Bìoball air-loidhne

Lu-tet Ki 1 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yî-li-mí-le̍t Chhiòn-kâ Sái-to Mô-ap

^1-2 Tông sṳ-sṳ̂ chhṳ-lî Yî-set-lie̍t ke-chham khì-kiên, thi-fông song fat-sên kî-fông. Yû yit-ke Yî-fap-thâ chhu̍k-ngìn, miàng ôn-to Yî-li-mí-le̍t, ngièn-lòi he̍t chhai Yù-thai ke Pak-li-hèn; kì tai-tén pû-ngiòng Nâ-ngò-mî lâu lióng-ke lai-é Mâ-lùn lâu Kî-lièn, chhiòn-kâ sái to Mô-ap hi, chhiam-sṳ̀ he̍t chhai ke-vi.

³ Heu-lòi Yî-li-mí-le̍t sí-thet, liù-hâ Nâ-ngò-mî lâu kì lióng-ke lai-é;

⁴ liá lióng-ke lai-é thó Mô-ap thi-fông ke se-moi-é — Ngò-ngí-pâ lâu Lu-tet. Thai-yok sṳ̍p-ngièn heu,

⁵ Mâ-lùn lâu Kî-lièn ya sí-thet, liù-hâ Nâ-ngò-mî, mò ló-kûng, ya mò lai-é.

Nâ-ngò-mî lâu Lu-tet Chón Pak-li-hèn

⁶ Nâ-ngò-mî hàn he̍t chhai Mô-ap ke sṳ̀, thâng-kóng Song-chú khon-ku Kì ke chṳ́-mìn, yí-kîn sṳ́ kì-têu yû sû-sṳ̀n, chhiu chún-phi lâu lióng-ke sîm-khiû lì-khôi Mô-ap chón ku-hiông hi.

⁷ Kì-têu khiung-ha hí-sṳ̂n oi chón Yù-thai, chúng-he chhai lu-song,

⁸ Nâ-ngò-mî tui lióng-ke sîm-khiû kóng: “Ngì lióng-sà chón moi-kâ hi hó nâ! Ngien Song-chú yung chhṳ̀-oi khoán-thai ngì-têu, chhiong ngì-têu hó khoán-thai ngài lâu yí-kîn sí-thet ke ngìn khiung-yong.

⁹ Ngien Song-chú sṳ́ ngì-têu yû kî-fi chai kiet-fûn, lióng-sà yû ôn-sṳ̂n ke só-chhai.” Yèn-heu, Nâ-ngò-mî chîm kì-têu. Lióng-ke sîm-khiû chhiu khôi-sâng thai-kieu,

¹⁰ tui kì kóng: “Mò-oi! Ngài-têu oi lâu ngì chón ngì pún-chhu̍k ke-vi hi.”

¹¹ Nâ-ngò-mî kóng: “Ngài ke moi-é â, ngì-têu hàn-he chón-hi nâ! Oi thèn ngài hi cho-má-ke nè? Ngài kám hàn-voi kiung lai-é lòi pûn ngì-têu cho ló-kûng mâ?

¹² Ngài ke moi-é â, chón-hi hó nâ! Ngài yí-kîn thet-ló, mò khó-nèn chai kiet-fûn lé. Chhiu-son ngài hàn-yû yit-si̍t-é hî-mong, kîm-am-pû chhiu kiet-fûn, chṳn-kîn kiung lai-é,

¹³ ngì-têu oi tén kì-têu chóng-thai sṳ̀n-ngìn he-mò? Ngì-têu kám nèn sú-tet-he̍t, m̀ ka ngìn mâ? Ngài ke moi-é â, m̀-hó án-ngiòng, liá he mò khó-nèn ke. Yîn-vi Song-chú hìn-fa̍t ngài, lièn-lui tó ngì-têu, ngài ya chhin sông-sîm.”

¹⁴ Kì-têu yu khôi-sâng thai-kieu. Ngò-ngí-pâ chîm kâ-ngiòng heu chhiu chón moi-kâ hi; chúng-he Lu-tet hàn-he m̀ phan-tet lì-khôi.

¹⁵ Nâ-ngò-mî tui kì kóng: “Lu-tet! Ngiâ-só yí-kîn chón-hi kiâ pún-chhu̍k lâu kì só pai ke sṳ̀n ke-vi hi lé. Ngì thèn kì chón-hi hó nâ!”

¹⁶ Chúng-he Lu-tet kóng: “Chhiáng m̀-hó ham ngài lì-khôi ngì. Mo̍k ham ngài chón-hi! Ngì to nai-vi, ngài ya to nai-vi; ngì he̍t nai-vi, ngài ya he̍t nai-vi; ngì ke mìn-chhu̍k chhiu-he ngài ke mìn-chhu̍k; ngì ke Song-ti chhiu-he ngài ke Song-ti.

¹⁷ Ngì sí chhai nai-vi, ngài ya sí chhai ke-vi, mài-chong chhai ke-vi. Chhù-liáu sí, chhie̍t-tui mò má-ke sṳ nèn sṳ́ ngài lâu ngì fûn-khôi! Na-he ngài poi-yok, ngien Song-chú chhûng-chhûng hìn-fa̍t ngài!”

¹⁸ Nâ-ngò-mî khon-tó Lu-tet án kiet-sîm oi thèn chhṳ-kâ hi, chhiu mò-chai khien kì.

¹⁹ Án-ngiòng, kì lióng-sà ki-siu̍k khiung-ha hàng, chhṳ̍t-to Pak-li-hèn. Kì-têu to Pak-li-hèn ke sṳ̀, chhiòn-sàng ke ngìn chhiu nau-hí-lòi. Ke-têu fu-ngìn-kâ chho̍k-kiâng to hêm-kóng: “Liá ton-chṳ̂n he Nâ-ngò-mî mâ?”

²⁰ Nâ-ngò-mî tui kì-têu kóng: “M̀-hó ham ngài Nâ-ngò-mî, oi ham ngài Mâ-lâ. Yîn-vi chhiòn-nèn ke Song-ti sṳ́ ngài miang pien tông khú.

²¹ Ngài chhut-hi ke sṳ̀ fu-chiuk, chúng-he Song-chú sṳ́ ngài khûng-sú chón-lòi. Cho-má-ke hàn oi ham ngài Nâ-ngò-mî nè? Song-chú chit-fa̍t ngài; Chhiòn-nèn-chá sṳ́ ngài su-khú.”

²² Liá chhiu-he Nâ-ngò-mî lâu kì ke Mô-ap sîm-khiû Lu-tet tui Mô-ap chón-lòi ke kîn-ko. Kì-têu chón-to Pak-li-hèn, tú-tú-hó he khôi-sṳ́ sû-kot thai-ma̍k ke sṳ̀-chiet.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan