Bìoball air-loidhne

Mìn-su Ki 6 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Lì-siu̍k-ngìn ke Thiàu-li

¹ Song-chú min-lin Mô-sî

² oi chiông yî-ha ke chṳ́-sṳ lâu Yî-set-lie̍t-ngìn kóng. Mò-lun nàm-ńg, na-he hí-ngien oi-cho lì-siu̍k-ngìn, chiông chhṳ-kâ hien-pûn Song-chú,

³ chhiu oi kim-chṳ́ lîm thâm-chiú ya-he ngiàm-chiú. Kì ya cho-m̀-tet lîm phù-thò cho ke yím-liau, cho-m̀-tet sṳ̍t phù-thò ya-he phù-thò-kôn.

⁴ Cho lì-siu̍k-ngìn ke khì-kiên, cho-m̀-tet sṳ̍t phù-thò-su só-kiet ke tûng-sî, lièn phù-thò chṳ́, phù-thò phì ya cho-m̀-tet sṳ̍t.

⁵ Chhai kì hí-ngien cho lì-siu̍k-ngìn ke khì-kiên, kì cho-m̀-tet thi-thèu. Kì hien-pûn Song-chú, fûn-phe̍t vì-sṳn ke khì-kiên, thèu-nà-mô yù-chhai kì chhòng.

^6-7 Kì ke thèu-nà-mô he fung-hien chhṳ-kâ pûn Song-ti ke ki-ho. Kì cho-m̀-tet hàng-khiûn sṳ̂-thí, sṳ́ chhṳ-kâ mò chhiang-li, chhiu-son he kì ke â-pâ, â-mê, hiûng-thi, ya-he chí-moi, kì ya cho-m̀-tet hàng-chhièn.

⁸ Chhai kì cho lì-siu̍k-ngìn khì-kiên, kì he fûn-phe̍t vì-sṳn kûi-pûn Song-chú ke.

⁹ Na-he lì-siu̍k-ngìn sṳ̂n-piên ke ngìn fut-yèn sí-thet, tá-lá-sap kì fûn-phe̍t vì-sṳn ke thèu-nà-mô, kì oi tén chhit-ngit, yèn-heu thi-thèu. Án-ngiòng, kì chhai lî-ngì song chhiu chhiang-li lé.

¹⁰ Thi-pat ngit, kì oi tai lióng-chak ngie̍t-kap-è ya-he lióng-chak pân-kiêu, to sṳn-chong-phùng mùn-héu, kâu-pûn chi-sṳ̂.

¹¹ Chi-sṳ̂ oi-hien yit-chak cho su̍k-chhui-chi, yit-chak cho sêu-fa-chi, vi kì hàng su̍k-chhui-lî, yîn-vi kì pen-tó sṳ̂-thí. Ke-ngit, kì oi chhùng-sîn chiông thèu-nà-mô fûn-phe̍t vì-sṳn,

¹² chai yit-pái chiông chhṳ-kâ hien-pûn Song-chú, cho lì-siu̍k-ngìn; yî-chhièn ke-chham ngit-è chhiu mò-son, yîn-vi kì ke fûn-phe̍t vì-sṳn ke thèu-nà-mô pien-cho mò chhiang-li. Kì oi khiên yit-chak yit-se thai ke se-yòng-kú cho su̍k-ko-sṳt-chi.

¹³ To lì-siu̍k-ngìn hí-ngien ke ngit-khì mân, oi hàng yî-ha ke lî-ngì. Kì oi to sṳn-chong-phùng mùn-héu,

¹⁴ chiông mò khiet-tiám ke thèu-sâng hien-pûn Song-chú: yit-chak yit-se thai ke se-yòng-kú cho sêu-fa-chi, yit-chak yit-se thai ke yòng-chhṳ-é cho su̍k-chhui-chi, yit-chak mièn-yòng-kú cho phìn-ôn-chi.

¹⁵ Kì ya oi hien yit-làm vù-kau-piáng: yû yu-mien-fún kiâu kám-lám-yù cho ke phûn-piáng lâu táng-kô kò kám-lám-yù ke pho̍k-piáng, yu oi-hien su-chi lâu chi-chiú.

¹⁶ Chi-sṳ̂ oi chiông liá-têu tûng-sî fung-hien pûn Song-chú, vi ke-ngìn hien su̍k-chhui-chi lâu sêu-fa-chi.

¹⁷ Kì oi chiông ke-chak mièn-yòng-kú cho phìn-ôn-chi hien-pûn Song-chú, thùng-sṳ̀ hien ke-làm vù-kau-piáng, ya oi hien su-chi lâu chi-chiú.

¹⁸ Lì-siu̍k-ngìn oi chhai sṳn-chong-phùng mùn-héu thi thèu-nà-mô, chiông thèu-nà-mô piong chhai hien phìn-ôn-chi ke fó táng-kô sêu-thet.

¹⁹ Yèn-heu, chi-sṳ̂ oi chiông chú-hó ke mièn-yòng-kú ke yit-kî chhièn-thúi lâu làm-è tú ke yit-te vù-kau phûn-piáng, yit-te vù-kau pho̍k-piáng piong chhai lì-siu̍k-ngìn ke sú-chûng.

²⁰ Chiap-tén, chi-sṳ̂ oi chiông liá-têu yèu kí-ha cho yèu-chi hien-pûn Song-chú; liá-têu he kûi-pûn chi-sṳ̂ ke sṳn-vu̍t. Fap-li̍t só kûi-thin ke hiûng-phù-ngiuk lâu heu-thúi ya he kûi-pûn chi-sṳ̂ ke. Liá yî-heu, lì-siu̍k-ngìn chhiu cho-tet lîm chiú.

²¹ Yî-song he lì-siu̍k-ngìn yin-kôi chûn-sú ke thiàu-li. Na-he lì-siu̍k-ngìn chhai só-hí ke ngien yî-ngoi kóng-ko oi hien phe̍t ke chi pûn Song-chú, chhiu yit-thin oi cheu só kóng-ko ke hi-cho.

Chi-sṳ̂ ke Chuk-fuk

²² Song-chú min-lin Mô-sî,

²³ oi fûn-fu Â-lùn lâu kì ke-têu lai-é yung yî-ha ke fa chuk-fuk Yî-set-lie̍t-ngìn:

²⁴ Ngien Song-chú su-fuk pûn ngì, pó-fu ngì;

²⁵ ngien Song-chú yung chhṳ̀-oi khoán-thai ngì, sṳ̂-ên pûn ngì;

²⁶ ngien Song-chú khon-ku ngì, sóng-su ngì phìn-ôn.

²⁷ Song-chú kóng: “Na-he kì-têu fung Ngài ke miàng chuk-fuk Yî-set-lie̍t-ngìn, Ngài chhiu su-fuk pûn kì-têu.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan