Bìoball air-loidhne

Pí-tet Heu-sû 2 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Ká Kau-sṳ̂

¹ Thèu-pái yû ká siên-tî chhai Yî-set-lie̍t mìn-kiên chhut-hien; khiung-yong, ya voi yû ká kau-sṳ̂ chhai ngì-têu chûng-kiên chhut-hien. Kì-têu voi am-chûng tai-ngi̍p fí-me̍t-sin ke yi-tôn, sṳm-chṳ m̀ sṳ̀n-ngin kiu-su̍k kì-têu ke Chú-chái, chhin-kiak chhiu chhṳ-chhí me̍t-mòng.

² Sûi-yèn án-ngiòng, hàn-he yû chhin-tô ngìn voi thèn kì-têu hi hàng yìm-lon ke sṳ, chṳ-to chṳ̂n-tho yîn-vi kì-têu ke hàng-vì su-tó fí-pong.

³ Liá-têu ká kau-sṳ̂ vi-tó oi mân-chiuk chhṳ-kâ ke thâm-sîm, voi yung ngiap-chho ke ku-sṳ lòi phien ngì-têu ke chhòi-vu̍t. Chhṳ-kú yî-lòi, kì-têu ke hìn-fa̍t yit-chhṳ̍t mò yèn-chhàn; kì-têu ke me̍t-mòng pit-thin kiak-kiak lòi-to!

⁴ Song-ti pin mò ngièu ke-têu fam-chhui ke thiên-sṳ́, fán-chón chiông kì-têu fit-lo̍k thi-ngiu̍k, koân chhai vû-am chûng, tén-heu sṳ́m-phan.

⁵ Song-ti ya mò ngièu song-kú ke sṳ-thoi, fán-chón yung thai-súi chim-sí ke-têu sîm-chûng mò Song-ti ke ngìn, chṳ́-yû chṳ́n-kiu chhòn-yòng chṳn-ngi ke Nò-â lâu khì-thâ chhit-ke ngìn.

⁶ Song-ti chit-fa̍t Só-tô-mâ lâu Ngò-mô-lâ lióng-chho sàng, kong fó chiông kì-têu sêu-thet, cho m̀ kin-khièn ke ngìn ke kam-kie.

⁷ Kì chhióng-kiu hó-ngìn Lò-tet; Lò-tet vi-tó fái-ngìn ke yìm-lon hàng-vì thai-thai yù-sèu.

⁸ Ke hó-ngìn he̍t chhai fái-ngìn chûng-kiên, tak-ngit khon-tó yu thâng-tó ke-têu sià-ok ke sṳ, sîm-kôn fî-sòng thung-khú.

^9-10 Chú tî oi ngióng-pân chṳ́n-kiu kin-khièn ke ngìn thot-lì sṳ-lien, ya tî oi ngióng-pân chiông fái-ngìn kî-liù hí-lòi, thi̍t-phe̍t he ke-têu fong-chiúng ngiuk-thí ke chhìn-yu̍k, méu-sṳ Song-ti Chú-khièn ke ngìn, hó chhai sṳ́m-phan ke-ngit hìn-fa̍t kì-têu. Liá-pân ká kau-sṳ̂ thai-tám, chhṳ-ngau, m̀ tân-chhiang m̀ chûn-kin ke-têu chhai thiên-táng yû yùng-kông ke, fán-chón vú-yu̍k kì-têu;

¹¹ lièn ke-têu li̍t-liong lâu khièn-nèn khiòng-ko liá-pân ká kau-sṳ̂ ke thiên-sṳ́ ya mò yung vú-yu̍k ke fa chhai Chú ke mien-chhièn ko kì-têu.

¹² Chúng-he, liá-pân ngìn chhiong mò lìn-sin ke khìm-chhu, thiên-sên chhiu-he oi pûn-ngìn chok pûn-ngìn chhṳ̀ ke; kì-têu cheu pún-nèn hi hàng, fí-pong chhṳ-kâ mò liáu-kié ke sṳ. Kì-têu voi chhiong khìm-chhu khiung-yong tù-tó fí-me̍t.

¹³ Kì-têu tô hàng put-ngi, chui-heu voi sṳ̍t-tó put-ngi ke po-yin. Tui kì-têu lòi kóng, só-vi khoai-lo̍k chhiu-he chhai kông-thiên pha̍k-ngit chṳ̂-ha mân-chiuk ngiuk-thí ke chhìn-yu̍k. Kì-têu fî-sòng ô-chô lâu vû-ve! Kì-têu thùng ngì-têu khiung-chok sṳ̍t-fan ke sṳ̀, chhiu nâ kúi-cha lòi chún-cho khoai-lo̍k!

¹⁴ Kì-têu hau-set ke muk-chû chôn-khon yìm-fu, fam-chhui ke yu̍k-mong yit-chhṳ̍t mò mân-chiuk. Kì-têu yú-fe̍t ngiôn-ngio̍k ke ngìn; kì-têu si̍p-koan thâm-sîm; kì-têu he Song-ti só chu-chú ke ngìn!

¹⁵ Kì-têu lì-khôi chṳn-lu, hàng vâi-lu, thùng Pí-ngí ke lai-é Pâ-làn hàng khiung-thiàu lu. Pâ-làn thâm-oi put-ngi ke chhièn-chhòi;

¹⁶ yîn-vi chhṳ-kâ só-fam ke chhui su-tó chit-fa̍t. M̀-voi kóng-fa ke lì-è kin-yèn fat-chhut ngìn ke sâng-yîm lòi làn-chú siên-tî ke ngong-tong.

¹⁷ Liá-têu ngìn chhiong châu-thet ke chhièn-ngièn, chhiong phau-fûng chhôi-san ke súi-hi; Song-ti vi-tó kì-têu pó-liù ke thi-fông he chhai vû-am ke chhṳ̂m-yên tî-poi.

¹⁸ Kì-têu kóng phong-fûng ke khûng-fa, yung ngiuk-thí ke chhìn-yu̍k yú-fe̍t ke-têu chang tui mièn-lan ke sên-fa̍t chûng thot-chhut-lòi ke ngìn.

¹⁹ Kì-têu tap-yin oi pûn ngìn chhṳ-yù, chhṳ-kâ fán-chón cho fú-phai sên-fa̍t ke nù-chhòi; yîn-vi ngìn pûn má-ke chṳ-fu̍k, chhiu-he má-ke ke nù-chhòi.

²⁰ Na-he ngìn thûng-ko ngin-sṳt ngài-têu ke Chú — Kiu-chú Yâ-sû Kî-tuk, thot-lì liá sṳ-kie fú-phai ke kok-chúng sṳ-li̍t, yî-heu yu pûn kì-têu chok-hi, pûn kì-têu chṳ-fu̍k, liá-chúng ngìn ke kiet-khiu̍k chhiu pí siên-chhièn hàn-kha chhám.

²¹ Kì-têu tî yû chṳn-ngi ke tho-lu, hàn kám tui kì-têu só sṳ̀n-su ke sṳ̀n-sṳn ke min-lin lì-khôi; liá-chúng ngìn mo̍k tî yû chṳn-ngi ke tho-lu hàn-kha yàng.

²² Siu̍k-ngî kóng chhin chho̍k: “Kiéu-è fì-thèu sṳ̍t kì só éu chhut-lòi ke”; ya-he “Chû-é sé-chhiang, yu vun nam-nài”. Kì-têu ke chhìn-hìn chhiu-chhiong án-ngiòng.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan