Bìoball air-loidhne

Li̍t-thoi-chṳ Song 28 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Thai-ví Chṳ́-sṳ Hí Sṳn-thien

¹ Thai-ví-vòng min-lin tak kî-chhu̍k ke chhu̍k-chóng, koet-kâ ke hàng-chṳn kôn-yèn, tai-liâng chhiên-ngìn lâu pak-ngìn ke kiûn-kôn, fu-chit vòng lâu ke-têu vòng-chṳ́ chhòi-sán pin thèu-sâng ke kón-lî ngìn, kiûng-thìn ke kôn-yèn, kiûn-chhui ke kiûn-kôn, lâu só-yû ke chhung-yeu ngìn-vu̍t chhiòn-phu si̍p-ha̍p chhai Yâ-lu-sat-lâng.

² Thai-ví-vòng khî chhai kì-têu mien-chhièn hiong kì-têu kóng: “Ngài ke hiûng-thi, ngài ke pak-siang â, chhiáng-thâng! Ngài pún-lòi sióng-oi hí yit-chho thien piong Song-chú ke yok-khui; liá yok-khui he Song-chú — ngài-têu Song-ti ke kiok-ten. Ngài yí-kîn chún-phi thó-tong oi hí yit-chho sṳn-thien.

³ Chúng-he Song-chú m̀-chún ngài vi Kì hí; yîn-vi ngài he yit-ke chan-sṳ, liù-ko chhin-tô ngìn ke hiet.

⁴ Song-chú — Yî-set-lie̍t ke Song-ti kién-sién ngài lâu ngài ke heu-thoi yún-yén cho Yî-set-lie̍t ke vòng. Kì chhai Yî-set-lie̍t chûng kién-sién Yù-thai kî-chhu̍k, chhai Yù-thai kî-chhu̍k chûng kién-sién ngâ-pâ ke kâ-chhu̍k, chhai ngâ-pâ ke kâ-chhu̍k thi̍t-phe̍t kién-sién ngài, sat-li̍p ngài cho vòng, thúng-chhṳ chhiòn Yî-set-lie̍t.

⁵ Kì su-pûn ngài chhin-tô lai-é, chhai liá-têu lai-é chûng kién-sién Só-lò-mùn chhṳ-lî Yî-set-lie̍t — chhiu-he Song-chú ke koet.

⁶ “Song-chú tui ngài kóng: ‘Oi fu-chit hí Ngài ke sṳn-thien ke ngìn chhiu-he ngì ke lai-é Só-lò-mùn. Ngài yí-kîn kién-sién kì cho Ngài ke lai-é, Ngài oi cho kì ke â-pâ.

⁷ Na-he kì chhiong liá-ha án-ngiòng ki-siu̍k kiún-sṳ́m lòi chûn-hàng Ngài só-yû ke fap-li̍t min-lin, Ngài oi yún-yén kiên-ku kì ke koet.’

⁸ “Liá-ha, ngài ke hiûng-thi, ngài ke pak-siang â, chhai Song-ti ke mien-chhièn lâu chhiòn-phu Yî-set-lie̍t-ngìn — Song-chú chṳ́-mìn ke mien-chhièn, ngài min-lin ngì-têu oi kiún-sṳ́m chûn-hàng Song-chú — ngài-têu Song-ti fûn-fu ke tak khien-sṳ, sṳ́ ngì-têu cho-tet sṳ̀n-su liá-te án-chiâng ke thú-thi, cho-tet thoi-thoi chhòn hâ-hi.”

⁹ Thai-ví tui Só-lò-mùn kóng: “Lai-é â, ngì oi ngin-sṳt ngiâ-pâ ke Song-ti, chhiòn-sîm lo̍k-yi sṳ-fung Kì; yîn-vi Song-chú kam-chhat chung-ngìn ke sîm, Kì tî ngài-têu só-yû ke sîm-sṳ̂ lâu ngien-mong. Ngì chhìm-khiù Kì, Kì chhiu chiap-na̍p ngì; ngì yén-lì Kì, Kì voi yún-yén vok-thet ngì.

¹⁰ Ngì oi tî, Song-chú yí-kîn kién-sién ngì lòi hí Kì ke sṳn-thien. Liá-ha ngì oi yúng-kám hi-cho.”

¹¹ Thai-ví chiông hí sṳn-thien ke kie-va̍k chhiòn-phu lâu Só-lò-mùn kóng, chhiong sṳn-thien só-yû ke kien-chuk, chhông-khu, lèu-fòng, nui-thien, lâu chṳ-sṳn-só — chhiu-he su̍k-chhui ke thi-fông.

¹² Kì ya chiông sîm-tú só-sióng ke thù-hìn chhiòn-phu lâu Só-lò-mùn kóng, chhiong thìn-yen, si chû-vì ke fòng-vuk, tú-chhùn sṳn-thien ke tûng-sî lâu hien-pûn Song-chú lî-vu̍t ke chhông-khu.

¹³ Thai-ví yu lâu kì kóng ngióng-pân chû-chṳt chi-sṳ̂ lâu Li-vi-ngìn, sṳ́ kì-têu sṳ̍t-hàng chṳt-vu, tâm-ngim Song-chú sṳn-thien ke kûng-chok, kón-lî sṳn-thien só-yû ke tûng-sî.

¹⁴ Kì yu chṳ́-sṳ yin-kôi yung kí-tô kîm-é lòi chṳ-chho kîm-hi, yung kí-tô ngiùn-è lòi chṳ-chho ngiùn-hi,

¹⁵ yung kí-tô kîm-é lòi chṳ-chho kîm tên-thòi lâu thòi-táng ke kîm-tên, yung kí-tô ngiùn-è lòi chṳ-chho ngiùn tên-thòi lâu thòi-táng ke ngiùn-tên;

¹⁶ yung kí-tô kîm-é lòi chṳ-chho piong kiûng-piáng hien-pûn Song-ti ke kîm chok-è, yung kí-tô ngiùn-è lòi chṳ-chho ngiùn chok-è.

¹⁷ Kì ya chṳ́-sṳ yin-kôi yung kí-tô sùn-kîm chṳ-chho chhâ-é, phàn-è, pî-é, kîm-vón, yung kí-tô ngiùn-è chṳ-chho ngiùn-vón,

¹⁸ yung kí-tô sùn-kîm chṳ-chho sêu-hiông ke thàn lâu ôn kî-lu-pak ke ku-thin-chho — ngoi-hìn chhiong chhâ-é; liá lióng-chak kîm kî-lu-pak ke yi̍t-kap khièm-tén Song-chú ke yok-khui.

¹⁹ Thai-ví kóng: “Liá só-yû ke kûng-chok kie-va̍k he cheu Song-chú chhîn-chhṳ pûn ngài ke chṳ́-sṳ siá ke.”

²⁰ Thai-ví tui kiâ lai-é Só-lò-mùn kóng: “Ngì oi kiên-khiòng yúng-kám, oi yû sin-sîm hi-cho! M̀-sṳ́ kiâng, ya m̀-hó fôi-sîm sṳt-chṳ. Ngài só sṳ-fung ke Chú Song-ti lâu ngì thùng-chhai; Kì m̀-voi lì-khôi ngì, ya m̀-voi fit-thet ngì, chhṳ̍t-to ngì vàn-sṳ̀n Song-chú sṳn-thien ke kûng-chok.

²¹ Chi-sṳ̂ lâu Li-vi-ngìn su-phai chhai Song-ti sṳn-thien tâm-ngim chṳt-vu. Kok-chúng sú-ngi kô-mìn ke sṳ̂-fu chhiòn-phu fôn-hí pông-chhu ngì; ngìn-mìn lâu mìn-kiên ke liâng-chhiu chhiòn-phu thâng ngì ke min-lin.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan