Bìoball air-loidhne

Lu-tet Ki 3 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Nâ-ngò-mî vi Lu-tet Chhìm Tui-siong

¹ Yû yit-ngit, Lu-tet ke kâ-ngiòng Nâ-ngò-mî tui kì kóng: “Ngài ke moi-é â, ngài yit-thin oi vi ngì chhìm ôn-sṳ̂n ke só-chhai, pûn ngì hen-fuk.

² Pô-â-sṳ̂ kám m̀-he ên-têu ke chhîn-chhu̍k mâ? Ngì sṳt lâu kì ke sṳ́-ńg khiung-ha cho-se. Thâng ngài kóng, kîm-am-pû kì voi chhai vò-thàng poi ma̍k-é.

³ Ngì hi sé-sṳ̂n, chhà yit-si̍t-é hiông-súi, chok chui-hó ke sâm-fu, yèn-heu to vò-thàng hi. Chúng-he m̀-hó pûn kì tî ngì chhai ke-vi, oi tén kì sṳ̍t-páu, lîm-la.

⁴ Oi chu-yi kì soi ke thi-fông; kì soi-thet, ngì chhiu hi, hiên-khôi kì kiok-hong ke phî, soi chhai ke-vi. Kì voi lâu ngì kóng yin-kôi cho má-ke.”

⁵ Lu-tet en-kóng: “Ngì án-ngiòng kóng, ngài chhiu cheu án-ngiòng cho.”

⁶ Só-yî, Lu-tet to vò-thàng hi, cheu kiâ kâ-ngiòng lâu kì kóng ke hi cho.

⁷ Pô-â-sṳ̂ sṳ̍t-páu, lîm-la, sîm-chhìn tông-hó, chhiu hi soi chhai ma̍k-tôi sùn. Lu-tet tiâm-tiâm-é hàng ko-hi, hiên-khôi kì kiok-hong ke phî, soi chhai ke-vi.

⁸ To pan-ya, Pô-â-sṳ̂ fut-yèn-kiên siáng ko-lòi, chón-sṳ̂n khon-tó yû yit-ke fu-ngìn-kâ soi chhai kì kiok-sùn, chhin chho̍k-kiâng,

⁹ chhiu mun: “Ngì he má-ngìn?” Kì kóng: “Sîn-sâng, ngài he Lu-tet, ngì ke sṳ́-ńg. Chhiáng ngì thó ngài, lâu ngài kiet-fûn, yîn-vi ngì he ngài ke chṳ-chhîn, yû ngi-vu cheu-ku ngài!”

¹⁰ Pô-â-sṳ̂ kóng: “Se-moi-é, ngien Song-chú su-fuk pûn ngì! Ngì yî-chhièn tui kâ-ngiòng chûng-sîm, liá-ha ngì tui ló-kûng ke kâ-chhu̍k só péu-hien ke chûng-sîm hàn-kha thai. Ngì pún-lòi cho-tet hi chhìm yit-ke heu-sâng-ngìn, put-kón kì yû-chhièn, mò-chhièn, chúng-he ngì mò án-ngiòng cho.

¹¹ Se-moi-é, liá-ha m̀-sṳ́ sèu! Ngì yêu-khiù má-ke, ngài chhiòn-phu voi vi ngì phan-hó, yîn-vi ngài pún-sàng ke ngìn chhiòn-phu tî ngì he yit-ke hièn-fi ke fu-ngìn-kâ.

¹² Ngài khok-sṳ̍t he ngì ke chṳ-chhîn, tui ngì yû ngi-vu, chúng-he nang-ngoi yû yit-sà pí ngài hàn-kha chhîn.

¹³ Kîm-am-pû ngì chhiu liù chhai liá-vi, thiên-kông chêu-sṳ̀n, ngài-têu khon kì hén tui ngì chhin chṳ-chhîn ke ngi-vu mò. Na-he kì hén, chhiu tông-hó; na-he kì m̀ hén, ngài chṳ́-tén yún-sên ke Song-chú fat-sṳ: Ngài yit-thin voi chhin liá-ke ngi-vu. Liá-ha ngì cho-tet liù chhai liá-vi, soi-to thiên-kông.”

¹⁴ Lu-tet chhiu soi chhai kì kiok-sùn. Chúng-he thiên hàn-màng kông, ngìn hàn ngin m̀-chhut kì ke sṳ̀, kì chhiu hong hí-lòi, yîn-vi Pô-â-sṳ̂ mò-oi pûn ngìn tî yû fu-ngìn-kâ lòi-to vò-thàng.

¹⁵ Pô-â-sṳ̂ tui kì kóng: “Thot-hâ ngì kâ-tén ke sâm, phû chhai liá-vi.” Kì chhiu cheu án-ngiòng cho. Pô-â-sṳ̂ chhiu tó chhâ-m̀-tô ngi-sṳ̍p kûng-kîn ke thai-ma̍k chhai sâm-táng-hong, pông kì piong chhai kiên-thèu-táng, yèn-heu chón sàng-tú hi.

¹⁶ Lu-tet chón-to vuk-hâ ke sṳ̀, kâ-ngiòng mun kì: “Ngài ke moi-é â, ngióng-pân?” Lu-tet chhiu chiông Pô-â-sṳ̂ vi kì só-cho ke chhiòn-phu lâu kâ-ngiòng kóng.

¹⁷ Lu-tet yu kóng: “Kì pûn ngài liá ngi-sṳ̍p kûng-kîn ke thai-ma̍k, yîn-vi kì lâu ngài kóng: ‘Cho-m̀-tet khûng-sú chón-to ngiâ kâ-ngiòng ke-vi.’ ”

¹⁸ Nâ-ngò-mî kóng: “Ngài ke moi-é â, m̀-sṳ́ chho̍k-kip, khon liá-khien sṳ ngióng-pân fat-chán. Pô-â-sṳ̂ kîm-pû-ngit mò phan-hó liá-sṳ thin-chho̍k m̀-voi hiet-khun.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan