Bìoball air-loidhne

Sṳ̂n-min Ki 4 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Mô-sî Khien Yî-set-lie̍t-ngìn Oi Fu̍k-chhiùng

¹ Mô-sî khien-miên ngìn-mìn kóng: “Yî-set-lie̍t-ngìn nâ, liá-ha ngì-têu oi thâng-chhiùng ngài kâu ngì-têu ke fap-li̍t lâu li-kûi; án-ngiòng, ngì-têu chang nèn sên-chhùn, yu cho-tet ngi̍p-hi cham-liâng Song-chú — ngì-têu chú-siên ke Song-ti só su-pûn ngì-têu ke thú-thi.

² Ngài só min-lin ngì-têu ke fa, ngì-têu m̀-hó kâ-thiâm, ya cho-m̀-tet kám-séu. Ngì-têu yit-thin oi chûn-hàng ngài só fûn-fu Song-chú — ngì-têu Song-ti ke kie-min.

³ Ngì-têu chhîn-muk khon-ko Song-chú chhai Phî-ngí-sân só-cho ke sṳ. Song-chú — ngì-têu ke Song-ti chhai ke-vi sêu-me̍t só-yû pai Pâ-li̍t ke ngìn,

⁴ chṳ́-yû ngì liá-têu tui Song-chú — ngì-têu ke Song-ti chûng-sîm ke ngìn to kîm-pû-ngit hàn chhôi.

⁵ “Ngài chûn-cheu Song-chú — ngài Song-ti ke min-lin, chiông só-yû ke fap-li̍t lâu li-kûi kâu ngì-têu; pûn ngì-têu chhai oi hi cham-liâng ke thú-thi song chûn-sú.

⁶ Ngì-têu yit-thin oi khok-sṳ̍t chûn-hàng; án-ngiòng chang yû-hó hiong van-mìn hién-mìn ngì-têu ke chhûng-mìn chṳ-fi. Kì-têu yit thâng-tó liá-têu fap-li̍t, chhiu voi kóng: ‘Liá ví-thai koet-kâ ke ngìn-mìn sṳ̍t-chhai chṳ̂n chhûng-mìn, chṳ̂n yû chṳ-fi!’

⁷ “Mò-lun kí khiòng-thai ke koet-kâ, kì ke sṳ̀n-mìn mò yit-ke chhîn-khiun kì ke koet-mìn chhiong Song-chú — ngài-têu ke Song-ti án-ngiòng lâu ngài-têu chhîn-khiun; ngài-têu khiù-ham Kì, Kì chhiu tap-yin.

⁸ Mò-lun kí khiòng-thai ke koet-kâ, kì ke fap-li̍t lâu li-kûi mò yit-chúng chhiong kîm-pû-ngit ngài kâu-pûn ngì-têu ke fap-li̍t án kûng-chṳn.

⁹ Ngì-têu oi se-ngi! Oi ki chhai ngì-têu ke sîm-chûng! Yit-sên-ngìn m̀-hó m̀ ki-tet chhîn-muk khon-ko ke liá-têu sṳ. Ngì-têu oi kâu ngì-têu ke chṳ́-ńg lâu chṳ́-sûn kóng,

¹⁰ thèu-pái ngì-têu sṳt chhai Hò-lie̍t-sân sân-kiok, khî chhai Song-chú — ngì-têu Song-ti ke mien-chhièn. Ke-sṳ̀, Song-chú lâu ngài kóng: ‘Ngì oi chiông ngìn-mìn chhi-si̍p khiung-ha. Ngài oi kì-têu thâng-tó Ngài kóng ke fa, sṳ́ kì-têu ho̍k-si̍p yit-sên-ngìn kin-vi Ngài, ya kâu kì-têu ke chṳ́-ńg kin-vi Ngài.’

¹¹ “Án-ngiòng, ngì-têu chhiòn-phu lòi khî chhai sân-hâ. Sân-táng vû-yùn phûn-phûn, fó-yam chhung-thiên, yu yû nùng-yên chhung-tén sông.

¹² Song-chú tui fó-yam chûng tui ngì-têu kóng-fa, ngì-têu tân-chhiang thâng-tó Kì kóng-fa ke sâng, chúng-he khon m̀-tó Kì ke hìn-siong.

¹³ Kì tui ngì-têu siên-pu Kì lâu ngì-têu li̍p ke yok, oi ngì-têu chûn-hàng sṳ̍p-thiàu kie-min. Kì chiông liá sṳ̍p-thiàu kie-min siá chhai lióng-te sa̍k-pán mien-táng.

¹⁴ Ke-sṳ̀ Song-chú min-lin ngài chiông fap-li̍t lâu li-kûi chhiòn-phu kâu ngì-têu; oi ngì-têu ko-hò pin cham-liâng ke-te thú-thi heu, khok-sṳ̍t chûn-hàng.”

Kín-ko Ngìn-mìn Cho-m̀-tet Pai Ngiéu-siong

¹⁵ “Song-chú chhai Hò-lie̍t-sân táng, tui fó-yam chûng lâu ngì-têu kóng-fa ke sṳ̀, ngì-têu mò khon-tó má-ke hìn-siong. Só-yî, ngì-têu oi thi̍t-phe̍t chu-yi,

¹⁶ cho-m̀-tet vi chhṳ-kâ chho nai-chúng hìn-siong ke ngiéu-siong lòi phai-fái chhṳ-kâ, mò-lun he nàm ke ya-he ńg ke ngiéu-siong,

¹⁷ he chhiong thi-song ke yâ-chhu ya-he thiên-táng ke fî-niâu,

¹⁸ he chhiong thi-song ke phà-chhùng ya-he súi-chûng ke ǹg-lui, chhiòn-phu cho-m̀-tet.

¹⁹ Ngì-têu ya cho-m̀-tet ham-ngi̍p yú-fe̍t, hi-pai ngì-têu só khon-tó ke ngit-ngie̍t sên-sṳ̀n liá-têu thiên-táng ke sên-khiù. Liá-têu he Song-chú — ngì-têu ke Song-ti pài-hó chhai van-mìn mien-chhièn ke.

²⁰ Chúng-he ngì-têu he Song-chú tui Âi-khi̍p, tui yùng-thiet ke fó-lù tú chhióng-kiu chhut-lòi ke. Kì thu ngì-têu chhut-lòi, oi ngì-têu cho Kì chhṳ-kâ ke chṳ́-mìn, chhiu-chhiong kîm-pû-ngit án-ngiòng.

²¹ Yîn-vi ngì-têu ke yèn-ku, Song-chú — ngì-têu ke Song-ti hiong ngài fat-khién, fat-sṳ put-chún ngài ko Yok-tan-hò, chin-ngi̍p Kì oi su-pûn ngì-têu ke chhin-phì ke thú-thi.

²² Ngài voi sí chhai liá-vi, cho-m̀-tet ko Yok-tan-hò; chúng-he ngì-têu oi ko-hò, cham-liâng ke chhin-phì ke thú-thi.

²³ Ngì-têu oi se-ngi, cho-m̀-tet m̀ ki-tet Song-chú — ngì-têu ke Song-ti lâu ngì-têu li̍p ke yok. Cho-m̀-tet vi chhṳ-kâ chho Song-chú só kim-chṳ́ ke ngiéu-siong.

²⁴ Yîn-vi Song-chú — ngì-têu ke Song-ti chhiu-chhiong yit-thòn lie̍t-fó, he chôn-chhìn ke Song-ti.

²⁵ “Chhiu-son ngì-têu chhai ke-thi he̍t tông-kiú, yû chṳ́-sûn, ya cho-m̀-tet chho nai-chúng hìn-siong ke ngiéu-siong, lòi phai-fái chhṳ-kâ. Liá chhai Song-chú — ngì-têu Song-ti ke ngién-chûng he sià-ok ke, voi ngiâ Kì fat-khién.

²⁶ Kîm-pû-ngit, ngài ham-thiên ham-thi lòi-cho kien-chṳn, na-he ngì-têu m̀ thâng-chhiùng ngài, tông-kiak chhiu voi tui ke thú-thi song sêu-me̍t. Ngì-têu ko Yok-tan-hò, cham-tó ke thú-thi yî-heu, chhiu m̀-sṳ́ sióng-oi chhòng-chhòng kiú-kiú he̍t chhai ke-vi.

²⁷ Song-chú voi chiông ngì-têu tá-san kiuk-to kok-koet, chhai ke-vi chhùn hâ-lòi ke chṳ́-yû séu-su ngìn.

²⁸ Chhai ke-vi, ngì-têu voi pai ngìn yung su-é lâu sa̍k-thèu tiâu-khiet ke sṳ̀n-mìn, he m̀-voi khon, m̀-voi thâng, m̀-voi sṳ̍t, m̀-voi phi ke ngiéu-siong.

²⁹ Chúng-he, ngì-têu chhai ke-vi oi chhìm-khiù Song-chú — ngì-têu ke Song-ti; na-he ngì-têu chôn-sîm yit-yi chhìm-khiù Kì, chhiu voi chhìm-tó Kì.

³⁰ Ngì-têu tù-tó châi-nan, su-chhin thung-khú ke sṳ̀, to-mî oi kûi-hiong Song-chú — ngì-têu ke Song-ti, thâng-chhiùng Kì.

³¹ Song-chú — ngì-têu ke Song-ti he lìn-mén ke Song-ti, Kì chhie̍t-tui m̀-voi fit-thet ngì-têu, m̀-voi sêu-me̍t ngì-têu; Kì m̀-voi m̀ ki-tet lâu ngì-têu ke chú-siên só-li̍p ke yok.

³² “Ngì-têu oi ngiên-kiu li̍t-sṳ́, tui ngì-têu chhut-se yî-chhièn, yit-chhṳ̍t chhà-tó Song-ti chhai thi-song chhóng-chho ngìn-lui ke sṳ̀. Ngì-têu oi chhà-phien chhiòn sṳ-kie, yû má-ngìn khon-ko ya-he thâng-ko liá án ví-thai ke sṳ?

³³ Yû nai-ke mìn-chhu̍k thâng-tó Song-ti tui fó-yam chûng lâu kì-têu kóng-fa, chhiong ngì-têu thâng-tó, hàn-yû miang nè?

³⁴ Song-chú — ngì-têu ke Song-ti chhai Âi-khi̍p vi ngì-têu só-cho ke sṳ, yû nai-ke sṳ̀n-mìn sṳt án-ngiòng cho, kám chiông yit-ke mìn-chhu̍k tui nang-ngoi yit-ke koet-kâ chhióng-kiu chhut-lòi, sàng-cho chhṳ-kâ ke chṳ́-mìn? Ngì-têu chhîn-muk khon-tó Kì yung thai-nèn thai-li̍t, kong-hâ vûn-é lâu chan-chên, hàng sṳ̀n-chiak khì-sṳ, pûn liá-têu tet-ngìn-kiâng ke sṳ fat-sên.

³⁵ “Song-chú tui ngì-têu hién-sṳ liá-têu, he-oi chṳn-mìn chṳ́-yû Kì he Song-ti; chhù-liáu Kì yî-ngoi, mò phe̍t ke Song-ti.

³⁶ Kì sṳ́ ngì-têu thâng-tó Kì tui thiên-táng fat-chhut ke sâng-yîm, yung án-ngiòng lòi kau-hiun ngì-têu, yu sṳ́ ngì-têu chhai thi-song khon-tó Kì sṳ̀n-sṳn ke fó, pin thâng-tó Kì tui fó-yam chûng lâu ngì-têu kóng-fa.

³⁷ Kì yîn-vi thung-siak ngì-têu ke chú-siên, chhiu kién-sién ngì-têu, yung chhṳ-kâ ke thai-nèn thai-li̍t, chhîn-chhṳ thu ngì-têu chhut Âi-khi̍p.

³⁸ Ngì-têu chhièn-chin ke sṳ̀, Kì chhiu chiông ke-têu pí ngì-têu kha khiòng-thai ke mìn-chhu̍k kiuk chhut-hi, vi-tó oi thu ngì-têu ngi̍p-hi, chiông kì-têu ke thú-thi su-pûn ngì-têu cho sán-ngia̍p. Kîm-pû-ngit ngì-têu chang voi tet-tó liá-te thú-thi.

³⁹ Só-yî, ngì-têu oi-tî, ya oi ki chhai sîm-tú, thiên-thi kiên chṳ́-yû Song-chú he Song-ti; chhù-liáu Kì yî-ngoi, mò phe̍t ke Song-ti.

⁴⁰ Kîm-pû-ngit, ngài chiông Kì ke fap-li̍t lâu kie-min pân-pu pûn ngì-têu; ngì-têu oi chûn-hàng. Án-ngiòng, ngì-têu lâu ngì-têu ke chṳ́-sûn yit-thin voi sṳ-sṳ sun-li. Ngì-têu voi ki-siu̍k he̍t chhai Song-chú — ngì-têu ke Song-ti su-pûn ngì-têu cho yún-kiú sán-ngia̍p ke liá-te thú-thi.”

Yok-tan-hò Tûng-phién ke Thò-sám-sàng

⁴¹ Heu-lòi, Mô-sî chhai Yok-tan-hò tûng-phién chṳ́-thin sâm-chho sàng cho thò-sám-sàng.

⁴² Liá-chúng sàng he vi-tó ke-têu yîn-vi ko-sṳt, m̀-he ku-yi chhṳ̀-sí ngìn ke lòi sat-li̍p ke. Liá-chúng ngìn cho-tet ngi̍p-to thò-sám-sàng, miên-tet pûn-ngìn chhú-sí.

⁴³ Mô-sî chhai Lî-phien kî-chhu̍k ke thi-khî chṳ́-thin khóng-yâ kô-ngièn song ke Pí-sit-sàng, chhai Kâ-tet kî-chhu̍k ke thi-khî chṳ́-thin Kî-lie̍t ke Lâ-ma̍t-sàng, chhai Mâ-nâ-sî kî-chhu̍k ke thi-khî chṳ́-thin Pâ-sân ke Kô-làn-sàng, cho thò-sám-sàng.

Pân-pu Song-ti ke Fap-li̍t

⁴⁴ Mô-sî chiông yî-ha ke fap-li̍t kâu-pûn Yî-set-lie̍t-ngìn.

^45-46 Kì-têu tui Âi-khi̍p chhut-lòi, lòi-to Yok-tan-hò tûng-phién Pak-Phî-ngí-sàng tui-mien ke sân-lak heu, Mô-sî hiong kì-têu pân-pu liá-têu fap-li̍t lâu li-kûi. Liá-thi he yî-chhièn kîn-sàng chhai Hî-sṳ̍t-pún ke Â-mô-li-vòng Sî-fèn ke thú-thi. Mô-sî lâu Yî-set-lie̍t-ngìn chhut Âi-khi̍p yî-heu, tá-yàng kì,

⁴⁷ cham-liâng kì lâu Pâ-sân-vòng Ngo̍k ke thú-thi. Liá lióng-ke Â-mô-li-vòng ke thú-thi chhiòn-phu chhai Yok-tan-hò tûng-phién,

⁴⁸ nàm-phién tui Â-nun sân-lak sùn-thèu ke Â-lò-ngí to pet-phién ke Sî-lièn-sân, chhiu-he Het-mùn-sân.

⁴⁹ Liá-te thú-thi ya pâu-hàm Yok-tan-hò tûng-phién ke kûi-chak thi-khî, nàm-phién to Sí-hói, tûng-phién to Pí-sṳ̂-kâ-sân ke sân-kiok.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan