Bìoball air-loidhne

Li̍t-thoi-chṳ Ha 8 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Só-lò-mùn ke Sṳ̀n-chhiu
( Lie̍t-vòng Ki-song 9:10-28 )

¹ Só-lò-mùn yung ngi-sṳ̍p ngièn ke sṳ̀-kiên hí Song-chú ke sṳn-thien lâu vòng-kiûng.

² Só-lò-mùn ya chhùng-sîn cháng Hî-làn-vòng sung-pûn kì ke sàng, chiông Yî-set-lie̍t-ngìn ôn-tún chhai ke-têu sàng-tú.

³ Só-lò-mùn cham-liâng Ha̍p-mâ-Só-pâ thi-khî,

⁴ kien-sat chhai khóng-yâ ke Pâ-mî-lâ-sàng, ya chhùng-kien Ha̍p-mâ kin-nui só-yû tún fo-vu̍t ke sàng-sṳ.

⁵ Kì ya chhùng-kien yî-ha ke sàng-sṳ: Song Pak-Fò-lùn lâu Hâ Pak-Fò-lùn (yû sàng-mùn, cho-tet chhôn ke fòng-ví-sàng),

⁶ Pâ-lâ-sàng, só-yû tún fo-vu̍t ke sàng-sṳ, piong chan-chhâ lâu chan-mâ ke sàng-sṳ. Kì chiông kie-va̍k chhai Yâ-lu-sat-lâng, Lì-pâ-nun lâu koet-nui tak só-chhai sióng-oi hí ke kûng-chhàng chhiòn-phu vàn-sṳ̀n.

^7-8 Só-lò-mùn khiòng-pet só-yû Kâ-nàm-ngìn ke heu-thoi cho khú-kûng; kì-têu he Yî-set-lie̍t-ngìn cham-liâng liá-thi sṳ̀ mò chhṳ̀-thet ke-têu ngìn ke heu-thoi, pâu-hàm Het-ngìn, Â-mô-li-ngìn, Pí-li-sé-ngìn, Hî-vi-ngìn lâu Yâ-pu-sṳ̂-ngìn. Kì-têu ke heu-thoi to liá-ha hàn-he cho nù-chhòi.

⁹ Só-lò-mùn mò ham Yî-set-lie̍t-ngìn cho khú-kûng, chṳ́-yû ham kì-têu cho chan-sṳ, kôn-chóng, chan-chhâ-chóng lâu khì-pîn.

¹⁰ Só-lò-mùn-vòng yû lióng-pak ńg-sṳ̍p ke kam-kûng, kam-tuk kûng-ngìn cho kok-chúng kien-chuk kûng-chhàng.

¹¹ Só-lò-mùn chiông Âi-khi̍p-vòng ke moi-é, tui Thai-ví-sàng sái-to vi kì sîn hí ke vòng-kiûng tú. Kì kóng: “Ngài ke pû-ngiòng mò yin-kôi he̍t chhai Yî-set-lie̍t-vòng Thai-ví ke vòng-kiûng, yîn-vi yok-khui to-ko ke só-chhai chhiu-he sṳn ke.”

¹² Só-lò-mùn chhai sṳn-thien thèu-chhièn, kì só-chho Song-chú ke chi-thàn táng hien sêu-fa-chi pûn Song-chú.

¹³ Kì cheu Mô-sî fap-li̍t ke kûi-thin, vi tak-ke sṳn-ngit hien sêu-fa-chi; liá-têu sṳn-ngit he: Ôn-sit-ngit, chhû-yit lâu sâm-ke ngièn-chiet — Chhù-kau-chiet, Chhit-chhit Sû-kot-chiet, Tap Liàu-è Chiet.

¹⁴ Kì cheu kiâ-pâ Thai-ví ke kûi-thin fûn-phai chi-sṳ̂ lâu Li-vi-ngìn tak-ngit ke kûng-chok; Li-vi-ngìn hia̍p-chhu chi-sṳ̂ khiung-ha chhong-sṳ̂ lâu tâm-ngim khì-thâ kûng-chok. Kì ya cheu sṳ̀n-ngìn Thai-ví ke min-lin chiông sṳn-thien sú-ví fûn-khî chû-chṳt hí-lòi, sṳ́ kì-têu tak-ngit chhai kok sàng-mùn chṳp-hàng ngim-vu.

¹⁵ Thai-ví só chṳ́-sṳ chi-sṳ̂ lâu Li-vi-ngìn yû-koân chhông-khu lâu khì-thâ ke kûng-chok, kì-têu chhiòn-phu chha̍t-tái sṳ̍t-hàng lé.

¹⁶ Liá-sṳ̀, Só-lò-mùn só-yû ke kie-va̍k chhiòn-phu vàn-sṳ̀n, Song-chú ke sṳn-thien tui tá thi-kî to vàn-kûng, só-yû ke kûng-chhàng chin-hàng sun-li.

¹⁷ Heu-lòi, Só-lò-mùn to Yî-sùn-Kâ-phe̍t lâu Yî-luk hi; liá he chhai Yî-tûng thi-khî Â-khá-pâ-vân lióng-ke hói-kóng.

¹⁸ Hî-làn-vòng sung kí-chak sòn hi pûn Só-lò-mùn, ham chhṳ-kâ ke kôn-yèn chṳ́-fî, min-lin kîn-ngiam fûng-fu ke sòn-yèn lòi sṳ́. Kì-têu lâu Só-lò-mùn ke kôn-yèn khiung-ha hàng-sòn to Ngò-fî, tui ke-vi yun chón-lòi thai-yok yit-van ńg-chhiên kûng-kîn kîm-é pûn Só-lò-mùn-vòng.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan