Bìoball air-loidhne

« Roimhe

Air adhart »

Sṳ̂-phiên 106 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Song-ti Yung Chhṳ̀-oi Tui-thai Kì Phoi-ngia̍k ke Chṳ́-mìn

¹ Hâ-li-lu-yá! Oi kám-chhia Song-chú, yîn-vi Kì he chṳ-san; Kì ke chhṳ̀-oi yún-yén chhòng-chhùn!

² Song-chú só-cho ke thai-sṳ, má-ngìn kóng tet-chhin? Yû má-ngìn nèn kóng-mìn Kì yit-chhiet ke mî-san?

³ Hàng-sṳ kûng-phìn, yit-chhṳ̍t sṳ̂n-chông kûng-ngi ke, liá-chúng ke ngìn sṳ̍t-chhai yû fuk-hi!

⁴ Song-chú â, Ngì hó khoán-thai Ngì chṳ́-mìn ke sṳ̀, khiù Ngì ku-ngiam ngài; Ngì chṳ́n-kiu kì-têu ke sṳ̀, khiù Ngì pông-chhu ngài.

⁵ Khiù Ngì pûn ngài khon-tó Ngì sién-mìn ke hen-fuk, ya oi pûn ngài fûn-hióng Ngì chṳ́-mìn ke fôn-hí, pûn ngài thùng su̍k Ngì ke ngìn khiung-ha siung-chan Ngì.

⁶ Ngài-têu thùng chú-siên yit-yong fam-liáu chhui; ngài-têu lûng-chúng chok-ok, cho fái-sṳ.

⁷ Ngài-têu ke chú-siên chhai Âi-khi̍p ke sṳ̀, m̀ mìn-pha̍k Song-ti khì-meu ke chok-vì; kì-têu m̀ ki-tet Kì fûng-sṳn ke chhṳ̀-oi, fán-chón chhai Fùng-hói chhièn chhiu phoi-ngia̍k Chhiòn-nèn-chá.

⁸ Chúng-he, Song-ti hàn-he yîn-vi Kì ke miàng kiu kì-têu, vi-tó oi hién-mìn Kì chhṳ-kâ ke thai khièn-nèn.

⁹ Kì chit-phi Fùng-hói, hói-súi chhiu châu-thet; Kì tai kì-têu tui hói-tái hàng ko-hi, chhiong hàng châu-thi.

¹⁰ Kì kiu kì-têu thot-lì yen-hen kì-têu ke ngìn; Kì tui sù-thi̍t ke sú-chûng kiu kì-têu chhut-lòi.

¹¹ Súi chiông sù-thi̍t yim-sí; lièn yit-sà ya mò chhûn.

¹² Ke-sṳ̀, kì-têu chang siông-sin Kì ke yin-hí; yîn-vi án-ngiòng, kì-têu chhong-kô siung-chan Kì.

¹³ Kì-têu chhin-kiak chhiu m̀ ki-tet Kì ke chok-vì; kì-têu ngiàm-sṳ̀ chhiu m̀-hén tén-heu Kì ke chṳ́-yi.

¹⁴ Chhai khóng-yâ, kì-têu chhûng-mân thâm-sṳ̍t ke sîm, chhai sâ-mo̍k, kì-têu sṳ-tham Song-ti.

¹⁵ Kì cheu kì-têu só-khiù ke su-pûn kì-têu; chúng-he, Kì ya kong-hâ phiang-thung chhai kì-têu chûng-kiên.

¹⁶ Chhai yàng-fòng chûng kì-têu chhit-tu Mô-sî, lâu Song-chú fûn-phe̍t vì-sṳn ke Â-lùn.

¹⁷ Thi chhiu lie̍t-khôi, chiông Thai-thân thûn lo̍k-hi, chiông Â-pí-làn lâu kì chhiòn-kâ sâng-mài.

¹⁸ Yû fó kong chhai kì-têu thùng-phân ke sṳ̂n-song, chiông ke-têu chok-ok ke ngìn sêu-sí chhiang-chhiang.

¹⁹ Kì-têu chhai Hò-lie̍t-sân chu-chho ngiù-siong, khúi-pai ngìn ke sú só-cho ke ngiéu-siong.

²⁰ Kì-têu chiông Song-ti ke yùng-kông, von-cho sṳ̍t-chhó ke ngiù ke siong.

²¹ Kì-têu m̀ ki-tet kiu kì-têu ke Song-ti, chhiu-he chhai Âi-khi̍p hàng thai-sṳ ke Song-ti.

²² Kì sṳt chhai Hàm ke thi-fông hàng sṳ̀n-chiak, sṳt chhai Fùng-hói hàng tet-ngìn-kiâng ke sṳ.

²³ Song-ti kóng Kì oi sêu-me̍t Kì ke chṳ́-mìn ke-sṳ̀, Kì kién-sién ke phu̍k-ngìn Mô-sî khî chhai Kì mien-chhièn, thùng Kì chên-lun, khiù Kì sû-fì Kì ke thai fat-khién, chang kié-chhù Yî-set-lie̍t-ngìn su sêu-me̍t ke ngùi-kî.

²⁴ Heu-lòi, kì-têu méu-sṳ ke mî-hó ke thi; kì-têu tui Song-ti ke yin-hí mò sin-sîm.

²⁵ Kì-têu chhai chhṳ-kâ ke chong-phùng tú mài-yen, m̀-hén thâng-chhiùng Song-chú ke fa.

²⁶ Kì chhiu ngiàm-ngiàm kín-ko kì-têu: Oi pûn kì-têu vang chhai khóng-yâ,

²⁷ pûn kì-têu ke chṳ́-sûn san-to lie̍t-koet, pûn kì-têu liù-mòng to ngoi-koet hi.

²⁸ Heu-lòi, Song-ti ke chṳ́-mìn chhai Phî-ngí pai Pâ-li̍t, sṳ̍t ke-têu pai-ko sí-ngìn ke chi-vu̍t.

²⁹ Kì-têu ke hàng-vì ngiâ Song-chú thai fat-khién, chhiu yû vûn-yi̍t chhai kì-têu tông-chûng liù-hàng.

³⁰ Chúng-he Fî-nì-ha̍p hong-hí-lòi hìn-fa̍t chhui, án-ngiòng, vûn-yi̍t chang mò ki-siu̍k chhe hâ-hi.

³¹ Liá-khien sṳ chhiu son-cho kì ke ngi, tui ke-sṳ̀ chhṳ̍t-to sṳ-sṳ thoi-thoi.

³² Kì-têu ya chhai Mí-li-pâ chhièn-súi ke-vi, kit Song-chú fat-khién, hoi Mô-sî su lièn-lui.

³³ Yîn-vi kì-têu chhiuk-sông Mô-sî ke sîm, hoi-tó kì kóng mò yin-kôi kóng ke fa.

³⁴ Kì-têu vì-poi Song-chú ke min-lin, mò chiông ke-têu ngoi-chhu̍k-ngìn sêu-me̍t,

³⁵ fán-chón hi lâu kì-têu thûng-fûn, ho̍k kì-têu ke fûng-siu̍k si̍p-koan.

³⁶ Song-ti ke chṳ́-mìn hàn hi-pai ngiéu-siong, liá chhiu-he kì-têu me̍t-mòng ke ngièn-yîn.

³⁷ Kì-têu chiông chhîn-sên ke chṳ́-ńg hî-sên, cho chi-vu̍t hien-pûn Kâ-nàm ke kúi-sṳ̀n.

³⁸ Kì-têu chhṳ̀ vù-kû ke ngìn, liù chhṳ-kâ chṳ́-ńg ke hiet, chiông kì-têu hien-pûn Kâ-nàm ke ngiéu-siong, ke thi-fông pûn só-liù ke hiet tá-lá-sap.

³⁹ Kì-têu ke hàng-vì ya chiông chhṳ-kâ tá-lá-sap, chhai Song-ti mien-chhièn cho phoi-ngia̍k pien-chiet ke ngìn.

⁴⁰ Só-yî, Song-chú tui kì-têu fat-khién; Kì chhin-nâu Kì chhṳ-kâ ke chṳ́-mìn.

⁴¹ Kì sṳ́ kì-têu lo̍k chhai ngoi-chhu̍k-ngìn ke sú-chûng; Kì yù-chhai kì-têu ke thi̍t-ngìn hot-chṳ kì-têu.

⁴² Kì-têu pûn sù-thi̍t khî-ap, pûn sù-thi̍t khim-to tap-tap.

⁴³ Song-chú chṳ́n-kiu kì-têu chhin-tô pái, chúng-he kì-têu kie-mèu phoi-ngia̍k Kì, ham-lo̍k chhui-ok chûng, kín-lòi kín-chhṳ̂m.

⁴⁴ Chúng-he, Kì ku-ngiam kì-têu ke khú-nan; kì-têu yit khiù-ham, Kì chhiu thâng kì-têu.

⁴⁵ Vi-tó kì-têu, Song-chú sióng-hí Kì ke khie-yok; cheu Kì fûng-sṳn ke chhṳ̀-oi, Kì fì-sîm chón-yi.

⁴⁶ Kì sṳ́ chok kì-têu hi ke ngìn chhiòn-phu lìn-mén kì-têu.

⁴⁷ Song-chú — ngài-têu ke Song-ti â, chṳ́n-kiu ngài-têu! Khiù Ngì chiông ngài-têu tui lie̍t-koet chhi-si̍p hí-lòi, pûn ngài-têu yû-hó siung-chan Ngì ke sṳn-miàng, yung kám-chhia Ngì lòi cho ngài-têu ke yùng-kông!

⁴⁸ Ngien Song-chú — Yî-set-lie̍t ke Song-ti su chhṳ̂n-siung, tui yún-yén to yún-yén! Ngien van-mìn thùng-sâng lòi-kóng: “Â-mén!” Hâ-li-lu-yá!

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan