Sṳ̂-phiên 105 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Song-ti he Li̍t-sṳ́ ke Chú-chái
( Li̍t-thoi-chṳ Song 16:8-22 )

¹ Ngì-têu oi kám-chhia Song-chú, khiù-ham Kì ke miàng; oi hiong van-koet chhòn-yòng Kì ke chok-vì!

² Ngì-têu oi chhong-kô lòi siung-chan Kì! Oi kóng-sot Kì khì-meu ke chok-vì!

³ Ngì-têu oi yîn-vi Kì ke sṳn-miàng khoai-lo̍k! Ngien yit-chhiet chhìm-khiù Song-chú ke ngìn fôn-hí!

⁴ Oi khiù Song-chú pông-chhu; oi sṳ̀-sòng kin-pai Kì.

^5-6 Song-ti ke phu̍k-ngìn Â-pak-lâ-hón ke heu-thoi â, Ngâ-kok ke chṳ́-sûn, Kì só kién-sién ke chṳ́-mìn â, ngì-têu oi ki-tet Kì só-cho khì-meu ke chok-vì, Kì só-hàng ke sṳ̀n-chiak lâu só kóng-hí ke sṳ́m-phan.

⁷ Kì he Song-chú — ngài-têu ke Song-ti; Kì ke sṳ́m-phan chhòn-phien chhiòn sṳ-kie.

⁸ Kì voi yún-yén sú Kì ke yok; Kì só-kóng ke yin-hí chhṳ̍t-to chhiên-thoi.

⁹ Kì ki-tet thùng Â-pak-lâ-hón só-li̍p ke yok, hàn-yû Kì fat-sṳ su-pûn Yî-sat ke yin-hí.

¹⁰ Song-chú thùng Ngâ-kok kiên-thin liá-yok cho thiàu-li, chhiu-he Kì pûn Yî-set-lie̍t yún-kiú ke khie-yok.

¹¹ Kì kóng: “Ngài oi chiông Kâ-nàm-thi su-pûn ngì, chhiòn-phu oi cho ngì-têu ke sán-ngia̍p.”

¹² Ke-sṳ̀, Song-ti chṳ́-mìn ke ngìn-tên yû-han, su-muk chhin-séu, chhai Kâ-nàm-thi chhiam-sṳ̀ he̍t.

¹³ Kì-têu tui liá-chhu̍k phêu-liù to ke-chhu̍k, tui liá-koet liù-long to ke-koet.

¹⁴ Chúng-he Song-ti put-chún ngoi-ngìn khî-fu kì-têu; vi-tó kì-têu, Kì kín-ko ngoi-chhu̍k ke-têu vòng.

¹⁵ Kì kóng: “Cho-m̀-tet vì-nàn Ngài só kién-sién ke; ngì-têu cho-m̀-tet sông-hoi Ngài ke siên-tî!”

¹⁶ Song-chú sṳ́ ke thi-fông tù-tó kî-fông; Kì chhiet-thôn kì-têu liòng-sṳ̍t ke lòi-ngièn.

¹⁷ Chúng-he Kì chhâi Yok-sit vi kì-têu siên-hàng; Yok-sit pûn-ngìn mai-cho nù-chhòi.

¹⁸ Kì ke sûng-kiok pûn kiok-liàu só-tén, kì ke kiáng-kîn tai-tén thiet-kâ-só.

¹⁹ Song-chú ke fa kín sṳ-lien kì, chhṳ̍t-to kì só yi-ngièn ke sṳ sṳ̍t-hien.

²⁰ Âi-khi̍p ke vòng chhiu phai-ngìn hi chiông kì sṳt-fong; thúng-chhṳ ngìn-mìn ke chhiu fî-fu̍k kì ke chhṳ-yù,

²¹ phai kì cho vòng-kiûng ke chóng-kón, ham kì chhṳ-lî kì só-yû ke yit-chhiet,

²² pûn kì chhṳ-yù kón-lî vùn-vú pak-kôn, yû-khièn chiông chṳ-fi kâu ke-têu ngièn-ló.

²³ Heu-lòi Yî-set-lie̍t hi-to Âi-khi̍p, Ngâ-kok chhiam-he̍t chhai Hàm ke thi-fông.

²⁴ Song-chú sṳ́ Kì ke chṳ́-mìn chen-kâ, pûn kì-têu pí thi̍t-ngìn kha khiòng-sṳn.

²⁵ Kì sṳ́ Âi-khi̍p-ngìn yen-hen Kì ke chṳ́-mìn; kì-têu yung kúi-kie tui-fu Kì ke phu̍k-ngìn.

²⁶ Kì chhiu chhâi Kì ke phu̍k-ngìn Mô-sî, yu phai Kì só kién-sién ke Â-lùn.

²⁷ Kì-têu hién-chhut Song-ti ke sṳ̀n-chiak, chhai Hàm ke thi-fông hàng thai khì-sṳ.

²⁸ Song-ti sṳ́ ke-vi chhûng-mân vû-am, chúng-he Âi-khi̍p-ngìn m̀-thâng Kì ke min-lin.

²⁹ Kì chiông kì-têu ke hò-súi pien-cho hiet, sṳ́ kì-têu ke ǹg chhiòn-phu sí chhiang-chhiang.

³⁰ Kì-têu koet-nui tak-vi he hà-mà, lièn vòng-kiûng tî-poi ya he khiung-yong.

³¹ Song-ti ha-lin, vû-yìn kûi-khiùn pî-lòi, set-mà ya he khiung-yong, phien-mân chhiòn-thi.

³² Kì kong pên-pho̍k chhiong lo̍k-yí, sṳ́ ngiap-lang to-chhu kín-ngiap.

³³ Kì tá-fái phù-thò-su lâu vù-fâ-kó-su, tá-thôn kì-têu koet-nui só-yû ke su-muk.

³⁴ Kì yit chhut-sâng, chhó-máng chhiu pî-lòi, chhiên-chhiên van-van, mò phan-fap hó son.

³⁵ Kì-têu chiông koet-nui ke chhiâng-chhoi khie chhiang-chhiang, chiông thièn-yèn só-yû ke ńg-kuk sṳ̍t kông-kông.

³⁶ Kì chhṳ̀-sí koet-nui só-yû ke chóng-chṳ́, chhiu-he ke-têu ngìn thèu-thôi ke lai-é.

³⁷ Yèn-heu, Kì chhiu tai-liâng Yî-set-lie̍t-ngìn chhut-lòi; kì-têu tai-tén kîm-ngiùn, kok kî-chhu̍k sà-sà yúng-khien.

³⁸ Kì-têu lì-khôi ke sṳ̀, Âi-khi̍p-ngìn fî-sòng fôn-hí, yîn-vi kì-têu kiâng Yî-set-lie̍t-ngìn kiâng-to voi sí.

³⁹ Song-ti yung yùn châ-tén Kì ke chṳ́-mìn, am-pû-sṳ̀ yung fó lòi cheu-kông kì-têu.

⁴⁰ Kì-têu yêu-khiù, Kì chhiu sṳ́ êm-thùn pî-lòi; yu tui thiên-táng kong liòng-sṳ̍t mân-chiuk kì-têu.

⁴¹ Kì tá-khôi phàn-sa̍k, pûn chhièn-súi yúng chhut-lòi, súi chhiong hò-pa liù chhai châu-châu ke khóng-yâ.

⁴² Yîn-vi Kì ki-tet Kì sṳ̀n-sṳn ke yin-hí, chhiu-he tui Kì phu̍k-ngìn Â-pak-lâ-hón só-kóng ke.

⁴³ Kì tai Kì ke chṳ́-mìn fôn-fôn hí-hí chhut-lòi; Kì só kién-sién ke chṳ́-mìn fôn-fû yu chhong-kô.

⁴⁴ Kì chiông lie̍t-koet ke thú-thi su-pûn kì-têu, pûn kì-têu sṳ̀n-su ngoi-chhu̍k-ngìn ke thièn-yèn,

⁴⁵ hó-pûn Kì ke chṳ́-mìn sú Kì ke kûi-chet, pin chûn-hàng Kì yit-chhiet ke kau-sṳ. Oi chan-mî Song-chú!

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan