Bìoball air-loidhne

Ngâ-kok Sû 2 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Kín-ko Phiên-sîm

¹ Ngài ke hiûng-thi chí-moi â, ngì-têu ki-yèn he ngài-têu yùng-kông ke Chú Yâ-sû Kî-tuk ke sin-thù, chhiu cho-m̀-tet cheu ngìn ke ngoi-péu yung mò khiung-yong ke thai-thu lòi tui-thai ngìn.

² Ká-sṳ́ yû yit-ke yû-chhièn-ngìn, tai kîm kim-chṳ́, chok chiâng sâm, ngi̍p-hi ngì-têu ke fi-thòng, thùng-sṳ̀ yû yit-ke chok lan sâm ke khiùng-khú-ngìn ya ngi̍p-hi;

³ na-he ngì-têu khon-chhung ke chok chiâng sâm ke ngìn, tui kì kóng: “Chhiáng ngì chhô song-vi”, chúng-he tui ke khiùng-khú-ngìn kóng: “Khî to ke-phién hi”, ya-he kóng: “Chhô chhai ngài ke kiok-hâ”,

⁴ án-ngiòng, ngì-têu kám m̀-he phiên-sîm, yung fái-yi lòi phín-siong ngìn mâ?

⁵ Ngài chhîn-oi ke hiûng-thi chí-moi â, ngì-têu oi thâng chhîn-chhú ô! Song-ti kám m̀-he kién-sién sṳ-kiên ke khiùng-khú-ngìn, pûn kì-têu chhai sin-ngióng-song fu-chiuk, lòi sṳ̀n-su Kì só yin-hí pûn ke-têu kin-oi Kì ke ngìn ke koet mâ?

⁶ Chúng-he, ngì-têu kin-yèn vú-yu̍k khiùng-khú-ngìn! Sṳ-sṳ̍t-song, khî-ap ngì-têu, lâi ngì-têu sông kôn-thâng ke, kám m̀-he ke-têu yû-chhièn-ngìn mâ?

⁷ Fí-pong ngì-têu só liâng-su ke chûn-kui ke miàng, kám m̀-he kì-têu mâ?

⁸ Ngì-têu na khok-sṳ̍t chûn-sú Sṳn-kîn só ki-chai, ke chṳ-kô vù-song ke kau-sṳ: “Siak phe̍t-ngìn chhiong chhṳ-kâ”, chhiu chho̍k lé!

⁹ Chúng-he, ngì-têu na cheu ngìn ke ngoi-péu lòi tui-thai ngìn, chhiu-he fam-chhui; fap-li̍t oi thin ngì-têu cho fam-fap ke ngìn.

¹⁰ Mò-lun má-ngìn vì-poi fap-li̍t chûng ke yit-thiàu kie-min, chhiu-he vì-poi chhiòn-phu fap-li̍t.

¹¹ Yîn-vi ke min-lin kóng “Cho-m̀-tet fam kiên-yìm” ke, ya kóng “Cho-m̀-tet chhṳ̀ ngìn”. Ngì na-he chhṳ̀ ngìn, sûi-yèn mò fam kiên-yìm, ngì hàn-he vì-poi fap-li̍t.

¹² Ki-yèn ngì-têu oi cheu ke pûn ngìn tet-tó chhṳ-yù ke kau-sṳ su sṳ́m-phan, ngì-têu ke ngièn-hàng chhiu oi ha̍p kì ke phêu-chún.

¹³ Yîn-vi, Song-ti sṳ́m-phan ke sṳ̀, m̀-voi lìn-mén ke-têu m̀ lìn-mén ngìn ke. Lìn-mén voi yàng-ko sṳ́m-phan.

Sin-sîm lâu Hàng-vì

¹⁴ Ngài ke hiûng-thi chí-moi â, ká-sṳ́ yû-ngìn kóng kì yû sin-sîm, chúng-he mò yung hàng-vì chṳn-mìn, yû má-ke yung nè? Ke-chúng sin-sîm voi kiu kì mò?

¹⁵ Ká-sṳ́ yû hiûng-thi ya-he chí-moi, mò hó chok yu mò hó sṳ̍t,

¹⁶ ngì-têu chûng-kiên yû-ngìn tui kì-têu kóng: “Cho ngì-têu phìn-ôn chón-hi! Ngien ngì-têu chok-tet-sêu, sṳ̍t-tet-páu!” chúng-he mò pûn kì-têu sṳ̂n-thí só sî-yeu ke, yû má-ke yung nè?

¹⁷ Chhiong án-ngiòng, sin-sîm na mò hàng-vì chhiu-he sí ke.

¹⁸ Chúng-he, yû-ngìn voi kóng: “Ngì yû sin-sîm; ngài yû hàng-vì.” Chúng-he, ngài oi kóng: “Pûn ngài khon ngì mò hàng-vì ke sin-sîm; ngài chhiu voi yung ngài ke hàng-vì pûn ngì khon ngài ke sin-sîm.”

¹⁹ Ngì sin Song-ti chṳ́-yû yit-ke, chhin hó! Sià-lìn me án-ngiòng siông-sin, chúng-he kì-têu kiâng-to pi̍t-pi̍t-chhat.

²⁰ Ngong-é â! Ngì sióng-oi tî mò hàng-vì ke sin-sîm he ngióng-pân mò yung mâ?

²¹ Ngài-têu ke chú-siên Â-pak-lâ-hón he ngióng-pân pûn Song-ti chhṳ̂n-cho ngi-ngìn nè? Kám m̀-he yîn-vi kì chiông kiâ lai-é Yî-sat hien chhai chi-thàn-táng liá-ke hàng-vì mâ?

²² Khó-kien, kì ke sin-sîm lâu hàng-vì he phiàng-phiàng chin-hàng ke; thûng-ko hàng-vì kì ke sin-sîm chang tha̍t-to vàn-chhiòn.

²³ Sṳn-kîn kóng: “Â-pak-lâ-hón sin Song-ti, yîn-vi kì ke sin, Song-ti chhiu son kì cho ngi-ngìn.” Liá-ke fa sṳ̍t-hien lé; só-yî, kì chhṳ̂n-cho Song-ti ke phèn-yû.

²⁴ Khó-kien, ngìn pûn Song-ti chhṳ̂n-cho ngi-ngìn he thûng-ko hàng-vì, m̀-he tân-tân kho sin-sîm.

²⁵ Kî-ńg Lâ-ha̍p ke chhìn-hìn ya he án-ngiòng. Kì pûn Song-ti chhṳ̂n-cho ngi-ngìn he yîn-vi hàng-vì; kì chiap-thai Yù-thai-ngìn ke sṳ́-chá, yu pông-chhu kì-têu tui nang-ngoi yit-thiàu lu thò-chéu.

²⁶ Só-yî, chhiong sṳ̂n-thí mò théu-hi he sí ke, sin-sîm mò hàng-vì ya he sí ke.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan