Bìoball air-loidhne

Mìn-su Ki 9 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Thi-ngi ke Phàn-ko-chiet

¹ Yî-set-lie̍t-ngìn lì-khôi Âi-khi̍p heu ke thi-ngi ngièn châng-ngie̍t, Song-chú chhai Sî-nai khóng-yâ tui Mô-sî kóng:

^2-3 “Pún-ngie̍t sṳ̍p-si, tui ngit-thèu lo̍k-sân khôi-sṳ́, Yî-set-lie̍t-ngìn oi chûn-cheu só-yû ke kûi-thin lâu thiàu-li lòi sú Phàn-ko-chiet.”

⁴ Só-yî Mô-sî fûn-fu ngìn-mìn sú Phàn-ko-chiet.

⁵ Châng-ngie̍t sṳ̍p-si lìm-am-é, kì-têu chhai Sî-nai khóng-yâ sú Phàn-ko-chiet. Song-chú só min-lin Mô-sî yit-chhiet ke fa, Yî-set-lie̍t-ngìn chhiòn-phu chûn-hàng.

⁶ Chúng-he, yû kí-ke ngìn yîn-vi pen-tó sṳ̂-thí chhiu mò chhiang-li, cho-m̀-tet chhai ke-ngit sú Phàn-ko-chiet. Kì-têu to Mô-sî, Â-lùn mien-chhièn,

⁷ kóng: “Ngài-têu yîn-vi pen-tó sṳ̂-thí chhiu mò chhiang-li; chúng-he cho-má-ke put-chún ngài-têu lâu khì-thâ ke Yî-set-lie̍t-ngìn khiung-ha chhai chṳ́-thin ke ngit-è hien chi-vu̍t pûn Song-chú nè?”

⁸ Mô-sî en-kóng: “Ngì-têu chhai liá-vi tén, ngài hi thâng Song-chú yû má-ke chṳ́-sṳ!”

⁹ Song-chú fûn-fu Mô-sî

¹⁰ tui Yî-set-lie̍t-ngìn kóng: “Ngì-têu lâu ngì-têu ke heu-thoi tông-chûng na yû-ngìn yîn-vi pen-tó sṳ̂-thí chhiu mò chhiang-li, ya-he chhut-mùn chhai-ngoi, hàn-he oi sú Phàn-ko-chiet;

¹¹ án-ngiòng ke ngìn cho-tet man yit-chak ngie̍t, chhiu-he chhai ngi-ngie̍t sṳ̍p-si lìm-am-é lòi sú-chiet. Oi sṳ̍t vù-kau-piáng, fú-chhoi lâu yòng-kâu ke ngiuk;

¹² chúng-he cho-m̀-tet chiông chhûn-tó ke sṳ̍t-vu̍t liù-to thi-ngi chêu-sṳ̀n, ya cho-m̀-tet áu-thôn yòng-kâu ke kut-thèu. Oi cheu só-yû ke thiàu-li lòi sú Phàn-ko-chiet.

¹³ Chúng-he, na yû-ngìn he chhiang-li ke, yu mò chhut-mùn lî-hàng, kì kám m̀ sú Phàn-ko-chiet, chhiu oi chiông kì tui Ngài ke chṳ́-mìn chûng chhù-thet, yîn-vi kì mò chhai chṳ́-thin ke ngit-è hien chi-vu̍t pûn Ngài. Kì yit-thin oi tâm-tông chhṳ-kâ ke chhui.”

¹⁴ “Na-he he̍t chhai ngì-têu tông-chûng ke ngoi-chhu̍k ngìn yû-ngìn oi sú Phàn-ko-chiet, kì yin-kôi cheu só-yû ke kûi-thin lâu thiàu-li lòi chûn-sú. Mò-lun pún-thi ngìn ya-he ngoi-chhu̍k ngìn, chhiòn-phu oi chûn-sú khiung-yong ke fap-li̍t.”

Châ-tén Sṳn-chong-phùng ke Yùn
( Chhut Âi-khi̍p Ki 40:34-38 )

¹⁵ Yok-khui ke sṳn-chong-phùng tap hí-lòi ke-ngit, yû yit-phién yùn châ-tén kì. Am-pû-sṳ̀, liá yùn khon hí-lòi chhiong fó.

¹⁶ Sòng-sòng he án-ngiòng, yùn châ-tén sṳn-chong-phùng, am-pû-sṳ̀ liá yùn khon hí-lòi chhiong fó.

¹⁷ Yùn sṳ̂n sông-hi ke sṳ̀, Yî-set-lie̍t-ngìn chhiu sái-yàng chhut-fat; yùn thìn chhai nai-vi, kì-têu chhiu chhai ke-vi ôn-yàng.

¹⁸ Ngìn-mìn chûn-cheu Song-chú ke min-lin sái-yàng, ya chûn-cheu Song-chú ke min-lin ôn-yàng. Yùn thìn chhai sṳn-chong-phùng táng-kô kí-kiú, kì-têu chhiu liù chhai ke yàng-thi kí-kiú.

¹⁹ Yùn thìn chhai sṳn-chong-phùng táng-kô yû yit-chham tông-chhòng ke sṳ̀-kiên, kì-têu hàn-he thâng-chhiùng Song-chú ke min-lin, mò sái-yàng.

²⁰ Yû-sṳ̀ yùn thìn chhai sṳn-chong-phùng táng-kô chṳ́-yû kí-ngit. Mò-lun chhai ngióng-pân ke chhìn-khóng, kì-têu chhiòn-phu chûn-cheu Song-chú ke min-lin sái-yàng, ôn-yàng.

²¹ Yû-sṳ̀ yùn thìn-liù ke sṳ̀-kiên chṳ́-yû yit am-pû, chêu-sṳ̀n-thèu chhiu sṳ̂n sông-hi. Kì yit sṳ̂n sông-hi, kì-têu chhiu sái-yàng. Mò-lun he ngit-sṳ̀-thèu ya-he am-pû-sṳ̀, yùn yit sṳ̂n sông-hi, kì-têu chhiu sái-yàng.

²² Mò-lun he lióng-ngit, yit-chak ngie̍t, yit-ngièn ya-he kha-kiú ke sṳ̀-kiên, yùn thìn chhai sṳn-chong-phùng táng-kô ke sṳ̀, kì-têu chhiu mò sái-yàng; yùn yit sṳ̂n sông-hi, kì-têu chhiu sái-yàng.

²³ Yî-set-lie̍t-ngìn ôn-yàng ya-he sái-yàng, chhiòn-phu he chûn-cheu Song-chú thûng-ko Mô-sî só min-lin ke fa hi-cho.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan