Bìoball air-loidhne

Mâ-khó 2 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yâ-sû Yî-hó Thân-fûng Phiang-ngìn
( Mâ-thai 9:1-8 ; Lu-kâ 5:17-26 )

¹ Ko mò kí-ngit, Yâ-sû yu chón-to Kâ-pak-nùng-sàng; thai-kâ thâng-kóng kì chhai vuk-hâ ke sêu-sit.

² Chhin-tô ngìn chhiu chhi-si̍p lòi, lièn mùn-chhièn ya mò khûng-vi. Yâ-sû tui kì-têu kóng-tho ke sṳ̀-chiet,

³ yû si-ke ngìn kông yit-ke thân-fûng phiang-ngìn lòi-kien Yâ-sû.

⁴ Chúng-he yîn-vi ngìn chhin-tô, kì-têu mò fap-thu chiông kì kông-to Yâ-sû mien-chhièn. Só-yî kì-têu chhiu chhai Yâ-sû thìn-liù ke só-chhai, tui vuk-táng chhak yit-chak khûng-é; yèn-heu, chiông phiang-ngìn lièn kì só soi ke chhó-chhia̍k, chhui-hâ-hi.

⁵ Yâ-sû khon-tó liá-têu ngìn ke sin-sîm, chhiu tui thân-fûng phiang-ngìn kóng: “Se-chṳ́ â, ngì ke chhui tet-tó sa-miên lé.”

⁶ Yû kí-ke kîn-ho̍k kau-sṳ̂ chhô chhai ke-vi, sîm-chûng ngi-lun kóng:

⁷ “Liá-ke ngìn kóng-fa ngióng-kám án ko-fun! Kì kóng vú-yu̍k Song-ti ke fa! Chhù-liáu Song-ti yî-ngoi, má-ngìn yû sa-chhui ke khièn-piang nè?”

⁸ Yâ-sû chit-sṳ̀ tî kì-têu sîm-chûng sióng má-ke, chhiu tui kì-têu kóng: “Ngì-têu ngióng-pân án-ngiòng sióng nè?

⁹ Tui liá-ke thân-fûng phiang-ngìn kóng: ‘Ngì ke chhui tet-tó sa-miên’ yùng-yi nè? Ya-he kóng: ‘Hong-hí-lòi, nâ ngì ke chhó-chhia̍k hàng-chón-hi’ kha yùng-yi nè?

¹⁰ Liá-ha ngài oi tui ngì-têu chṳn-mìn, Ngìn-chṳ́ chhai thi-song yû sa-chhui ke khièn-piang.” Chhiu tui thân-fûng phiang-ngìn kóng:

¹¹ “Ngài fûn-fu ngì hong-hí-lòi, nâ ngì ke chhó-chhia̍k chón-hi vuk-hâ!”

¹² Ke-ngìn chhiu hong-hí-lòi, nâ-hí chhó-chhia̍k, chhai thai-kâ mien-chhièn hàng chhut-hi. Chung-ngìn chhiu fî-sòng chho̍k-kiâng, siung-chan Song-ti kóng: “Ngài-têu chhiùng-lòi màng-sṳt khon-tó án-ngiòng ke sṳ!”

Yâ-sû Fû-seu Li-vi
( Mâ-thai 9:9-13 ; Lu-kâ 5:27-32 )

¹³ Yâ-sû yu to-chón Kâ-li-li fù-piên, yit thai-khiùn ngìn hi-to kì ke-vi, kì chhiu kau-hiun kì-têu.

¹⁴ Kì chai hiong-chhièn hàng, khon-tó yit-ke soi-vu-yèn, chhiu he Â-le̍t-fî ke lai-é Li-vi, chhô chhai soi-koân. Yâ-sû tui kì kóng: “Lòi thèn ngài!” Li-vi chhiu hong-hí-lòi thèn kì.

¹⁵ Heu-lòi Yâ-sû chhai Li-vi ke vuk-hâ sṳ̍t-fan, chhin-tô soi-vu-yèn lâu mò sú kau-kûi ke ngìn ya thèn-tén kì lòi, tông-chûng ya yû chhin-tô thùng Yâ-sû lâu kiâ ho̍k-sâng khiung-ha sṳ̍t-fan.

¹⁶ Yû-têu Fap-li-soi-ngìn chûng ke kîn-ho̍k kau-sṳ̂ khon-tó Yâ-sû thùng fái-ngìn lâu soi-kun khiung-ha sṳ̍t-fan, chhiu chṳt-mun kiâ ho̍k-sâng kóng: “Kì ngióng-pân thùng soi-kun lâu fái-ngìn khiung-ha sṳ̍t-fan nè?”

¹⁷ Yâ-sû thâng-tó, chhiu en-kóng: “Khien-không ke ngìn m̀-sṳ́ yî-sên, yû phiang ke ngìn chang oi. Ngài lòi ke muk-tit m̀-he oi fû-seu ngi-ngìn, he oi fû-seu chhui-ngìn.”

Kim-sṳ̍t ke Mun-thì
( Mâ-thai 9:14-17 ; Lu-kâ 5:33-39 )

¹⁸ Yû yit-pái, Sṳ̂-sé Yok-hon ke ho̍k-sâng lâu Fap-li-soi-ngìn tông chhai ke-vi kim-sṳ̍t, yû ngìn lòi mun Yâ-sû kóng: “Sṳ̂-sé Yok-hon ke ho̍k-sâng lâu Fap-li-soi-ngìn ke ho̍k-sâng kim-sṳ̍t, ngì ke ho̍k-sâng mò kim-sṳ̍t, he vi-tó má-ke nè?”

¹⁹ Yâ-sû en-kóng: “Sîn-lòng hàn chhai fûn-yîn ke yèn-si̍t chûng, ngìn-hak kám oi-sṳ́ kim-sṳ̍t? Sîn-lòng thùng kì-têu khiung-ha ke sṳ̀, kì-têu chhiu m̀-sṳ́ kim-sṳ̍t.

²⁰ Chúng-he sṳ̀-kiên voi to, sîn-lòng voi pûn-ngìn tui kì-têu tông-chûng tai-chéu, ke-sṳ̀ kì-têu chhiu oi kim-sṳ̍t.

²¹ “Mò ngìn yung sîn-pu pú khiu-sâm; na-he án-ngiòng, sîn pú ke pu voi chhá-lie̍t khiu-sâm, lan-khûng chhiu hàn-kha thai.

²² Ya mò ngìn chiông sîn-chiú chông chhai khiu phì-thoi tú; na-he án-ngiòng, sîn-chiú voi chong-lie̍t phì-thoi, chiú lâu phì-thoi chhiòn-phu voi tá-sóng thet. Sîn-chiú oi chông chhai sîn phì-thoi tú chang chho̍k!”

Ôn-sit-ngit ke Mun-thì
( Mâ-thai 12:1-8 ; Lu-kâ 6:1-5 )

²³ Yû yit-ke Ôn-sit-ngit, Yâ-sû kîn-ko ma̍k-thièn, kiâ ho̍k-sâng ya thùng kì khiung-ha hàng; kì-têu yit-phién hàng yit-phién lo̍t têu ma̍k-chhon.

²⁴ Fap-li-soi-ngìn tui Yâ-sû kóng: “Ngì khon, ngì ke ho̍k-sâng ngióng-pân cho Ôn-sit-ngit kim-chṳ́ cho ke sṳ?”

²⁵ Yâ-sû en-kóng: “Thai-ví lâu thèn kì ke ngìn khiam-khiet yu tú-kî ke sṳ̀ cho má-ke, ngì-têu mò thu̍k-ko he-mò?

²⁶ Kì ngi̍p-hi Song-ti ke sṳn-thien, sṳ̍t hien-pûn Song-ti ke piáng. Liá-ke sṳ fat-sên chhai Â-pí-â-thâ cho thai-chi-sṳ̂ ke sṳ̀-chiet. Cheu ngài-têu ke fap-li̍t, chṳ́-yû chi-sṳ̂ chang cho-tet sṳ̍t liá-ke piáng-è; chúng-he Thai-ví nâ-lòi sṳ̍t, yu pûn-pûn thèn kì ke ngìn sṳ̍t.”

²⁷ Yâ-sû kiet-lun kóng: “Ôn-sit-ngit he vi-tó ngìn sat ke; ngìn m̀-he vi-tó Ôn-sit-ngit lòi chhùn-chhai ke.

²⁸ Só-yî Ngìn-chṳ́ ya he Ôn-sit-ngit ke Chú.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan