Bìoball air-loidhne

Li̍t-thoi-chṳ Song 17 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Nâ-tân Chhòn Sêu-sit pûn Thai-ví
( Sat-mû-ngí Ki-ha 7:1-17 )

¹ Thai-ví-vòng he̍t chhai vòng-kiûng. Yû yit-ngit, kì tui siên-tî Nâ-tân kóng: “Ngì khon, ngài he̍t chhai hiông-pak-su hí ke vòng-kiûng, chúng-he Song-chú ke yok-khui hàn chhai chong-phùng tú!”

² Nâ-tân tui Thai-ví kóng: “Ngì chhiu cheu ngì ke sîm-yi hi-cho, yîn-vi Song-ti lâu ngì khiung-ha.”

³ Chúng-he, ke am-pû Song-ti tui Nâ-tân kóng:

⁴ “Hi lâu Ngài ke phu̍k-ngìn Thai-ví kóng, Song-chú án-ngiòng kóng: ‘Ngì cho-m̀-tet hí sṳn-thien pûn Ngài he̍t.

⁵ Chhṳ-chhiùng Ngài tui Âi-khi̍p tai Yî-set-lie̍t-ngìn chhut-lòi to liá-ha, Ngài mò he̍t-ko sṳn-thien; Ngài yit-chhṳ̍t he̍t chhai chong-phùng, tak só-chhai sái-lòi sái-hi.

⁶ Ngài lâu Yî-set-lie̍t-ngìn khiung-ha liù-long ke-têu ngièn-ngit, ke-têu Ngài sién-lòi khon-ku Ngài chṳ́-mìn só-yû ke liâng-chhiu, Ngài chhiùng-lòi m̀-sṳt mun-ko má-ngìn, cho-má-ke m̀ vi Ngài hí yit-chho hiông-pak-su ke sṳn-thien.’

⁷ “Só-yî, ngì oi lâu Ngài ke phu̍k-ngìn Thai-ví kóng, Ngài — Song-chú, Van-kiûn ke Ngièn-soi án-ngiòng kóng: ‘Ngì chhai yâ-thi chóng-yòng, Ngài chiông ngì fû-seu chhut-lòi, li̍p ngì cho Ngài chṳ́-mìn Yî-set-lie̍t ke vòng.

⁸ Ngì mò-lun to má-ke thi-fông, Ngài lûng-chúng lâu ngì khiung-ha; Ngài chhù-thet ngì só-yû ke sù-thi̍t. Ngài oi sṳ́ ngì lâu sṳ-kie chui ví-thai ke ngìn khiung-yong án yû-miàng.

^9-10 Ngài vi Ngài ke chṳ́-mìn Yî-set-lie̍t sién yit-ke thi-fông, chiông kì-têu ôn-tún chhai ke-vi, sṳ́ kì-têu m̀-voi chai pûn-ngìn khî-fu. Chhṳ-chhiùng kì-têu sái-to liá-te thú-thi, Ngài yu sat-li̍p sṳ-sṳ̂ lòi chhṳ-lî kì-têu, kì-têu sa sòng-sòng pûn ok-pa khî-ap; chúng-he liá-chúng sṳ m̀-voi chai fat-sên lé. Ngài tap-yin tá-yàng ngì só-yû ke sù-thi̍t. Ngài — Song-chú ya tui ngì siên-ko, Ngài oi su-pûn ngì yû heu-thoi.

¹¹ Ngì sí-heu lâu chú-siên chong khiung-ha ke sṳ̀, Ngài voi li̍p ngì yit-ke lai-é cho vòng, sṳ́ kì ke koet khiòng-sṳn.

¹² Kì chang he vi Ngài hí sṳn-thien ke ngìn; Ngài oi kiên-ku kì ke vòng-vi chhṳ̍t-to yún-yén.

¹³ Ngài oi cho kì ke â-pâ; kì oi cho Ngài ke lai-é. Ngài m̀-voi sû-chón Ngài tui kì ke thung-siak, chhiong Ngài yî-chhièn sû-chón tui Só-lò ke thung-siak án-ngiòng; Ngài sṳt fi-thet kì, li̍p ngì cho vòng.

¹⁴ Ngài oi sṳ́ kì yún-yén chhṳ-lî Ngài ke chṳ́-mìn lâu Ngài ke koet; kì ke vòng-vi voi yún-yén chhùn-chhai.’ ”

¹⁵ Nâ-tân chiông Song-ti hiong kì khí-sṳ ke tak-khien sṳ chhiòn-phu lâu Thai-ví kóng.

Thai-ví Kám-ên ke Khì-tó
( Sat-mû-ngí Ki-ha 7:18-29 )

¹⁶ Thai-ví-vòng ngi̍p-hi sṳn-chong-phùng, to Song-chú mien-chhièn, chhô-tén khì-tó kóng: “Chú Song-ti â, Ngì vi ngài só cho ke yit-chhiet, ngài sṳ̍t-chhai khâm m̀-tet, ngài ke kâ-chhu̍k ya khâm m̀-tet.

¹⁷ Chúng-he, Song-ti â, Ngì su-pûn ngài án-tô, sṳm-chṳ yin-hí chhai chiông-lòi ke ngit-è oi ên-thai Ngì phu̍k-ngìn ke chṳ́-sûn. Chú Song-ti â, Ngì yí-kîn khon ngài cho thai-ngìn-vu̍t lòi khoán-thai.

¹⁸ Ngài hàn-yû má-ke fa hó kóng nè? Yîn-vi Ngì tî Ngì ke phu̍k-ngìn, hàn-he su-pûn ngài yùng-yeu lâu chûn-kui.

¹⁹ Song-chú â, Ngì án-ngiòng khoán-thai ngài, yu chiông phu̍k-ngìn chiông-lòi ke hîn-vong hiong ngài hién-mìn, liá chhiòn-phu he cheu Ngì ke sîm-yi.

²⁰ Song-chú â, nai yû lâu Ngì pí é-tet ke! Ngài-têu tî, chhù-liáu Ngì yî-ngoi, mò phe̍t-ke Song-ti.

²¹ Sṳ-kiên me mò yit-ke koet-kâ chhiong Yî-set-lie̍t; Ngì kiu Yî-set-lie̍t ngìn-mìn lì-khôi Âi-khi̍p, sṳ́ kì-têu cho Ngì chhṳ-kâ ke chṳ́-mìn. Ngì vi kì-têu cho ví-thai khì-meu ke sṳ, sṳ́ Ngì ke thai-miàng chhòn-to chhiòn sṳ-kie. Ngì ke chṳ́-mìn hiong-chhièn hàng ke sṳ̀, Ngì chiông khì-thâ ke mìn-chhu̍k kiuk-chéu.

²² Ngì sṳ́ Yî-set-lie̍t yún-yén cho Ngì chhṳ-kâ ke chṳ́-mìn, Ngì — Song-chú ya cho kì-têu ke Song-ti.

²³ “Song-chú â, khiù Ngì sṳ̍t-hien Ngì yû-koân ngài lâu ngài heu-thoi ke yin-hí; khiù Ngì yún-yén cheu Ngì só-kóng ke fa sṳ̍t-hàng.

²⁴ Ngien Ngì ke yin-hí yún-yén mò-pien. Ngien Ngì ke miàng yún-yén su chûn-kin; ngien ngìn-mìn yún-yén chhṳ̂n-siung: ‘Song-chú — Van-kiûn ke Ngièn-soi he Yî-set-lie̍t ke Song-ti, he chhṳ-lî Yî-set-lie̍t ke Song-ti!’ Án-ngiòng, Ngì voi sṳ-sṳ thoi-thoi pó-sú Ngì phu̍k-ngìn Thai-ví ke vòng-chhèu.

²⁵ Song-ti â, ngài thai-tám chhai Ngì mien-chhièn án-ngiòng khì-tó; yîn-vi Ngì chiông liá yit-chhiet hiong ngài — Ngì ke phu̍k-ngìn khí-sṳ chhut-lòi, lâu ngài kóng, Ngì oi li̍p ngài ke heu-thoi cho vòng.

²⁶ Song-chú â, chṳ́-yû Ngì he Song-ti; Ngì tui Ngì ke phu̍k-ngìn ya yû án khì-meu ke yin-hí.

²⁷ Liá-ha khiù Ngì su-fuk pûn phu̍k-ngìn ke heu-thoi, sṳ́ kì-têu ki-siu̍k hióng-su Ngì ke ên-fi. Song-chú â, Ngì yí-kîn su-fuk pûn kì-têu; ngien Ngì yún-yén ên-thai kì-têu.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan