Li̍t-thoi-chṳ Ha 6 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Só-lò-mùn Siên-pu Hí Sṳn-thien ke Lî-yù
( Lie̍t-vòng Ki-song 8:12-21 )

¹ Ke-sṳ̀, Só-lò-mùn khì-tó kóng: “Song-chú â, Ngì kiet-thin oi he̍t chhai phûn-phûn ke vû-yùn tú.

² Ngài yí-kîn vi Ngì hí yit-chho ví-thai ke thien, cho Ngì yún-yén he̍t ke só-chhai.”

³ Yî-set-lie̍t fi-chung chhiòn-phu khî chhai ke-vi. Só-lò-mùn-vòng chón-ko sṳ̂n lòi, mien-tui fi-chung, vi kì-têu hiong Song-ti khiù-fuk.

⁴ Kì kóng: “Chan-mî Song-chú — Yî-set-lie̍t ke Song-ti! Kì chhîn-chhṳ vàn-sṳ̀n Kì hiong ngâ-pâ Thai-ví só yin-hí ke; Kì sṳt chhîn-choi lâu Thai-ví kóng:

⁵ ‘Chhṳ-chhiùng Ngài chiông Ngài ke chṳ́-mìn tai-chhut Âi-khi̍p yî-lòi, Ngài mò sién Yî-set-lie̍t nai-chho sàng lòi hí kin-pai Ngài ke sṳn-thien; Ngài ya mò sién má-ngìn lòi tai-liâng Ngài ke chṳ́-mìn Yî-set-lie̍t.

⁶ Chúng-he liá-ha, Ngài sién Yâ-lu-sat-lâng cho kin-pai Ngài ke só-chhai, yu kién-sién ngì — Thai-ví lòi thúng-chhṳ Ngài ke chṳ́-mìn.’ ”

⁷ Só-lò-mùn ki-siu̍k kóng: “Ngâ-pâ Thai-ví kie-va̍k hí sṳn-thien, cho kin-pai Song-chú — Yî-set-lie̍t Song-ti ke só-chhai.

⁸ M̀-ko Song-chú tui kì kóng: ‘Ngì sióng-oi vi Ngài hí sṳn-thien, liá sîm-yi tông-hó;

⁹ chúng-he ngì cho-m̀-tet khôi-kûng, chṳ́-yû ngì ke lai-é — ngì chhîn-sên ke lai-é chang cho-tet hí Ngài ke sṳn-thien.’

¹⁰ “Liá-ha Song-chú yí-kîn sṳ̍t-hien Kì ke yin-hí. Ngài sṳ̀n-chiap ngâ-pâ Thai-ví cho Yî-set-lie̍t ke vòng, yu yí-kîn hí-hó kin-pai Song-chú — Yî-set-lie̍t Song-ti ke sṳn-thien.

¹¹ Ngài ya chiông yok-khui piong chhai sṳn-thien tú. Yok-khui tî-poi piong-tén li̍p-yok ke sa̍k-pán; liá chhiu-he Song-chú lâu Yî-set-lie̍t-ngìn li̍p ke yok.”

Só-lò-mùn ke Khì-tó
( Lie̍t-vòng Ki-song 8:22-53 )

¹² Chiap-tén, Só-lò-mùn chhai Yî-set-lie̍t fi-chung mien-chhièn hàng-to Song-chú ke chi-thàn chhièn khî-tén, khià-hí sûng-sú khì-tó.

¹³ (Só-lò-mùn sṳt ham-ngìn cho yit-ke thùng-thòi, piong chhai thìn-yen tûng-ông, lióng kûng-chhak lióng kûng-chhun si-fông, kô yit kûng-chhak sâm kûng-chhun. Só-lò-mùn khî chhai thòi-táng, chhai tak-sà khon tet-tó ke só-chhai khúi hâ-lòi, hiong-thiên khià-hí sûng-sú.)

¹⁴ Kì khì-tó kóng: “Song-chú — Yî-set-lie̍t ke Song-ti â, thiên-táng thi-song mò phe̍t ke sṳ̀n cho-tet lâu Ngì pí! Ngì sin-sú Ngì lâu Ngì phu̍k-ngìn só-li̍p ke yok: Ke-têu yit-sîm yit-yi sun-fu̍k Ngì ke, Ngì chhiu oi hiong kì-têu hién-chhut chhṳ̀-oi.

¹⁵ Ngì chhîn-chhṳ vàn-sṳ̀n Ngì hiong Ngì ke phu̍k-ngìn — ngâ-pâ Thai-ví ke yin-hí, to kîm-pû-ngit, tak-chak sṳ, tak-ki fa chhiòn-phu sṳ̍t-hien lé.

¹⁶ Song-chú — Yî-set-lie̍t ke Song-ti â, liá-ha ngài khiù Ngì ya sṳ̍t-hien Ngì hiong ngâ-pâ só-kóng ke khì-thâ ke yin-hí: Ngì sṳt lâu kì kóng, na-he kì ke heu-thoi chhiong kì khiung-yong, ngin-chṳ̂n chûn-hàng Ngì ke fap-li̍t, kì ke heu-thoi chhiu voi yún-yén yû-ngìn cho Yî-set-lie̍t ke vòng.

¹⁷ Só-yî, Song-chú — Yî-set-lie̍t ke Song-ti â, khiù Ngì sṳ̍t-hien hiong Ngì ke phu̍k-ngìn Thai-ví só yin-hí ke fa.

¹⁸ “Song-ti â, Ngì ton-chṳ̂n voi he̍t chhai thi-song, chhai sṳ-ngìn tông-chûng mâ? Chhiu-son thiên lâu thiên-táng ke thiên ya m̀-la Ngì he̍t, ngài só-hí ke liá sṳn-thien son má-ke nè?

¹⁹ Song-chú — ngài ke Song-ti â, ngài he Ngì ke phu̍k-ngìn; khiù Ngì thâng ngài ke khì-tó, thâng ngài chhai Ngì mien-chhièn ke khiù-ham.

²⁰ Khiù Ngì ngit-ya khon-ku liá sṳn-thien; liá he Ngì sṳt yin-hí oi-cho kin-pai Ngì ke só-chhai. Ngì ke phu̍k-ngìn mien-tui liá sṳn-thien khì-tó ke sṳ̀, khiù Ngì thâng ngài ke khì-khiù.

²¹ Ngì ke phu̍k-ngìn lâu Ngì ke chṳ́-mìn Yî-set-lie̍t mien-tui liá só-chhai khì-tó ke sṳ̀, khiù Ngì tui thiên-táng Ngì he̍t ke só-chhai thâng ngài-têu ke khì-khiù, sa-miên ngài-têu.

²² “Na-he yû-ngìn tet-chhui thùng-pâu pûn-ngìn ko, pûn-ngìn tai-to liá sṳn-thien — Ngì ke chi-thàn chhièn, fat-sṳ kóng kì he mò-chhui ke,

²³ Song-chú â, khiù Ngì tui thiên-táng thâng, lòi sṳ́m-phan Ngì ke phu̍k-ngìn: Yû-chhui ke, chhiu cheu kì kôi-tet ke chit-fa̍t kì; mò-chhui ke, chhiu phan kì mò-chhui, vàn kì chhîn-pha̍k.

²⁴ “Na-he Ngì ke chṳ́-mìn Yî-set-lie̍t yîn-vi tet-chhui Ngì pûn thi̍t-ngìn tá-yàng, heu-lòi yu fí-kói kûi-hiong Ngì, chûn Ngì ke miàng cho-thai, to liá sṳn-thien lòi, khiâm-pî khì-khiù Ngì ke sa-miên,

²⁵ khiù Ngì tui thiên-táng thâng kì-têu ke khì-khiù, sa-miên Ngì chṳ́-mìn ke chhui, thu kì-têu chón-to Ngì su-pûn kì-têu lâu kì-têu chú-siên ke liá-te thú-thi.

²⁶ “Na-he yû Ngì ke chṳ́-mìn tet-chhui Ngì, Ngì sṳ́ thiên mò lo̍k-yí, heu-lòi kì-têu fí-kói, chûn Ngì ke miàng cho-thai, mien-tui liá sṳn-thien, khiâm-pî hiong Ngì khì-tó,

²⁷ khiù Ngì tui thiên-táng thâng kì-têu ke khì-khiù. Khiù Ngì sa-miên Ngì ke phu̍k-ngìn — Yî-set-lie̍t ngìn-mìn ke chhui, kâu kì-têu hàng chṳn-chhṳ̍t ke lu. Ke-sṳ̀, Song-chú â, khiù Ngì lo̍k-súi chhai Ngì ke thú-thi song, chhiu-he Ngì su-pûn Ngì chṳ́-mìn cho sán-ngia̍p ke thú-thi.

²⁸ “Na-he koet-nui yû kî-fông, pot-vûn, sêu-fûng, sâng-kû, chhó-máng, vò-hà, ya-he Ngì ke chṳ́-mìn pûn sù-thi̍t vì-khun, ya-he tù-tó khì-thâ châi-fo phiang-thung,

²⁹ khiù Ngì thâng kì-têu ke khì-tó. Na-he Ngì ke chṳ́-mìn Yî-set-lie̍t chûng yû-ngìn yù-sông thung-khú, chhûn-chhut sûng-sú hiong liá sṳn-thien khì-tó,

³⁰ khiù Ngì tui thiên-táng Ngì he̍t ke só-chhai thâng kì-têu ke khì-khiù, lòi sa-miên kì-têu. Chṳ́-yû Ngì chhṳ̂m-tî ngìn-sîm. Khiù Ngì cheu tak-sà só-cho ke khoán-thai kì-têu,

³¹ sṳ́ Ngì ke chṳ́-mìn yún-yén chhai Ngì su-pûn ngài-têu chú-siên ke thú-thi song kin-vi Ngì, sun-fu̍k Ngì.

³² “Na-he yû yit-ke he̍t chhai yén-fông ke ngoi-chhu̍k ngìn thâng-tó Ngì ke thai-miàng lâu thai-yû nèn-li̍t, sùi-sṳ̀ pông-chhu ngìn ke sú, chhiu lòi hiong liá sṳn-thien khì-tó,

³³ khiù Ngì tui thiên-táng Ngì he̍t ke só-chhai thâng kì ke khì-khiù, cheu kì hiong Ngì só-khiù ke tap-yin kì, sṳ́ chhiòn sṳ-kie ke ngìn chhiòn-phu chhiong Ngì ke chṳ́-mìn Yî-set-lie̍t khiung-yong ngin-sṳt Ngì, kin-vi Ngì, sṳ́ kì-têu tî ngài só-hí ke liá sṳn-thien chhiu-he kin-pai Ngì ke só-chhai.

³⁴ “Na-he Ngì ke chṳ́-mìn cheu Ngì ke min-lin sông chan-chhòng lâu thi̍t-ngìn siông-chhṳ̀, mò-lun kì-têu chhai má-ke thi-fông, mien-tui Ngì só-sién ke liá-sàng lâu ngài vi Ngì hí ke liá sṳn-thien khì-tó,

³⁵ khiù Ngì thâng kì-têu. Khiù Ngì tui thiên-táng thâng kì-têu ke khì-tó, sṳ́ kì-têu tet-sṳn.

³⁶ “Na-he Ngì ke chṳ́-mìn tet-chhui Ngì (sṳ-song mò-ngìn he mò fam-chhui ke), Ngì fat-khién ke sṳ̀ chún thi̍t-ngìn tá-yàng kì-têu, chiông kì-têu chok-hi phe̍t ke thi-fông, mò-lun he yén ya-he khiûn,

³⁷ ya khiù Ngì thâng Ngì chṳ́-mìn ke khì-tó. Na-he kì-têu chhai ke-vi fí-kói, hiong Ngì khì-khiù, sṳ̀n-ngin kì-têu fam-chhui, hàng-sṳ sià-ok, Song-chú â, khiù Ngì thâng kì-têu ke khì-tó.

³⁸ Na-he kì-têu chhai ke thi-fông sṳ̀n-sîm sṳ̀n-yi fí-kói, mien-tui Ngì su-pûn ngài-têu chú-siên ke liá-te thú-thi hiong Ngì khì-tó, mien-tui Ngì só-sién ke liá-sàng lâu ngài vi Ngì hí ke liá sṳn-thien khì-tó,

³⁹ khiù Ngì thâng kì-têu. Khiù Ngì tui thiên-táng Ngì he̍t ke só-chhai thâng kì-têu ke khì-khiù, lìn-mén kì-têu, sa-miên Ngì chṳ́-mìn só-yû ke chhui.

⁴⁰ “Ngài ke Song-ti â, liá-ha khiù Ngì muk-chû tá-khôi lòi khon, ngí-kûng chu-yi lòi thâng ngài-têu chhai liá-vi só hien ke khì-tó.

⁴¹ Chú Song-ti â, khiù Ngì hong-hí-lòi chin-ngi̍p Ngì hiû-sit ke thi-fông, lâu thoi-péu Ngì thai-nèn ke yok-khui khiung-ha ngi̍p-hi sṳn-thien. Chú Song-ti â, khiù Ngì su-fuk pûn Ngì ke-têu chi-sṳ̂ só-cho ke yit-chhiet; ngien Ngì só-yû ke sṳn-mìn yîn-vi Ngì ke liòng-san khoai-lo̍k.

⁴² Song-chú — Song-ti â, m̀-hó fit-thet Ngì só sién-li̍p ke vòng. Khiù Ngì ki-tet Ngì tui Ngì phu̍k-ngìn Thai-ví ke chhṳ̀-oi.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan