Bìoball air-loidhne

Ngâ-kô 5 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

(Sîn-lòng)

¹ Ngài ke â-moi, ngài ke sîn-ngiòng, ngài ngi̍p-to ngài ke yèn-chûng, chak mu̍t-yo̍k lâu hiông-liau, sṳ̍t ngài ke phûng-fòng lâu phûng-thòng, lîm ngài ke chiú lâu nen. Oi-ngìn nâ, sṳ̍t â! Lîm â! Chhṳ̍t-to ngì-têu chui chhai oi-chhìn chûng!

(Yâ-lu-sat-lâng ke se-moi-é) Thi-si Sú (Sîn-ngiòng)

² Ngài sûi-yèn soi-tén, chúng-he sîm hàn mò soi; ngài thâng-tó ngài ke chhìn-lòng kho̍k-mùn: Ngài ke â-moi, lâu ngài khôi-mùn â, ngài vàn-mî ke chhìn-moi, ngài ke ngie̍t-kap-è â! Ngài mân thèu-nà lu-súi; thèu-nà-mô pûn am-pû-sṳ̀ ke lu-súi tá-sṳp lé.

(Sîn-lòng) (Sîn-ngiòng)

³ Ngài yí-kîn thot-sâm lé, ngióng-oi ngài hong hí-lòi chok chón-hi nè? Ngài ke kiok yí-kîn sé chhiang-li lô, ngióng-hó ko tá-lá-sap nè?

⁴ Ngài ke chhìn-lòng tui mùn-phung chhûn-sú ngi̍p-lòi, ngài ke sîm chhiu po̍k-po̍k-thiàu.

⁵ Ngài hong-hí-lòi khôi-mùn pûn chhìn-lòng ngi̍p-lòi; ngài kha̍k-tén mùn-chhôn, ngài ke sûng-sú yû mu̍t-yo̍k liù hâ-lòi, mu̍t-yo̍k chṳp tui sú-chṳ́-thèu tit-tén hâ.

⁶ Ngài vi ngài ke chhìn-lòng khôi-mùn, chúng-he kì yí-kîn chéu-thet hi lé. Khon m̀-tó kì, ngài mò-kat mò-sat! Ngài kín chhìm kì, chúng-he chhìm m̀-tó; ngài kín hêm kì, chúng-he kì mò en.

⁷ Sàng-tú sùn-lò chóng-kâng ke ngìn tù-tó ngài; kì-têu chhiu tá ngài, chiông ngài tá-to chho̍k-sông; chóng sàng-chhiòng ke chiông ngài ke ngoi-sâm chhióng-chéu.

⁸ Yâ-lu-sat-lâng ke se-moi-é â, chhiáng tap-yin ngài! Na-he ngì-têu khon-tó ngài ke chhìn-lòng, chhiáng lâu kì kóng, ngài pot siông-sṳ̂-phiang lé.

(Yâ-lu-sat-lâng ke se-moi-é)

⁹ Ngì liá chhai se-moi-é tông-chûng chui-chiâng ke â, ngì ke chhìn-lòng pí phe̍t-ngìn ke kám yû kha-hó? Kì to-tái yû má-ke thi̍t-phe̍t ke só-chhai nè? Ngài-têu ngióng-pân oi tap-yin ngì ke yêu-khiù nè?

(Sîn-ngiòng)

¹⁰ Ngài ke chhìn-lòng yèn-tàu yu khien-không, chhai van-ngìn chûng mò-ngìn pí é-tet.

¹¹ Kì ke thèu-nà chhiong sùn-kîm; kì ke thèu-nà-mô chhiong pô-long, chhiong vû-â án vû.

¹² Kì ke muk-chû chhiong hâi-súi sùn ke ngie̍t-kap-è, chhai nen-chṳp tông-chûng sé-sṳ̂n, khî-chhai hâi-súi sùn.

¹³ Kì ke mien-kap-lón chhiong kûi-siông ke hiông-fâ, ya chhiong kûi-thòi ke hiông-chhó. Kì ke choi-sùn chhiong pak-ha̍p-fâ, tit-hâ mu̍t-yo̍k-chṳp.

¹⁴ Kì ke sûng-sú chhiong kîm-é cho ke kón-è, siông-tén pó-sa̍k. Kì ke sṳ̂n-thí chhiong kông-va̍t ke siong-ngà, siông-tén làm-pó-sa̍k.

¹⁵ Kì ke sûng-kiok chhiong pha̍k-ngiu̍k chhû, ôn chhai sùn-kîm ke chho-thòi táng. Kì ke ngoi-mau chhiong Lì-pâ-nun-sân án hiùng-chong, ya chhiong hiông-pak-su án tèn-sien.

¹⁶ Kì ke choi chîm hí-lòi chhin-thiàm; kì sṳ̍t-chhai tông tet-ngìn-siak ô! Yâ-lu-sat-lâng ke se-moi-é â, kì chhiu-he ngài ke chhìn-lòng, ngài ke phèn-yû!

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan