Bìoball air-loidhne

Sṳ̂n-min Ki 3 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yî-set-lie̍t-ngìn Chṳ̂n-fu̍k Pâ-sân-vòng
( Mìn-su Ki 21:31-35 )

¹ “Chiap-tén, ngài-têu chai hiong pet-phién oi hi Pâ-sân thi-khî. Pâ-sân-vòng Ngo̍k tai-liâng kì ke chhiòn-kiûn chhut-lòi, chhai Yî-tet-lòi-sàng fu-khiun lâu ngài-têu siông-chhṳ̀.

² Song-chú tui ngài kóng: ‘Ngì-têu m̀-sṳ́ kiâng! Ngài oi chiông kì, kì ke ngìn-mìn, lâu kì ke thú-thi chhiòn-phu kâu chhai ngì-têu sú-chûng. Yî-chhièn ngì-têu ngióng-pân tui-thai ke kîn-sàng chhai Hî-sṳ̍t-pún ke Â-mô-li-vòng Sî-fèn, liá-ha ya oi cheu-yong tui-thai Pâ-sân-vòng.’

³ “Tui án-ngiòng, Song-chú — ngài-têu ke Song-ti ya chiông Pâ-sân-vòng Ngo̍k lâu kì ke ngìn-mìn kâu chhai ngài-têu sú-chûng. Ngài-têu chiông kì-têu chhiòn-phu sêu-me̍t, lièn yit-ke ya mò-liù.

⁴ Thùng-sṳ̀, ngài-têu cham-liâng kì só-yû ke sàng-chṳ́n, mò yit-chho sàng mò cham-liâng. Ngài-têu chhiu cham-liâng Pâ-sân-vòng Ngo̍k thúng-chhṳ ke kûi-chak Â-ngí-kô-pak thi-khî, yit-khiung yû liuk-sṳ̍p chho sàng;

⁵ liá-têu sàng chhiòn-phu yû kiên-ku ke fòng-phi: yû kô-chhiòng, sàng-mùn lâu mùn-chhôn. Ngài-têu ya cham-liâng khì-thâ mò sàng-chhiòng ke chhûn-chông.

⁶ Ngài-têu fí-me̍t só-yû ke sàng-chṳ́n, chiông sàng-tú ke ngìn, mò-fûn nàm-ńg ló-yu, chhiòn-phu chhṳ̀ chhiang-chhiang, chhiong yî-chhièn ngài-têu fí-me̍t Hî-sṳ̍t-pún-vòng Sî-fèn só-yû ke sàng-chṳ́n khiung-yong.

⁷ Ngài-têu chiông thèu-sâng lâu sàng-tú ke chhòi-vu̍t lûng-chúng chhióng chhiang-chhiang.

⁸ “Ke-sṳ̀, ngài-têu tui lióng-ke Â-mô-li-vòng ke sú, chiông Yok-tan-hò tûng-phién ke thú-thi chhióng ko-lòi, tui nàm-phu ke Â-nun sân-lak chhṳ̍t-to pet-phu ke Het-mùn-sân.

⁹ (Sî-tun-ngìn chiông Het-mùn-sân ham-cho Sî-lièn; Â-mô-li-ngìn ham kì Sṳ-nì-ngí.)

¹⁰ Ngài-têu cham-liâng Pâ-sân-vòng Ngo̍k só-yû ke sàng-chṳ́n: pâu-hàm phìn-ngièn ke tak sàng-chṳ́n, Kî-lie̍t lâu Pâ-sân kûi-chak thi-khî, tûng-phién to Sat-kâ lâu Yî-tet-lòi-sàng.”

¹¹ (Pâ-sân-vòng Ngo̍k he chui-heu yit-ke Li-fa̍t-yîm-ngìn. Kì ke kôn-chhòi he yung sa̍k-thèu cho ke, cheu phû-thûng ke chhak-chhun, chhòng si kûng-chhak, fat lióng kûng-chhak. Chhai Â-mùn-ngìn ke Lâ-pâ sàng-tú hàn khon tet-tó liá-fu kôn-chhòi.)

He̍t chhai Yok-tan-hò Tûng-phién ke Kok Kî-chhu̍k
( Mìn-su Ki 32:1-42 )

¹² “Ngài-têu cham-liâng liá-phién thú-thi yî-heu, ngài chiông Â-nun sân-lak sùn-thèu ke Â-lò-ngí-sàng yî-pet thi-khî lâu Kî-lie̍t sân-khî ke yit-pan, hàn-yû liá thi-khî ke sàng-chṳ́n, pûn-pûn Lî-phien lâu Kâ-tet kî-chhu̍k.

¹³ Ngài yu chiông Kî-lie̍t khì-thâ ke thi-khî lâu Pâ-sân-vòng Ngo̍k ke kûi-chak thi-khî pûn-pûn Mâ-nâ-sî ke pan kî-chhu̍k.” (Pâ-sân thi-khî yu ham-cho Li-fa̍t-yîm-thi.

¹⁴ Mâ-nâ-sî pan kî-chhu̍k ke Ngài-ngí cham-liâng kûi-chak Â-ngí-kô-pak thi-khî, chhiu-he Pâ-sân kûi-chak thi-khî, tui ke-vi chhṳ̍t-to Kî-sut-ngìn lâu Mâ-kâ-ngìn kâu-kie ke thi-fông. Ngài-ngí yung chhṳ-kâ ke miàng chiông ke-thi ke sàng-chṳ́n ôn-to Ha̍p-vô-thi̍t-Ngài-ngí, to kîm-pû-ngit hàn-he án-ngiòng.)

¹⁵ “Ngài chiông Kî-lie̍t pûn-pûn Mâ-nâ-sî kî-chhu̍k ke Mâ-kit chûng-chhu̍k,

¹⁶ chiông Kî-lie̍t to Â-nun sân-lak ke yit-te thú-thi pûn-pûn Lî-phien lâu Kâ-tet kî-chhu̍k. Kì-têu nàm-phién ke piên-kie chhai Â-nun sân-lak tûng-ông, pet-phién ke piên-kie he Ngâ-pok sân-lak, khì-chûng yit phu-fun lâu Â-mùn-ngìn ke piên-kie siông-chiap.

¹⁷ Kì-têu sî-phién ke kie-han to Yok-tan-hò, tui pet-phién ke Kâ-li-li-fù to nàm-phién ke Sí-hói, tûng-to Pí-sṳ̂-kâ-sân sân-kiok.

¹⁸ “Ke-sṳ̀, ngài chṳ́-sṳ kì-têu kóng: ‘Song-chú — ngì-têu ke Song-ti chiông Yok-tan-hò tûng-phién ke thú-thi su-pûn ngì-têu, sṳ́ ngì-têu cham-liâng liá-te thú-thi. Liá-ha, ngì-têu oi chiông kiûn-chhui vú-chông hí-lòi, phai kì-têu vi Yî-set-lie̍t tak kî-chhu̍k tá thèu-chhṳn, ko Yok-tan-hò, pông-chhu tak kî-chhu̍k cham-liâng Song-chú su-pûn kì-têu ke thú-thi.

¹⁹ Chúng-he ngì-têu ke pû-ngiòng, chṳ́-ńg, lâu thèu-sâng (ngài tî ngì-têu yû chhin-tô thèu-sâng) cho-tet liù chhai ngài pûn-pûn ngì-têu ke sàng-chṳ́n.

²⁰ Ngì-têu oi pông-chhu thùng-pâu cham-liâng Song-chú só-su Yok-tan-hò sî-phién ke thú-thi, chhṳ̍t-to Song-chú sṳ́ kì-têu he̍t chhai ke-vi, chhiong Kì sṳ́ ngì-têu chhai liá-vi he̍t khiung-yong. Ke-sṳ̀, ngì-têu chhiu cho-tet chón-to ngài pûn-pûn ngì-têu ke liá-te thú-thi.’

²¹ “Yèn-heu, ngài chṳ́-sṳ Yok-sû-â kóng: ‘Ngì yí-kîn chhîn-muk khon-tó Song-chú — ngì-têu ke Song-ti tui Sî-fèn lâu Ngo̍k lióng-ke vòng só-cho ke sṳ; Song-chú ya oi án-ngiòng tui-thai ngì-têu oi hi cham-liâng ke khì-thâ koet-kâ.

²² Ngì-têu m̀-sṳ́ kiâng kì-têu, yîn-vi Song-chú — ngì-têu ke Song-ti oi vi ngì-têu siông-chhṳ̀.’ ”

Mô-sî Cho-m̀-tet Chin-ngi̍p Kâ-nàm

²³ “Ke-sṳ̀, ngài khì-khiù Song-chú:

²⁴ ‘Chṳ-kô ke Song-chú â! Ngài tî Ngì yí-kîn khôi-sṳ́ hiong Ngì ke phu̍k-ngìn hién-mìn Ngì ví-thai, khì-meu ke chok-vì. Thiên-thi chṳ̂-kiên mò khì-thâ sṳ̀n-mìn nèn cho Ngì só-cho ke thai-sṳ!

²⁵ Khiù Ngì chún ngài ko Yok-tan-hò, hi-khon ke-phién chhin-chiâng ke thú-thi, mî-li ke sân-khî, lâu Lì-pâ-nun-sân.’

²⁶ “Chúng-he yîn-vi ngì-têu ke yèn-ku, Song-chú hiong ngài fat-khién, m̀-thâng ngài ke khì-khiù. Kì tui ngài kóng: ‘Hó lé nâ! Liá-khien sṳ m̀-sṳ́ kóng lé!

²⁷ Ngì sông Pí-sṳ̂-kâ sân-táng hi, tui ke-vi yén-yén khon tûng-sî nàm-pet si-fông. Ngì oi siòng-se khon, yîn-vi ngì cho-m̀-tet ko liá Yok-tan-hò.

²⁸ Ngì oi chṳ́-thô Yok-sû-â, ya oi kiên-thin kì ke sîm-chṳ, sṳ́ kì yúng-kám, yîn-vi kì oi tai-liâng ngìn-mìn ko-hò, cham-liâng ngì só khon-tó ke thú-thi.’

²⁹ Só-yî, ngài-têu liù chhai Pak-Phî-ngí tui-mien ke sân-lak.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan