Bìoball air-loidhne

« Roimhe

Air adhart »

Lu-kâ 22 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Sat-hoi Yâ-sû ke Yîm-mèu
( Mâ-thai 26:1-5 ; Mâ-khó 14:1-2 ; Yok-hon 11:45-53 )

¹ Chhù-kau-chiet (yu ôn-to Phàn-ko-chiet) voi to lé.

² Chi-sṳ̂-chóng lâu kîn-ho̍k kau-sṳ̂ yîn-vi kiâng mìn-chung, chhiu yîm-mèu oi ngióng-pân sat-hoi Yâ-sû.

Yù-thai Chhut-mai Yâ-sû
( Mâ-thai 26:14-16 ; Mâ-khó 14:10-11 )

³ Ke-sṳ̀, Sat-tan chin-ngi̍p Kâ-lio̍k-ngìn Yù-thai ke sîm. (Yù-thai he Yâ-sû sṳ̍p-ngi-ke ho̍k-sâng ke yit-ke.)

⁴ Yù-thai hi thùng chi-sṳ̂-chóng lâu sṳn-thien ke kín-ví-chóng chhâm-siòng, oi ngióng-pân chiông Yâ-sû kâu-pûn kì-têu.

⁵ Kì-têu fî-sòng fôn-hí, yu tap-yin nâ chhièn pûn kì.

⁶ Yù-thai chhiu thùng-yi, khôi-sṳ́ chhìm kî-fi, oi chhai mò chung-ngìn chhai-chhòng ke sṳ̀-chiet chhut-mai Yâ-sû.

Chún-phi Phàn-ko-chiet ke Vân-chhôn
( Mâ-thai 26:17-25 ; Mâ-khó 14:12-21 ; Yok-hon 13:21-30 )

⁷ Chhù-kau-chiet khì-kiên, chhṳ̀ Phàn-ko-chiet kâu-yòng ke-ngit to lé.

⁸ Yâ-sû phai Pí-tet lâu Yok-hon chhut-hi, fûn-fu kì-têu kóng: “Ngì-têu hi thoi ngài-têu chún-phi Phàn-ko-chiet ke vân-chhôn.”

⁹ Kì-têu mun-kóng: “Ngì oi ngài-têu chhai nai-vi chún-phi?”

¹⁰ Yâ-sû kóng: “Ngì-têu ngi̍p-sàng hi, voi tù-tó yit-ke ngìn tai-tén yit-kon súi; ngì-têu chhiu thèn-tén kì, to kì ngi̍p-hi ke vuk-tú,

¹¹ mun ke kâ ke chú-ngìn kóng: ‘Sîn-sâng kóng: Ngài lâu ngài ke ho̍k-sâng sṳ̍t Phàn-ko-chiet vân-chhôn ke hak-thâng chhai nai-vi?’

¹² Kì voi tai ngì-têu hi khon lèu-táng yit-kiên pu-chṳ-hó ke thai fòng-kiên; ngì-têu chhiu chhai ke-vi chún-phi.”

¹³ Kì-têu chhiu hi; só tù-tó ke chhiòn-phu lâu Yâ-sû tui kì-têu kóng ke khiung-yong; kì-têu chhiu chhai ke-vi chún-phi Phàn-ko-chiet ke vân-chhôn.

Chú ke Vân-chhôn
( Mâ-thai 26:26-30 ; Mâ-khó 14:22-26 ; Kô-lìm-tô Chhièn-sû 11:23-25 )

¹⁴ Sṳ̍t-ya ke sṳ̀-kiên to lé, Yâ-sû ngi̍p-hi, sṳ́-thù ya thùng kì khiung-ha chhô-chok.

¹⁵ Kì tui kì-têu kóng: “Ngài yit-chhṳ̍t hî-mong chhai su-nan yî-chhièn thùng ngì-têu khiung-ha sṳ̍t liá Phàn-ko-chiet ke vân-chhôn.

¹⁶ Ngài lâu ngì-têu kóng, mò tén-to liá vân-chhôn ke yi-ngi sṳ̍t-hien chhai Song-ti koet, ngài chhie̍t-tui m̀-voi chai sṳ̍t liá-ke vân-chhôn.”

¹⁷ Yèn-heu, Yâ-sû chiap-ko pî-é, kám-chhia Song-ti heu, kóng: “Ngì-têu nâ-hi, thai-kâ pûn-tén lîm.

¹⁸ Ngài lâu ngì-têu kóng, chhiùng-kîm yî-heu, mò tén-to Song-ti ke koet lìm-to, ngài chhie̍t-tui m̀-voi chai lîm liá phù-thò-chiú.”

¹⁹ Chiap-tén, kì nâ-hí piáng-è, kám-chhia Song-ti heu, chhiu pak-khôi, pûn-pûn kì-têu, kóng: “Liá he ngài ke sṳ̂n-thí, he vi ngì-têu hî-sên ke; ngì-têu oi án-ngiòng hàng, lòi ki-ngiam ngài.”

²⁰ Sṳ̍t-páu heu, kì cheu-yong nâ-hí pî-é, kóng: “Liá pî he Song-ti ke sîn-yok, he yung ngài vi ngì-têu liù-chhut ke hiet só sat-li̍p ke.

²¹ “Ngì-têu khon, chhut-mai ngài ke ngìn thùng ngài khiung-chok!

²² Ngìn-chṳ́ khok-sṳ̍t oi cheu Song-ti ke ôn-phài lòi su-hoi, chúng-he chhut-mai kì ke ngìn yû châi-fo lé!”

²³ Kì-têu chhiu pí-chhṳ́ kín-mun, to-tái he má-ngìn oi cho liá-khien sṳ.

Ho̍k-sâng Chên-lun Má-ngìn Chui-thai

²⁴ Ho̍k-sâng chûng-kiên fat-sên chên-lun, to-tái má-ngìn chui-thai.

²⁵ Yâ-sû tui kì-têu kóng: “Ngoi-pâng-ngìn ke kiûn-vòng yû khièn kón-hot kì-têu; kì-têu ke thúng-chhṳ-chá yu pûn-ngìn chhṳ̂n-cho kiu-sên;

²⁶ chúng-he ngì-têu m̀-he án-ngiòng. Ngì-têu tông-chûng chui-thai ke, fán-chón oi chhiong chui-se ke; cho liâng-chhiu ke, yin-kôi chhiong phu̍k-ngìn.

²⁷ He chhô-chok ke kha thai, ya-he fu̍k-sṳ kì ke kha thai nè? Kám m̀-he chhô-chok ke kha thai mâ? Chúng-he, ngài chhai ngì-têu chûng-kiên he fu̍k-sṳ ngìn ke.

²⁸ “Ngài su mò-lien ke sṳ̀, ngì-têu yit-chhṳ̍t thùng ngài khiung-ha.

²⁹ Ngâ Pâ yû su ngài yit-ke koet, liá-ha, ngài khiung-yong ya oi chiông liá-koet ke thúng-chhṳ-khièn su-pûn ngì-têu.

³⁰ Ngì-têu oi chhai ngài ke koet tî-poi thùng ngài khiung-ha lîm-sṳ̍t, ya oi chhô chhai pó-chho táng-kô sṳ́m-phan Yî-set-lie̍t ke sṳ̍p-ngi kî-chhu̍k.”

Yâ-sû Yi-ngièn Pí-tet M̀ Ngin Kì
( Mâ-thai 26:31-35 ; Mâ-khó 14:27-31 ; Yok-hon 13:36-38 )

³¹ Yâ-sû yu kóng: “Sî-mùn, Sî-mùn! Sat-tan yí-kîn yêu-khiù sṳ-tham ngì-têu, chhiong kâng-chung-ngìn chhî ma̍k-é án-ngiòng lòi chhî ngì-têu.

³² Chúng-he, ngài yí-kîn vi ngì khì-tó, pûn ngì ke sin-sîm m̀-voi mò-thet hi. Ngì to-chón-lòi kûi ngài yî-heu, chhiu oi kiên-ku ngì ke-têu hiûng-thi.”

³³ Pí-tet kóng: “Chú â, ngài kâm-ngien thèn ngì hi chhô-kâm, thùng ngì khiung-ha sí!”

³⁴ Yâ-sû kóng: “Pí-tet, ngài lâu ngì kóng, kîm-pû-ngit kiê-é thài yî-chhièn, ngì voi sâm-pái kóng ngì m̀-sṳt ngài.”

Chhièn-pâu, Lî-hàng-thoi, Tô-é

³⁵ Yâ-sû yu tui kì-têu kóng: “Thèu-pái, ngài phai ngì-têu chhut-hi, ham ngì-têu m̀-hó tai chhièn-pâu, m̀-hó tai lî-hàng-thoi ya-he hài-è, ngì-têu sṳt khiam má-ke mò?” Kì-têu en-kóng: “M̀-sṳt.”

³⁶ Yâ-sû kóng: “Chúng-he liá-ha, yû chhièn-pâu ya-he lî-hàng-thoi ke, oi tai-tén; mò tô-é ke, oi mai sâm hi mâi yit-kî.

³⁷ Ngài lâu ngì-têu kóng, Sṳn-kîn só kóng: ‘Kì sṳ̀n-tâm chhui-ngìn ke miang-yun’ ke-ki fa, yit-thin oi sṳ̍t-hien chhai ngài ke sṳ̂n-song. Sṳ-sṳ̍t-song, só-yû koân-he ngài ke ki-chai yí-kîn yin-ngiam-tén lé.”

³⁸ Ho̍k-sâng kóng: “Chú â, ngì khon, liá-vi yû lióng-kî tô-é.” Yâ-sû kóng: “La lé!”

Yâ-sû Chhai Kám-lám-sân Khì-tó
( Mâ-thai 26:36-46 ; Mâ-khó 14:32-42 )

³⁹ Yâ-sû chhut-sàng, cheu-sòng hi Kám-lám-sân; ho̍k-sâng ya thèn-tén kì hi.

⁴⁰ To ke só-chhai, Yâ-sû tui kì-têu kóng: “Ngì-têu oi khì-tó, miên-tet ham-lo̍k mì-fe̍t.”

⁴¹ Yèn-heu, Yâ-sû lì-khôi kì-têu, yok yû te̍p yit-chak sa̍k-thèu án yén, khúi hâ-hi khì-tó,

⁴² kóng: “Â-pâ â, Ngì na-he hén, chhiáng chiông liá-ke khú-pî sái-chéu; chúng-he, m̀-hó cheu ngài ke yi-sṳ, oi sṳ̀n-chhiòn Ngì ke chṳ́-yi.”

⁴³ Yû yit-ke thiên-sṳ́ tui thiên-táng hiong kì hién-hien, lòi kâ-thiâm kì ke li̍t-liong.

⁴⁴ Chhai khi̍t thung-khú chṳ̂ chûng, Yâ-sû hàn-kha pet-chhiet khì-tó; kì ke hon-súi chhiong thai-tiám ke hiet tit-tén lo̍k thi-nài.

⁴⁵ Khì-tó heu, Yâ-sû hong-hí-lòi, chón-to ho̍k-sâng ke-vi, fat-hien kì-têu yù-sông ko-thu chhiu soi-thet-hi.

⁴⁶ Kì tui kì-têu kóng: “Ngì-têu cho-má-ke soi-thet-hi nè? Hong-hí-lòi, oi khì-tó, miên-tet ham-lo̍k mì-fe̍t.”

Yâ-sû Pûn-ngìn Chok-hi
( Mâ-thai 26:47-56 ; Mâ-khó 14:43-50 ; Yok-hon 18:2-11 )

⁴⁷ Yâ-sû hàn kóng-tén fa ke sṳ̀, yû yit-khiùn ngìn lòi-to. Sṳ̍p-ngi-ke ho̍k-sâng chûng ke Yù-thai chhai thèu-chhièn tai-lu, kì chin-chhièn oi chîm Yâ-sû.

⁴⁸ Yâ-sû tui kì kóng: “Yù-thai, ngì yung chîm ngài lòi chhut-mai Ngìn-chṳ́ he-mò?”

⁴⁹ Thùng Yâ-sû khiung-ha ke ho̍k-sâng khon-tó liá-ke chhìn-hìn, chhiu kóng: “Chú â, ngài-têu cho-tet sṳ́ tô-é mò?”

⁵⁰ Khì-chûng yit-ke pâng-chhut tô-é, tui thai-chi-sṳ̂ ke phu̍k-ngìn phiak-ko-hi, siok-thet kì yu-phién ke ngí-kûng.

⁵¹ Yâ-sû kóng: “Mo̍k chai thûng-sú!” Thèn-tén, kì chhûn-sú miâ ke-ngìn ke ngí-kûng, yî-hó kì.

⁵² Yèn-heu, Yâ-sû tui ke-têu lòi chok kì ke chi-sṳ̂-chóng, sṳn-thien ke kín-ví-chóng, lâu chóng-ló kóng: “Ngì-têu tai-tén tô-é lâu kun-é chhut-lòi chok ngài, khon ngài cho khiòng-tho he-mò?

⁵³ Ngài tak-ngit thùng ngì-têu khiung-ha chhai sṳn-thien-tú, ngì-têu pin mò ha-sú chok ngài; chúng-he, liá-ha he ngì-têu vàng-hàng ke sṳ̀-chiet, vû-am chóng-khièn lé.”

Pí-tet M̀ Ngin Yâ-sû
( Mâ-thai 26:57-58 , 69-75 ; Mâ-khó 14:53-54 , 66-72 ; Yok-hon 18:12-18 , 25-27 )

⁵⁴ Kì-têu chok-tén Yâ-sû, tai kì hi thai-chi-sṳ̂ ke vuk-tú; Pí-tet yén-yén thèn-tén hi.

⁵⁵ Kì-têu chhai thìn-yen-tú hí yit-tôi fó, thai-kâ vì-tén fó chhô-tén, Pí-tet ya chhô chhai kì-têu chûng-kiên.

⁵⁶ Yû yit-ke sṳ́-ńg khon-tó Pí-tet chhô chhai ke-vi phoi-fó, chhiu chu-muk khon-tén kì, kóng: “Liá-ke ngìn ya he thùng kì khiung-ha ke.”

⁵⁷ Pí-tet féu-ngin kóng: “Fu-ngìn-kâ, ngài m̀ sṳt kì!”

⁵⁸ Ko mò kí-kiú, yu yû-ngìn chu-yi-tó kì, kóng: “Ngì me he kì-têu tông-chûng ke yit-ke.” Pí-tet kóng: “Sîn-sâng, ngài m̀-he!”

⁵⁹ Chhâ-m̀-tô yit-tiám-chûng heu, nang-ngoi yû yit-ke ngìn yung kiên-thin ke khiéu-hi kóng: “Chhie̍t-tui m̀-voi chhâ, kì me he thùng ke-ngìn khiung-ha ke, yîn-vi kì he Kâ-li-li-ngìn!”

⁶⁰ Chúng-he Pí-tet kóng: “Ngì liá-ke ngìn â, ngài m̀-tî ngì kóng má-ke!” Kì ke fa hàn-màng kóng-so̍t, kiê-é chhiu thài.

⁶¹ Chú chón-sṳ̂n, chu-muk khon Pí-tet; Pí-tet chang sióng-hí Chú tui kì só-kóng ke fa: “Kîm-pû-ngit kiê-é thài yî-chhièn, ngì voi sâm-pái m̀ ngin ngài.”

⁶² Pí-tet chhiu chéu-chhut-hi, kieu-to fî-sòng sông-sîm.

Yâ-sû Pûn-ngìn Met-sa pin Vú-yu̍k
( Mâ-thai 26:67-68 ; Mâ-khó 14:65 )

⁶³ Chóng Yâ-sû ke ngìn met-sa kì, tá kì;

⁶⁴ êm-tén kì ke muk-chû, mun kì kóng: “Siên-tî â, chhṳ-thòn-khon, he má-ngìn tá ngì?”

⁶⁵ Kì-têu yu kóng chhin-tô fa lòi vú-yu̍k kì.

Yâ-sû Chhai Ngi-fi Su Sṳ́m-phan
( Mâ-thai 26:59-66 ; Mâ-khó 14:55-64 ; Yok-hon 18:19-24 )

⁶⁶ Thiên-kông ke sṳ̀, Yù-thai-ngìn ke chóng-ló, chi-sṳ̂-chóng, lâu kîn-ho̍k kau-sṳ̂ chhiòn-phu chhi-si̍p khiung-ha, yèn-heu tai Yâ-sû to kì-têu ke ngi-fi hi.

⁶⁷ Kì-têu mun kì kóng: “Lâu ngài-têu kóng, ngì he m̀-he Kî-tuk?” Kì en-kóng: “Ngài chhiu-he lâu ngì-têu kóng, ngì-têu ya m̀-voi siông-sin;

⁶⁸ na-he ngài mun ngì-têu, ngì-têu me voi m̀ fì-tap.

⁶⁹ Chúng-he, chhiùng-kîm yî-heu, Ngìn-chṳ́ oi chhô chhai chhiòn-nèn Song-ti ke yu-phién.”

⁷⁰ Thai-kâ kóng: “Án-ngiòng, ngì he Song-ti ke Lai-é lô?” Yâ-sû kóng: “Ngài he, liá he ngì-têu kóng ke!”

⁷¹ Kì-têu chhiu kóng: “Ngài-têu kám hàn oi-sṳ́ khì-thâ ke chṳn-kí nè? Ngài-têu yí-kîn thâng-tó kì chhîn-khiéu kóng ke fa lé!”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan