Bìoball air-loidhne

Sṳ̂n-min Ki 11 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Song-chú ke Ví-thai

¹ “Ngì-têu yin-tông kin-oi Song-chú — ngì-têu ke Song-ti, chhiùng-thèu to-mî chûn-sú Kì só-yû ke fap-li̍t, li-kûi lâu kie-min.

² Oi-tî, ngài kîm-pû-ngit he tui ngì-têu kóng-fa, m̀-he tui ngì-têu ke chṳ́-ńg kóng-fa, yîn-vi he ngì-têu chhîn-sṳ̂n thí-ngiam Song-chú — ngì-têu Song-ti ke kón-kau, lòi ngin-sṳt Kì. Ngì-têu khon-ko Song-chú ke ví-thai, khièn-piang, nèn-li̍t,

³ lâu sṳ̀n-chiak. Ngì-têu chhîn-muk khon-tó Kì ngióng-pân tui-fu Âi-khi̍p-vòng lâu kì ke koet-kâ,

⁴ ya khon-tó Kì ngióng-pân sêu-me̍t Âi-khi̍p ke kiûn-chhui, chan-mâ lâu chan-chhâ. Kì-têu tûi ngì-têu ke sṳ̀, Song-chú sṳ́ Fùng-hói chim-thet kì-têu, chiông kì-têu chha̍t-tái sêu-me̍t.

⁵ Ngì-têu tî, ngì-têu lòi-to liá-thi yî-chhièn, chhai khóng-yâ chûng, Song-chú vi ngì-têu só-cho ke yit-chhiet.

⁶ Ngì-têu ki-tet Kì ngióng-pân tui-fu Lî-phien ke heu-thoi, Yî-li-ap ke lai-é Thai-thân lâu Â-pí-làn. Thai-thi chhai Yî-set-lie̍t chung-ngìn mien-chhièn lie̍t-khôi, chiông kì-têu lâu kì-têu ke kâ-chhu̍k, chong-phùng, lâu só-yû ke phu̍k-ngìn, thèu-sâng chhiòn-phu thûn lo̍k-hi.

⁷ Ngì-têu chhîn-muk khon-tó Song-chú só cho liá yit-chhiet ví-thai ke sṳ.”

Chhai Yin-hí chṳ̂ Thi ke Fuk-hi

⁸ “Ngì-têu oi chûn-sú ngài kîm-pû-ngit fûn-fu ngì-têu só-yû ke kie-min, án-ngiòng ngì-têu chang voi yû li̍t-liong, cho-tet ko-hò cham-liâng ngì-têu oi ngi̍p-hi ke thú-thi,

⁹ chhai Song-chú yin-hí pûn ngì-têu ke chú-siên lâu chṳ́-sûn, ke liù-nen-lâu-me̍t chhin-phì ke thú-thi song hióng-su chhòng-kiú ke ngit-è.

¹⁰ Ngì-têu oi ngi̍p-hi cham-liâng ke thú-thi m̀-he chhiong ngì-têu lì-khôi ke Âi-khi̍p. Chhai Âi-khi̍p, ngì-têu ve-chúng yî-heu hàn-oi sîn-khú tha̍p súi-chhâ yim-súi chang-yû sû-sṳ̀n,

¹¹ chúng-he ngì-têu oi ko-hò cham-liâng ke thú-thi yû-sân, yû-kuk, yû yí-súi ke chṳ̂-yun.

¹² Song-chú — ngì-têu ke Song-ti tui ngièn-thèu to ngièn-mî yit-chhṳ̍t khon-ku liá thú-thi.

¹³ “Só-yî, ngì-têu oi ngin-chṳ̂n chûn-hàng ngài kîm-pû-ngit pân-pu pûn ngì-têu ke kie-min, kin-oi Song-chú — ngì-têu ke Song-ti, yit-sîm yit-yi sṳ-fung Kì.

¹⁴ Án-ngiòng, Kì chhiu voi cheu-sṳ̀ pûn ngì-têu chhûn-yí, chhiû-súi, sṳ́ ngì-têu yû la-ngiak ke ńg-kuk, sîn-chiú, kám-lám-yù,

¹⁵ lâu hiuk thèu-sâng ke chhó-liau. Ngì-têu voi sṳ̍t-to páu-chiuk.

¹⁶ Ngì-têu oi se-ngi, miên-tet sîm-kôn su-tó yín-yu, hoi ngì-têu poi-phan Song-chú, hi fu̍k-sṳ khúi-pai phe̍t ke sṳ̀n-mìn.

¹⁷ Na-he m̀-thâng, Song-chú voi hiong ngì-têu fat-khién, m̀ lo̍k-súi pûn ngì-têu, sṳ́ thú-thi châu-hôn, m̀-voi chhut-sán ńg-kuk; chhiu-son Kì su-pûn ngì-têu ke he chhin-chiâng ke thú-thi, ngì-têu ya voi tông-kiak chhai ke-vi sêu-me̍t.

¹⁸ “Só-yî, ngì-têu oi ki-tet liá-têu kie-min, piong chhai sîm-tú. Oi chiông liá-têu kie-min cho ki-ho, thak chhai sú-hong, tai chhai ngiak-thèu.

¹⁹ Ngì-têu oi chiông liá-têu kie-min kâu ngì-têu ke chṳ́-ńg, mò-lun chhai vuk-hâ ya-he chhut-ngoi, hiet-khun ya-he cho-kûng, oi sòng-sòng thàm-lun liá-têu kie-min.

²⁰ Ngì-têu oi chiông liá-têu kie-min siá chhai vuk-hâ ke mùn-khiông lâu thai-mùn.

²¹ Án-ngiòng, ngì-têu lâu ngì-têu ke chṳ́-ńg chhiu voi chhai Song-chú só yin-hí pûn ngì-têu chú-siên ke thú-thi song hióng-su chhòng-kiú ke ngit-è; thiên-thi chhùn-chhai kí-kiú, ngì-têu chhiu he̍t chhai ke-vi kí-kiú.

²² “Ngì-têu oi ngin-chṳ̂n chûn-hàng ngài pân-pu pûn ngì-têu só-yû ke kie-min, kin-oi Song-chú — ngì-têu ke Song-ti, sṳ̍t-hàng Kì ke tho, tui Kì chûng-sîm.

²³ Án-ngiòng, ngì-têu ngi̍p-hi ke sṳ̀, Song-chú voi kiuk-chhut kok mìn-chhu̍k, sṳ́ ngì-têu cham-liâng pí ngì-têu kha khiòng-thai ke mìn-chhu̍k ke thú-thi.

²⁴ Ngì-têu kiok só hàng-ko ke thú-thi chhiòn-phu oi kûi-pûn ngì-têu. Ngì-têu ke thi-kie oi tui nàm-phién ke khóng-yâ to pet-phién ke Lì-pâ-nun-sân, tui tûng-phién ke Yu-fat-lâ-tí-hò to sî-phién ke Thi-chûng-hói.

²⁵ Mò yit-sà chhai ngì-têu mien-chhièn khî tet-he̍t. Ngì-têu mò-lun to nai-vi hi, Song-chú — ngì-têu ke Song-ti oi cheu Kì ke yin-hí sṳ́ ngì-têu thai-thai tet-sṳn; mò-ngìn m̀ kiâng ngì-têu.

²⁶ “Khon nâ, ngài kîm-pû-ngit chiông chuk-fuk lâu chu-chú pài chhai ngì-têu mien-chhièn, pûn ngì-têu chhṳ-kâ lòi-sién.

²⁷ Na-he ngì-têu chûn-hàng ngài kîm-pû-ngit fûn-fu ngì-têu, chhiu-he Song-chú — ngì-têu Song-ti ke só-yû kie-min, chhiu voi tet-tó chuk-fuk.

²⁸ Na-he ngì-têu m̀ chûn-hàng liá-têu kie-min, chón-hiong ngì-têu chhiùng-lòi m̀ ngin-sṳt ke sṳ̀n-mìn, hi thèn kì-têu, chhiu voi su chu-chú.

²⁹ Tông Song-chú — ngì-têu ke Song-ti tai-liâng ngì-têu ngi̍p-hi ngì-têu oi cham-liâng ke thú-thi yî-heu, ngì-têu oi chhai Kî-li-sîm-sân siên-pu chuk-fuk ke fa, chhai Yî-pâ-lu-sân siên-pu chu-chú ke fa.

³⁰ (Liá lióng-chho sân chhiòn-phu chhai Yok-tan-hò sî-phién ngit-thèu lo̍k-sân ke só-chhai, he sân-lak ke Kâ-nàm-ngìn ke thú-thi, chhai Kit-kap ke sî-phién, vá-khiun Mô-li sṳn-su.)

³¹ Ngì-têu ngiàm-sṳ̀ oi ko Yok-tan-hò, hi cham-liâng Song-chú — ngì-têu ke Song-ti só su-pûn ngì-têu ke thú-thi. Ngì-têu cham-liâng ke thú-thi, chhai ke-vi ôn-kî yî-heu,

³² yit-thin oi chûn-hàng ngài kîm-pû-ngit fûn-fu ngì-têu ke só-yû fap-li̍t.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan