Bìoball air-loidhne

Sṳ̂n-min Ki 1 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Chhièn-ngièn

¹ Pún-sû he ki-chai Mô-sî só-kóng ke fa. Tông Yî-set-lie̍t-ngìn chhai Yok-tan-hò tûng-phién ke khóng-yâ, Sû-fut tui-mien ke Yok-tan hò-kuk, chhiu chhai Pâ-làn-sàng lâu Thò-fut, Lâ-pân, Ha̍p-sé-liu̍k, Tí-sat-ha̍p liá-têu sàng-chṳ́n chûng-kiên, Mô-sî hiong chung-ngìn kóng yî-ha ke fa.

² (Tui Hò-lie̍t-sân kîn-ko Yî-tûng sân-khî to Kâ-tâi-sṳ̂-Pâ-nì-â sî-yeu sṳ̍p-yit ngit ke lu-chhàng.)

³ Chhai Yî-set-lie̍t-ngìn chhut Âi-khi̍p heu ke thi si-sṳ̍p ngièn sṳ̍p-yit ngie̍t chhû-yit, Mô-sî chiông Song-chú min-lin kì kóng ke fa chhiòn-phu lâu kì-têu kóng.

⁴ Ke-sṳ̀, kì yí-kîn tá-yàng yung Hî-sṳ̍t-pún cho kîn-sàng ke Â-mô-li-vòng Sî-fèn lâu yung Â-sṳ̂-thâ-liu̍k, Yî-tet-lòi cho kîn-sàng ke Pâ-sân-vòng Ngo̍k.

⁵ Mô-sî chhai Yok-tan-hò tûng-phién ke Mô-ap-thi hiong Yî-set-lie̍t-ngìn kié-sṳt Song-chú ke kau-sṳ. Kì kóng:

⁶ “Ngài-têu hàn chhai Hò-lie̍t-sân ke sṳ̀, Song-chú — ngài-têu ke Song-ti tui ngài-têu kóng: ‘Ngì-têu yí-kîn chhai liá sân-táng he̍t la-kiú lé.

⁷ Liá-ha ngì-têu oi sái-yàng, hiong-chhièn hàng. Ngì-têu oi chin-ngi̍p Â-mô-li-ngìn ke sân-khî lâu fu-khiun tak só-chhai — chhiu-he Yok-tan hò-kuk, sân-thi, kô-ngièn, nàm-khî lâu Thi-chûng-hói sùn, ya chhiu-he kóng, ngì-têu oi chin-ngi̍p Kâ-nàm, Lì-pâ-nun lâu tui ke-vi to Yu-fat-lâ-tí-hò ke thú-thi.

⁸ Liá-te thú-thi chhiu-he Ngài — Song-chú yin-hí oi pûn ngì-têu chú-siên Â-pak-lâ-hón, Yî-sat, Ngâ-kok lâu kì-têu heu-thoi ke thú-thi. Ngì-têu oi ngi̍p-hi, cham-liâng liá-te thú-thi.’ ”

Chṳ́-phai Sṳ́m-phan-kôn
( Chhut Âi-khi̍p Ki 18:13-27 )

⁹ Mô-sî tui ngìn-mìn kóng: “Ngài-têu hàn chhai Hò-lie̍t-sân ke sṳ̀, ngài lâu ngì-têu kóng-ko: ‘Ngài mò fap-thu chhṳ-kâ yit-sà tâm-tông tai-liâng ngì-têu ke chit-ngim.

¹⁰ Song-chú — ngì-têu ke Song-ti yí-kîn sṳ́ ngì-têu ngìn-khiéu chen-kâ, chhiong thiên-táng ke sên-é án-tô.

¹¹ Ngien Song-chú — ngì-têu chú-siên ke Song-ti cheu Kì chhṳ-kâ ke yin-hí sṳ́ ngì-têu ke ngìn-khiéu chai chen-kâ chhiên-phi, sṳ́ ngì-têu hîn-vong.

¹² Chúng-he ngài yit-sà oi ngióng-pân tâm-tông ngì-têu fun-chha̍p ke sṳ-chhìn, lâu vi ngì-têu phài-kié khun-nàn ke chit-ngim nè?

¹³ Ngì-têu oi tui tak kî-chhu̍k sién-chhut yû chṳ-fi, yû chhòi-thiau, su chûn-kin ke ngìn lòi; ngài oi sat-li̍p kì-têu lòi kón-lî ngì-têu.’

¹⁴ “Ngì-têu sṳt thùng-yi yin-kôi án-ngiòng cho.

¹⁵ Só-yî, ngài sat-li̍p ke-têu tak kî-chhu̍k sién chhut-lòi ke yû chṳ-fi, su chûn-kin ke ngìn lòi kón-lî ngì-têu: yû fu-chit kón yit-chhiên ngìn ke, yû kón yit-pak ngìn ke, yû kón ńg-sṳ̍p ngìn ke, yû kón sṳ̍p-ngìn ke. Ngài yu tui tak kî-chhu̍k nang-ngoi sat-li̍p khì-thâ ke kôn-yèn.

¹⁶ “Ke-sṳ̀, ngài chṳ́-sṳ ngì-têu ke sṳ́m-phan-kôn kóng: ‘Ngì-têu oi chhú-lî mìn-kiên ke kôn-sṳ̂. Mò-lun he thùng-pâu chûng-kiên ke kiu-fun, ya-he lâu ngì-têu tông-chûng ngoi-chhu̍k ngìn ke kiu-fun, ngì-têu lûng-chúng oi kûng-chṳn sṳ́m-phan.

¹⁷ Ngì-têu oi kûng-chṳn tui-ngìn mò phiên-sîm, mò-lun thi-vi kô-tâi, chhiòn-phu m̀-hó khon ngìn ke chhìn-mien. M̀-hó kiâng má-ngìn, yîn-vi ngì-têu he thoi Song-ti sṳ́m-phan ke. Na-he ngì-têu yû khun-nàn ke on-khien, cho-tet sung-to ngài liá-vi lòi, ngài voi chhú-lî.’

¹⁸ Ke-sṳ̀, ngài ya chiông khì-thâ yin-kôi cho ke sṳ chhiòn-phu chṳ́-sṳ ngì-têu lé.”

Phai-ngìn Tá-tham Kâ-nàm-thi
( Mìn-su Ki 13:1-33 )

¹⁹ “Ngài-têu chûn-cheu Song-chú — ngài-têu Song-ti ke min-lin, lì-khôi Hò-lie̍t-sân, kîn-ko ngì-têu só khon-tó ke tông-fat, tông tet-ngìn-kiâng ke khóng-yâ, hi Â-mô-li-ngìn ke sân-khî. Ngài-têu to Kâ-tâi-sṳ̂-Pâ-nì-â ke sṳ̀,

²⁰ ngài sṳt tui ngì-têu kóng: ‘Liá-ha, ngì-têu yí-kîn to Â-mô-li-ngìn ke sân-khî, chhiu-he Song-chú — ngài-têu ke Song-ti su-pûn ngài-têu ke thú-thi.

²¹ Khon â, Song-chú — ngì-têu ke Song-ti yí-kîn chiông liá-te thú-thi pài chhai mien-chhièn. Ngì-têu oi chûn-cheu Song-chú — ngì-têu chú-siên ke Song-ti só min-lin ke hi cham-liâng; m̀-hó kiâng, m̀-hó sṳt-chṳ.’

²² “Chúng-he ngì-têu chhiòn-phu lòi-kien ngài, hiong ngài kien-ngi kóng: ‘Ngài-têu sióng-oi siên phai-ngìn hi tá-tham ke-te thú-thi, ham kì-têu chón-lòi po-ko oi hàng ke lu-sien lâu oi kûng-tá ke sàng.’

²³ “Ngài ngin-vì án-ngiòng cho mò m̀-chho̍k, chhiu tui tak kî-chhu̍k sién yit-sà, yit-khiung sién chhut-lòi sṳ̍p-ngi sà.

²⁴ Kì-têu chin-ngi̍p sân-khî, yit-chhṳ̍t to Yî-sṳ̍t-kok sân-lak hi tá-tham.

²⁵ Kì-têu tai-chón ke-thi ke kó-chṳ́, po-ko kóng: ‘Song-chú — ngài-têu ke Song-ti su-pûn ngài-têu ke he tông-chiâng ke thú-thi.’

²⁶ “Chúng-he, ngì-têu phoi-ngia̍k Song-chú — ngì-têu Song-ti ke min-lin, m̀-hén chin-ngi̍p ke thú-thi.

²⁷ Ngì-têu chhai chong-phùng tú koai-yen kóng: ‘Song-chú nâu ngài-têu! Kì thu ngài-têu chhut Âi-khi̍p, he-oi chiông ngài-têu kâu-pûn Â-mô-li-ngìn, lòi chhù-me̍t ngài-têu.

²⁸ Ngài-têu ngióng oi-sṳ́ ngi̍p-hi nè? Tham-é ke po-ko sṳ́ ngài-têu fî-sòng kiâng. Kì-têu kóng: Ke thi-fông ke ngìn pí ngài-têu kha khiòng-chong kô-thai; kì-têu he̍t chhai kiên-ku ke sàng-tú, sàng-chhiòng kô-to tù-thiên. Ngài-têu hàn chhai ke-vi khon-tó Â-na̍p-chhu̍k ke ngìn!’

²⁹ “Chúng-he ngài lâu ngì-têu kóng: ‘M̀-hó kiâng kì-têu!

³⁰ Song-chú — ngì-têu ke Song-ti oi tai-liâng ngì-têu, vi ngì-têu lòi siông-chhṳ̀, chhiong thèu-pái án-ngiòng. Ngì-têu yû chhîn-muk khon-tó Kì chhai Âi-khi̍p lâu khóng-yâ vi ngì-têu só-cho ke yit-chhiet.

³¹ Song-chú — ngì-têu ke Song-ti sṳt tai-liâng ngì-têu yit-lu phìn-ôn to liá thi-fông, chhiong â-pâ pà chhṳ-kâ ke lai-é án-ngiòng.’

³² Chúng-he, mò-lun ngài ngióng-pân kóng, ngì-têu hàn-he m̀-hén sin-kho Song-chú — ngì-têu ke Song-ti.

³³ Sûi-yèn án-ngiòng, Song-chú chhiùng-thèu to-mî hàng chhai ngì-têu thèu-chhièn, vi ngì-têu chhìm ôn-yàng ke thi-fông. Kì am-pû-sṳ̀ yung fó-chhû, ngit-sṳ̀-thèu yung yùn-chhû, tai-liâng ngì-têu ke lu-chhàng.”

Song-chú Chit-fa̍t Yî-set-lie̍t-ngìn
( Mìn-su Ki 14:20-45 )

³⁴ “Song-chú thâng-tó ngì-têu koai-yen, fî-sòng fat-khién, fat-sṳ kóng:

³⁵ ‘Ngì-têu liá sià-ok ke yit-thoi, má-ngìn ya cho-m̀-tet khon Ngài yin-hí su-pûn ngì-têu chú-siên ke chhin-chiâng ke thú-thi;

³⁶ chṳ́-yû Yâ-fù-nì ke lai-é Kâ-le̍t cho-tet khon. Yîn-vi kì yit-sîm yit-yi thèn-tén Ngài; Ngài oi chiông kì hàng-ko ke thú-thi su-pûn kì lâu kì ke chṳ́-sûn.’

³⁷ Yîn-vi ngì-têu ke yèn-ku, Song-chú ya tui ngài fat-khién. Kì kóng: ‘Lièn ngì ya cho-m̀-tet chin-ngi̍p ke-te thú-thi.

³⁸ Chúng-he ngì ke chhu-sú, Nun ke lai-é Yok-sû-â cho-tet ngi̍p-hi; ngì oi kú-li kì kiên-khiòng hí-lòi, yîn-vi kì voi tai-liâng Yî-set-lie̍t-ngìn cham-liâng ke-te thú-thi.’

³⁹ “Chiap-tén, Song-chú tui ngài-têu kóng: ‘Ke-têu kîm-pû-ngit hàn m̀-voi fûn-phe̍t sṳ-fî ke se-ngìn-è, ngì-têu láu-tó voi pûn thi̍t-ngìn chok-hi ke, fán-chón voi chin-ngi̍p ke-te thú-thi. Kì-têu voi cham-liâng ke-te thú-thi; yîn-vi Ngài oi su-pûn kì-têu.

⁴⁰ Chúng-he ngì liá-têu ngìn, ngì-têu oi vat-chón thèu, oi chón-to hiong Fùng-hói lu-song ke khóng-yâ hi.’

⁴¹ “Ngì-têu en-kóng: ‘Mô-sî â! Ngài-têu tet-chhui Song-chú! Liá-ha ngài-têu oi chûn-hàng Song-chú — ngài-têu Song-ti ke min-lin, hi siông-chhṳ̀.’ Ngì-têu tak-sà tai-tén vú-hi, chún-phi siông-chhṳ̀, láu-tó sùi-phien chhiu cho-tet cham-liâng ke sân-khî.

⁴² “Chúng-he, Song-chú tui ngài kóng: ‘Ngì oi kín-ko kì-têu, m̀-hó hi siông-chhṳ̀, miên-tet pûn thi̍t-ngìn tá sû-thet, yîn-vi Ngài m̀ lâu kì-têu thùng-chhai.’

⁴³ Ngài chiông Song-chú ke fa lâu ngì-têu kóng, chúng-he ngì-têu m̀-thâng. Ngì-têu phoi-ngia̍k Song-chú ke min-lin, khiòng-khiòng hiong sân-khî chhièn-chin.

⁴⁴ He̍t chhai ke sân-khî ke Â-mô-li-ngìn chhiong kûi thai-chhṳn ke phûng-é án-ngiòng chhut-lòi mien-tui ngì-têu. Kì-têu chiông ngì-têu kiuk-to Yî-tûng sân-khî ke Hò-ngí-mâ, chhai ke-vi tá-phai ngì-têu.

⁴⁵ Ke-sṳ̀ ngì-têu chón-lòi, chhai Song-chú mien-chhièn ôi-khiù; chúng-he Kì m̀-hén thâng ngì-têu ke ôi-khiù, m̀ chhap ngì-têu.

⁴⁶ Ngì-têu chhiu chhai Kâ-tâi-sṳ̂ he̍t yit-chham tông-kiú ke sṳ̀-kiên.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan