Li̍t-thoi-chṳ Ha 36 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yù-thai-vòng Yok-ha̍p-sṳ̂
( Lie̍t-vòng Ki-ha 23:30-35 )

¹ Yù-thai ngìn-mìn sién Yok-sî-â ke lai-é Yok-ha̍p-sṳ̂, chhai Yâ-lu-sat-lâng sat-li̍p kì cho vòng.

² Yok-ha̍p-sṳ̂ ngi-sṳ̍p sâm-se ke sṳ̀ cho Yù-thai-vòng; kì chhai Yâ-lu-sat-lâng thúng-chhṳ sâm-ke ngie̍t.

³ Âi-khi̍p-vòng Nì-kô chhai Yâ-lu-sat-lâng chok-tó kì, fa̍t Yù-thai-koet oi chin-kung ngiùn-è sâm-chhiên si-pak kûng-kîn, kîm-é sâm-sṳ̍p si kûng-kîn.

⁴ Âi-khi̍p-vòng Nì-kô li̍p Yok-ha̍p-sṳ̂ kiâ-kô Yî-li-â-kin cho Yù-thai lâu Yâ-lu-sat-lâng ke vòng, chiông kì ke miàng kói-cho Yok-ngâ-kin. Yok-ha̍p-sṳ̂ pûn Nì-kô chok-tó Âi-khi̍p hi.

Yù-thai-vòng Yok-ngâ-kin
( Lie̍t-vòng Ki-ha 23:36–24:7 )

⁵ Yok-ngâ-kin ngi-sṳ̍p ńg-se ke sṳ̀ cho Yù-thai-vòng; kì chhai Yâ-lu-sat-lâng thúng-chhṳ sṳ̍p-yit ngièn. Kì hàng Song-chú — kì ke Song-ti khon-cho sià-ok ke sṳ.

⁶ Pâ-pí-lùn-vòng Nì-pu-kap-nì-sat chhîm-fam Yù-thai, chok-tó Yok-ngâ-kin, chiông kì yung thùng-lien só-tén, tai-to Pâ-pí-lùn.

⁷ Nì-pu-kap-nì-sat ya chiông Song-chú sṳn-thien tú ke yit phu-fun pó-vu̍t tai-to Pâ-pí-lùn, piong chhai chhṳ-kâ ke vòng-kiûng tú.

⁸ Yok-ngâ-kin khì-thâ ke sṳ, pâu-hàm kì só-cho sià-ok ke sṳ lâu só-fam ke chhui, chhiòn-phu ki chhai Yî-set-lie̍t lâu Yù-thai Lie̍t-vòng Sṳ́ tî-poi. Kì ke lai-é Yok-ngâ-kîn sṳ̀n-chiap kì cho vòng.

Yù-thai-vòng Yok-ngâ-kîn
( Lie̍t-vòng Ki-ha 24:8-17 )

⁹ Yok-ngâ-kîn sṳ̍p-pat se ke sṳ̀ cho Yù-thai-vòng; kì chhai Yâ-lu-sat-lâng thúng-chhṳ sâm-ke ngie̍t yu sṳ̍p-ngit. Kì hàng Song-chú khon-cho sià-ok ke sṳ.

¹⁰ Chhûn-thiên ke sṳ̀, Nì-pu-kap-nì-sat-vòng phai-ngìn chiông Yok-ngâ-kîn lâu Song-chú sṳn-thien tú ke pó-vu̍t tai-to Pâ-pí-lùn, yèn-heu li̍p Yok-ngâ-kîn ke â-suk Sî-tí-kâ cho Yù-thai lâu Yâ-lu-sat-lâng ke vòng.

Yù-thai-vòng Sî-tí-kâ
( Lie̍t-vòng Ki-ha 24:18-20 ; Yâ-li-mí Sû 52:1-3 )

¹¹ Sî-tí-kâ ngi-sṳ̍p yit-se ke sṳ̀ cho Yù-thai-vòng; kì chhai Yâ-lu-sat-lâng thúng-chhṳ sṳ̍p-yit ngièn.

¹² Kì hàng Song-chú — kì ke Song-ti khon-cho sià-ok ke sṳ, m̀-hén khiâm-pî thâng-chhiùng siên-tî Yâ-li-mí só-chhòn Song-chú ke fa.

Yâ-lu-sat-lâng Ham-lo̍k
( Lie̍t-vòng Ki-ha 25:1-21 ; Yâ-li-mí Sû 52:3-11 )

¹³ Nì-pu-kap-nì-sat-vòng sṳt khiòng-pet Sî-tí-kâ fung Song-ti ke miàng fat-sṳ, oi tui kì chûng-sîm, chúng-he Sî-tí-kâ chho-fán. Sî-tí-kâ ngang-kiáng m̀-hén fí-kói, m̀-ngien chón-hiong Song-chú — Yî-set-lie̍t ke Song-ti.

¹⁴ Nang-ngoi, Yù-thai ke-têu liâng-chhiu, chi-sṳ̂, lâu ngìn-mìn ya fam-liáu thai-chhui, ho̍k kì-têu chû-vì ke mìn-chhu̍k hi-pai ngiéu-siong, vû-ve Song-chú chhai Yâ-lu-sat-lâng fûn-phe̍t vì-sṳn ke sṳn-thien.

¹⁵ Song-chú — kì-têu chú-siên ke Song-ti yit-pái yu yit-pái phai siên-tî kín-ko kì-têu, yîn-vi Kì thung-siak Kì ke chṳ́-mìn lâu sṳn-thien.

¹⁶ Kì-têu fán-chón méu-sṳ Song-ti ke sṳ́-chá, m̀-tap Song-ti ke fa, sâu-nat Kì ke siên-tî. To chui-heu, Song-chú tui Kì ke chṳ́-mìn thai fat-khién, chṳ-to mò-ngìn yû phan-fap kiu kì-têu.

¹⁷ Song-chú phai Pâ-pí-lùn-vòng lòi kûng-tá kì-têu, chhai sṳn-thien tú chhṳ̀-sí Yù-thai ke heu-sâng ngìn. Mò-lun nàm-ńg thai-se, Pâ-pí-lùn-vòng lûng-chúng mò lìn-mén. Song-ti chiông kì-têu chhiòn-phu kâu chhai kì ke sú-chûng.

¹⁸ Pâ-pí-lùn-vòng chiông Song-chú sṳn-thien tú só-yû ke yung-phín lâu chhòi-pó, pin vòng lâu kôn-yèn ke chhòi-pó, chhiòn-phu tai-to Pâ-pí-lùn hi.

¹⁹ Kì sêu-thet Song-ti ke sṳn-thien, chhak-thet Yâ-lu-sat-lâng ke sàng-chhiòng, piong-fó chiông vòng-kiûng lâu sàng-nui chhung-yeu ke kien-chuk sêu-thet, fí-fái sàng-nui só-yû ke chhòi-pó.

²⁰ Kì chiông châi-nan heu hàn-sâng ke ngìn tai-to Pâ-pí-lùn, khiòng-pet kì-têu chhai ke-vi cho nù-chhòi, fu̍k-sṳ kì lâu kì ke heu-thoi, chhṳ̍t-to Pô-sṳ̂ ti-koet hîn-hí.

²¹ Song-chú thûng-ko siên-tî Yâ-li-mí só yi-ngièn: “Liá-te thú-thi oi fông-thet chhit-sṳ̍p ngièn, he oi pú-chiuk ke mò chûn-sú ke ôn-sit-ngièn”, liá-fa sṳ̍t-hien lé.

Sai-lû-sṳ Fòng-ti Ha-lin Yù-thai-ngìn Chón-hi
( Yî-sṳ̂-lâ Ki 1:1-4 )

²² Pô-sṳ̂-vòng Sai-lû-sṳ tên-kî cho fòng-ti ke thi-yit ngièn, Song-chú vi-tó sṳ̍t-hien Kì thûng-ko siên-tî Yâ-li-mí só-kóng ke yi-ngièn, chhiu kám-thung Sai-lû-sṳ pân-pu min-lin, yung sṳ siá hâ-lòi, chhòn-to chhiòn ti-koet tak só-chhai kóng:

²³ “Liá he Pô-sṳ̂ fòng-ti Sai-lû-sṳ ke min-lin: Song-chú — thiên-táng ke Song-ti pûn ngài cho chhiòn sṳ-kie ke thúng-chhṳ-chá; Kì oi ngài fu-chit chhai Yù-thai ke Yâ-lu-sat-lâng vi Kì hí yit-chho thien. Liá-ha, ngì-têu só-yû su̍k Song-ti ke chṳ́-mìn oi sông-hi ke-vi, ngien Song-chú — ngì-têu ke Song-ti lâu ngì-têu thùng-chhai.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan