Bìoball air-loidhne

Lu-kâ 9 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yâ-sû Chhâi-khién Sṳ̍p-ngi-ke Ho̍k-sâng
( Mâ-thai 10:1 , 5-15 ; Mâ-khó 6:7-13 )

¹ Yâ-sû seu-si̍p sṳ̍p-ngi-ke ho̍k-sâng lòi, su-pûn kì-têu nèn-li̍t lâu khièn-piang, kiuk-kúi pin yî-hó kok-chúng ke phiang,

² yèn-heu phai kì-têu chhut-hi chhòn Song-ti koet ke fuk-yîm, ya yî-chhṳ phiang-ngìn.

³ Kì lâu kì-têu kóng: “Ngì-têu chhut-ngoi ke sṳ̀, m̀-hó tai má-ke tûng-sî: M̀-hó tai koái-kun-é, m̀-hó tai lî-hàng-thoi, m̀-hó tai sṳ̍t-vu̍t ya-he chhièn, ya m̀-hó kâ-tai yit-liâng nui-sâm.

⁴ Mò-lun nai-kâ ngìn hén chiap-thai ngì-têu, chhiu he̍t chhai ke-vi, chhṳ̍t-to ngì-têu lì-khôi ke só-chhai.

⁵ Na-he ke-vi ke ngìn m̀ chiap-thai ngì-têu, ngì-têu chhiu lì-khôi ke sàng-sṳ, ya oi chiông kiok-hong ke nài-fún tém-thet, lòi péu-sṳ tui kì-têu ke kín-ko.”

⁶ Ho̍k-sâng chhiu chhut-hi, hàng-phien kok hiông-chhûn, tak só-chhai siên-chhòn fuk-yîm pin yî-phiang.

Hî-li̍t ke Chhâu-fàn
( Mâ-thai 14:1-12 ; Mâ-khó 6:14-29 )

⁷ Kâ-li-li ke Hî-li̍t-vòng thâng-tó só fat-sên ke yit-chhiet sṳ, chhiu chhin chhâu-fàn; yîn-vi yû-ngìn kóng, he Sṳ̂-sé Yok-hon fán-sâng;

⁸ yû-ngìn kóng, he Yî-li-â hién-hien; ya yû-ngìn kóng, he kú-sṳ̀-thoi ke yit-ke siên-tî fán-sâng lé.

⁹ Hî-li̍t kóng: “Yok-hon yí-kîn pûn ngài chám-thèu, liá-ke ngìn yu he má-ngìn nò? Ngióng-pân ngài thâng-tó án-tô koân-he kì ke sṳ-chhìn?” Só-yî kì yit-chhṳ̍t sióng-oi kien Yâ-sû.

Pûn Ńg-chhiên Ngìn Sṳ̍t-páu
( Mâ-thai 14:13-21 ; Mâ-khó 6:30-44 ; Yok-hon 6:1-14 )

¹⁰ Sṳ́-thù to-chón-lòi, chiông kì-têu só cho ke yit-chhiet chhiòn-phu po-ko Yâ-sû. Yâ-sû chhiu tai-tén kì-têu, tiâm-tiâm-é hi-to miàng ôn-to Pak-soi-thai ke sàng-sṳ.

¹¹ Chung-ngìn yit tî, chhiu thèn-tén kì hi. Yâ-sû chhiu fôn-ngiàng kì-têu, tui kì-têu kóng-lun koân-he Song-ti koet ke sṳ, yu yî-hó ke-têu sî-yeu yî ke ngìn.

¹² Ngit-thèu lo̍k-sân ke sṳ̀, sṳ̍p-ngi-ke ho̍k-sâng lòi kien Yâ-sû, tui kì kóng: “Chhiáng ham thai-kâ lì-khôi, hó pûn kì-têu hi fu-khiun ke chhûn-chông chhìm sṳ̍t ke tûng-sî lâu he̍t ke só-chhai, yîn-vi liá-vi chhin phiên-phit.”

¹³ Chúng-he Yâ-sû tui kì-têu kóng: “Ngì-têu pûn kì-têu sṳ̍t!” Ho̍k-sâng kóng: “Ngài-têu chṳ́-yû ńg-chak piáng lâu lióng-mî ǹg. Kám-kóng ngì oi ngài-têu hi mâi pûn liá án thai-khiùn ke ngìn sṳ̍t mâ?”

¹⁴ (Ke-têu ngìn, tân-chhiang nàm-ngìn chhiu yok-yû ńg-chhiên sà.) Yâ-sû tui ho̍k-sâng kóng: “Hêm chung-ngìn yit-phài yit-phài chhô-tén, tak-phài yok ńg-sṳ̍p-sà.”

¹⁵ Ho̍k-sâng cheu kì ke fa hi cho, hêm chung-ngìn chhô-hâ-hi.

¹⁶ Yâ-sû chiông ńg-chak piáng lâu lióng-mî ǹg nâ-hí-lòi, ngo-thèu mong-thiên, kám-chhia Song-ti, yèn-heu pak-khôi, kâu-pûn ho̍k-sâng; ho̍k-sâng chhiu pûn-pûn chung-ngìn.

¹⁷ Thai-kâ chhiòn-phu sṳ̍t-to páu; ho̍k-sâng chiông só chhûn ke sui-é ngiâm-hí-lòi, chông-mân sṳ̍p-ngi-chak làm-è.

Pí-tet Ngin Yâ-sû He Kî-tuk
( Mâ-thai 16:13-19 ; Mâ-khó 8:27-29 )

¹⁸ Yû yit-pái, Yâ-sû tân-chhiang yit-sà khì-tó ke sṳ̀, ho̍k-sâng ya thùng kì chhai ke-vi. Kì mun kì-têu kóng: “Chung-ngìn kóng ngài he má-ngìn?”

¹⁹ Kì-têu en-kóng: “Yû-têu kóng ngì he Sṳ̂-sé Yok-hon; yû-têu kóng ngì he Yî-li-â; ya yû-têu kóng ngì he kú-sṳ̀-thoi ke yit-ke siên-tî fán-sâng lé.”

²⁰ Yâ-sû yu mun kì-têu kóng: “Ngì-têu nè? Ngì-têu kóng ngài he má-ngìn?” Pí-tet kóng: “Song-ti sat-li̍p ke Kî-tuk!”

Yâ-sû Yi-ngièn Chhṳ-kâ ke Sí lâu Fu̍k-fa̍t
( Mâ-thai 16:20-28 ; Mâ-khó 8:30–9:1 )

²¹ Yèn-heu, Yâ-sû ngiàm-ngiàm kín-ko kì-têu, m̀-hó chiông liá-khien sṳ tui phe̍t-ngìn kóng.

²² Chiap-tén, kì yu kóng: “Ngìn-chṳ́ yit-thin oi su chhin-tô ke khú-nan; kì voi pûn chóng-ló, chi-sṳ̂-chóng lâu kîn-ho̍k kau-sṳ̂ hi-chhie̍t, ya voi pûn-ngìn sat-hoi, chúng-he thi-sâm-ngit kì voi fu̍k-fa̍t.”

²³ Yâ-sû yu tui thai-kâ kóng: “Sióng-oi thèn ngài ke ngìn, chhiu oi piong-thet chhṳ-kâ, tak-ngit khià-hí kì ke sṳ̍p-sṳ-ka lòi thèn ngài.

²⁴ Yîn-vi sióng-oi kiu chhṳ-kâ sâng-miang ke ngìn, fán-chón voi sóng-sṳt sâng-miang; vi-tó ngài sóng-sṳt sâng-miang ke ngìn, fán-chón voi tet-tó sâng-miang.

²⁵ Ngìn na-he chhon-tó chhiòn sṳ-kie, chúng-he sóng-sṳt ya-he sún-hoi chhṳ-kâ ke sâng-miang, yû má-ke lu-yung nè? Tông-yèn mò!

²⁶ Mò-lun má-ngìn, yîn-vi ngài lâu ngài ke kau-hiun kám-kok kien-seu, Ngìn-chṳ́ chhai kì lâu kiâ Pâ pin sṳn thiên-sṳ́ ke yùng-kông chûng kong-lìm ke-sṳ̀, ya oi khon kì cho kien-seu ke ngìn.

²⁷ Ngài sṳ̍t-chhai lâu ngì-têu kóng, khî chhai liá-vi ke ngìn, yû-têu chhai sí yî-chhièn voi khon-tó Song-ti ke chú-khièn sṳ̍t-hien!”

Kói-pien Hìn-siong
( Mâ-thai 17:1-8 ; Mâ-khó 9:2-8 )

²⁸ Kóng liá-têu fa yok pat-ngit heu, Yâ-sû tai-tén Pí-tet, Yok-hon lâu Ngâ-kok hi sân-táng khì-tó.

²⁹ Yâ-sû khì-tó ke sṳ̀, kì ke mien-mau kói-pien, sâm pha̍k-to fat-kông.

³⁰ Fut-yèn, yû lióng-ke ngìn chhut-hien thùng kì kóng-fa, chhiu-he Mô-sî lâu Yî-li-â.

³¹ Kì lióng-sà chhai yùng-kông chûng chhut-hien, thùng Yâ-sû kóng-lun kì oi chhai Yâ-lu-sat-lâng yung sí lòi vàn-sṳ̀n ke sṳ.

³² Pí-tet lâu lióng-ke thùng-phân yí-kîn soi-thet-hi; kì-têu chhîn-siáng heu, chhiu khon-tó Yâ-sû ke yùng-yeu lâu thùng kì khiung-ha khî-tén ke lióng-ke ngìn.

³³ Ke lióng-ke ngìn oi lì-khôi Yâ-sû ke sṳ̀, Pí-tet tui Yâ-sû kóng: “Sîn-sâng, ngài-têu chhai liá-vi chhin hó! Ngài-têu lòi tap sâm-kiên liàu-è, yit-kiên pûn ngì, yit-kiên pûn Mô-sî, yit-kiên pûn Yî-li-â.” (Kì chṳn-kîn m̀-tî chhṳ-kâ he kóng má-ke.)

³⁴ Kì hàn kóng-tén fa ke sṳ̀, yû yùn chhut-hien, châ-tén kì-têu. Kì-têu pûn yùn pâu-tén ke sṳ̀, ho̍k-sâng chhiu chhin chho̍k-kiâng.

³⁵ Fut-yèn yû sâng tui yùn-chûng chhòn chhut-lòi, kóng: “Liá he Ngài ke Lai-é, he Ngài só kién-sién ke. Ngì-têu oi thâng-chhiùng kì!”

³⁶ Ke sâng-yîm thìn-thet yî-heu, chṳ́-yû Yâ-sû yit-sà chhai ke-vi. Chhai ke-têu ngit-è chûng, ho̍k-sâng tiâm-tiâm m̀ sṳt tui má-ngìn kóng-hí kì-têu só khon-tó ke sṳ.

Yî-hó Pûn Kúi Fu-sṳ̂n ke Se-ngìn-è
( Mâ-thai 17:14-18 ; Mâ-khó 9:14-27 )

³⁷ Thi-ngi-ngit, kì-têu tui sân-táng hâ-lòi ke sṳ̀, yû yit thai-khiùn ngìn lòi ngiàng-chiap Yâ-sû.

³⁸ Ngìn-khiùn chûng, yû yit-ke ngìn hêm-kóng: “Sîn-sâng, khiù ngì kiu ngâ lai-é, yîn-vi ngài chṳ́-yû kì yit-ke lai-é!

³⁹ Sià-lìn kûng-kit kì ke sṳ̀-chiet, sṳ́ kì fut-yèn-kiên chhin hêm, hoi kì kûi-sṳ̂n chhû-kîn, choi kín pu̍t-phô. Sià-lìn sòng-sòng án-ngiòng sông-hoi kì, m̀-hén piong kì so̍t!

⁴⁰ Ngài khiù ngiâ ho̍k-sâng kiuk liá-ke sià-lìn chéu, chúng-he kì-têu mò phan-fap.”

⁴¹ Yâ-sû en-kóng: “Ngì-têu liá sṳ-thoi ke ngìn ngióng-pân án mò sin-sîm, án fú-phai! Ngài hàn oi chhai ngì-têu liá-vi kí-kiú nè? Hàn oi ngiûn-nai ngì-têu kí-kiú nè?” Chiap-tén, kì tui ke-ngìn kóng: “Chiông ngiâ lai-é tai-lòi liá-vi!”

⁴² Se-ngìn-è hàng-tén lòi ke sṳ̀, kúi chiông kì phiâng-lo̍k thi-song, sṳ́ kì kín chhû-kîn. Yâ-sû chhiu chit-phi ke sià-lìn, yî-hó se-ngìn-è, chiông kì kâu-vàn kiâ-pâ.

⁴³ Thai-kâ lûng-chúng chhin hî-khì Song-ti ke thai-nèn. Thai-kâ tui Yâ-sû só-cho ke yit-chhiet hàn chhai hî-khì ke sṳ̀, Yâ-sû yu tui kiâ ho̍k-sâng kóng:

Yâ-sû Chai Yi-ngièn Chhṳ-kâ ke Sí
( Mâ-thai 17:22-23 ; Mâ-khó 9:30-32 )

⁴⁴ “M̀-hó m̀ ki-tet ngài oi lâu ngì-têu kóng ke fa: Ngìn-chṳ́ voi pûn-ngìn kâu chhai ngìn ke sú-chûng.”

⁴⁵ Chúng-he kì-têu m̀-voi liáu-kié liá fa ke yi-sṳ; yîn-vi hàm-yi put-mìn, kì-têu mò fap-thu sióng-siong. Kì-têu yu m̀-kám mun kì to-tái kóng má-ke.

Má-ngìn Chui Ví-thai
( Mâ-thai 18:1-5 ; Mâ-khó 9:33-37 )

⁴⁶ Ho̍k-sâng fu-siông ngi-lun, kì-têu tông-chûng to-tái má-ngìn chui ví-thai.

⁴⁷ Yâ-sû tî kì-têu sîm-chûng só-sióng ke, chhiu ham yit-ke se-ngìn-è lòi, pûn kì khî chhai chhṳ-kâ ke sùn-thèu,

⁴⁸ yèn-heu tui kì-têu kóng: “Vi-tó ngài ke miàng chiap-thai liá se-ngìn-è ke, chhiu-he chiap-thai ngài; chiap-thai ngài ke, chhiu-he chiap-thai ke chhâi ngài lòi ke. Ngì-têu tông-chûng, má-ngìn he chui mì-se ke, má-ngìn chhiu-he chui ví-thai ke.”

Fán-tui Ya-he Chan-sṳ̀n
( Mâ-khó 9:38-40 )

⁴⁹ Yok-hon tui Yâ-sû kóng: “Sîn-sâng, ngài-têu khon-tó yû-ngìn fung ngì ke miàng kiuk-kúi, ngài-têu chhiu kim-chṳ́ kì, yîn-vi kì m̀-he thèn ngài-têu ke.”

⁵⁰ Yâ-sû chhiu tui kì kóng: “M̀-hó kim-chṳ́ kì, yîn-vi m̀-he fán-tui ngì-têu ke, chhiu-he chan-sṳ̀n ngì-têu ke.”

M̀ Chiap-thai Yâ-sû ke Chhûn-chông

⁵¹ Yâ-sû su-chiap sṳ̂n-thiên ke ngit-è voi to lé, kì kiet-sîm oi hi Yâ-lu-sat-lâng,

⁵² chhiu phai sṳ́-chá siên hàng. Kì-têu hi-to Sat-mâ-li-â ke yit-chak chhûn-chông, oi vi Yâ-sû chún-phi.

⁵³ Chúng-he ke thi-fông ke ngìn m̀ fôn-ngiàng Yâ-sû, yîn-vi kì oi hi Yâ-lu-sat-lâng.

⁵⁴ Kiâ ho̍k-sâng Ngâ-kok lâu Yok-hon khon-tó liá-ke chhìn-hìn, chhiu kóng: “Chú â, ngì oi ngài-têu hêm thiên-táng ke fó hâ-lòi sêu-me̍t kì-têu mò?”

⁵⁵ Yâ-sû chón-sṳ̂n chit-phi kì-têu.

⁵⁶ Kì-têu chhiu hi phe̍t ke chhûn-chông.

Oi Thèn Yâ-sû ke Ngìn
( Mâ-thai 8:19-22 )

⁵⁷ Chhai kì-têu só-hàng ke lu-song, yû yit-ke ngìn tui Yâ-sû kóng: “Ngì mò-lun hi-to nai-vi, ngài yit-thin oi thèn ngì.”

⁵⁸ Yâ-sû kóng: “Fù-lì yû lùng, tiâu-é yû teu, chúng-he Ngìn-chṳ́ lièn thiap-thèu ke só-chhai ya mò.”

⁵⁹ Yâ-sû yu tui nang-ngoi yit-ke ngìn kóng: “Ngì lòi thèn ngài.” Chúng-he ke-ngìn kóng: “Chú â, chún ngài siên chón-hi mài-chong ngâ-pâ.”

⁶⁰ Yâ-sû kóng: “Pûn sí-ngìn hi mài-chong kì-têu ke sí-ngìn! Na-he ngì, ngì oi hi chhòn Song-ti koet ke fuk-yîm.”

⁶¹ Yu yû yit-ke ngìn kóng: “Chú â, ngài oi thèn ngì, chúng-he chún ngài siên chón-hi thùng vuk-hâ-ngìn chhṳ̀-phe̍t.”

⁶² Yâ-sû tui kì kóng: “Sú hon-tén lài-è kâng-thièn yu kín-khon heu-poi ke ngìn, khâm-m̀-tet cho Song-ti koet ke ngìn.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan