Bìoball air-loidhne

Sṳ̂n-min Ki 2 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Chhai Khóng-yâ Liù-long

¹ “Heu-lòi, ngài-têu chûn-cheu Song-chú ke min-lin chón fông-hiong, sun-tén Fùng-hói sùn ke lu hi khóng-yâ. Ngài-têu chhai Yî-tûng sân-khî lit yit-chham tông-kiú ke sṳ̀-kiên.

^2-3 “Heu-lòi, Song-chú lâu ngài kóng, ngài-têu yí-kîn chhai liá sân-yâ thi-khî tîn-lòi tîn-hi tîn la-lé, yin-kôi chón-hiong pet-phién hàng.

⁴ Kì oi ngài chiông yî-ha ke fa fûn-fu ngì-têu kóng: ‘Ngì-têu voi kîn-ko Yî-tûng sân-khî, chhiu-he ngì-têu ke yén-chhîn Yî-so heu-thoi ke thi-khî. Sûi-yèn kì-têu voi kiâng ngì-têu, chúng-he ngì-têu oi chu-yi,

⁵ cho-m̀-tet lâu kì-têu siông-chhṳ̀; yîn-vi Ngài m̀ chiông liá-te thú-thi su-pûn ngì-têu, lièn tha̍p-kiok ke thi-fông ya mò pûn ngì-têu. Ngài yí-kîn chiông Yî-tûng sân-khî su-pûn Yî-so ke heu-thoi cho sán-ngia̍p.

⁶ Ngì-têu cho-tet yung chhièn hiong kì-têu mâi sṳ̍t ke lâu lîm ke tûng-sî.’

⁷ “Oi tî, Song-chú — ngì-têu ke Song-ti ngióng-pân chhai ngì-têu só-cho ke sṳ su-fuk pûn ngì-têu. Ngì-têu chhai ke tông-fat ke khóng-yâ liù-long ke sṳ̀, Kì cheu-ku ngì-têu. Si-sṳ̍p ngièn lòi, Kì lâu ngì-têu khiung-ha, ngì-têu pin-mò khiam má-ke.

⁸ “Án-ngiòng, ngài-têu tîn-ko Yî-tûng, chhiu-he ngài-têu yén-chhîn Yî-so heu-thoi ke thi-khî, tui Yî-lâ-thâ lâu Yî-sùn-Kâ-phe̍t to Sí-hói ke lu, hiong tûng-pet Mô-ap khóng-yâ ke lu hi.

⁹ Song-chú tui ngài kóng: ‘Ngì-têu m̀-hó ngiâ Mô-ap-ngìn, ya cho-m̀-tet lâu kì-têu siông-chhṳ̀. Ngài yí-kîn chiông Â-ngí-sàng su-pûn Lò-tet ke heu-thoi cho sán-ngia̍p; Ngài m̀ chiông kì-têu ke thú-thi pûn ngì-têu.’ ”

¹⁰ (Yî-chhièn yû yit-ke tông yúng-chong kô-thai ke chúng-chhu̍k he̍t chhai Â-ngí-sàng; kì-têu ngìn chhin-tô, sṳ̂n-chhòi lâu Â-na̍p-chhu̍k ke ngìn khiung-yong án kô-thai.

¹¹ Kì-têu lâu Â-na̍p-ngìn khiung-yong, ya son-cho Li-fa̍t-yîm-ngìn, chúng-he Mô-ap-ngìn ham kì-têu Yî-mí-ngìn.

¹² Hò-li-ngìn sṳt he̍t chhai Yî-tûng; Yî-so ke heu-thoi chiông kì-têu kiuk-chéu, sêu-me̍t kì-têu, he̍t chhai ke-vi, chhiu-chhiong Yî-set-lie̍t-ngìn tui Song-chú su-pûn kì-têu ke thú-thi chiông thi̍t-ngìn kiuk-chéu khiung-yong.)

¹³ “Heu-lòi, ngài-têu chûn-cheu Song-chú ke min-lin ko Sat-lie̍t sân-lak.

¹⁴ Ngài-têu tui lì-khôi Kâ-tâi-sṳ̂-Pâ-nì-â to ko-hi Sat-lie̍t sân-lak, khiung-yû sâm-sṳ̍p pat-ngièn kiú. Cheu Song-chú só-fat ke sṳ, ke sṳ-thoi ke chan-sṳ chhiòn-phu sí chhiang-chhiang lé.

¹⁵ Song-chú chhîn-chhṳ kûng-kit kì-têu, chhṳ̍t-to chiông kì-têu tui yàng-chûng chhiòn-phu sêu me̍t-thet.

¹⁶ “Ke-têu chan-sṳ tui ngìn-mìn chûng chhiòn-phu sí-thet yî-heu,

¹⁷ Song-chú tui ngài kóng:

¹⁸ ‘Kîm-pû-ngit, ngì-têu oi tui Â-ngí-sàng kîn-ko Mô-ap ke thi-khî.

¹⁹ Yèn-heu ngì-têu voi lòi-to Lò-tet heu-thoi Â-mùn-ngìn ke thi-khî; chúng-he ngì-têu m̀-hó ngiâ Â-mùn-ngìn, ya cho-m̀-tet lâu kì-têu siông-chhṳ̀. Ngài yí-kîn chiông liá-te thú-thi su-pûn Lò-tet ke heu-thoi cho sán-ngia̍p; Ngài m̀ chiông kì-têu ke thú-thi pûn ngì-têu.’ ”

²⁰ (Liá-te thú-thi ya son-cho Li-fa̍t-yîm-thi, yîn-vi ngièn-lòi ke ngìn-mìn he Li-fa̍t-yîm-ngìn. Â-mùn-ngìn ham kì-têu San-chû-mìn-ngìn.

²¹ Kì-têu ke sṳ̂n-chhòi lâu Â-na̍p-chhu̍k ke ngìn khiung-yong án kô-thai, ngìn-khiéu chhin-tô, he tông yúng-chong ke chúng-chhu̍k. Chúng-he Song-chú sêu-me̍t kì-têu; Â-mùn-ngìn chhiu cham-liâng ke-te thú-thi, he̍t chhai ke-vi.

²² Song-chú sṳt vi Yî-so ke heu-thoi — Yî-tûng-ngìn vàn-sṳ̀n khiung-yong ke sṳ. Kì sêu-me̍t he̍t chhai Yî-tûng sân-khî ke Hò-li-ngìn; Yî-tûng-ngìn chhiu cham-liâng ke-phién thú-thi, he̍t chhai ke-vi, yit-chhṳ̍t to kîm-pû-ngit.

²³ Ke-têu tui Khiet-lî-thi̍t-tó lòi ke ngìn sṳt he̍t chhai Thi-chûng-hói sùn-thèu; kì-têu sêu-me̍t ngièn-chhu-mìn Â-ví-ngìn, cham-liâng kì-têu ke thú-thi, he̍t chhai ke-vi, chhṳ̍t-to nàm-phu ke Kâ-sat-sàng.)

²⁴ “Ngài-têu kîn-ko Mô-ap heu, Song-chú lâu ngài-têu kóng: ‘Liá-ha ngì-têu oi chhut-fat, ko Â-nun sân-lak. Ngài chiông ke yung Hî-sṳ̍t-pún cho kîn-sàng ke Â-mô-li-vòng Sî-fèn lâu kì ke thú-thi chhiòn-phu kâu chhai ngì-têu sú-chûng. Ngì-têu oi lâu kì siông-chhṳ̀, cham-liâng kì ke thú-thi.

²⁵ Tui kîm-pû-ngit khôi-sṳ́, Ngài oi sṳ́ thiên-ha van-mìn chhiòn-phu kiâng ngì-têu. Kì-têu yit thâng-tó ngì-têu ke miàng chhiu voi kiâng-to pi̍t-pi̍t-chhat.’ ”

Yî-set-lie̍t-ngìn Tá-yàng Hî-sṳ̍t-pún-vòng
( Mìn-su Ki 21:21-30 )

²⁶ “Heu-lòi, ngài tui Kî-tí-mo̍k khóng-yâ phai sṳ́-chá to Hî-sṳ̍t-pún hi-kien Sî-fèn-vòng, yung fò-mu̍k ke fa tui kì kóng:

²⁷ ‘Chhiáng pûn ngài-têu kîn-ko ngì ke thú-thi. Ngài-têu tân-chhiang hàng thai-lu, mò phiên chó-yu, yit-chhṳ̍t hàng thai-lu.

²⁸ Ngài-têu ngien-yi chhut-chhièn hiong ngì-têu mâi sṳ̍t ke lâu lîm ke tûng-sî. Ngài-têu tân-chhiang oi kîn-ko ngì ke thú-thi,

²⁹ ko Yok-tan-hò, chin-ngi̍p Song-chú — ngài-têu Song-ti oi su-pûn ngài-têu ke thú-thi. He̍t chhai Yî-tûng ke Yî-so heu-thoi lâu he̍t chhai Â-ngí-sàng ke Mô-ap-ngìn chhiòn-phu pûn ngài-têu kîn-ko kì-têu ke thú-thi.’

³⁰ “Chúng-he, Hî-sṳ̍t-pún-vòng Sî-fèn m̀-hén pûn ngài-têu kîn-ko kì ke thú-thi. Song-chú — ngài-têu ke Song-ti sṳ́ kì ngang-kiáng yu ngang-hok, hó-pûn ngài-têu tá-yàng kì, cham-liâng kì ke thú-thi; to kîm-pû-ngit ngài-têu hàn-he cham-liâng liá-te thú-thi.

³¹ “Heu-lòi, Song-chú tui ngài kóng: ‘Khon nâ, Ngài yí-kîn chiông Sî-fèn-vòng lâu kì ke thú-thi kâu-pûn ngì-têu lé. Ngì-têu liá-ha ngi̍p-hi cham-liâng.’

³² Sî-fèn tai-liâng chhiòn-kiûn chhut-lòi, chhai Ngâ-chha̍p-sàng lâu ngài-têu siông-chhṳ̀.

³³ Chúng-he Song-chú — ngài-têu ke Song-ti chiông kì-têu chhiòn-phu kâu-pûn ngài-têu. Ngài-têu chhṳ̀-sí kì, kì ke-têu lai-é, lâu só-yû ke chan-sṳ.

³⁴ “Ngài-têu yu cham-liâng, tá-fái tak-ke sàng-sṳ, chiông sàng-tú ke ngìn, mò-fûn nàm-ńg ló-yu, chhiòn-phu chhṳ̀ chhiang-chhiang, yit-ke ya mò-liù.

³⁵ Ngài-têu chiông thèu-sâng lâu sàng-tú ke chhòi-vu̍t lûng-chúng chhióng chhiang-chhiang.

³⁶ Song-chú — ngài-têu ke Song-ti sṳ́ ngài-têu cham-liâng só-yû ke sàng-chṳ́n, tui Â-nun sân-lak sùn-thèu ke Â-lò-ngí, to sân-lak tûng-ông ke sàng-chṳ́n, yit-chhṳ̍t to Kî-lie̍t, chhiòn-phu cham-liâng hâ-lòi.

³⁷ Chúng-he cheu Song-chú — ngài-têu Song-ti ke kim-lin, ngài-têu mò chiap-khiun Â-mùn-ngìn ke thú-thi ya-he Ngâ-pok sân-lak lióng-phién ke thi-fông, ya mò hàng-ko sân-khî só-yû ke sàng-chṳ́n.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan