Bìoball air-loidhne

Sṳ̂n-min Ki 7 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Song-chú ke Chṳ́-mìn
( Chhut Âi-khi̍p Ki 34:11-16 )

¹ “Song-chú — ngì-têu ke Song-ti oi thu ngì-têu chin-ngi̍p ngì-têu oi hi cham-liâng ke thú-thi; Kì oi kiuk-chhut chhin-tô mìn-chhu̍k. Ngì-têu chhièn-chin ke sṳ̀, Kì oi kiuk-chéu chhit-ke pí ngì-têu khiòng-thai ke mìn-chhu̍k: chhiu-he Het-ngìn, Kiet-kâ-sat-ngìn, Â-mô-li-ngìn, Kâ-nàm-ngìn, Pí-li-sé-ngìn, Hî-vi-ngìn, Yâ-pu-sṳ̂-ngìn.

² Song-chú — ngì-têu ke Song-ti oi chiông liá-têu mìn-chhu̍k kâu-pûn ngì-têu. Ngì-têu oi tá-yàng kì-têu, chha̍t-tái sêu-me̍t kì-têu, cho-m̀-tet lìn-mén kì-têu, ya-he lâu kì-têu li̍p-yok.

³ Ngì-têu cho-m̀-tet lâu kì-têu thûng-fûn; ngì-têu ke moi-é cho-m̀-tet ka-pûn kì-têu ke lai-é, lai-é cho-m̀-tet thó kì-têu ke moi-é;

⁴ yîn-vi kì-têu voi yín-yu ngì-têu lì-khôi Song-chú, hi-pai phe̍t ke sṳ̀n-mìn. Na-he ngì-têu lì-khôi Song-chú, Kì voi hiong ngì-têu fat-khién, ngiàm-sṳ̀ sêu-me̍t ngì-têu.

⁵ Só-yî, ngì-têu oi chhak-thet kì-têu ke chi-thàn, tá-sui kì-têu ke sṳ̀n-chhû, chám-vang Â-sa-lâ ńg-sṳ̀n siong, sêu-thet kì-têu ke ngiéu-siong.

⁶ Ngì-têu he su̍k Song-chú — ngì-têu ke Song-ti ke; ngì-têu he sṳn-kiet ke chṳ́-mìn. Song-chú — ngì-têu ke Song-ti tui thiên-ha van-mìn chûng kién-sién ngì-têu cho Kì chhṳ-kâ pó-pi ke chṳ́-mìn.

⁷ “Song-chú siak ngì-têu, kién-sién ngì-têu, pin m̀-he yîn-vi ngì-têu ke ngìn-su pí phe̍t-ngìn kha-tô; khì-sṳ̍t, ngì-têu he sṳ-kie-song chui-se ke mìn-chhu̍k.

⁸ Song-chú siak ngì-têu, he vi-tó oi sú Kì hiong ngì-têu chú-siên só yin-hí ke. Án-ngiòng, Song-chú chhiu yung thai nèn-li̍t kiu ngì-têu, tui cho nù-chhòi ke só-chhai chiông ngì-têu kiu chhut-lòi, sṳ́ ngì-têu thot-lì Âi-khi̍p-vòng ke sú.

⁹ Só-yî, ngì-têu oi-tî: Song-chú — ngì-têu ke Song-ti he vì-yit ke Song-ti. Só-yû kin-oi Kì, chûn-hàng Kì kie-min ke ngìn, Kì he sin-sṳ̍t ke, thin-chho̍k voi sú-yok, yung put-pien ke chhṳ̀-oi tui-thai kì-têu, chhṳ̍t-to chhiên-thoi.

¹⁰ Chúng-he nâu Kì ke ngìn, Kì voi tông-mien chit-fa̍t kì-têu, chhin-kiak sêu-me̍t kì-têu.

¹¹ Só-yî, ngì-têu yit-thin oi khok-sṳ̍t chûn-hàng ngài kîm-pû-ngit hiong ngì-têu pân-pu ke só-yû kie-min, fap-li̍t lâu li-kûi.”

Chûn-hàng Kie-min Voi Mùng-fuk
( Sṳ̂n-min Ki 28:1-14 )

¹² “Ngì-têu na-he thâng-chhiùng liá-têu kie-min, khok-sṳ̍t chûn-hàng, Song-chú — ngì-têu ke Song-ti voi cheu Kì hiong ngì-têu chú-siên só yin-hí ke, sú Kì lâu ngì-têu só-li̍p ke yok, yung put-pien ke chhṳ̀-oi khoán-thai ngì-têu.

¹³ Kì thin-chho̍k voi siak ngì-têu, su-fuk pûn ngì-têu, sṳ́ ngì-têu hîn-vong, chhai Kì yin-hí ngì-têu chú-siên oi su-pûn ngì-têu ke thú-thi song su-fuk pûn ngì-têu, sṳ́ ngì-têu tô-chṳ́ tô-sûn, sên-sán fûng-fu — yû ńg-kuk, chiú, kám-lám-yù lâu tông thai-khiùn ke ngiù-yòng.

¹⁴ Ngì-têu liâng-su ke fuk-hi voi yàng-ko sṳ-song van-chhu̍k só liâng-su ke. Mò-lun ngì-têu ya-he ngì-têu ke ngiù-yòng chhiòn-phu mò m̀-voi kiung ke.

¹⁵ Song-chú voi sṳ́ ngì-têu mò-châi mò-phiang, m̀-voi chai pûn ngì-têu chhe-tó chhai Âi-khi̍p pot-ko ke-têu tet-ngìn-kiâng ke phiang-thung; Kì voi chiông ke-têu tet-ngìn-kiâng ke phiang-thung kâ chhai ngì-têu thi̍t-ngìn ke sṳ̂n-song.

¹⁶ Song-chú — ngì-têu ke Song-ti kâu chhai ngì-têu sú-chûng ke kok mìn-chhu̍k, ngì-têu yit-thin oi sêu-me̍t, m̀-hó lìn-mén kì-têu. Ngì-têu cho-m̀-tet pai kì-têu ke sṳ̀n-mìn, yîn-vi ke voi sàng-cho hoi-sí ngì-têu ke lò-mióng.

¹⁷ “Ngì-têu m̀-hó láu-tó liá-têu mìn-chhu̍k pí ngì-têu kha-tô, chhiu mò fap-thu kiuk-chéu kì-têu.

¹⁸ M̀-sṳ́ kiâng kì-têu! Ngì-têu thin-chho̍k oi ki-tet Song-chú — ngì-têu ke Song-ti ngióng-pân tui-fu Âi-khi̍p-vòng lâu kì só-yû ke ngìn-mìn.

¹⁹ Ngì-têu chhîn-muk khon-ko ke-têu tet-ngìn-kiâng ke châi-nan, sṳ̀n-chiak, khì-sṳ. Oi ki-tet, Song-chú — ngì-têu ke Song-ti yung thai-nèn thai-li̍t kiu ngì-têu chhut-lòi. Song-chú — ngì-têu ke Song-ti ngióng-pân sêu-me̍t Âi-khi̍p-ngìn, ya oi cheu-yong sêu-me̍t ngì-têu só-kiâng ke ke-têu mìn-chhu̍k.

²⁰ Song-chú — ngì-têu ke Song-ti oi sṳ́ kì-têu chho̍k-kiâng fun-lon; chhiu-son yû-têu thò-chéu, khong hí-lòi, ya-voi chhiòn-phu pûn Kì sêu-me̍t.

²¹ Só-yî, ngì-têu m̀-sṳ́ kiâng liá-têu ngìn, yîn-vi Song-chú — ngì-têu ke Song-ti lâu ngì-têu thùng-chhai. Kì he chṳ-thai, yin-kôi su kin-vi ke Song-ti.

²² Ngì-têu chhièn-chin ke sṳ̀, Song-chú — ngì-têu ke Song-ti voi chhiam-chhiam chiông liá-têu mìn-chhu̍k kiuk-chéu. Ngì-têu cho-m̀-tet yit-ha-é chhiu chiông kì-têu chhiòn-phu sêu-me̍t, kiâng-pha án-ngiòng cho, voi sṳ́ yâ-chhu chen-tô, fán-chón sông-hoi tó ngì-têu.

²³ Song-chú — ngì-têu ke Song-ti voi chiông thi̍t-ngìn kâu chhai ngì-têu ke sú-chûng, sṳ́ kì-têu thai chho̍k-kiâng, chhṳ̍t-to kì-têu chhiòn-phu sêu-me̍t.

²⁴ Kì ya voi chiông kì-têu ke kiûn-vòng kâu chhai ngì-têu sú-chûng; ngì-têu oi chhṳ̀-thet kì-têu, sṳ́ ngìn m̀-voi chai sióng-hí kì-têu ke miàng. Ngì-têu chhṳ̀ kì-têu ke sṳ̀, mò-ngìn nèn tí-khong.

²⁵ Ngì-têu oi sêu-thet kì-têu ke ngiéu-siong; cho-m̀-tet thâm ngiéu-siong sṳ̂n-song ke kîm-ngiùn, ya cho-m̀-tet thêu-thêu-é liù hí-lòi, kiâng-pha án-ngiòng cho voi ham-hoi ngì-têu tiet-lo̍k lò-mióng, yîn-vi Song-chú — ngì-têu ke Song-ti chhin-nâu ngiéu-siong.

²⁶ Lièn yit-ke ngiéu-siong tû cho-m̀-tet tai-chón vuk-hâ, miên-tet ngì-têu su-tó liá-têu ngiéu-siong só-su ke chu-chú. Ngì-têu yit-thin oi chhin-nâu, chhin-hen liá-têu ngiéu-siong; yîn-vi kì-têu he Song-chú só chu-chú ke.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan