Bìoball air-loidhne

Li̍t-thoi-chṳ Ha 9 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Sṳ-pâ Ńg-vòng Fóng-mun Só-lò-mùn
( Lie̍t-vòng Ki-song 10:1-13 )

¹ Sṳ-pâ ńg-vòng thâng-tó Só-lò-mùn-vòng ke miàng-sâng, chhiu to Yâ-lu-sat-lâng lòi, sióng-oi yung khun-nàn ke mun-thì lòi kháu Só-lò-mùn. Yû yit thai-khiùn ngìn thèn-tén kì, tai-tén yit thai-chhui lo̍k-thò chai-tén hiông-liau, chû-pó lâu tông-tô vòng-kîm. Kì khon-tó Só-lò-mùn ke sṳ̀, chiông sîm-chûng só sióng-tó ke mun-thì chhiòn-phu nâ-lòi mun.

² Só-lò-mùn yit-yit fì-tap kì só-yû ke mun-thì, mò yit-chak mun-thì kháu-tó kì.

³ Sṳ-pâ ńg-vòng thâng-tó Só-lò-mùn chṳ-fi ke fa, ya khon-tó kì só-hí ke vòng-kiûng,

⁴ yu khon-tó kì chok-táng fûng-fu ke sṳ̍t-vu̍t, kiâ kôn-yèn he̍t ke vuk, vòng-kiûng phu̍k-ngìn ke chû-chṳt lâu só-chok ke chṳ-fu̍k, chṳ̂m-chiú ke phu̍k-ngìn lâu kì-têu ke sâm-fu, pin sṳn-thien tú só-hien ke sêu-fa-chi, kûi-chak ngìn ngong thet-hi.

⁵ Kì tui Só-lò-mùn-vòng kóng: “Ngài chhai chhṳ-kâ ke koet-kâ só thâng-tó yû-koân ngì ke sṳ̀n-chhiu lâu chṳ-fi chhiòn-phu he ton-chṳ̂n ke!

⁶ Ngài ngièn-lòi m̀-sin, chúng-he ngài lòi-to liá-vi chhîn-ngién khon-tó liá yit-chhiet chang siông-sin. Yû-koân ngì ke chṳ-fi, ngài thâng-tó ke hàn-màng yû yit-pan; ngì pí phe̍t-ngìn chhòn-kóng ke hàn-kha yû chṳ-fi.

⁷ Fu̍k-sṳ ngì ke ngìn ngióng-pân án-yû fuk-hi â! Kì-têu yû-hó sòng-sòng chhai ngì mien-chhièn thâng ngì chṳ-fi ke fa!

⁸ Ngien Song-chú — ngì ke Song-ti tet-tó chan-mî! Kì sat-li̍p ngì cho vòng, sṳ́ ngì fung Kì ke miàng thúng-chhṳ, péu-sṳ Kì ngióng-pân chung-yi ngì. Yîn-vi ngì ke Song-ti thung-siak Kì ke chṳ́-mìn Yî-set-lie̍t, oi yún-yén pó-fu kì-têu, só-yî sat-li̍p ngì cho kì-têu ke vòng, oi ngì vì-fu fap-li̍t, sṳ̂n-chông chṳn-ngi.”

⁹ Sṳ-pâ ńg-vòng chiông tai-lòi ke lî-vu̍t sung-pûn Só-lò-mùn-vòng: Thai-yok yû si-chhiên kûng-kîn chhûng ke vòng-kîm, tông-tô hiông-liau lâu pó-sa̍k. Só-lò-mùn-vòng chhiùng-lòi m̀-sṳt sû-ko pí Sṳ-pâ ńg-vòng só-sung hàn-kha kô-kui ke hiông-liau.

¹⁰ (Hî-làn-vòng lâu Só-lò-mùn-vòng ke phu̍k-ngìn tui Ngò-fî yun kîm-é lòi, ya yun-lòi thàn-hiông-muk lâu chû-pó.

¹¹ Só-lò-mùn-vòng yung liá-têu thàn-hiông-muk cho Song-chú sṳn-thien lâu vòng-kiûng ke lèu-thôi, ya vi ngo̍k-sṳ̂ kô-sú chṳ-chho su-khìm lâu chhit-hièn-khìm. Yù-thai-thi chhiùng-lòi m̀-sṳt khon-ko án-hó ke thàn-hiông-muk.)

¹² Só-lò-mùn-vòng ya tông-khói, sung Sṳ-pâ ńg-vòng kok-chúng lî-vu̍t, chhù-liáu cheu-li oi sung ke lî-vu̍t yî-ngoi, fàm-he Sṳ-pâ ńg-vòng só yêu-khiù ke, kì chhiòn-phu pûn kì. Ńg-vòng lâu thèn kì ke ngìn chhiu chón Sṳ-pâ hi lé.

Só-lò-mùn-vòng ke Chhòi-fu
( Lie̍t-vòng Ki-song 10:14-29 )

¹³ Só-lò-mùn-vòng tak-ngièn sû-tó lióng-van sâm-chhiên kûng-kîn ke vòng-kîm,

¹⁴ nang-ngoi hàn-yû sên-lî ngìn na̍p ke soi. Â-lâ-pak ke-têu vòng lâu Yî-set-lie̍t tak thi-khî ke chúng-tuk ya hiong Só-lò-mùn chin-kung kîm-ngiùn.

¹⁵ Só-lò-mùn-vòng chṳ-chho lióng-pak te thai tún-phài, tak-te yung thai-yok chhit kûng-kîn ke kîm-é tá ke.

¹⁶ Kì yu chṳ-chho sâm-pak te se tún-phài, tak-te yung thai-yok sâm kûng-kîn ke kîm-é tá ke. Kì chiông liá-têu tún-phài piong chhai Lì-pâ-nun Lìm-kiûng tú.

¹⁷ Só-lò-mùn-vòng yu yung siong-ngà chṳ-chho yit-chak thai pó-chho, yung sùn-kîm pâu-tén.

¹⁸ Pó-chho thèu-chhièn yû liuk-chhèn ton-é, lièn-tén yit-chông pâu-kîm ke kiok-ten. Pó-chho lióng-phién yû fù-sú, tak-phién yû yit-chho sṳ̂-é.

¹⁹ Tak-chhèn ton-é ke lióng-thèu ya kok-yû yit-chho sṳ̂-é, chúng-khiung sṳ̍p-ngi chho. Khì-thâ koet-kâ chhiòn-phu m̀-sṳt yû án-ngiòng ke pó-chho.

²⁰ Só-lò-mùn-vòng só-yû ke chiú-pî chhiòn-phu he kîm-é cho ke; só-yû chhai Lì-pâ-nun Lìm-kiûng tú ke vón-phàn chhiòn-phu he sùn-kîm cho ke, m̀-he yung ngiùn-è cho ke; yîn-vi chhai Só-lò-mùn ke sṳ̀-thoi, ngiùn-è m̀-he kui-chhung ke.

²¹ Só-lò-mùn-vòng yû yit-chhui thai-sòn, lâu Hî-làn-vòng ke sòn-chhui khiung-ha chhut-hói; sòn-chhui sâm-ngièn chón-lòi yit-pái, tai-tén kîm-ngiùn, siong-ngà, hèu-è lâu khúng-chhiok chón-lòi.

²² Só-lò-mùn-vòng ke hó-ngiak lâu chhûng-mìn yàng-ko sṳ-song só-yû ke kiûn-vòng.

²³ Chhiòn sṳ-kie tak-ke vòng chhiòn-phu sióng-oi lòi kien Só-lò-mùn, oi thâng Song-ti su-pûn kì chṳ-fi ke fa.

²⁴ Kì-têu tak-ngièn tai lî-vu̍t pûn kì, yû kîm-hi, ngiùn-hi, sâm-fu, vú-hi, hiông-liau, mâ lâu lò-è.

²⁵ Só-lò-mùn yû si-chhiên kiên mâ-phùng piong chan-chhâ lâu mâ, yu yû yit-van lióng-chhiên khì-pîn. Kì chiông yit phu-fun ôn-phài to Yâ-lu-sat-lâng, khì-thâ ke fûn-chu to tak-ke sàng-sṳ

²⁶ Só-lò-mùn thúng-chhṳ tui Yu-fat-lâ-tí-hò to Fî-li-sṳ lâu Âi-khi̍p piên-kin só-yû ke vòng.

²⁷ Chhai kì thúng-chhṳ khì-kiên, Yâ-lu-sat-lâng ke ngiùn-pi chhiong sa̍k-thèu án-tô, hiông-pak-su ya chhiong kô-ngièn ke sông-é-su án phû-phiên.

²⁸ Só-lò-mùn ke sên-lî ngìn tui Mu-chṳ̂-lì lâu phe̍t ke koet-kâ chin-khiéu mâ-é.

Só-lò-mùn Kién-tân ke Li̍t-sṳ́
( Lie̍t-vòng Ki-song 11:41-43 )

²⁹ Só-lò-mùn khì-thâ ke sṳ, tui-thèu to-mî, chhiòn-phu ki chhai Siên-tî Nâ-tân ke Sû, Sṳ-lò-ngìn Â-hî-ngâ ke Yi-ngièn Sû, lâu Siên-kien Yi̍t-tô ke Yi-siong Sû. Chui-mî yit-pún sû he ki-chai Yî-set-lie̍t-vòng Yâ-lò-pô-ôn ke sṳ.

³⁰ Só-lò-mùn chhai Yâ-lu-sat-lâng cho vòng, thúng-chhṳ chhiòn Yî-set-lie̍t si-sṳ̍p ngièn.

³¹ Só-lò-mùn ko-sṳ̂n heu, chong chhai kiâ-pâ Thai-ví ke sàng; kì ke lai-é Lò-pô-ôn sṳ̀n-chiap kì cho vòng.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan