Bìoball air-loidhne

Lu-kâ 15 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Sṳt-lo̍k ke Yòng
( Mâ-thai 18:12-14 )

¹ Yû yit-pái, hó-tô soi-kun lâu fái-ngìn lòi thâng Yâ-sû kóng-tho.

² Fap-li-soi-ngìn lâu kîn-ho̍k kau-sṳ̂ fat yen-ngièn kóng: “Liá-ke ngìn ngióng-voi chiap-thai fái-ngìn, yu thùng kì-têu khiung-ha sṳ̍t-fan!”

³ Yîn-vi án-ngiòng, Yâ-sû kóng yit-ke pí-yi pûn kì-têu thâng; kì kóng:

⁴ “Na-he ngì-têu chûng-kiên mêu-ngìn yû yit-pak-chak yòng, sṳt-lo̍k khì-chûng yit-chak, kì kám m̀-voi chiông khì-thâ ke kiú-sṳ̍p-kiú-chak piong chhai chhó-phû, hi chhìm ke-chak sṳt-lo̍k ke, chhṳ̍t-to chhìm-tó mâ?

⁵ Chhìm-tó yî-heu, kì chhin fôn-hí, chhiu chiông yòng-è piong chhai kiên-thèu-táng,

⁶ chón vuk-hâ hi, yèn-heu chhiáng phèn-yû lâu lìn-sa lòi, tui kì-têu kóng: ‘Ngài hàn fôn-hí ô! Ngài sṳt-lo̍k ke yòng-è chhìm-tó lé! Ngì-têu lòi thùng ngài then fôn-hí!’

⁷ Chhiong án-ngiòng, ngài lâu ngì-têu kóng, yit-ke chhui-ngìn fí-kói, chhai thiên-táng ya oi vi-tó kì fôn-hí; ke-chúng ke fôn-hí, yàng-ko kiú-sṳ̍p-kiú-ke m̀-sṳ́ fí-kói ke ngi-ngìn!

Sṳt-lo̍k ke Chhièn

⁸ “Na-he yit-ke fu-ngìn-kâ yû sṳ̍p-chak ngiùn-chhièn, sṳt-lo̍k yit-chak, kì kám m̀-voi tiám-tên lòi piang-vuk, tak só-chhai siòng-se chhìm, chhṳ̍t-to chhìm-tó mâ?

⁹ Chhìm-tó yî-heu, kì chhiu voi chhiáng phèn-yû lâu lìn-sa lòi, tui kì-têu kóng: ‘Ngài hàn fôn-hí ô! Ngài sṳt-lo̍k ke ngiùn-chhièn chhìm-tó lé! Ngì-têu lòi thùng ngài then fôn-hí!’

¹⁰ Chhiong án-ngiòng, ngài lâu ngì-têu kóng, Song-ti ke thiên-sṳ́ ya oi vi-tó yit-ke chhui-ngìn ke fí-kói lòi fôn-hí.”

Chhṳ̀-fu lâu Long-chṳ́

¹¹ Yâ-sû ki-siu̍k kóng: “Mêu-ngìn yû lióng-ke lai-é.

¹² Se ke lai-é tui â-pâ kóng: ‘Â-pâ, khiù ngì liá-ha chhiu chiông ngài yin-tet ke sán-ngia̍p pûn-pûn ngài.’ Â-pâ chhiu chiông sán-ngia̍p pûn-pûn kì lióng-ke lai-é.

¹³ Ko kí-ngit, se ke lai-é chhiu chiông só pûn-tó ke sán-ngia̍p mai-thet, tai-tén chhièn lì-khôi vuk-hâ. Kì hi-to chhin-yén ke thi-fông, chhai ke-vi long-fi chhièn-chhòi, ko fong-thong ke sên-fa̍t.

¹⁴ Kì chiông só-yû ke yit-chhiet fâ chhiang-chhiang heu, yu tù-tó ke-vi thai kî-fông, kì chhiu khú-to kóng-m̀-tet.

¹⁵ Só-yî, kì hi khiù tông-thi yit-ke ngìn pûn kì se cho; ke-ngìn ham kì hi nùng-chhòng hiuk chû-é.

¹⁶ Kì ngo-to lièn chû-é sṳ̍t ke theu-kap ya sióng-oi nâ-lòi sṳ̍t; hàn-he mò-ngìn nâ má-ke tûng-sî pûn kì sṳ̍t.

¹⁷ Chui-heu, kì fûn-siáng ko-lòi, kóng: ‘Ngâ pâ yû chhiáng án-tô kûng-ngìn, kì-têu liòng-sṳ̍t chhûng-chiuk yu yû-chhûn, ngài fán-chón chhai liá-vi ngo-sí!

¹⁸ Ngài oi hong-hí-lòi, chón-hi ngâ-pâ ke-vi, tui kì kóng: Â-pâ, ngài tet-chhui thiên, ya tet-chhui ngì.

¹⁹ Ngài yí-kîn mò chṳ̂-kiet chhṳ̂n-cho ngiâ lai-é; khiù ngì khon ngài cho ngì chhiáng-lòi ke kûng-ngìn.’

²⁰ Kì chhiu hí-sṳ̂n chón kiâ-pâ ke-vi hi. “Lì vuk-hâ hàn chhin-yén, kiâ-pâ khon-tó kì, chhiu lìn-mén kì, chéu-tén ko-hi, nám-tén kì ke kiáng-kîn, kín chîm kì.

²¹ Lai-é kóng: ‘Â-pâ, ngài tet-chhui thiên, ya tet-chhui ngì; yí-kîn mò chṳ̂-kiet cho ngiâ lai-é!’

²² Chúng-he ke â-pâ hêm phu̍k-ngìn kóng: ‘Kiak-kiak nâ chui-hó ke chhòng-phàu lòi pûn kì chok, nâ kim-chṳ́ pûn kì tai, nâ hài pûn kì chok,

²³ yèn-heu chiông ke-chak phì ke se ngiù-kú khiên-lòi chhṳ̀. Ngài-têu lòi phan-chok, fôn-fôn hí-hí lòi khin-chuk!

²⁴ Yîn-vi ngài liá-ke lai-é he sí-thet yu fu̍k-fa̍t, sṳt-lo̍k yu chhìm-tó ke.’ Thai-kâ chhiu khôi-sṳ́ khin-chuk.

²⁵ “Ke-sṳ̀, thai ke lai-é hàn chhai thièn-hong cho-se; to kì chón-lòi, lì vuk-hâ mò kí-yén ke sṳ̀, thâng-tó yîm-ngo̍k lâu thiau-vú ke sâng,

²⁶ chhiu ham yit-ke phu̍k-ngìn ko-lòi, mun kì fat-sên má-ke sṳ-chhìn.

²⁷ Phu̍k-ngìn en-kóng: ‘Ngiâ ló-thâi chón-lòi lé! Ngiâ pâ yîn-vi kì phìn-ôn yúng-khien chón-lòi, chhiu chhṳ̀ ke-chak phì ke se ngiù-kú.’

²⁸ “Mò sióng-tó, thai lai-é sa fat-khién, m̀-hén ngi̍p-hi; kiâ-pâ chhiu chhut-lòi khien kì.

²⁹ Chúng-he kì tui kiâ-pâ kóng: ‘Ngì khon, án-tô ngièn lòi, ngài chhiong nù-chhòi án-ngiòng fu̍k-sṳ ngì, m̀-sṳt vì-poi ngì ke min-lin, ngì sṳt pûn ngài má-ke nò? Lièn yit-chak se sân-yòng ya m̀-sṳt pûn ngài thùng phèn-yû khiung-ha fôn-hí.

³⁰ Chúng-he ngì liá-chak lai-é, kì chiông ngì ke chhòi-sán lon-yung chhai kî-ńg ke sṳ̂n-song; liá-ha kì chón-lòi, ngì chhiu vi kì chhṳ̀ ke-chak phì ke se ngiù-kú!’

³¹ Kiâ-pâ chhiu tui kì kóng: ‘Se-chṳ́ â, ngì sòng-sòng thùng ngài khiung-ha, ngài yit-chhiet só-yû ke, chhiòn he ngì ke.

³² Chúng-he ngì liá-ke ló-thâi he sí-thet yu fu̍k-fa̍t, sṳt-lo̍k yu chhìm-tó ke; só-yî, ngài-têu yin-tông fôn-hí khin-chuk.’ ”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan