Bìoball air-loidhne

Ngâ-kok Sû 3 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yok-suk Sa̍t-mà

¹ Ngài ke hiûng-thi chí-moi â, ngì-têu m̀-hó án tô ngìn cho kau-sṳ̂, yîn-vi tî ngài-têu cho kau-sṳ̂ ke yit-thin voi pí phe̍t-ngìn su kha ngiàm ke sṳ́m-phan.

² Ngài-têu thai-kâ tû sòng-sòng yû ko-sṳt; na yû-ngìn chhai ngièn-ngî song mò ko-sṳt, kì chhiu-he yit-ke vàn-chhiòn ke ngìn, yû fap-thu khúng-chṳ kì ke chhiòn-sṳ̂n.

³ Ngài-têu chiông mâ-hàm-thiet piong chhai mâ-choi tî-poi, ham mâ sun-fu̍k, chhiu nèn khúng-chṳ kì chhiòn-sṳ̂n.

⁴ Ngì khon, sòn sûi-yèn án thai, yu pûn thai-fûng chhôi-tén chéu, chúng-he yung yit-kî se-se ke sòn-thò chhiu nèn khúng-chṳ kì ke fông-hiong, cheu thò-kûng ke yi-sṳ hàng.

⁵ Chhiong án-ngiòng, sa̍t-mà sûi-yèn chhin se, chúng-he voi kóng thai fa. Khon â, se-se ke fó nèn sêu-chhiang thai-thai ke sêm-lìm!

⁶ Sa̍t-mà chhiong fó yit-yong, chhai ngài-têu ke pak-thí-chûng, kì he chhui-ok ke sṳ-kie, voi hoi ngài-têu kûi-sṳ̂n tá lá-sap; kì voi yung tui thi-ngiu̍k lòi ke fó lòi fùn-sêu ngài-têu ngìn-sên ke lu-chhàng.

⁷ Ngìn yû phan-fap chṳ-fu̍k kok-chúng ke chéu-chhu, fî-khìm, khûn-chhùng, lâu súi-chhu̍k; sṳ-sṳ̍t-song, kok-chúng ke thung-vu̍t ya yí-kîn pûn-ngìn chṳ-fu̍k lé.

⁸ Chúng-he, mò ngìn nèn chṳ-fu̍k sa̍t-mà; kì he mò-fap chṳ-fu̍k ke ok-vu̍t, chhûng-mân hoi-sí ngìn ke thu̍k-hi.

⁹ Ngài-têu yung sa̍t-mà kám-chhia Chú — ngài-têu ke Thiên-fu, yu yung sa̍t-mà chu-chú Song-ti cheu chhṳ-kâ ke hìn-siong só chho-chhut-lòi ke ngìn.

¹⁰ Kám-chhia lâu chu-chú chhiòn-phu tui khiung chông choi chhut-lòi! Ngài ke hiûng-thi chí-moi â, liá he chhin m̀ yin-kôi ke!

¹¹ Khiung-chak chhièn-ngièn nèn thùng-sṳ̀ yúng-chhut thiàm-súi lâu fú-súi mâ?

¹² Ngài ke hiûng-thi chí-moi â, vù-fâ-kó-su voi tá kám-lám mâ? Phù-thò-su ya voi tá vù-fâ-kó mâ? Hàm ke chhièn-súi m̀-voi liù-chhut thiàm-súi lòi.

Su̍k Thiên ke Chṳ-fi

¹³ Ngì-têu chûng-kiên yû chhûng-mìn chṳ-fi ke ngìn mò? Na yû, kì chhiu yin-kôi yung khiâm-pî lâu chṳ-fi ke hó hàng-vì, lòi péu-hien kì tông-chiâng ke sên-fa̍t.

¹⁴ Ngì-têu sîm-chûng na yû ok-thu̍k ke chhit-tu lâu chhṳ-sṳ̂, ngì-têu chhiu m̀-hó chai chhṳ-khoâ lâu kóng fâ-liâu; liá he phoi-ngia̍k chṳ̂n-lî ke sṳ.

¹⁵ Liá-chúng ke chṳ-fi m̀-he tui thiên-táng lòi ke, he su̍k thi ke, su̍k chhìn-yu̍k ke, su̍k Mô-kúi ke.

¹⁶ Nai-vi yû chhit-tu lâu chhṳ-sṳ̂, nai-vi chhiu voi yû fun-lon lâu kok-chúng sià-ok ke hàng-vì.

¹⁷ Tiên-to, tui táng-kô lòi ke chṳ-fi yû kí-yong thi̍t-set: Thi-yit he sùn-kiet, yèn-heu he fò-phìn, vûn-fò, hó chhâm-siòng, chhûng-mân chhṳ̀-pî, nèn kiet-chhut fûng-fu ke san-kó, m̀-voi phiên-sîm, ya m̀-voi hî-ká.

¹⁸ Chhiuk-chin fò-phìn ke ngìn he yung fò-phìn lòi ve-chúng, chhiu sû-kot kûng-ngi ke kó-chṳ́.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan