Bìoball air-loidhne

Li̍t-thoi-chṳ Ha 33 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yù-thai-vòng Mâ-nâ-sî
( Lie̍t-vòng Ki-ha 21:1-9 )

¹ Mâ-nâ-sî sṳ̍p-ngi se ke sṳ̀ cho Yù-thai-vòng, chhai Yâ-lu-sat-lâng thúng-chhṳ ńg-sṳ̍p ńg-ngièn.

² Mâ-nâ-sî hàng Song-chú khon-cho sià-ok ke sṳ, chhiu-chhiong Song-chú chhai Kì ke chṳ́-mìn mien-chhièn kiuk-chéu ke ngièn-lòi ngoi-chhu̍k ngìn só-cho chit-ok ke sṳ.

³ Kì chhùng-sîn hí kiâ-pâ Hî-sî-kâ só chhak-thet sân-kông táng ke sṳ̀n-meu, yu hí chi-thàn pai Pâ-li̍t, tá-chho Â-sa-lâ ńg-sṳ̀n ke chhû-siong, ya kin-pai sṳ-fung thiên-siong.

⁴ Kì chhai Yâ-lu-sat-lâng, chhiu chhai Song-chú fûn-fu oi yún-yén kin-pai Song-chú ke sṳn-thien tî-poi hí yi-kau ke chi-thàn,

⁵ yu chhai sṳn-thien ke lióng-chak thìn-yen tú hí pai thiên-siong ke chi-thàn.

⁶ Kì chhai Hiûn-nun-chṳ́ sân-lak chiông chhṳ-kâ ke lai-é piong-fó sêu-hien pûn sṳ̀n-mìn, yu hi puk-koa, yung fap-su̍t, hàng sià-su̍t, khiù-mun kâu-kúi ke lâu son-miang ke. Kì hàng tông-tô Song-chú khon-cho sià-ok ke sṳ, ngiâ Kì fat-khién.

⁷ Kì chiông ngiéu-siong piong chhai Song-ti ke sṳn-thien tî-poi. Lun-tó sṳn-thien, Song-ti sṳt tui Thai-ví lâu kiâ lai-é Só-lò-mùn kóng: “Yâ-lu-sat-lâng ke sṳn-thien chhiu-he Ngài tui Yî-set-lie̍t sṳ̍p-ngi kî-chhu̍k ke thú-thi chûng sién chhut-lòi, oi yún-yén cho kin-pai Ngài ke thi-fông.

⁸ Na-he Yî-set-lie̍t ngìn-mìn ngin-chṳ̂n thâng-chhiùng Ngài só-yû ke kie-min, chûn-sú Mô-sî fûn-fu kì-têu só-yû ke fap-li̍t, Ngài yit-thin m̀-voi pûn kì-têu tui Ngài su-pûn kì-têu chú-siên ke liá-te thú-thi pûn-ngìn kiuk-chéu.”

⁹ Chúng-he Mâ-nâ-sî tai Yù-thai lâu Yâ-lu-sat-lâng ngìn-mìn fam-chhui, pí Song-chú tui Kì ke chṳ́-mìn mien-chhièn kiuk-chéu ke ngièn-lòi ngoi-chhu̍k ngìn só-fam ke chhui hàn-kha ngiàm-chhung.

Mâ-nâ-sî Fí-kói

¹⁰ Sûi-yèn Song-chú kín-ko Mâ-nâ-sî lâu Kì ke ngìn-mìn, kì-têu hàn-he m̀-thâng.

¹¹ Só-yî Song-chú pûn Â-sut fòng-ti ke chiông-kiûn tai kiûn-chhui lòi chhîm-fam Yù-thai. Kì-têu chok-tó Mâ-nâ-sî, yung kiêu-é kiêu-tén kì, thùng lien-é só-tén kì, chok-to Pâ-pí-lùn hi.

¹² Mâ-nâ-sî su-tó thung-khú ke sṳ̀ khiâm-pî hâ-lòi, chón-hiong Song-chú — kì ke Song-ti, kiâ chú-siên ke Song-ti, khì-khiù Kì ke pông-chhu.

¹³ Song-ti thâng kì ke khì-tó, chún kì ke khì-khiù, pûn kì to-chón Yâ-lu-sat-lâng cho vòng. Yîn-vi liá-khien sṳ, Mâ-nâ-sî chang khok-sin Song-chú chhiu-he Song-ti.

¹⁴ Liá-sṳ yî-heu, Mâ-nâ-sî chiông Thai-ví-sàng tûng-phién ke ngoi sàng-chhiòng kâ-kô, tui Kî-hiun chhièn-súi fu-khiun ke sân-lak hiong-pet to Ǹg-mùn lâu sàng-tú Ngò-fî-le̍t thi-khî. Kì ya chhai Yù-thai tak fòng-ví-sàng phai kiûn-chhui, yû kiûn-kôn chṳ́-fî.

¹⁵ Kì chiông yî-chhièn piong chhai Song-chú sṳn-thien tú ke ngoi-chhu̍k sṳ̀n-siong chhù-thet, ya chiông kì chhai sṳn-thien sân-táng lâu Yâ-lu-sat-lâng khì-thâ só-chhai só hí ke yi-kau chi-thàn chhak-thet. Mâ-nâ-sî chiông liá-têu tûng-sî pân-chhut sàng-ngoi te̍p-thet.

¹⁶ Kì siû-cháng kin-pai Song-chú ke chi-thàn, chhai chi-thàn táng-kô hien phìn-ôn-chi lâu kám-ên chi. Kì min-lin Yù-thai só-yû ngìn-mìn oi kin-pai Song-chú — Yî-set-lie̍t ke Song-ti.

¹⁷ Sûi-yèn ngìn-mìn ki-siu̍k chhai khì-thâ ke sân-táng hien-chi, chúng-he kì-têu chṳ́-yû hien-pûn Song-chú — kì-têu ke Song-ti.

Mâ-nâ-sî Thúng-chhṳ ke Kiet-suk
( Lie̍t-vòng Ki-ha 21:17-18 )

¹⁸ Mâ-nâ-sî khì-thâ ke sṳ, pâu-hàm kì hiong Song-ti ke khì-tó, pin siên-kien fung Song-chú — Yî-set-lie̍t ke Song-ti tui kì kóng ke fa, chhiòn-phu ki chhai Yî-set-lie̍t Lie̍t-vòng Sṳ́ tî-poi.

¹⁹ Vòng ke khì-tó lâu Song-ti ke fì-tap, pin kì chhai fí-kói chhièn só-fam ke chhui — chhiu-he kì só-cho ke fái-sṳ, chhiong hí-chho sân-táng ke sṳ̀n-meu, tá-chho Â-sa-lâ ńg-sṳ̀n ke chhû-siong lâu khì-thâ kin-pai tiâu-khiet ke ngiéu-siong, chhiòn-phu ki chhai Siên-kien Sṳ́ tî-poi.

²⁰ Mâ-nâ-sî sí-heu chong chhai chhṳ-kâ ke vòng-kiûng tú; kì ke lai-é Â-mùn sṳ̀n-chiap kì cho vòng.

Yù-thai-vòng Â-mùn
( Lie̍t-vòng Ki-ha 21:19-26 )

²¹ Â-mùn ngi-sṳ̍p ngi-se ke sṳ̀ cho Yù-thai-vòng, chhai Yâ-lu-sat-lâng thúng-chhṳ lióng-ngièn.

²² Kì chhiong kiâ-pâ Mâ-nâ-sî hàng Song-chú khon-cho sià-ok ke sṳ, pai kiâ-pâ só chho ke ngiéu-siong.

²³ Chúng-he Â-mùn mò chhiong kiâ-pâ khiâm-pî chón-hiong Song-chú, fán-chón pí kiâ-pâ fam hàn-kha chhûng ke chhui.

²⁴ Â-mùn ke kôn-yèn chho-fán, chhai vòng-kiûng tú chiông kì chhṳ̀-thet.

²⁵ Chúng-he Yù-thai ngìn-mìn chiông ke-têu mèu-sat Â-mùn-vòng ke ngìn chhṳ̀-thet, sat-li̍p kiâ lai-é Yok-sî-â sṳ̀n-chiap kì cho vòng.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan