Bìoball air-loidhne

Li̍t-thoi-chṳ Ha 30 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yi-phi Ko Phàn-ko-chiet

^1-3 Mìn-chung lòi m̀-chhat chhai thi-yit chak ngie̍t khin-chuk Phàn-ko-chiet, yîn-vi lî-ngì song chhiang-li ke chi-sṳ̂ m̀-la, yu yû chhin-tô ngìn hàn-màng to Yâ-lu-sat-lâng, só-yî Hî-sî-kâ-vòng lâu ke-têu liâng-chhiu, pin Yâ-lu-sat-lâng ngìn-mìn thùng-yi thi-ngi chak ngie̍t khin-chuk Phàn-ko-chiet. Hî-sî-kâ phai-ngìn thûng-tî chhiòn-phu Yî-set-lie̍t-ngìn lâu Yù-thai-ngìn, yu thi̍t-phe̍t siá-sin pûn Yî-fap-lièn kî-chhu̍k lâu Mâ-nâ-sî kî-chhu̍k, yêu-chhiáng kì-têu to Yâ-lu-sat-lâng Song-chú ke sṳn-thien khiung-ha khin-chuk Phàn-ko-chiet, kin-pai Song-chú — Yî-set-lie̍t ke Song-ti.

⁴ Vòng lâu ngìn-mìn chhiòn-phu mân-yi liá-ke kie-va̍k.

⁵ Só-yî kì-têu yêu-chhiáng só-yû ke Yî-set-lie̍t-ngìn, tui nàm-phu ke Phe̍t-sṳ-pâ to pet-phu ke Tan, khiung-ha to Yâ-lu-sat-lâng lòi, cheu fap-li̍t ke kûi-thin khin-chuk Phàn-ko-chiet, kin-pai Song-chú — Yî-set-lie̍t ke Song-ti; yîn-vi chhin-tô ngìn-mìn yí-kîn mò cheu só ki-chai ke kûi-thin lòi sú liá-chiet.

⁶ Sung-sin ke ngìn fung vòng lâu ke-têu liâng-chhiu ke min-lin chhut-hi, chiông liá-fûng yêu-chhiáng sin sung-to Yù-thai lâu Yî-set-lie̍t tak só-chhai; nui-yùng he: “Yî-set-lie̍t ke ngìn-mìn â, chhai Â-sut fòng-ti lòi chhîm-fam ke sṳ̀, Song-chú mò pûn ngì liá-têu chhûn hâ-lòi ke ngìn su-tó châi-nan. Ngì-têu oi chón-hiong Song-chú — Â-pak-lâ-hón, Yî-sat, Yî-set-lie̍t ke Song-ti, Kì chhiu voi chón-hiong ngì-têu.

⁷ M̀-hó ho̍k ngì-têu ke â-pâ lâu hiûng-thi; kì-têu tui Song-chú — kì-têu chú-siên ke Song-ti mò chûng-sîm. Chhiu-chhiong ngì-têu só khon-tó ke, Song-ti ngiàm-ngiàm chit-fa̍t kì-têu.

⁸ M̀-hó chhiong kì-têu án ngang-kiáng; oi sun-fu̍k Song-chú. Ngì-têu oi to Yâ-lu-sat-lâng ke sṳn-thien lòi, liá he Song-chú — ngì-têu ke Song-ti yún-yén sṳn-kiet ke só-chhai. Ngì-têu lòi kin-pai Kì, Kì chhiu m̀-voi chai hiong ngì-têu fat-khién.

⁹ Na-he ngì-têu chón-hiong Song-chú, ke-têu chok-chéu ngì-têu chhîn-ngìn ke ngìn chhiu voi lìn-mén kì-têu, pûn kì-têu chón-lòi. Song-chú — ngì-têu ke Song-ti he chhṳ̀-oi, mân-yû lìn-mén ke. Ngì-têu chón-hiong Kì, Kì chhiu chiap-na̍p ngì-têu.”

¹⁰ Sung-sin ke ngìn hi-to Yî-fap-lièn lâu Mâ-nâ-sî thi-khî tak só-chhai, sṳm-chṳ to pet-phién Sî-pu-lùn kî-chhu̍k ke tak-sàng. Chúng-he ke-vi ke ngìn chhṳ́-seu kì-têu, vú-yu̍k kì-têu.

¹¹ Chúng-he Â-sat, Mâ-nâ-sî, Sî-pu-lùn kî-chhu̍k chûng ya yû-ngìn khiâm-pî hâ-lòi, ngien-yi to Yâ-lu-sat-lâng lòi.

¹² Song-ti ya chhai Yù-thai-ngìn chûng cho-kûng, sṳ́ kì-têu thùng-sîm chûn-hàng Kì ke chṳ́-yi, lòi thâng vòng lâu ke-têu liâng-chhiu ke min-lin.

Khin-chuk Phàn-ko-chiet

¹³ Chhin-tô ngìn chhai thi-ngi chak ngie̍t chhi-si̍p chhai Yâ-lu-sat-lâng khin-chuk Chhù-kau-chiet.

¹⁴ Kì-têu chiông Yâ-lu-sat-lâng tak-vi hien-chi sêu-hiông ke chi-thàn chhiòn-phu te̍p-lo̍k Khi̍p-lùn-hâi tú.

¹⁵ Thi-ngi chak ngie̍t sṳ̍p-si ngit, kì-têu chhṳ̀ se-yòng cho Phàn-ko-chiet ke sên-ngì. Ke-têu mò chhiang-li ke chi-sṳ̂ lâu Li-vi-ngìn kám-kok kien-seu, chhiu kiet-chhiang chhṳ-kâ, chiông sêu-fa-chi tai-to Song-chú ke sṳn-thien.

¹⁶ Kì-têu cheu sṳ̀n-ngìn Mô-sî chhai fap-li̍t song ke chṳ́-sṳ, khî chhai sṳn-thien kì-têu yin-kôi khî ke vi-é. Li-vi-ngìn chiông sên-ngì ke hiet nâ-pûn chi-sṳ̂, chi-sṳ̂ chhiu chiông hiet hia chhai chi-thàn táng.

¹⁷ Chhin-tô ngìn yîn-vi cheu lî-ngì song mò chhiang-li, cho-m̀-tet chhṳ-kâ chhṳ̀ Phàn-ko-chiet ke se yòng-è, só-yî Li-vi-ngìn thoi kì-têu chhṳ̀, chiông se yòng-è hien-pûn Song-chú.

¹⁸ Nang-ngoi, chhin-tô tui Yî-fap-lièn, Mâ-nâ-sî, Yî-sat-kâ, Sî-pu-lùn kî-chhu̍k lòi ke ngìn mò kiet-chhiang chhṳ-kâ, chhiu sṳ̍t Phàn-ko-chiet ke se yòng-è; liá he mò-ha̍p kûi-thin ke. Só-yî, Hî-sî-kâ vi kì-têu án-ngiòng khì-tó kóng:

¹⁹ “Chhṳ̀-pî ke Song-chú — ngài-têu chú-siên ke Song-ti â, chhiáng sa-miên ke-têu sûi-yèn cheu sṳn-só kûi-thin mò chhiang-li, chúng-he chhiòn-sîm chhiòn-yi chhìm-khiù Ngì ke ngìn.”

²⁰ Song-chú thâng Hî-sî-kâ ke khì-tó, chhiu sa-miên kì-têu.

²¹ Chhi-si̍p chhai Yâ-lu-sat-lâng ke mìn-chung fôn-fôn hí-hí lòi khin-chuk Chhù-kau-chiet, lièn-tén chhit-ngit. Tak-ngit, Li-vi-ngìn lâu chi-sṳ̂ yung tông-hióng ke ngo̍k-hi siung-chan Song-chú.

²² Hî-sî-kâ chhṳ̂n-chan Li-vi-ngìn, yîn-vi kì-têu tông voi tai-liâng ngìn-mìn kin-pai Song-chú. Mìn-chung sṳ̍t cheu kûi-thin ke yèn-si̍t, yu hien phìn-ôn-chi, pin chan-mî Song-chú — kì-têu chú-siên ke Song-ti. Ko chhit-ngit,

Yu Khin-chuk Yit-pái

²³ thai-kâ kiet-thin chai khin-chuk chhit-ngit; só-yî kì-têu yu khoai-lo̍k khin-chuk.

²⁴ Yù-thai-vòng Hî-sî-kâ kiên-chhut yit-chhiên chak ngiù-kú lâu chhit-chhiên chak mièn-yòng pûn mìn-chung chhṳ̀ lòi sṳ̍t; ke-têu liâng-chhiu nang-ngoi yu kiên-chhut yit-chhiên chak ngiù-kú lâu yit-van chak mièn-yòng. Chhin-tô chi-sṳ̂ kiet-chhiang chhṳ-kâ.

²⁵ Yù-thai ngìn-mìn, chi-sṳ̂, Li-vi-ngìn, pet-phu Yî-set-lie̍t lòi ke mìn-chung, lâu he̍t chhai Yî-set-lie̍t lâu Yù-thai ke ngoi-chhu̍k ngìn, thai-kâ chhiòn-phu tông khoai-lo̍k.

²⁶ Yâ-lu-sat-lâng chhûng-mân fôn-hí; yîn-vi tui Yî-set-lie̍t-vòng Thai-ví ke lai-é Só-lò-mùn yî-lòi m̀-sṳt án-ngiòng.

²⁷ Chi-sṳ̂ lâu Li-vi-ngìn khì-khiù Song-chú su-fuk ngìn-mìn. Song-ti chhai thiên-táng Kì ke sṳn-só thâng kì-têu ke khì-tó, chiap-su kì-têu ke khì-khiù.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan