Bìoball air-loidhne

Lu-kâ 17 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Lun Chhui
( Mâ-thai 18:6-7 , 21-22 ; Mâ-khó 9:42 )

¹ Yâ-sû lâu kiâ ho̍k-sâng kóng: “Hoi ngìn fam-chhui ke sṳ he nàn-miên ke, chúng-he sṳ́ liá-ke sṳ fat-sên ke ngìn fái lé!

² Kì pûn-ngìn yung thai mo-sa̍k thò-tén kiáng-kîn fit-lo̍k hói-tú hi, kha-yàng kì hoi ngim-hò yit-ke chui mì-se ke ngìn fam-chhui.

³ Ngì-têu chhṳ-kâ oi se-ngi! “Ká-sṳ́ ngì ke hiûng-thi ya-he chí-moi fam-chhui, oi khien-va kì; kì na-he fí-kói, chhiu oi sa-miên kì.

⁴ Na-he kì chhai yit-ngit tông-chûng tet-chhui ngì chhit-pái, tak-pái to-chón-lòi tui ngì kóng: ‘Ngài fí-kói lé’, ngì ya oi sa-miên kì.”

Lun Sin-sîm

⁵ Ke-têu sṳ́-thù tui Chú kóng: “Khiù ngì pûn ngài-têu yû kha thai ke sin-sîm!”

⁶ Chú kóng: “Na-he ngì-têu yû chhiong yit-lia̍p kie-chhoi-chṳ́ án-thai ke sin-sîm, chhiu-he tui liá-thèu sông-su kóng: ‘Lièn kîn pâng-hí-lòi, hi chung chhai hói-chûng!’ kì ya voi thâng-chhiùng ngì-têu.

Phu̍k-ngìn ke Chit-ngim

⁷ “Ká-sṳ́ ngì-têu tông-chûng mêu-ngìn yû yit-ke kâng-thièn ya-he chóng-yòng ke phu̍k-ngìn, kì tui thièn-yèn chón-lòi ke sṳ̀, ngì kám voi tui kì kóng: ‘Kiak-kiak chhô-hâ-lòi sṳ̍t-fan!’

⁸ Tông-yèn m̀-voi! Ngì kám m̀-he tui kì kóng: ‘Vi ngài chún-phi sṳ̍t ke, yèn-heu kiê-tén vì-khiùn lòi fu̍k-sṳ ngài, tén ngài sṳ̍t-páu, ngì chang hi sṳ̍t!’

⁹ Phu̍k-ngìn cheu chú-ngìn ke fûn-fu cho-se, kám-kóng chú-ngìn hàn-oi kám-chhia kì mâ?

¹⁰ Ngì-têu ya he khiung-yong; tông ngì-têu cho-hó Song-ti só fûn-fu ke yit-chhiet sṳ-chhìn, chhiu oi kóng: ‘Ngài-têu he mò lu-yung ke phu̍k-ngìn; ngài-têu só-cho ke he chhin pún-fun thin-thin.’ ”

Yî-hó Sṳ̍p-ke Pot Thái-kô ke Ngìn

¹¹ Yâ-sû chhai oi hi Yâ-lu-sat-lâng ke lu-song, kîn-ko Sat-mâ-li-â lâu Kâ-li-li tông-chûng ke só-chhai.

¹² Kì ngi̍p yit-ke chhûn-chông ke sṳ̀, yû sṳ̍p-ke pot thái-kô ke ngìn tui-mien hàng-tén lòi. Kì-têu yén-yén khî-tén,

¹³ thai-sâng hêm-kóng: “Yâ-sû, sîn-sâng â, khó-lièn ngài-têu!”

¹⁴ Yâ-sû khon-tó, chhiu tui kì-têu kóng: “Ngì-têu hi pûn chi-sṳ̂ kiám-chhà sṳ̂n-thí!” Kì-têu chhai hi ke lu-song, chhiu tet-tó chhiang-li.

¹⁵ Khì-chûng yit-sà khon-tó chhṳ-kâ yí-kîn hó lé, kiak-kiak chhiu to-chón-lòi, thai-sâng siung-chan Song-ti,

¹⁶ yu phu̍k chhai Yâ-sû ke kiok-chhièn kám-chhia kì. Liá-ke ngìn he Sat-mâ-li-â-ngìn.

¹⁷ Yâ-sû kóng: “Tet-tó yî-hó ke ngìn kám m̀-he yû sṳ̍p-sà? Nang-ngoi kiú-ke chhai nai-vi nè?

¹⁸ Ngióng-pân chṳ́-yû liá phe̍t-chhu̍k ke ngìn to-chón-lòi kám-chhia Song-ti nè?”

¹⁹ Yâ-sû chhiu tui kì kóng: “Hong-hí-lòi, hó hi lé! Ngì ke sin-sîm yî-hó ngì lé!”

Song-ti Koet ke Kong-lìm
( Mâ-thai 24:17-18 , 23-28 , 37-41 )

²⁰ Yû-têu Fap-li-soi-ngìn lòi mun Yâ-sû, oi tî Song-ti ke koet kí-sṳ̀ voi kong-lìm. Yâ-sû en-kóng: “Song-ti koet ke kong-lìm pin m̀-he muk-chû só khon-tet-tó ke.

²¹ Mò ngìn nèn kóng: ‘Khon â, chhai liá-vi!’ ya-he ‘Chhai ke-vi!’ Yîn-vi Song-ti ke koet chhiu chhai ngì-têu ke sîm-chûng!”

²² Chiap-tén, kì yu tui ho̍k-sâng kóng: “Sṳ̀-kiên voi to, ngì-têu voi chhin sióng-oi khon Ngìn-chṳ́ chóng-khièn ke sṳ̀-chiet, chúng-he lièn yit-ngit ya khon-m̀-tó.

²³ Yû ngìn voi tui ngì-têu kóng: ‘Khon â, chhai liá-vi!’ ya-he ‘Khon â, chhai ke-vi!’ Ngì-têu m̀-hó chhut-hi khon, ya m̀-hó thèn kì-têu hi.

²⁴ Chhiong ngiap-lang yit-ha-é tui thiên ke liá-phién cheu-to thiên ke ke-phién hi, Ngìn-chṳ́ chai-lìm ke-ngit ya voi án-ngiòng.

²⁵ Chúng-he kì yit-thin voi siên su chhin-tô khú-nan, pûn liá sṳ-thoi ke ngìn hi-chhie̍t.

²⁶ Chhiong Nò-â sṳ̀-thoi ke chhìn-hìn, Ngìn-chṳ́ chai-lìm ke sṳ̀-chiet ya voi án-ngiòng.

²⁷ Ke sṳ̀-thoi ke ngìn cheu-sòng sṳ̍t-lîm ka-chhí, chhṳ̍t-to Nò-â ngi̍p thai-sòn ke-ngit, thai-súi lòi-to, chiông kì-têu chhiòn-phu me̍t-thet.

²⁸ Ngìn-chṳ́ chai-lìm ke sṳ̀-chiet, yu voi chhiong Lò-tet sṳ̀-thoi ke chhìn-hìn; ke sṳ̀-thoi ke ngìn cheu-sòng sṳ̍t-lîm, mâi-mai, cheu-sòng kâng-chung, hí-vuk.

²⁹ To Lò-tet lì-khôi Só-tô-mâ ke-ngit, fó lâu liù-vòng chhiu tui thiên-táng kong hâ-lòi, chiông kì-têu chhiòn-phu me̍t-thet.

³⁰ Ngìn-chṳ́ hién-hien ke-ngit ya voi án-ngiòng.

³¹ “Ke-ngit, chhai vuk-táng ke, m̀-hó hâ-lòi ngi̍p-hi vuk-tú nâ kì ke tûng-sî; khiung-yong, chhai thièn-hong ke, ya m̀-hó chón-hi.

³² Oi ki-tet Lò-tet ke pû-ngiòng lòi cho kín-kie!

³³ Sióng-oi pó-chhiòn chhṳ-kâ sâng-miang ke, fán-chón voi sóng-sṳt sâng-miang; sóng-sṳt sâng-miang ke, fán-chón voi pó-chhiòn sâng-miang.

³⁴ Ngài lâu ngì-têu kóng, ke-ngit am-pû, lióng-ke ngìn soi khiung-táng mìn-chhòng, yit-ke voi su chiap-chéu, yit-ke voi liù-hâ-lòi;

³⁵ lióng-ke fu-ngìn-kâ khiung-ha âi mo-sa̍k, yit-ke voi su chiap-chéu, nang-ngoi yit-ke voi liù-hâ-lòi.”

³⁷ Ho̍k-sâng mun-kóng: “Chú â, liá-têu sṳ-chhìn voi fat-sên chhai nai-vi nè?” Yâ-sû en-kóng: “Sṳ̂n-sṳ̂ chhai nai-vi, yîn-tiâu ya voi chhi-si̍p chhai ke-vi.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan