Bìoball air-loidhne

Ngâ-kok Sû 1 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

¹ Ngài he Ngâ-kok, Song-ti lâu Chú Yâ-sû Kî-tuk ke phu̍k-ngìn; ngài hiong fûn-san chhai chhiòn sṳ-kie Song-ti ke chṳ́-mìn chhiáng-ôn.

Sin-sîm lâu Chṳ-fi

² Ngài ke hiûng-thi chí-moi â, ngì-têu tù-tó kok-chúng ke sṳ-lien, yin-kôi khon-cho he fôn-hí ke sṳ,

³ yîn-vi tî, ngì-têu ke sin-sîm kîn-ko kháu-ngiam chhiu voi sâng-chhut ngiûn-nai.

⁴ Ngì-têu oi ngiûn-nai to-tái, chang nèn tha̍t-to sṳ̍p-chhiòn sṳ̍p-mî, mò khiam-khiet ke thi-phu.

⁵ Ngì-têu chûng-kiên na yû-ngìn khiet-séu chṳ-fi, kì chhiu yin-tông khiù Song-ti; Kì voi chiông chṳ-fi su-pûn kì, yîn-vi Song-ti lo̍k-yi fûng-fûng fu-fu su-pûn mî-yit-ke ngìn.

⁶ Chúng-he, ngì-têu oi phìn sin-sîm khiù, m̀-hó yû yit-si̍t ngì-fù; yîn-vi ngì-fù ke ngìn chhiong pûn fûng chhôi-lòi chhôi-hi ke hói-long yit-yong.

^7-8 Án-ngiòng ke ngìn sâm-sîm lióng-yi, chhai kì yit-chhiet só-hàng ke sṳ-song mò-thin mò-chho̍k; liá-chúng ngìn m̀-sṳ́ sióng-oi tui Chú ke-vi tet-tó má-ke.

Khiùng-khú lâu Fu-chiuk

⁹ Khiùng-khú ke hiûng-thi chí-moi tet-tó kô-sṳ̂n, yin-kôi fôn-hí;

¹⁰ yû-chhièn-ngìn su kong-pî ya oi fôn-hí; yîn-vi kì voi chhiong yâ-fâ yit-yong chhia-thet-hi.

¹¹ Ngit-thèu chhut-lòi, ngie̍t-fûng yit chhôi, chhó chhiu khû-châu, fâ ya chhia-thet, só-yû ke chiâng chhiu mò-thet hi. Yû-chhièn-ngìn chhai sṳ-ngia̍p-song mò-hàn chhṳ̍t-chha̍t, ya voi chhiong án-ngiòng chhia-thet-hi.

Kháu-ngiam lâu Sṳ-tham

¹² Tù-tó sṳ-lien ngiûn-nai to-tái ke ngìn he yû fuk-hi ke; yîn-vi thûng-ko kháu-ngiam yî-heu, kì voi liâng-su-tó Song-ti só yin-hí pûn ke-têu kin-oi Kì ke ngìn sâng-miang ke miên-liù.

¹³ Ngìn su sṳ-tham ke sṳ̀-chiet, cho-m̀-tet kóng: “Ngài he su Song-ti ke sṳ-tham!” Yîn-vi Song-ti m̀ pûn sià-ok sṳ-tham, Kì ya m̀-voi sṳ-tham ngìn.

¹⁴ Mî-yit-ke ngìn su sṳ-tham, he pûn kì chhṳ-kâ ke yu̍k-mong khiên-tén-chéu, pûn kì phien-chéu-hi.

¹⁵ Yu̍k-mong fài-thôi yî-heu, chhiu kiung-chhut chhui-ok; chhui-ok yit chóng-sṳ̀n, chhiu sâng-chhut sí-mòng.

¹⁶ Ngài chhîn-oi ke hiûng-thi chí-moi â, m̀-hó pûn-ngìn phien-chéu-hi!

¹⁷ Yit-chhiet mî-san lâu vàn-chhiòn ke ên-su chhiòn-phu he tui táng-kô, tui thiên-táng ke Â-pâ lòi ke; Kì he yit-chhiet kông ke Chhóng-chho-chá, m̀-voi kói-pien, ya mò chón-thung ke yáng.

¹⁸ Kì cheu chhṳ-kâ ke chṳ́-yi, thûng-ko chṳ̂n-lî ke fa su sâng-miang pûn ngài-têu, sṳ́ ngài-têu chhai Kì só-chho ke van-vu̍t chûng chhîn-chhiong chhû-siuk ke kó-chṳ́.

Thâng-tho lâu Hàng-tho

¹⁹ Ngài chhîn-oi ke hiûng-thi chí-moi â, ngì-têu oi tî ô! Mî-yit-ke ngìn oi kiak-kiak thâng, m̀-hó án kiak khôi-choi, ya m̀-hó án kiak fat-khién;

²⁰ yîn-vi ngìn ke fat-khién put-nèn tha̍t-sṳ̀n Song-ti kûng-ngi ke muk-tit.

²¹ Só-yî, ngì-têu oi chhù-thet yit-chhiet ke fái si̍p-koan lâu sià-ok ke hàng-vì, yung vûn-yù ke sîm lòi chiap-su Song-ti chung chhai ngì-têu sîm-chûng ke chṳ̂n-tho, chhiu-he nèn chṳ́n-kiu ngì-têu ke chṳ̂n-tho.

²² Chúng-he, ngì-têu m̀-hó phien chhṳ-kâ, láu-tó thâng-tho chhiu la; tiên-to, ngì-têu yit-thin oi hàng-tho.

²³ Na yû-ngìn thâng-liáu tho-lî mò hi hàng, chhiu-chhiong yit-ke ngìn cheu kiang-é khon chhṳ-kâ ke mien-mau,

²⁴ khon-liáu chhiu hàng-khôi, ngiàm-sṳ̀ chhiu m̀ ki-tet chhṳ-kâ ke yong-siong.

²⁵ Chúng-he, siòng-se chhà-khon ke vàn-chhiòn yu pûn ngìn tet-tó chhṳ-yù ke kau-sṳ, pin kiún-sú ke ngìn, m̀-he thâng-liáu chhiu m̀ ki-tet, fán-chón sṳ̍t-sṳ̍t chhai-chhai hi hàng, liá-chúng ngìn chhai kì só-hàng ke sṳ-song yit-thin voi mùng-fuk.

²⁶ Na yû-ngìn chhṳ-ngin he khièn-sṳ̀n ke ngìn, chúng-he mò yok-suk chhṳ-kâ ke sa̍t-mà, chhiu-he phien chhṳ-kâ; kì ke khièn-sṳ̀n mò pan-tiám ka-chhṳ̍t.

²⁷ Chhai Â-pâ Song-ti khon-lòi, sùn-kiet mò lá-sap ke khièn-sṳ̀n chhiu-he: Cheu-ku chhai fam-nan chûng ke kû-yì lâu koá-fu; thùng-sṳ̀ pó-sú chhṳ-kâ mo̍k ngiam-tó sṳ-kie ke vû-ve.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan