Bìoball air-loidhne

Mâ-khó 11 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Kông-yùng Ngi̍p Yâ-lu-sat-lâng
( Mâ-thai 21:1-11 ; Lu-kâ 19:28-40 ; Yok-hon 12:12-19 )

¹ Yâ-sû lâu ho̍k-sâng hàng voi to Yâ-lu-sat-lâng, chiông-khiun Pak-fap-khì lâu Pak-thai-nì, chhai Kám-lám-sân, Yâ-sû ham lióng-ke ho̍k-sâng siên hàng,

² fûn-fu kì-têu kóng: “Ngì-têu hi thèu-chhièn ke chhûn-chông. Ngì-têu yit ngi̍p-hi, chhiu voi khon-tó yit-chak hàn-màng yû-ngìn khì-ko ke se lì-è thò chhai ke-vi. Ngì-têu chiông kì kié-khôi, khiên-lòi liá-vi.

³ Na-he yû-ngìn mun ngì-têu: ‘Ngióng-pân cho liá-ke sṳ?’ ngì-têu chhiu lâu kì kóng: ‘Chú oi yung kì; kì ngiàm-sṳ̀ voi sung-chón-lòi.’ ”

⁴ Kì-têu chhiu hi, khon-tó lu-sùn yû yit-chak se lì-è thò chhai mùn-héu, chhiu chiông kì kié-khôi.

⁵ Khî chhai ke-vi ke ngìn mun kì-têu kóng: “Ngì-têu cho-má-ke kié-khôi se lì-è?”

⁶ Kì-têu chhiu cheu Yâ-sû só fûn-fu ke fì-tap; ke-têu ngìn chhiu chún kì-têu chiông se lì-è khiên-chéu.

⁷ Kì-têu chiông se lì-è khiên-to Yâ-sû ke-vi, chiông chhṳ-kâ ke sâm tap chhai lì-è ke poi-nòng-táng, Yâ-sû chhiu khì sông-hi.

⁸ Yû chhin-tô ngìn yung chhṳ-kâ ke sâm phû chhai lu-song, ya yû-ngìn nâ yâ-thi chám-lòi ke su-kî phû chhai lu-song.

⁹ Thèu-chhièn hàng lâu heu-poi thèn ke ngìn thai-sâng hêm-kóng: “Hò-san-nâ! Siung-chan Song-ti! Ngien Song-ti su-fuk pûn ke fung Chú miàng lòi ke!

¹⁰ Ngien Song-ti su-fuk pûn ngài-têu chú-siên Thai-ví ke koet, chhiu-he mò kí-kiú voi lìm-to ke! Hò-san-nâ! Siung-chan kûi-pûn Chṳ-kô ke Song-ti!”

¹¹ Yâ-sû to Yâ-lu-sat-lâng, ngi̍p-hi sṳn-thien, si chû-vì khon yit-ha. Yîn-vi thiên yí-kîn am, kì chhiu lâu sṳ̍p-ngi-ke ho̍k-sâng chhut-sàng to Pak-thai-nì hi.

Chu-chú Vù-fâ-kó-su
( Mâ-thai 21:18-19 )

¹² Thi-ngi-ngit, kì-têu tui Pak-thai-nì to-chón sàng-tú hi; chhai lu-song, Yâ-sû tú-kî.

¹³ Kì khon-tó thèu-chhièn mò kí-yén ke só-chhai yû yit-thèu vù-fâ-kó-su, ya̍p-é cha̍t-cha̍t, chhiu hàng-ko-hi, sióng-oi khon yû kó-chṳ́ mò. Kì hàng-to su-chhièn, khon-tó chṳ́-yû ya̍p-é, yîn-vi ke-sṳ̀ m̀-he vù-fâ-kó ke sṳ̀-chiet.

¹⁴ Yâ-sû chhiu tui ke-thèu su-é kóng: “Chhiùng-kîm yî-heu, m̀-voi chai yû-ngìn sṳ̍t ngì ke kó-chṳ́!” Kiâ ho̍k-sâng lûng-chúng thâng-tó liá-ke fa.

Yâ-sû Kiet-chhiang Sṳn-thien
( Mâ-thai 21:12-17 ; Lu-kâ 19:45-48 ; Yok-hon 2:13-22 )

¹⁵ Kì-têu lòi-to Yâ-lu-sat-lâng, Yâ-sû yit ngi̍p sṳn-thien chhiu chiông só-yû chhai sṳn-thien-tú cho sên-lî ke ngìn kiuk chhut-hi. Kì súng-vang von-chhièn ke ngìn ke chok-è lâu mai ngie̍t-kap-è ke ngìn ke ten-é,

¹⁶ ya m̀-chún yû-ngìn kông tûng-sî chhai sṳn-thien hàng-lòi hàng-hi.

¹⁷ Kì kau-hiun kì-têu kóng: “Sṳn-kîn kám m̀-he ki-chai Song-ti ke fa kóng: ‘Ngài ke sṳn-thien oi cho van-mìn khì-tó ke thien’, ngì-têu sa chiông kì pien-cho chhe̍t-teu!”

¹⁸ Chi-sṳ̂-chóng lâu kîn-ho̍k kau-sṳ̂ thâng-tó liá-ke fa, chhiu sióng phan-fap oi sat-hoi Yâ-sû. Chúng-he kì-têu kiâng kì, yîn-vi chung-ngìn tû khîm-fu̍k kì ke kau-hiun.

¹⁹ Lìm-am-é, Yâ-sû chhiu lâu ho̍k-sâng hi sàng-ngoi.

Tui Vù-fâ-kó-su Tet-tó Kau-hiun
( Mâ-thai 21:20-22 )

²⁰ Thi-ngi-ngit tá-chó, Yâ-sû lâu ho̍k-sâng yu tui ke-thiàu lu kîn-ko, khon-tó ke-thèu vù-fâ-kó-su lièn kîn chhiòn-phu châu-thet.

²¹ Pí-tet sióng-hí liá-khien sṳ ke kîn-ko, chhiu tui Yâ-sû kóng: “Sîn-sâng, ngì khon, ngì só chu-chú ke vù-fâ-kó-su châu-thet lô.”

²² Yâ-sû fì-tap kóng: “Tui Song-ti oi yû sin-sîm!

²³ Ngài sṳ̍t-chhai lâu ngì-têu kóng, ngì-têu na-he tui liá-chho sân kóng: ‘Sái-khôi, lo̍k hói-tú hi!’ sîm-chûng mò ngì-fù, khok-sin só kóng ke yit-thin voi sṳ̍t-hien, liá-ke sṳ chhiu voi vi-tó ngì-têu lòi sṳ̍t-hien.

²⁴ Só-yî, ngài lâu ngì-têu kóng, ngì-têu khì-tó ke sṳ̀, siông-sin ngì-têu só khiù ke he yí-kîn tet-tó, chhiu voi tet-tó.

²⁵ Ngì-têu khî-tén khì-tó ke sṳ̀, oi siên sa-miên tet-chhui ngì-têu ke ngìn; án-ngiòng, ngì-têu chhai thiên-táng ke Â-pâ chang voi sa-miên ngì-têu ke ko-fam.”

Chṳt-mun Yâ-sû ke Khièn-piang
( Mâ-thai 21:23-27 ; Lu-kâ 20:1-8 )

²⁷ Kì-têu yu lòi-to Yâ-lu-sat-lâng. Yâ-sû chhai sṳn-thien-tú hàng ke sṳ̀, chi-sṳ̂-chóng, kîn-ho̍k kau-sṳ̂, lâu chóng-ló lòi-kien kì,

²⁸ mun kì kóng: “Ngì kho má-ke khièn-piang cho liá-têu sṳ? Má-ngìn pûn ngì liá khièn-piang cho liá-têu sṳ nè?”

²⁹ Yâ-sû en-kóng: “Ngài siên mun ngì-têu yit-ki fa, na-he ngì-têu fì-tap ngài, ngài chhiu lâu ngì-têu kóng, ngài kho má-ke khièn-piang cho liá-têu sṳ.

³⁰ Lâu ngài kóng, Yok-hon hàng sé-lî ke khièn-piang, he tui Song-ti lòi ke, ya-he tui ngìn lòi ke?”

³¹ Kì-têu chhiu pí-chhṳ́ chên-lun, kóng: “Na-he ngài-têu kóng: ‘Tui Song-ti lòi ke’, kì voi kóng: ‘Án-ngiòng, ngì-têu cho-má-ke m̀ sin Yok-hon nè?’

³² Na-he ngài-têu kóng: ‘Tui ngìn lòi ke’, ngài-têu ke mun-thì chhiu tông-thai lé.” (Kì-têu kiâng ngìn-mìn voi tui-fu kì-têu, yîn-vi chung-ngìn lûng-chúng siông-sin Yok-hon he siên-tî.)

³³ Tui án-ngiòng, kì-têu en Yâ-sû kóng: “Ngài-têu m̀ tî.” Yâ-sû tui kì-têu kóng: “Án-ngiòng, ngài ya m̀ lâu ngì-têu kóng ngài kho má-ke khièn-piang cho liá-têu sṳ-chhìn.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan