Bìoball air-loidhne

« Roimhe

Air adhart »

Lu-kâ 18 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Koá-fu lâu Fap-kôn ke Pí-yi

¹ Yâ-sû tui ho̍k-sâng kóng yit-ke pí-yi, kâu kì-têu oi sòng-sòng khì-tó, m̀-hó fôi-sîm.

² Kì kóng: “Mêu-sàng yû yit-ke fap-kôn, kì m̀ kiâng Song-ti, ya mò chûn-chhung ngìn.

³ Ke sàng-nui yû yit-ke koá-fu, sòng-sòng hi chhìm kì, kóng: ‘Ngài yû yit-ke tui-thi̍t, khiù ngì chú-chhṳ̀ kûng-tho, thoi ngài sṳ̂n-yên.’

⁴ Liá fap-kôn yit-chhṳ̍t m̀-tap kì, chúng-he heu-lòi chhiu sióng: ‘Ngài sûi-yèn m̀ kiâng Song-ti, ya mò chûn-chhung ngìn,

⁵ chúng-he liá-ke koá-fu kín-lòi chhàu ngài, ngài hàn-he thoi kì chhut-thèu kha-yàng, miên-tet kì sòng-sòng lòi chhàn ngài!’ ”

⁶ Chú ki-siu̍k kóng: “Liá put-ngi ke fap-kôn só-kóng ke fa, ngì-têu thâng khon-é!

⁷ Song-ti ke sién-mìn ngit-ya tui Kì khì-khiù, Kì kám voi m̀ thoi kì-têu sṳ̂n-yên mâ? Kì kám voi ngiûn-tén m̀-tap kì-têu mâ?

⁸ Ngài lâu ngì-têu kóng, Kì yit-thin voi chhin-kiak thoi kì-têu sṳ̂n-yên. Mun-thì he Ngìn-chṳ́ lòi ke sṳ̀, chhai sṳ-kiên kám chhìm tet-tó án-ngiòng ke sin-sîm mâ?”

Fap-li-soi-ngìn lâu Soi-vu-yèn ke Pí-yi

⁹ Yâ-sû yu sat nang-ngoi yit-ke pí-yi, lòi kau-hiun ke-têu khok-sin chhṳ-kâ he ngi-ngìn yu khon-khiâng phe̍t-sà ke ngìn. Kì kóng:

¹⁰ “Yû lióng-ke ngìn hi sṳn-thien khì-tó: Yit-ke he Fap-li-soi-ngìn, yit-ke he soi-vu-yèn.

¹¹ Ke Fap-li-soi-ngìn ngo-thèu khî-tén, khì-tó kóng: ‘Song-ti â, ngài kám-chhia Ngì, yîn-vi ngài mò chhiong phe̍t-ngìn án-ngiòng thâm-vû, put-ngi, yìm-lon, ya mò chhiong liá-chak soi-kun.

¹² Ngài tak lî-pai kim-sṳ̍t lióng-pái, yu fung-hien chhiòn-phu sû-ngi̍p ke sṳ̍p-fûn chṳ̂-yit.’

¹³ Chúng-he ke soi-vu-yèn yén-yén khî-tén, lièn thèu-nà ya m̀-kám khià-hí-lòi mong-thiên, chṳ́-yû chhùi sîm-kôn kóng: ‘Song-ti â, khôi-ên lìn-mén ngài liá-ke chhui-ngìn!’

¹⁴ Ngài lâu ngì-têu kóng, liá lióng-ke ngìn chón-hi ke sṳ̀, Song-ti oi chhṳ̂n soi-vu-yèn cho ngi-ngìn, Fap-li-soi-ngìn fán-chón sa m̀-he. Yîn-vi Song-ti oi chiông chhṳ-kô ke ngìn kong-cho pî-mì, ya oi kô-sṳ̂n kâm-sîm khiâm-pî ke ngìn.”

Yâ-sû Chuk-fuk Se-ngìn-è
( Mâ-thai 19:13-15 ; Mâ-khó 10:13-16 )

¹⁵ Yû-têu ngìn tai se-ngìn-è lièn ô-nga-é lòi-kien Yâ-sû, hî-mong kì miâ kì-têu. Ho̍k-sâng khon-tó chhiu chit-phi ke-têu ngìn.

¹⁶ Chúng-he Yâ-sû ham kì-têu lòi kì ke mien-chhièn, kóng: “Pûn se-ngìn-è lòi ngài liá-vi, m̀-hó kim-chṳ́ kì-têu, yîn-vi Song-ti koet ke chṳ́-mìn chhiu-chhiong liá-chúng ke ngìn.

¹⁷ Ngài sṳ̍t-chhai lâu ngì-têu kóng, mò-lun má-ngìn, na m̀-he chhiong se-ngìn-è án-ngiòng lòi chiap-su Song-ti ke chú-khièn, kì chhie̍t-tui mò khó-nèn sàng-cho Song-ti ke chṳ́-mìn.”

Chhòi-chú ke Nàn-thì
( Mâ-thai 19:16-30 ; Mâ-khó 10:17-31 )

¹⁸ Yû yit-ke Yù-thai-ngìn ke liâng-chhiu lòi chhiáng-kau Yâ-sû, kóng: “Liòng-san ke sîn-sâng, ngài oi cho má-ke chang cho-tet sṳ̀n-su yún-yén ke sâng-miang â?”

¹⁹ Yâ-sû mun kì kóng: “Ngì ngióng-pân ham ngài cho liòng-san ke nè? Song-ti yî-ngoi, mò chai yû liòng-san ke.

²⁰ Ngì tî ke-têu kie-min: ‘Cho-m̀-tet fam kiên-yìm; cho-m̀-tet chhṳ̀-ngìn; cho-m̀-tet thêu-nâ; cho-m̀-tet cho ká kien-chṳn; oi hau-kin yà-ôi.’ ”

²¹ Ke ngìn en-kóng: “Liá-têu kie-min ngài chhiòn-phu chhiùng-se chhiu yí-kîn chûn-sú lé.”

²² Yâ-sû thâng-tó liá-ki fa, chhiu tui kì kóng: “Ngì hàn khiam yit-yong. Hi mai ngì só-yû ke sán-ngia̍p, chiông chhièn pûn-pûn khiùng-khú-ngìn, ngì chhiu voi yû chhòi-sán chit-chhùn chhai thiên-táng; yèn-heu ngì lòi thèn ngài.”

²³ Ke ngìn thâng-tó liá-ke fa, chhiu chhin sông-sîm, yîn-vi kì chhin yû-chhièn.

²⁴ Yâ-sû khon-tó kì án-ngiòng, chhiu kóng: “Yû-chhièn-ngìn oi cho Song-ti koet ke chṳ́-mìn, sṳ̍t-chhai chṳ̂n nàn ô!

²⁵ Yû-chhièn-ngìn oi cho Song-ti koet ke chṳ́-mìn, pí lo̍k-thò chhôn-ko chṳ̂m-phi hàn-kha nàn!”

²⁶ Thâng-tó liá-ki fa ke ngìn chhiu mun-kóng: “Án-ngiòng, má-ngìn yû khó-nèn tet-kiu nè?”

²⁷ Yâ-sû kóng: “Chhai ngìn mò khó-nèn ke sṳ, chhai Song-ti tû nèn.”

²⁸ Liá-sṳ̀, Pí-tet kóng: “Ngì khon, ngài-têu yí-kîn piong-thet chhṳ-kâ só-yû ke lòi thèn ngì.”

²⁹ Yâ-sû tui kì-têu kóng: “Ngài sṳ̍t-chhai lâu ngì-têu kóng, vi-tó Song-ti ke koet lòi piong-thet chhṳ-kâ ke fòng-vuk, pû-ngiòng, hiûng-thi, yà-ôi, ya-he chṳ́-ńg ke ngìn,

³⁰ yit-thin voi chhai kîm-sṳ tet-tó kâ chhin-tô phi, chhai lòi-sên ya voi tet-tó yún-yén ke sâng-miang.”

Yâ-sû Thi-sâm-pái Yi-ngièn Chhṳ-kâ ke Sí lâu Fu̍k-fa̍t
( Mâ-thai 20:17-19 ; Mâ-khó 10:32-34 )

³¹ Yâ-sû tai-tén sṳ̍p-ngi-ke ho̍k-sâng, tui kì-têu kóng: “Khon â, ngài-têu liá-ha oi sông Yâ-lu-sat-lâng hi; siên-tî-sû só siá koân-he Ngìn-chṳ́ ke mî-yit-khien sṳ chhiòn-phu voi sṳ̍t-hien.

³² Kì voi pûn-ngìn kâu chhai Ngoi-pâng-ngìn ke sú-chûng; kì-têu voi met-sa kì, vú-yu̍k kì, phi kì héu-lân,

³³ hàn-oi piên-tá kì, sat-hoi kì; chúng-he, thi-sâm-ngit kì voi fu̍k-fa̍t.”

³⁴ Ho̍k-sâng tui liá-têu sṳ-chhìn chhiòn mò liáu-kié, yîn-vi liá kau-hiun ke yi-sṳ he yún-chhòng-tén ke; só-yî Yâ-sû só kóng ke fa kì-têu ya thâng-m̀-sṳt.

Yâ-sû Yî-hó Mô-muk ke Khiet-sṳ̍t
( Mâ-thai 20:29-34 ; Mâ-khó 10:46-52 )

³⁵ Yâ-sû lòi-to khiûn Yâ-li-kô ke só-chhai, yû yit-ke mô-muk ke ngìn chhô chhai lu-sùn thó-sṳ̍t.

³⁶ Kì thâng-tó yit thai-khiùn ngìn kîn-ko, chhiu mun he má-ke sṳ-chhìn.

³⁷ Yû ngìn lâu kì kóng: “He Nâ-sat-le̍t ke Yâ-sû tui liá-vi kîn-ko.”

³⁸ Kì chhiu hêm-kóng: “Thai-ví ke chṳ́-sûn Yâ-sû â, khó-lièn ngài!”

³⁹ Hàng chhai Yâ-sû thèu-chhièn ke ngìn chit-phi kì, ham kì m̀-hó chhàu. Chúng-he kì hàn-kha thai-sâng hêm-kóng: “Thai-ví ke chṳ́-sûn â, khó-lièn ngài!”

⁴⁰ Yâ-sû chhiu thìn hâ-lòi, fûn-fu ngìn chiông mô-muk-ke tai-to kì mien-chhièn lòi. Kì hàng-khiûn ke sṳ̀, Yâ-sû mun kì kóng:

⁴¹ “Ngì oi ngài vi ngì cho má-ke?” Kì en-kóng: “Chú â, ngài oi khon-tet-tó!”

⁴² Yâ-sû chhiu tui kì kóng: “Ngì khon-tet-tó lé! Ngì ke sin-sîm yí-kîn yî-hó ngì lé.”

⁴³ Mô-muk-ke ngiàm-sṳ̀ khon-tet-tó, chhiu thèn-tén Yâ-sû, kûi-lu siung-chan Song-ti. Chung-ngìn khon-tó liá-ke sṳ, ya lûng-chúng chan-mî Song-ti.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan