Bìoball air-loidhne

Ngâ-kok Sû 5 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Kín-ko Yû-chhièn-ngìn

¹ Ngì-têu yû-chhièn-ngìn â, oi se-ngi ô! Ngì-têu oi liù muk-chṳp thai-sâng kieu, yîn-vi yû thai châi-nan voi lìm-to ngì-têu lé!

² Ngì-têu ke chhòi-sán piong-to mut-thet, ngì-têu ke sâm-fu pûn chhùng-è chu-thet.

³ Ngì-têu ke kîm-ngiùn yí-kîn sâng-lû thet-hi; ke-têu lû oi cho ko ngì-têu ke chṳn-kí, chhiong fó yit-yong sêu-me̍t ngì-têu ke sṳ̂n-thí. Chhai sṳ-kie ke ma̍t-khì, ngì-têu hàn chhai ke-vi chit-chhùn chhòi-sán!

⁴ Ngì-têu pok-siok chhai thièn-hong vi ngì-têu kot-vò ke kûng-ngìn, khieu kì-têu ke kûng-chhièn. Thâng â, ke-têu chhièn-ngiùn chhut yen-sâng lô; ke-têu sû-kot ke kûng-ngìn, kì-têu yen-than ke sâng ya ngi̍p-to Chú — Van-kiûn ke Ngièn-soi ke ngí-kûng lô!

⁵ Ngì-têu chhai sṳ-kiên chhâ-fà yen-lo̍k, chiông chhṳ-kâ hiuk-to phì-phì, tén pûn-ngìn chhṳ̀ ke ngit-è.

⁶ Ngì-têu chiông ngi-ngìn thin-chhui, hoi-sí kì-têu; kì-têu ya mò tí-khong ngì-têu.

Ngiûn-nai lâu Khì-tó

⁷ Só-yî, hiûng-thi chí-moi â, ngì-têu oi ngiûn-nai, tén-to Chú chai-lòi. Khon â, kâng-thièn-ngìn án yû nai-sîm tén-heu thièn-tú pó-kui ke chhut-sán, ngiûn-nai tén-heu chhûn-lìm chhiû-yí.

⁸ Ngì-têu ya oi chhiong án-ngiòng ngiûn-nai. Ngì-têu ke sîm oi kiên-thin, yîn-vi Chú chai-lòi ke ngit-è voi to lé.

⁹ Hiûng-thi chí-moi â, m̀-hó pí-chhṳ́ mài-yen, miên-tet ngì-têu su sṳ́m-phan; khon â, sṳ́m-phan ke Chú chhai mùn-héu lé.

¹⁰ Hiûng-thi chí-moi â, vông-sṳ̀ ke-têu fung Chú ke miàng kóng-fa ke siên-tî, ngì-têu oi nâ kì-têu ke su-khú lâu ngiûn-nai lòi cho póng-yong.

¹¹ Oi tî, chhai ngài-têu khon-lòi, ke-têu ngiûn-nai to-tái ke ngìn he yû fuk-hi ke. Ngì-têu thâng-ko Yok-pak ke ngiûn-nai, ya tî heu-lòi Chú ngióng-pân khon-ku kì. Chú he mân-yû chhṳ̀-pî lâu lìn-mén ke.

¹² Ngài ke hiûng-thi chí-moi â, chui chhung-yeu ke he m̀-hó fat-sṳ! M̀-hó chṳ́ thiên, chṳ́ thi, ya-he chṳ́ má-ke tûng-sî fat-sṳ. He, chhiu kóng “He”; m̀-he, chhiu kóng “M̀-he”. Án-ngiòng, ngì-têu chhiu m̀-voi ham-lo̍k Song-ti ke sṳ́m-phan.

¹³ Ngì-têu chûng-kiên yû-ngìn su-khú mò? Kì yin-tông oi khì-tó. Yû-ngìn sîm-chhìn fôn-hí mò? Kì yin-tông oi kô-siung Song-ti.

¹⁴ Ngì-têu chûng-kiên yû-ngìn pot-phiang mò? Kì yin-tông chhiáng kau-fi ke chóng-ló lòi vi kì khì-tó, fung Chú ke miàng vi kì mat-yù.

¹⁵ Yû sin-sîm ke khì-tó voi kiu-tó ke phiang-ngìn; Chú voi pûn phiang-ngìn hó hí-lòi; na-he kì fam-liáu chhui, Chú ya voi sa-miên kì.

¹⁶ Só-yî, ngì-têu oi fu-siông ngin-chhui, pí-chhṳ́ thoi-tó, sṳ́ ngì-têu tet-tó yî-chhṳ. Ngi-ngìn ke khì-tó he thai-yû kûng-háu ke.

¹⁷ Yî-li-â lâu ngài-têu yû khiung-yong ke ngìn-sin; kì pet-chhiet khì-tó, khiù Song-ti mo̍k lo̍k-yí, chṳn-kîn chhiu yû sâm-ngièn-pan mò lo̍k-yí.

¹⁸ Kì chai khì-tó, thiên chhiu lo̍k thai-yí, thi chang chhut-sán ńg-kuk.

¹⁹ Ngài ke hiûng-thi chí-moi â, ngì-têu chûng-kiên na yû-ngìn hàng m̀-chho̍k lu, lì-khôi chṳ̂n-lî, yû-ngìn chiông kì tai-chón-lòi,

²⁰ ngì-têu oi tî: Má-ngìn tai chhui-ngìn fì-thèu, lì-khôi m̀-chho̍k ke lu, voi chiông chhui-ngìn ke lìn-fùn tui sí chhióng-kiu chón-lòi, yu pûn tô-tô ke chhui tet-tó sa-miên.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan