Bìoball air-loidhne

Lu-kâ 11 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Koân-he Khì-tó ke Kau-hiun
( Mâ-thai 6:9-13 ; 7:7-11 )

¹ Yû yit-pái, Yâ-sû chhai yit-ke só-chhai khì-tó. Khì-tó heu, yû yit-ke ho̍k-sâng tui kì kóng: “Chú â, chhiáng kâu ngài-têu khì-tó, chhiong Yok-hon kâu kì ke ho̍k-sâng yit-yong.”

² Yâ-sû lâu kì-têu kóng: “Ngì-têu oi án-ngiòng khì-tó: Â-pâ â: Ngien Ngì ke sṳn-miàng su chûn-chhung; ngien Ngì chhai sṳ-kiên chóng-khièn.

³ Su ngài-têu tak-ngit só sî-yeu ke yím-sṳ̍t.

⁴ Sa-miên ngài-têu ke chhui-ko, yîn-vi ngài-têu ya sa-miên só-yû tet-chhui ngài-têu ke ngìn. M̀-hó pûn ngài-têu tù-tó thet-chhûng ke kháu-ngiam.”

⁵ Chiap-tén, Yâ-sû lâu kì-têu kóng: “Ká-sṳ́ ngì-têu chûng-kiên yû-ngìn pan-ya hi-to phèn-yû vuk-hâ, tui kì kóng: ‘Phèn-yû, chhiáng chia ngài sâm-chak piáng-è;

⁶ yîn-vi yû yit-ke phèn-yû lî-hàng lòi ngâ vuk-hâ, ngài mò má-ke sṳ̍t ke hó chêu-thai kì.’

⁷ Na-he ngì ke phèn-yû tui vuk-tú en-kóng: ‘Mo̍k chhàu ngài! Mùn yí-kîn koân-hó, ngài lâu ngài ke chṳ́-ńg ya yí-kîn sông-chhòng lé, ngài mò fap-thu hong-hí-lòi nâ pûn ngì.’

⁸ Oi ngióng-pân chang hó nè? Ngài lâu ngì-têu kóng, chhiu-son kì mò yîn-vi ke-ngìn he kiâ phèn-yû, hong-hí-lòi nâ piáng-è pûn kì, ya voi yîn-vi ke-ngìn pet-chhiet kín khiù, hong-hí-lòi nâ kì só sî-yeu ke tûng-sî pûn kì.

⁹ “Só-yî, ngài lâu ngì-têu kóng: Ngì-têu khiù, chhiu voi tet-tó; chhìm, chhiu voi chhìm-tó; phông-mùn, mùn chhiu voi vi ngì-têu khôi.

¹⁰ Yîn-vi mî-yit-ke khiù ke, chhiu tet-tó; chhìm ke, chhiu chhìm-tó; phông-mùn ke, mùn chhiu vi kì khôi.

¹¹ Ngì-têu tông-chûng cho â-pâ ke, lai-é thó ǹg-è ke sṳ̀, yû má-ngìn fán-chón nâ sà-kô pûn kì?

¹² Thó kiê-lón ke sṳ̀, fán-chón nâ hiet-è pûn kì nè?

¹³ Ngì-têu sûi-yèn fái, hàn tî nâ hó tûng-sî pûn chhṳ-kâ ke chṳ́-ńg; án-ngiòng, chhai thiên-táng ke Â-pâ kám m̀-he hàn-kha oi chiông Sṳn-Lìn su-pûn khiù Kì ke ngìn mâ?”

Yâ-sû lâu Phe̍t-sî-puk
( Mâ-thai 12:22-30 ; Mâ-khó 3:20-27 )

¹⁴ Yâ-sû kiuk-chéu yit-ke á-è-kúi, kúi chhut-hi heu, ke-ngìn chhiu kóng-fa. Chung-ngìn lûng-chúng chhin chho̍k-kiâng,

¹⁵ chúng-he kì-têu chûng-kiên yû-ngìn kóng: “Kì he kho kúi-vòng Phe̍t-sî-puk kiuk-kúi.”

¹⁶ Ya yû-têu ngìn sióng-oi hoi Yâ-sû, yêu-khiù kì hàng yit-ke sṳ̀n-chiak, lòi chṳn-mìn kì só cho ke he tui Song-ti lòi ke.

¹⁷ Yâ-sû tî kì-têu ke yi-sṳ, chhiu tui kì-têu kóng: “Yit-ke koet-kâ chhṳ-siông fûn-chên, ke koet-kâ yit-thin voi phai-thet. Yit-ke kâ-thìn chhṳ-siông fûn-chên, ke kâ-thìn thin-chho̍k voi pho-sui thet-hi.

¹⁸ Ká-sṳ́ Sat-tan chhṳ-siông fûn-chên, kì ke koet ngióng-pân voi khî tet-he̍t nò? Ngì-têu kóng ngài kiuk-kúi he kho Phe̍t-sî-puk.

¹⁹ Na-he án-ngiòng, ngì-têu ke chṳ́-thi kiuk-kúi yu he kho má-sà nò? Ngì-têu ke chṳ́-thi voi chṳn-mìn he ngì-têu m̀-chho̍k!

²⁰ Khì-sṳ̍t, ngài kiuk-kúi na-he kho Song-ti ke nèn-li̍t, chhiu-he chṳn-mìn Song-ti yí-kîn chhai ngì-têu tông-chûng chóng-khièn lé.

²¹ “Sú nâ vú-hi ke yúng-sṳ chóng-tén kì chhṳ-kâ ke vuk, ke-sṳ̀ kì ke tûng-sî chhiu chhin ôn-chhiòn.

²² Chúng-he, pí kì hàn-kha yû-li̍t ke yúng-sṳ lòi-to, chṳ-fu̍k kì, chhiu chiông kì só-kho ke vú-hi chhióng-chéu, yu chiông kì só chhióng-lòi ke tûng-sî pûn-thet.

²³ “M̀ thùng ngài khiung-ha ke, chhiu-he fán-tui ngài ke; m̀ thùng ngài khiung-ha sû-si̍p ke, chhiu-he tá-san ke.

Sià-lìn To-chón-lòi
( Mâ-thai 12:43-45 )

²⁴ “Sià-lìn lì-khôi só fu-sṳ̂n ke ngìn, chhai châu-sóng ke thi-fông hàng-lòi hàng-hi, chhìm hiû-sit ke só-chhai, chúng-he chhìm mò, chhiu kóng: ‘Ngài oi chón ngièn-lòi ke vuk-tú hi.’

²⁵ Kì chhiu to-chón hi, khon-tó ke vuk piang-to chhiang-li chhiang-li, yu chṳ́n-lî to chhin hó-se.

²⁶ Kì chhiu chhut-hi, tai chhit-ke pí kì hàn-kha ok ke sià-lìn to-chón-lòi, thùng kì khiung-ha ngi̍p-hi he̍t. Án-ngiòng, ke-ngìn heu-lòi ke chhìn-hìn chhiu pí siên-chhièn hàn-kha chhám.”

Chṳn-kîn ke Fuk-hi

²⁷ Yâ-sû kóng-tén liá-ke fa, ngìn-khiùn chûng yû yit-ke fu-ngìn-kâ thai-sâng tui kì kóng: “Kiung ngì, pûn ngì sṳ̍t-nen ke ngìn, sṳ̍t-chhai yû fuk-hi ô!”

²⁸ Yâ-sû kóng: “Thâng Song-ti ke fa chhiu chûn-hàng ke ngìn, hàn-kha yû fuk-hi ô!”

Yêu-khiù Sṳ̀n-chiak
( Mâ-thai 12:38-42 )

²⁹ Chung-ngìn chhi-si̍p ye̍t-lòi ye̍t-tô, Yâ-sû chhiu kóng: “Liá sṳ-thoi ke ngìn án sià-ok ô! Ngì-têu sióng-oi khon sṳ̀n-chiak, chúng-he, chhù-liáu Yok-nâ ke sṳ̀n-chiak yî-ngoi, mò phe̍t ke sṳ̀n-chiak hó pûn ngì-têu khon.

³⁰ Yok-nâ ngióng-pân sàng-cho Nì-nì-mì-ngìn ngién-chûng ke sṳ̀n-chiak, Ngìn-chṳ́ ya oi sàng-cho liá sṳ-thoi ngìn ngién-chûng ke sṳ̀n-chiak.

³¹ Chhai sṳ́m-phan ke-ngit, nàm-fông ke ńg-vòng voi khî-hí-lòi ko ngì-têu liá-thoi ke ngìn, yîn-vi kì tui án-yén lòi thâng Só-lò-mùn-vòng chṳ-fi ke fa. Ngài lâu ngì-têu kóng, chhai liá-vi yû pí Só-lò-mùn-vòng hàn-kha ví-thai ke.

³² Chhai sṳ́m-phan ke-ngit, Nì-nì-mì-ngìn voi khî-hí-lòi ko ngì-têu liá-thoi ke ngìn, yîn-vi kì-têu thâng-tó Yok-nâ só-chhòn ke chhiu hi-sià kûi-chṳn. Ngài lâu ngì-têu kóng, chhai liá-vi yû pí Yok-nâ hàn-kha ví-thai ke.

Sṳ̂n-thí ke Kông
( Mâ-thai 5:15 ; 6:22-23 )

³³ “Mò ngìn tiám-tên khong chhai mò ngìn khon-tó ke só-chhai, ya-he piong chhai téu tái-hâ; kì yit-thin he piong chhai tên-thòi-táng, pûn ngi̍p-lòi ke ngìn khon-tet-tó kông.

³⁴ Muk-chû khó-pí sṳ̂n-thí ke tên. Muk-chû na-he hó, ngì chhiòn-sṳ̂n chhiu voi yû kông-mìn; muk-chû na fái-thet, ngì ke sṳ̂n-thí chhiu voi vû-am.

³⁵ Só-yî, oi se-ngi, kiâng-pha ngì tî-poi ke kông pien-cho vû-am.

³⁶ Na-he ngì chhiòn-sṳ̂n chhûng-mân kông-mìn, mò pan-tiám vû-am, chhiu voi kông-mìn chhan-lan, chhiong pûn tên ke kông cheu-tén yit-yong.”

Chit-phi Fap-li-soi-ngìn lâu Fap-li̍t Kau-sṳ̂
( Mâ-thai 23:1-36 ; Mâ-khó 12:38-40 )

³⁷ Yâ-sû kóng liá-têu fa heu, yû yit-ke Fap-li-soi-ngìn chhiáng kì sṳ̍t-fan; kì chhiu ngi̍p-hi chhô-chok.

³⁸ Liá Fap-li-soi-ngìn khon-tó Yâ-sû sṳ̍t-fan chhièn mò siên cheu kûi-kí sé-sú, chhiu fî-sòng khì-koai.

³⁹ Chú tui kì kóng: “Ngì-têu Fap-li-soi-ngìn chiông pî-é lâu phàn-è ke ngoi-poi sé-to chhiang-chhiang, chúng-he ngì-têu ke tî-poi fán-chón chông-mân thâm-sîm lâu sià-ok.

⁴⁰ Ngì liá-têu ngong-é â, chho ngoi-poi ke Song-ti kám m̀-he ya chho tî-poi mâ?

⁴¹ Chṳ́-oi chiông pî-phàn tî-poi ke tûng-sî sung pûn khiùng-khú-ngìn, án-ngiòng, yit-chhiet tui ngì-têu lòi-kóng chhiu son chhiang-li lé.

⁴² “Ngì-têu Fap-li-soi-ngìn chhám lé! Ngì-têu lièn pho̍k-hò, yùn-hiông, lâu khì-thâ ke hiông-liau ya hien sṳ̍p-fûn chṳ̂-yit pûn Song-ti, chúng-he fut-lio̍k kûng-ngi lâu kin-oi Song-ti ke sṳ. Khì-sṳ̍t, liá-têu chang he ngì-têu yin-tông chhin-li̍t hi-hàng ke; khì-thâ ke, ya cho-m̀-tet fut-lio̍k.

⁴³ “Ngì-têu Fap-li-soi-ngìn chhám lé! Ngì-têu oi chhô fi-thòng-tú ke thi̍t-phe̍t chho-vi, oi phe̍t-ngìn chhai kûng-khiung chhòng-só tui ngì-têu chṳ-kin chhiáng-ôn.

⁴⁴ Ngì-têu chhám lé! Yîn-vi ngì-têu chhiong mò cho ki-ho ke fùn-mu, tui ke táng-kô hàng-ko-hi, mò-ngìn tî he fùn-mu.”

⁴⁵ Yû yit-ke Fap-li̍t kau-sṳ̂ tui Yâ-sû kóng: “Sîn-sâng, ngì án-ngiòng kóng, lièn ngài-têu ya pûn ngì vú-yu̍k-tó lé!”

⁴⁶ Yâ-sû en-kóng: “Ngì-têu liá-pân Fap-li̍t kau-sṳ̂ me chhám lé! Ngì-têu chiông nàn khâi ke chhûng-tâm piong chhai phe̍t-ngìn ke kiên-thèu-táng, chúng-he chhṳ-kâ lièn chhûn yit-kî sú-chṳ́ then-sú ya m̀ hén.

⁴⁷ Ngì-têu chhám lé! Ngì-têu chṳ́n-lî siên-tî ke fùn-mu, ke-têu siên-tî chang he ngì-têu ke chú-siên só sat-hoi ke.

⁴⁸ Án-ngiòng, ngì-têu chṳn-mìn yu chan-sṳ̀n ngì-têu chú-siên só-cho ke sṳ; kì-têu sat-hoi siên-tî, ngì-têu chhiu chṳ́n-lî siên-tî ke fùn-mu.

⁴⁹ Só-yî, Song-ti ke Chṳ-fi sṳt kóng: ‘Ngài oi phai siên-tî lâu sṳ́-thù to kì-têu ke-vi hi; yû-têu voi pûn kì-têu chhṳ̀-sí, yû-têu voi pûn kì-têu pet-hoi.’

⁵⁰ Yîn-vi án-ngiòng, tui chhóng-chho sṳ-kie yî-lòi, só-yû sat-hoi siên-tî ke chhui,

⁵¹ tui sat-hoi Â-pak, chhṳ̍t-to chhai chi-thàn lâu sṳn-só chûng-kiên sat-hoi Sat-kâ-li-â vì-chṳ́ só-yû ke hiet-chai, liá sṳ-thoi ke ngìn yit-thin oi vàn. Ngài sṳ̍t-chhai lâu ngì-têu kóng, liá sṳ-thoi ke ngìn yit-thin oi vi-tó liá yit-chhiet su chit-fa̍t!

⁵² “Ngì-têu liá-pân Fap-li̍t kau-sṳ̂ chhám lé! Ngì-têu chiông tá-khôi chṳ-sṳt pó-khu ke só-sṳ̀ chhióng-chéu, chhṳ-kâ m̀ ngi̍p-hi, ya chú-tóng sióng-oi ngi̍p ke ngìn ngi̍p-hi!”

⁵³ Yâ-sû lì-khôi ke-vi yî-heu, kîn-ho̍k kau-sṳ̂ lâu Fap-li-soi-ngìn khôi-sṳ́ kit-lie̍t phî-phìn kì, nâ chhin-tô nàn-thì lòi mun kì,

⁵⁴ sióng-oi tui kì ke fa chhìm pá-piang lòi hoi kì.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan