Bìoball air-loidhne

Lu-kâ 14 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yâ-sû Yî-hó Súi-chúng Phiang-ngìn

¹ Yû yit-ke Ôn-sit-ngit, Yâ-sû hi-to yit-ke Fap-li-soi-ngìn liâng-chhiu ke vuk-hâ sṳ̍t-fan; yû-têu ngìn chhai sùn-thèu khon-tén kì.

² Tú-hó, chhai kì mien-chhièn yû yit-ke pot súi-chúng-phiang ke ngìn.

³ Yâ-sû chhiu mun ke-têu Fap-li̍t kau-sṳ̂ lâu Fap-li-soi-ngìn kóng: “Ngài-têu ke fap-li̍t chún ngìn chhai Ôn-sit-ngit yî-phiang mò?”

⁴ Kì-têu lûng-chúng tiâm-tiâm m̀ chhut-sâng. Yâ-sû chhiu fù-tén ke-ngìn, yî-hó kì, ham kì chéu.

⁵ Yèn-heu, kì tui thai-kâ kóng: “Ngì-têu tông-chûng yû má-ngìn, lai-é ya-he ngiù chhai Ôn-sit-ngit tiet-lo̍k chiáng-tú hi, m̀-he ngiàm-sṳ̀ chiông kì lâi sông-lòi nè?”

⁶ Kì-têu tui Yâ-sû só mun ke fa chhiòn-phu mò fa hó en.

Kâu Ngìn Khiâm-pî

⁷ Yâ-sû chu-yi tó yû-têu ngìn-hak vi chhṳ-kâ sién yèn-si̍t chûng ke thai-vi, chhiu yung pí-yi tui thai-kâ kóng:

⁸ “Ngì pûn-ngìn chhiáng-hi chhâm-kâ fûn-yîn yèn-si̍t ke sṳ̀, m̀-hó chhô thai-vi, kiâng-pha só chhiáng ke ngìn-hak yû pí ngì kha su chûn-chhung ke.

⁹ Chhiáng ngì lióng-sà ke chú-ngìn voi hàng-chhièn lòi tui ngì kóng: ‘Pai-thok ngiong-vi pûn liá-ke ngìn!’ Ke-sṳ̀, ngì voi kám-kok chhin mò mien-chṳ́, thui-to piak-kok hi chhô.

¹⁰ Ngì pûn-ngìn chhiáng ke sṳ̀, oi chhô se-vi, án-ngiòng, chú-ngìn lòi tui ngì kóng: ‘Phèn-yû, chhiáng chhô thai-vi.’ Ke-sṳ̀, ngì chhai ngìn-hak mien-chhièn chhiu chhin yû thí-mien.

¹¹ Yîn-vi Song-ti oi chiông chhṳ-kô ke ngìn kong-cho pî-mì, ya oi kô-sṳ̂n kâm-sîm khiâm-pî ke ngìn.”

Oi Chhiáng Má-ngìn Cho Ngìn-hak

¹² Yâ-sû yu tui chhiáng kì ke chú-ngìn kóng: “Ngì chhiáng ngìn sṳ̍t-chu ya-he sṳ̍t-ya ke sṳ̀, m̀-hó chhiáng ngì ke phèn-yû, hiûng-thi chí-moi, chhîn-chhit, ya-he yû-chhièn ke lìn-sa, kiâng-pha kì-têu heu-lòi ya chhiáng ngì, ngì ke ngìn-chhìn chhiu tet-tó po-tap lé.

¹³ Ngì oi chhiáng ngìn-hak, chhiu oi chhiáng ke-têu khiùng-khú-ke, chhàn-chong ke, pài-kiok-ke, mô-muk-ke;

¹⁴ án-ngiòng, ngì chhiu yû fuk-hi lé, yîn-vi ke-têu ngìn mò má-ke hó po-tap ngì. Chhai ngi-ngìn fu̍k-fa̍t ke sṳ̀, Song-ti voi chhîn-chhṳ po-tap ngì.”

Fûn-yîn Yèn-si̍t ke Pí-yi
( Mâ-thai 22:1-14 )

¹⁵ Khiung-chok yû yit-ke ngìn thâng-tó liá-têu fa, chhiu tui Yâ-sû kóng: “Yû-hó chhai Song-ti ke koet hióng-su yèn-si̍t ke ngìn he ngióng-pân yû fuk-hi â!”

¹⁶ Yâ-sû tui kì kóng: “Yû ngìn thai pài yèn-si̍t, chhiáng chhin-tô ngìn-hak.

¹⁷ Voi to khôi-chok ke sṳ̀, kì phai phu̍k-ngìn hi tui só chhiáng ke ngìn-hak kóng: ‘Chhiáng ngì-têu lòi, tak-hong chún-phi hó-se lô!’

¹⁸ Chúng-he kì-têu khôi-sṳ́ yit-ke yit-ke thôi-chhṳ̀. Thèu-yit-ke kóng: ‘Ngài yû mâi yit-khiû thièn, mò hi khon cho-m̀-tet. Chhiáng ngièn-liong, ngài hi-m̀-tet.’

¹⁹ Nang-ngoi yit-ke kóng: ‘Ngài yû mâi ńg-tui ngiù, oi hi chhṳ khon-é; chhiáng ngièn-liong ngài, sṳt-lî.’

²⁰ Yu yû yit-ke kóng: ‘Ngài chang kiet-fûn, sṳ̍t-chhai mò fap-thu hi.’

²¹ Ke phu̍k-ngìn to-chón-hi, chiông liá chhìn-hìn po-ko chú-ngìn. Liá-kâ ke chú-ngìn thai fat-khién, chhiu tui phu̍k-ngìn kóng: ‘Kiak-kiak chhut-hi, to sàng-nui ke thai-kiê séu-hong, tai ke-têu khiùng-khú-ke, chhàn-chong ke, mô-muk-ke, pài-kiok-ke chhiòn-phu lòi.’

²² Mò kí-kiú, phu̍k-ngìn to-chón-lòi, kóng: ‘Thèu-kâ, ngì só fûn-fu ke yí-kîn phan-hó lé, chúng-he hàn-he yû chhin-tô khûng-vi!’

²³ Chú-ngìn chhiu tui phu̍k-ngìn kóng: ‘Ngì to kiê-lu lâu lì-pâ-sùn ke hong-tú hi, miên-kióng chhiáng ngìn ngi̍p-lòi, chhô-mân ngài ke vuk.

²⁴ Ngài lâu ngì-têu kóng, ke-têu siên-chhièn só chhiáng ke ngìn, yit-ke ya m̀-sṳ́ sióng-oi sṳ̍t ngài ke yèn-si̍t!’ ”

Cho Ho̍k-sâng ke Thoi-ka
( Mâ-thai 10:37-38 )

²⁵ Fî-sòng tô ke ngìn thèn-tén Yâ-sû khiung-ha hàng. Yâ-sû chón-sṳ̂n tui kì-têu kóng:

²⁶ “To ngài liá-vi lòi ke ngìn, na m̀-he kin-oi ngài yàng-ko chhṳ-kâ ke yà-ôi, ya-he yàng-ko siak pû-ngiòng, chṳ́-ńg, hiûng-thi, chí-moi, sṳm-chṳ chhṳ-kâ, kì chhiu mò fap-thu cho ngài ke ho̍k-sâng.

²⁷ M̀-hén khià chhṳ-kâ ke sṳ̍p-sṳ-ka lòi thèn ngài ke ngìn, ya mò fap-thu cho ngài ke ho̍k-sâng.

²⁸ Ngì-têu chûng-kiên yû má-ngìn sióng-oi hí thai-lèu, kám m̀-he siên chhô-hâ-lòi hó-hó kie-son yit-ha, khon yû vàn-sṳ̀n chhiòn-phu kûng-chhàng ke fi-yung mò?

²⁹ Na m̀-he án-ngiòng, kiâng-pha thi-kî tá-hó, thai-lèu sa mò fap-thu vàn-kûng, khon-tó ke ngìn chhiòn-phu voi seu kì,

³⁰ kóng: ‘Liá-ke ngìn khôi-kûng, chúng-he mò fap-thu vàn-kûng!’

³¹ Ká-sṳ́ yû yit-ke koet-vòng, tai yit-van ngìn ke kiûn-chhui, oi hi lâu nang-ngoi yit-ke tai lióng-van ngìn kiûn-chhui ke koet-vòng siông-chhṳ̀, kì kám m̀-he siên chhô-hâ-lòi mén-khon-é, yû khó-nèn tá-yàng mò?

³² Na-he mò khó-nèn, kì chhiu voi kón-kín chhai thi̍t-ngìn hàn chhin-yén ke sṳ̀, phai sṳ́-chá hi thàm fò-phìn ke thiàu-khien.

³³ Khiung-yong, ngì-têu mò-lun má-ngìn, na mò piong-thet chhṳ-kâ só-yû ke yit-chhiet, chhiu mò fap-thu cho ngài ke ho̍k-sâng.

Mò-yung ke Yàm
( Mâ-thai 5:13 ; Mâ-khó 9:50 )

³⁴ “Yàm he hó ke, chúng-he yàm na sṳt-thet hàm-mi, oi ngióng-pân sṳ́ kì chai hàm nè?

³⁵ Ve-lo̍k yèn-tú ya-he chhâm chhai phì-liau-chûng, lûng-chúng mò-ha̍p, chṳ́-yû fit-thet. Yû ngí-kûng hó-thâng ke ngìn, chhiu oi thâng!”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan