Bìoball air-loidhne

Sṳ̂-phiên 104 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Siung-chan Chhóng-chho ke Chú

¹ Ngài ke sîm â, oi siung-chan Song-chú! Song-chú — ngài ke Song-ti â, Ngì chṳ̂n ví-thai! Ngì chok-tén yùng-kông lâu vî-ngiàm;

² Ngì yung kông cho chhòng-phàu phî-tén. Ngì ôn-sat kiûng-chhông, chhiong tap chong-phùng yit-yong;

³ Ngì chhai kô-thiên ke súi mien-táng hí chhu-só. Ngì yung yùn cho chan-chhâ, chia fûng ke yi̍t-kap lòi-pî.

⁴ Ngì yung fûng cho sṳ́-chá, yung ngiap-lang cho phu̍k-ngìn.

⁵ Ngì chiông thai-thi ôn chhai kiên-ku ke kîn-kî táng-kô, pûn kì yún-yén m̀-voi yèu-thung.

⁶ Ngì yung thai-hói chhiong ngoi-phàu pâu-tén thi-mien; thai-súi chhiu chiông khiùn-sân yim-tén.

⁷ Ngì thai-sâng yit-tot, súi chhiu kón-kín thui-chéu; Ngì thai-sâng yit-hot, súi chhiu sia-chéu.

⁸ Thai-súi ye̍t-ko sân-liâng, liù-ngi̍p sân-lak, to Ngì vi kì-têu sat-thin ke só-chhai.

⁹ Ngì va̍k-thin kie-han, m̀-chún súi yê ko-lòi, ham kì-têu m̀-hó chai chiông thai-thi yim-tén.

¹⁰ Ngì sṳ́ chhièn-súi chhai sân-lak yúng-chhut, chhai khiùn-sân chûng-kiên liù-tén hâ.

¹¹ Chéu-chhu yû súi hó-lîm, yâ-lì yû hó chṳ́-hot.

¹² Fî-niâu chhai súi-piên cho-teu, chhai su-kî ke chûng-kiên chhong-kô.

¹³ Ngì tui thiên-táng lo̍k-yí chhai sân-liâng-táng; yîn-vi Ngì kûng-chok ke kiet-kó, thai-thi chhiu fûng-chiuk.

¹⁴ Ngì sṳ́ chhiâng-chhó sâng chhut-lòi, pûn thèu-sâng sṳ̍t; Ngì sṳ́ chhiâng-chhoi chóng-thai, pûn ngìn cho sṳ̍t-vu̍t; Ngì pûn ngìn chhai thú-thi song kâng-chung ńg-kuk:

¹⁵ kiuk-chiú lòi pûn ngìn-sîm fôn-hí, chṳ-chho yù lòi chṳ̂-yun mien-mau, cho liòng-sṳ̍t lòi kâ-thiâm thí-li̍t.

¹⁶ Song-chú chung chhai Lì-pâ-nun ke hiông-pak-su, chhiòn-phu tet-tó fûng-fu ke yí-súi chṳ̂-yun.

¹⁷ Tiâu-é chhai ke-têu su-táng cho-teu; chhiùng-su-táng ya yû pha̍k-ho̍k ke teu.

¹⁸ Yâ-sân-yòng he̍t chhai kô-sân-táng; sa̍k-fôn khong chhai sa̍k-lùng tî-poi.

¹⁹ Ngì chho ngie̍t-kông lòi-thin chiet-lin; ngit-thèu tî kí-sṳ̀ oi lo̍k-sân.

²⁰ Ngì sṳ́ vû-am lìm-to, sàng-cho am-pû-thèu, su-nà chûng só-yû ke yâ-chhu chhiu chhut-lòi.

²¹ Sṳ̂-é ho-ho-kún, chhut-lòi tá-lia̍p, oi chhìm Song-ti só-su ke sṳ̍t-vu̍t.

²² Ngit-thèu yit chhut, kì-têu chhiu sám-chéu, to-chón sân-lùng tî-poi hi soi-muk.

²³ Yèn-heu, ngìn chhut-hi cho-se, lò-lò luk-luk to thôn-vû.

²⁴ Song-chú â, Ngì ke chhóng-chho sṳ̍t-chhai chṳ̂n-tô! Kì-têu chhiòn-phu he Ngì yung chṳ-fi chho ke; thai-thi chhûng-mân Ngì só chhóng-chho ke van-vu̍t.

²⁵ Ke-phién yû hói, yu-thai yu-fat, khì-chûng yû vù-su ke sâng-vu̍t, thai-ke se-ke chhiòn-phu tû yû;

²⁶ hói-mien yû chhin-tô sòn lòi-lòi hi-hi, Ngì chho ke thai hói-koai chhai hói-tú káu-súi.

²⁷ Kì-têu chhiòn-phu he yí-kho Ngì, kho Ngì cheu-sṳ̀ kiûng-kip sṳ̍t-vu̍t.

²⁸ Ngì su má-ke pûn kì-têu, kì-têu chhiu liâng-su; Ngì ke sú yit tá-khôi, kì-têu chhiu tet-tó páu-chiuk.

²⁹ Ngì na-he êm-mien m̀-tap kì-têu, kì-têu chhiu chho̍k-kiâng; Ngì sû-chón kì-têu ke hi, kì-têu chhiu sí-thet, kûi-thú.

³⁰ Ngì tui kì-têu phùn-hi, kì-têu chhiu su-chho; Ngì sṳ́ thai-thi sṳ̀-sòng von-sîn.

³¹ Ngien Song-chú ke yùng-kông yún-yén chhòng-chhùn! Ngien Song-chú fôn-hí chhṳ-kâ só-chho ke!

³² Kì khon thai-thi, thi chhiu chṳ́n-thung; Kì miâ khiùn-sân, sân chhiu chhut-yên.

³³ Ngài yit-sên-ngìn oi chhong-kô lòi chan-mî Song-chú! Ngài yû-sên chṳ̂-ngit oi kô-siung ngài ke Song-ti!

³⁴ Ngien Kì yîn-vi ngài ke sṳ̂-kô fôn-hí, yîn-vi ngài ke khoai-lo̍k he tui Kì lòi.

³⁵ Ngien chhui-ngìn tui sṳ-kiên sêu-me̍t; ngien fái-ngìn m̀-voi chai chhut-hien. Ngài ke sîm â, oi siung-chan Song-chú! Hâ-li-lu-yá!

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan