Bìoball air-loidhne

Li̍t-thoi-chṳ Ha 31 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Hî-sî-kâ ke Kói-kiet

¹ Chiet-khì kiet-suk yî-heu, só-yû ke Yî-set-lie̍t-ngìn to Yù-thai tak-sàng hi, khau-sui sa̍k-chhû, chám-thôn Â-sa-lâ ńg-sṳ̀n ke chhû-siong, chhù-thet chi-thàn lâu sân-kông táng ke sṳ̀n-meu. Kì-têu ya chhai Yù-thai khì-thâ thi-khî lâu Phien-ngâ-mén, Yî-fap-lièn, Mâ-nâ-sî kin-nui cho khiung-yong ke sṳ, yèn-heu chón-to kâ-hiông.

² Hî-sî-kâ-vòng chhùng-sîn chû-chṳt chi-sṳ̂ lâu Li-vi-ngìn ke lùn-pân, chhai liá chṳ-thu ha, tak-sà chhiòn-phu yû thi̍t-phe̍t ke chṳt-vu. Kì-têu ke kûng-chok pâu-hàm hien sêu-fa-chi lâu phìn-ôn-chi, chhai sṳn-thien sṳ-fung, chhai sṳn-thien tak-chak mùn-nui hien siung-chan lâu kám-chhia.

³ Vòng yu fung-hien chhṳ-kâ ke ngiù-yòng cho tak-ngit chó-am ke sêu-fa-chi, ya cho ôn-sit-ngit, tak-chak ngie̍t chhû-yit, lâu khì-thâ chiet-khì só-oi hien ke sêu-fa-chi, chhiòn-phu cheu Song-chú fap-li̍t só kûi-thin.

⁴ Nang-ngoi vòng fûn-fu Yâ-lu-sat-lâng ke ngìn-mìn chiông chi-sṳ̂ lâu Li-vi-ngìn yin-kôi tet ke fun-ngiak tai-lòi, sṳ́ kì-têu cho-tet chôn-sîm cho Song-chú fap-li̍t só kûi-thin ke sṳ.

⁵ Min-lin yit hâ-lòi, Yî-set-lie̍t-ngìn chhiu chiông kì-têu sîn-chhut ke ńg-kuk, chiú, kám-lám-yù, phûng-thòng lâu khì-thâ nùng-sán-vu̍t tai-lòi, ya chiông só-yû tûng-sî ke sṳ̍p-fûn chṳ̂-yit tai-lòi.

⁶ He̍t chhai Yù-thai tak-sàng ke Yî-set-lie̍t-ngìn lâu Yù-thai-ngìn chhiòn-phu chiông kì-têu ngiù-yòng ke sṳ̍p-fûn chṳ̂-yit tai-lòi, ya fung-hien sṳ̍p-fûn chṳ̂-yit fûn-phe̍t vì-sṳn ke lî-vu̍t pûn Song-chú — kì-têu ke Song-ti.

⁷ Tui sâm-ngie̍t khôi-sṳ́, lî-vu̍t yit-chhṳ̍t sung ngi̍p-lòi, tôi-to chhiong sân. Liá chhìn-hìn yit-chhṳ̍t to chhit-ngie̍t.

⁸ Hî-sî-kâ lâu ke-têu liâng-chhiu khon-tó án-tô ke lî-vu̍t chhiu siung-chan Song-chú, yu chuk-fuk Kì ke chṳ́-mìn Yî-set-lie̍t.

⁹ Hî-sî-kâ mun chi-sṳ̂, Li-vi-ngìn ngióng-pân yû án-tô lî-vu̍t;

¹⁰ Sat-tuk ke heu-thoi Â-sat-li-ngâ thai-chi-sṳ̂ en-kóng: “Tui ngìn-mìn khôi-sṳ́ tai lî-vu̍t to Song-chú ke sṳn-thien yî-lòi, m̀ tân-chhiang la sṳ̍t, hàn chhûn tông-tô, yîn-vi Song-chú su-fuk pûn Kì ke chṳ́-mìn.”

¹¹ Kì-têu fung Hî-sî-kâ ke min-lin chhai Song-chú ke sṳn-thien yi-phi chhông-khu,

¹² chûng-sṳ̍t chiông só-yû ke lî-vu̍t lâu sṳ̍p-fûn chṳ̂-yit fung-hien piong chhai tî-poi. Kì-têu phai Li-vi-ngìn Kô-nàm-ngâ kón-lî, phai Kô-nàm-ngâ ke ló-thâi Sṳ-mî cho chhu-sú.

¹³ Kì-têu yu phai sṳ̍p-ke Li-vi-ngìn chhai kì lióng-sà sú-hâ kûng-chok; liá sṳ̍p-sà ke miàng-è he: Yâ-hiet, Â-sat-se-ngâ, Nâ-ha̍p, Â-sat-het, Yâ-li-ma̍t, Yok-sat-pha̍t, Yî-lie̍t, Yî-sṳ̂-mâ-kî-ngâ, Mâ-ha̍p, Pí-nâ-ngâ. Liá-sṳ he fung Hî-sî-kâ-vòng lâu Â-sat-li-ngâ thai-chi-sṳ̂ ke min-lin cho ke.

¹⁴ Li-vi-ngìn Yîm-nâ ke lai-é Khó-li he sṳn-thien tûng-mùn ke sú-ví-chóng; kì fu-chit sû hien-pûn Song-chú ke lî-vu̍t, ya fu-chit pûn lî-vu̍t.

¹⁵ Chhai chi-sṳ̂ he̍t ke khì-thâ ke sàng, yû yî-ha ke Li-vi-ngìn chûng-sṳ̍t hia̍p-chhu kì. Kì-têu ke miàng-è he: Yî-thien, Mìn-ngâ-mìn, Yâ-sû-â, Sṳ-mâ-ngâ, Â-mâ-li-ngâ, Sṳ-kâ-nì-ngâ. Liá-têu ngìn chiông sṳ̍t-vu̍t phìn-kiûn pûn-pûn Li-vi-ngìn, he cheu tak-sà ke chṳt-vu,

¹⁶ m̀-he cheu chûng-chhu̍k pûn ke. Só-yû sâm-sṳ̍p se yî-song ke nàm-ngìn, tak-ngit chhai sṳn-thien chhṳ̍t-pân ke, cheu chṳt-vu lùn-pân, tak-sà cho-tet pûn-tó yit-fun.

¹⁷ Chi-sṳ̂ he cheu chûng-chhu̍k lòi pûn; ngi-sṳ̍p se yî-song ke Li-vi-ngìn he cheu chṳt-vu lâu lùn-pân lòi pûn.

¹⁸ Kì-têu lâu kì-têu ke pû-ngiòng, chṳ́-ńg, pin khì-thâ vuk-hâ ngìn chhiòn-phu khiung-ha tên-ki; yîn-vi kì-têu chûng-sṳ̀n, chiông chhṳ-kâ fûn-phe̍t vì-sṳn.

¹⁹ He̍t chhai Â-lùn heu-thoi só-tet ke sàng ya-he sàng-ngoi ke-têu chi-sṳ̂, ke-têu fu-chit ke ngìn chiông sṳ̍t-vu̍t pûn-pûn chi-sṳ̂ kâ-chhu̍k só-yû ke nàm-ngìn lâu Li-vi chhu̍k-phú só-ki ke tak-ke ngìn.

²⁰ Hî-sî-kâ chhai Yù-thai chhiòn-thi cho Song-chú — kì ke Song-ti khon-cho liòng-san, chṳn-chhṳ̍t, chûng-sṳ̍t ke sṳ.

²¹ Kì fî-sòng sṳ̀n-kûng; yîn-vi kì só-cho ke, mò-lun he yû-koân Song-ti ke sṳn-thien ya-he chûn-hàng fap-li̍t ke tak khien-sṳ, chhiòn-phu chôn-sîm chhìm-khiù Song-ti ke chṳ́-yi.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan