Bìoball air-loidhne

Li̍t-thoi-chṳ Song 29 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Vi Hí Sṳn-thien Hien Lî-vu̍t

¹ Thai-ví-vòng hiong chhiòn fi-chung siên-ko: “Ngài ke lai-é Só-lò-mùn he Song-ti só kién-sién ke; chúng-he kì hàn heu-sâng, mò kîn-ngiam. Kì só oi vàn-sṳ̀n ke kûng-chhàng fî-sòng thai; yîn-vi liá m̀-he hí pûn ngìn he̍t ke vòng-kiûng, he vi-tó Chú Song-ti hí ke sṳn-thien.

² Ngài chhin chui-thai ke nú-li̍t vi ngài Song-ti ke sṳn-thien chún-phi chhòi-liau, yû kîm-ngiùn thùng-thiet, muk-chhòi, kô-kui ke sa̍k-chôn, pó-sa̍k, yû fâ-vùn ke sa̍k-thèu, lâu chhin-tô ke thai-lî-sa̍k.

³ Yîn-vi ngài chhin oi ngài Song-ti ke sṳn-thien, só-yî ngài chhù-liáu yi-phi liá-têu yî-ngoi, hàn tui ngài ke chhòi-sán tông-chûng nâ-têu kîm-é lâu ngiùn-è chhut-lòi, cho hí Song-ti sṳn-thien ke lu-yung.

⁴ Ngài nâ-chhut pak-làng kûng-tún chui-hó ke kîm-é lâu thai-yok lióng-pak si-sṳ̍p kûng-tún ke sùn ngiùn-è, nâ-lòi thiap sṳn-thien ke piak,

⁵ hàn-yû kîm-é cho kîm-hi, ngiùn-è cho ngiùn-hi, pin kiûng-kip tak-chúng sṳ̂-fu chṳ-chho ke sî-yeu. Liá-ha, yû má-ngìn fôn-hí fung-hien lî-vu̍t pûn Song-chú?”

⁶ Só-yî, tak chûng-chhu̍k chhu̍k-chóng, Yî-set-lie̍t tak kî-chhu̍k kôn-chóng, chhiên-ngìn lâu pak-ngìn ke chṳ́-fî-kôn, vòng-sṳt chhòi-sán ke kón-lî ngìn, chhiòn-phu fôn-hí lòi fung-hien.

⁷ Kì-têu vi-tó hí Song-ti ke sṳn-thien fung-hien yit-pak chhit-sṳ̍p làng kûng-tún kîm-é, sâm-pak si-sṳ̍p làng kûng-tún ngiùn-è, thùng-è thai-yok liuk-pak ngi-sṳ̍p kûng-tún, lâu sâm-chhiên si-pak kûng-tún thiet-è.

⁸ Yû pó-sa̍k ke ngìn chhiòn-phu nâ chhut-lòi fung-hien, piong-ngi̍p Song-chú sṳn-thien ke pó-khu, kâu-pûn Kiet-sun-chhu̍k ke Li-vi-ngìn Yâ-hiet kón-lî.

⁹ Yîn-vi liá-têu liâng-chhiu kâm-sîm lo̍k-yi fung-hien pûn Song-chú, ngìn-mìn chhiu chhin fôn-hí, Thai-ví-vòng ya fî-sòng fôn-hí.

Thai-ví Siung-chan Song-chú

¹⁰ Thai-ví-vòng chhai chhiòn fi-chung mien-chhièn siung-chan Song-chú. Kì kóng: “Song-chú — ngài-têu chú-siên Yî-set-lie̍t ke Song-ti â, ngien Ngì su siung-chan chhṳ̍t-to yún-yún yén-yén!

¹¹ Song-chú â, Ngì chhin ví-thai; Ngì yû thai-nèn thai-li̍t, yùng-kông, vî-ngiàm. Thiên-táng thi-hâ só-yû ke chhiòn-phu he Ngì ke; Ngì he kiûn-vòng, Ngì he chṳ-kô, he van-vu̍t ke chú-chái.

¹² Só-yû fu-chiuk lâu chûn-yùng tui Ngì ke-vi lòi; Ngì yung Ngì ke li̍t-liong, khièn-piang thúng-chhṳ van-yû. Sṳ́ ngìn chûn-kui, khiòng-sṳn ke chhiu-he Ngì.

¹³ Ngài-têu ke Song-ti â, liá-ha ngài-têu kám-chhia Ngì, siung-chan Ngì yùng-kông ke chûn-miàng!

¹⁴ “Ngài lâu ngài ke ngìn-mìn sṳ̍t-chhai mò chṳ̂-kiet nâ má-ke hien-pûn Ngì; yîn-vi van-vu̍t chhiòn-phu he Ngì só-su ke, ngài-têu chṳ́-yû chiông su̍k Ngì ke tûng-sî vàn-pûn Ngì thin-thin.

¹⁵ Ngài-têu chhai Ngì mien-chhièn he chhiam-he̍t ke lî-hak lâu liù-long ke ngìn, chhiu-chhiong ngài-têu ke chú-siên khiung-yong. Ngài-têu ke ngìn-sên chhiong yáng-è khiung-yong voi mò-thet hi, mò khó-nèn chhòng-chhùn.

¹⁶ Song-chú — ngài-têu ke Song-ti â, ngài-têu chiông liá só-yû chhòi-vu̍t tai-lòi, oi hí yit-chho sṳn-thien, lòi yùng-kông Ngì ke sṳn-miàng. Liá yit-chhiet he tui Ngì ke-vi lòi ke, ya he su̍k Ngì ke.

¹⁷ Song-ti â, ngài tî Ngì kam-chhat ngìn-sîm; Ngì fôn-hí chṳn-chhṳ̍t ke ngìn. Ngài yung chṳn-chhṳ̍t ke sîm, fôn-fôn hí-hí chiông liá yit-chhiet hien-pûn Ngì. Liá-ha ngài khon-tó Ngì ke chṳ́-mìn ya fôn-fôn hí-hí tai-tén lî-vu̍t lòi hien-pûn Ngì.

¹⁸ Song-chú — ngài-têu chú-siên Â-pak-lâ-hón, Yî-sat, Yî-set-lie̍t ke Song-ti â, khiù Ngì sṳ́ Ngì chṳ́-mìn ke sîm yún-yén tui Ngì ngie̍t-sṳ̀n, yu sṳ́ kì-têu yún-yén tui Ngì chûng-sîm.

¹⁹ Khiù Ngì pûn ngài ke lai-é Só-lò-mùn chhiòn-sîm chûn-hàng Ngì só-yû ke fap-li̍t, min-lin lâu li-kûi, lòi sṳ̀n-chhiu yit-chhiet, yung ngài só yi-phi ke lòi hí Ngì ke sṳn-thien.”

²⁰ Yèn-heu, Thai-ví fûn-fu chhiòn fi-chung: “Oi siung-chan Song-chú — ngì-têu ke Song-ti!” Chhiòn fi-chung chhiu siung-chan Song-chú — kì-têu chú-siên ke Song-ti. Ngìn-mìn kiûng-kiûng kin-kin kin-pai Song-chú, ya tui vòng hàng-lî.

²¹ Thi-ngi ngit, Yî-set-lie̍t ngìn-mìn chhṳ̀ chhin-tô thèu-sâng cho sên-ngì hien-pûn Song-chú, yèn-heu pûn-pûn thai-kâ sṳ̍t. Nang-ngoi, kì-têu yu chhṳ̀ yit-chhiên chak ngiù-kú, yit-chhiên chak mièn-yòng-kú, yit-chhiên chak se yòng-è cho sêu-fa-chi hien-pûn Song-chú. Kì-têu ya hien chhin-tô chi-chiú.

²² Ke-ngit, kì-têu chhai Song-chú mien-chhièn sṳ̍t-lîm, fî-sòng khoai-lo̍k. Ngìn-mìn thi-ngi pái siên-pu Thai-ví ke lai-é Só-lò-mùn cho vòng. Kì-têu fung Song-chú ke miàng kò-yù sat-li̍p kì cho kì-têu ke thúng-chhṳ-chá, ya kò-yù sat-li̍p Sat-tuk cho chi-sṳ̂.

²³ Só-yî Só-lò-mùn sṳ̀n-chiap kiâ-pâ Thai-ví cho vòng; liá vòng-khièn he Song-chú só-su ke. Só-lò-mùn he yit-ke sṳ̀n-kûng ke kiûn-vòng; Yî-set-lie̍t chhiòn-koet sun-chhiùng kì.

²⁴ Só-yû ke kôn-yèn lâu kiûn-ngìn, sṳm-chṳ Thai-ví-vòng khì-thâ ke lai-é, chhiòn-phu fat-sṳ sun-fu̍k Só-lò-mùn-vòng.

²⁵ Song-chú sṳ́ Yî-set-lie̍t chhiòn-koet kin-fu̍k Só-lò-mùn, yu sṳ́ Só-lò-mùn ke vî-ngiàm chhêu-ko kì yî-chhièn ke-têu Yî-set-lie̍t-vòng.

Thai-ví-vòng Kién-tân ke Li̍t-sṳ́

²⁶ Yâ-sî ke lai-é Thai-ví cho vòng thúng-chhṳ chhiòn Yî-set-lie̍t.

²⁷ Kì cho vòng chúng-khiung si-sṳ̍p ngièn: Chhai Hî-pak-lùn cho vòng chhit-ngièn, chhai Yâ-lu-sat-lâng cho vòng sâm-sṳ̍p sâm-ngièn.

²⁸ Thai-ví hióng-su yùng-fà fu-kui, sṳ̍t-to chhin-ló chang ko-sṳ̂n; kì ke lai-é Só-lò-mùn sṳ̀n-chiap kì cho vòng.

²⁹ Thai-ví-vòng yit-sên-ngìn ke sṳ ki chhai siên-kien Sat-mû-ngí, siên-tî Nâ-tân, siên-kien Kâ-tet ke li̍t-sṳ́ sû tî-poi.

³⁰ Liá-têu sû kóng-hí: Thai-ví ke thúng-chhṳ lâu kì ke yúng-kám, ya ki-chai kì lâu Yî-set-lie̍t hàn-yû lìn-koet só kîn-li̍t ke sṳ.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan