Bìoball air-loidhne

Li̍t-thoi-chṳ Ha 32 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Â-sut-ngìn Vî-hia̍p Yâ-lu-sat-lâng
( Lie̍t-vòng Ki-ha 18:13-37 ; 19:14-19 , 35-37 ; Yî-soi-â Sû 36:1-22 ; 37:8-38 )

¹ Chhai Hî-sî-kâ-vòng chûng-sîm sṳ-fung Song-chú ke liá-têu sṳ-khien yî-heu, Â-sut fòng-ti Sî-nâ-kî-li̍p chhîm-fam Yù-thai. Kì pâu-vì fòng-ví-sàng, sióng-oi cham-liâng liá-têu sàng.

² Hî-sî-kâ khon-tó Sî-nâ-kî-li̍p sióng-oi kûng-tá Yâ-lu-sat-lâng,

^3-4 kì lâu mìn-kiên ke-têu liâng-chhiu lâu kôn-yèn kiet-thin chhiet-thôn sàng-ngoi ke súi-ngièn, sṳ́ Â-sut-ngìn chhai chiap-khiun Yâ-lu-sat-lâng ke sṳ̀ mò súi hó-lîm. Kì-têu chhiu si̍p-ha̍p chhin-tô ngìn chhut-hi set só-yû sàng-ngoi ke súi-ngièn.

⁵ Hî-sî-kâ-vòng cháng sàng-chhiòng, kâ-khiòng sàng-nui ke fòng-phi, chhai sàng-chhiòng táng hí sàng-lèu, yu chho ngoi-chhiòng. Nang-ngoi, kì yu cháng khiu Thai-ví-sàng tûng-phién thi-kî kha-tâi ke sàng-pó, ya tá-chho chhin-tô tô-chhiông lâu tún-phài.

⁶ Hî-sî-kâ-vòng min-lin sàng-tú só-yû ke nàm-ngìn chhiòn-phu chiap-su kiûn-kôn ke chṳ́-fî, pin seu-si̍p kì-têu to sàng-mùn sùn ke kóng-chhòng, miên-li kì-têu kóng:

⁷ “Ngì-têu oi kiên-khiòng, oi yúng-kám! M̀-sṳ́ kiâng Â-sut fòng-ti lâu kì só tai-liâng ke thai kiûn-chhui, yîn-vi ke lâu ngài-têu khiung-ha ke, pí lâu kì khiung-ha ke kien-yû nèn-li̍t.

⁸ Kì chṳ́-yû ngìn ke li̍t-liong; chúng-he ngài-têu yû Song-chú — ngài-têu ke Song-ti pông-chhu, vi ngài-têu siông-chhṳ̀.” Ngìn-mìn yîn-vi Yù-thai-vòng Hî-sî-kâ liá-têu fa chhiu tet-tó kú-li.

⁹ Ko-heu, tông Â-sut fòng-ti Sî-nâ-kî-li̍p lâu kì ke kiûn-chhui kûng-tá Lâ-kit ke sṳ̀, kì phai kí-ke kôn-yèn hi Yâ-lu-sat-lâng, tui Yù-thai-vòng Hî-sî-kâ lâu ke-vi ke Yù-thai ngìn-mìn kóng:

¹⁰ “Ngài — Â-sut fòng-ti Sî-nâ-kî-li̍p mun ngì-têu, ngì-têu phìn má-ke án yû pá-ak, tông Yâ-lu-sat-lâng su pâu-vì ke sṳ̀ hàn liù chhai ke-vi?

¹¹ Hî-sî-kâ lâu ngì-têu kóng, Song-chú — ngì-têu ke Song-ti voi kiu ngì-têu lì-khôi ngài ke sú. Hî-sî-kâ he khî-phien ngì-têu, voi hoi ngì-têu ngo-sí, hot-sí.

¹² Hî-sî-kâ kám m̀-he fi-thet Song-chú sân-táng ke meu lâu chi-thàn, fûn-fu Yù-thai lâu Yâ-lu-sat-lâng ngìn-mìn tân-tân cho-tet chhai yit-ke chi-thàn kin-pai sêu-hiông mâ?

¹³ “Kám-kóng ngì-têu m̀-tî, ngài ke chú-siên lâu ngài ngióng-pân tui-fu phe̍t ke koet-kâ he-mò? Yû nai-chak koet ke sṳ̀n yû phan-fap kiu ngìn-mìn thot-lì Â-sut fòng-ti ke sú nè?

¹⁴ Ngài ke chú-siên só me̍t-thet ke koet-kâ, yû nai-chak koet ke sṳ̀n tui ngài ke sú-chûng kiu-ko kì-têu ke koet-kâ? Án-ngiòng, ngì-têu phìn má-ke láu-tó ngì-têu ke Song-ti nèn kiu ngì-têu thot-lì ngài ke sú nè?

¹⁵ Ngì-têu m̀-hó pûn Hî-sî-kâ mì-fe̍t, m̀-hó pûn kì phien-tó. M̀-hó siông-sin kì! Màng-sṳt yû yit-ke koet-kâ ke sṳ̀n kiu-ko kì ke ngìn-mìn thot-lì Â-sut fòng-ti ke sú! Ngì-têu ke sṳ̀n ko-kha mò phan-fap kiu ngì-têu thot-lì ngài ke sú!”

¹⁶ Â-sut fòng-ti ke-têu kôn-yèn hàn yung chhin-tô nàn-thâng ke fa vú-yu̍k Chú Song-ti lâu Kì ke phu̍k-ngìn Hî-sî-kâ.

¹⁷ Fòng-ti yu siá-sin vú-yu̍k Song-chú — Yî-set-lie̍t ke Song-ti, kóng: “Phe̍t-koet ke sṳ̀n m̀-sṳt kiu-ko kì-têu ke ngìn-mìn thot-lì ngài ke sú, Hî-sî-kâ ke sṳ̀n ya mò phan-fap kiu Kì ke ngìn-mìn thot-lì ngài ke sú.”

¹⁸ Ke-têu kôn-yèn yung Hî-pak-lòi-fa hiong sàng-chhiòng táng ke Yâ-lu-sat-lâng ngìn-mìn thai-sâng hêm, oi hak kì-têu, sṳ́ kì-têu chho̍k-kiâng sṳt-chṳ, án-ngiòng kha yùng-yi cham-liâng liá-sàng.

¹⁹ Kì-têu kóng-tó Yâ-lu-sat-lâng ke Song-ti, chhiu-chhiong kóng khì-thâ mìn-chhu̍k ngìn-sú só-chho ke sṳ̀n-mìn khiung-yong.

²⁰ Só-yî, Hî-sî-kâ-vòng lâu Â-mô-sṳ̂ ke lai-é siên-tî Yî-soi-â hiong thiên-táng ke Song-ti khì-tó khiù pông-chhu.

²¹ Song-chú chhiu phai yit-ke thiên-sṳ́ ngi̍p-hi Â-sut fòng-ti ke yàng-chûng, chiông kiûn-chhui ke yúng-sṳ, kôn-chóng lâu chiông-kiûn chhiòn-phu sêu-me̍t; yîn-vi án-ngiòng, Â-sut fòng-ti chón kì ke koet hi, kien-seu to thèu-nà khià m̀ hí-lòi. Yû yit-ngit, kì ngi̍p-hi kiâ sṳ̀n ke meu-tú, kiâ kí-ke chhîn-sên lai-é chiông kì chhṳ̀-thet.

²² Án-ngiòng, Song-chú kiu Hî-sî-kâ-vòng lâu Yâ-lu-sat-lâng ngìn-mìn thot-lì Â-sut fòng-ti Sî-nâ-kî-li̍p ke sú, ya thot-lì khì-thâ ke sù-thi̍t, pûn kì-têu lâu só-yû ke lìn-koet fò-phìn siông-chhu.

²³ Chhin-tô ngìn to Yâ-lu-sat-lâng, hiong Song-chú hien-chi, ya sung pó-vu̍t pûn Yù-thai-vòng Hî-sî-kâ. Tui ke-sṳ̀ khôi-sṳ́, só-yû ke koet-kâ chhiòn-phu chûn-kin Hî-sî-kâ.

Hî-sî-kâ ke Phiang lâu Kiêu-ngau
( Lie̍t-vòng Ki-ha 20:1-3 , 12-19 ; Yî-soi-â Sû 38:1-3 ; 39:1-8 )

²⁴ Ke-yông-sṳ̀, Hî-sî-kâ pot phiang-é tông ngiàm-chhung, chhâ-m̀-tô voi sí. Kì khì-tó Song-chú, Song-chú chhiu pûn kì yit-ke seu-thèu, chṳ́-sṳ kì voi không-fu̍k.

²⁵ Chúng-he Hî-sî-kâ kiêu-ngau, mò kám-chhia Song-chú vi kì só-cho ke, só-yî châi-fo lìm-to kì, Yù-thai lâu Yâ-lu-sat-lâng.

²⁶ Heu-lòi, Hî-sî-kâ lâu Yâ-lu-sat-lâng ke ngìn-mìn khiâm-pî hâ-lòi, Song-chú chhiu mò chhai Hî-sî-kâ hàn-sâng ke sṳ̀ hìn-fa̍t kì-têu.

Hî-sî-kâ ke Chhòi-fu lâu Chûn-yùng

²⁷ Hî-sî-kâ yû chhin-tô chhòi-fu, ngìn-ngìn chhiòn-phu chûn-kin kì. Kì hí chhông-khu, khong kì ke kîm-é, ngiùn-è, pó-sa̍k, hiông-liau, tún-phài lâu khì-thâ ta̍t-chhièn ke tûng-sî.

²⁸ Nang-ngoi, kì yu hí chhông-khu tún ńg-kuk, chiú, kám-lám-yù, yu vi ngiù-khiùn, yòng-khiùn hí ngiù-làn, yòng-liàu.

²⁹ Liá yit-chhiet yî-ngoi, Song-ti su-pûn kì ke ngiù, yòng, lâu khì-thâ ke chhòi-fu chhin-tô, yîn-vi án-ngiòng, kì chhiu hí-kâ chhin-tô sîn sàng.

³⁰ Hî-sî-kâ chiông Kî-hiun chhièn-súi ke chhut-héu tù hí-lòi, pûn súi liù-to Thai-ví-sàng ke sî-phién. Kì só-cho ke tak-khien sṳ chhiòn-phu sun-li sṳ̀n-kûng;

³¹ sṳm-chṳ Pâ-pí-lùn ke sṳ́-chá lòi mun liá só-chhai fat-sên ke khì-sṳ, Song-ti pûn Hî-sî-kâ chhṳ-yù chhú-lî, lòi kháu-ngiam kì ke nui-sîm.

Hî-sî-kâ Thúng-chhṳ ke Kiet-suk
( Lie̍t-vòng Ki-ha 20:20-21 )

³² Hî-sî-kâ khì-thâ ke sṳ lâu kì tui Song-chú ke chûng-sṳ̀n, chhiòn-phu ki chhai Â-mô-sṳ̂ ke Lai-é Siên-tî Yî-soi-â ke Yi-siong Sû pin Yù-thai lâu Yî-set-lie̍t Lie̍t-vòng Sṳ́ tî-poi.

³³ Hî-sî-kâ sí-heu, chong chhai Thai-ví heu-thoi vòng-sṳt fùn-mu chui-kô ke só-chhai. Kì sí ke sṳ̀, só-yû Yù-thai lâu Yâ-lu-sat-lâng ke ngìn vi kì ôi-sông chṳ-kin. Kì ke lai-é Mâ-nâ-sî sṳ̀n-chiap kì cho vòng.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan