Bìoball air-loidhne

Li̍t-thoi-chṳ Ha 29 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yù-thai-vòng Hî-sî-kâ
( Lie̍t-vòng Ki-ha 18:1-3 )

¹ Hî-sî-kâ ngi-sṳ̍p ńg-se ke sṳ̀ cho Yù-thai-vòng, chhai Yâ-lu-sat-lâng thúng-chhṳ ngi-sṳ̍p kiú-ngièn. Kiâ-mê Â-pí-ngâ he Sat-kâ-li-ngâ ke moi-é.

² Hî-sî-kâ ho̍k kiâ chú-siên Thai-ví-vòng ke mù-yong, hàng Song-chú khon-cho chho̍k ke sṳ.

Kiet-chhiang Sṳn-thien

³ Hî-sî-kâ cho vòng ke-ngièn ke thi-yit chak ngie̍t, kì chhùng-sîn chiông Song-chú sṳn-thien ke mùn tá khôi-lòi, pin chin-hàng siû-cháng ke kûng-chok.

⁴ Kì seu-si̍p chi-sṳ̂ lâu Li-vi-ngìn to sṳn-thien ke tûng-yen,

⁵ chhai ke-vi tui kì-têu kóng: “Li-vi-ngìn nâ, oi thâng ngài kóng: Liá-ha ngì-têu oi kiet-chhiang chhṳ-kâ; ngì-têu ya oi kiet-chhiang Song-chú — ngì-têu chú-siên Song-ti ke sṳn-thien, chiông só-yû ô-chô ke tûng-sî chhù-thet.

⁶ Ngài-têu ke chú-siên tui Song-chú — ngài-têu ke Song-ti m̀ chûng-sṳ̀n, hàng Kì khon-cho sià-ok ke sṳ, lì-khôi Kì, chón-mien poi-hiong Song-chú só-he̍t ke só-chhai.

⁷ Kì-têu chiông sṳn-thien ke mùn koân hí-lòi, yù-chhai tên-fó vû-thet, m̀ sêu-hiông, ya mò chhai Yî-set-lie̍t Song-ti ke sṳn-thien hien sêu-fa-chi.

⁸ Só-yî, Song-chú hiong Yù-thai lâu Yâ-lu-sat-lâng fat-khién. Song-chú ke hàng-thung sṳ́ ngìn chho̍k-kiâng, chhṳ́-seu kì-têu. Liá yit-chhiet ngì-têu chhiòn-phu tông chhîn-chhú.

⁹ Khon nâ! Ngài-têu ke chú-siên sí chhai chan-chhòng, ngài-têu ke pû-ngiòng chṳ́-ńg pûn-ngìn chok-hi.

¹⁰ “Liá-ha, ngài kiet-thin lâu Song-chú — Yî-set-lie̍t ke Song-ti li̍p-yok, Kì ke fat-khién chang voi lì-khôi ngài-têu.

¹¹ Ngài chhîn-oi ke Li-vi-ngìn nâ, m̀-hó yèn-chhàn; ngì-têu he Song-chú kién-sién lòi hiong Kì sêu-hiông ke ngìn, oi liâng-thô ngìn-mìn kin-pai Kì.”

^12-14 Chhai ke-vi ke Li-vi-ngìn yû: Kô-hot chûng-chhu̍k: Â-mâ-soi ke lai-é Mâ-ha̍p lâu Â-sat-li-ngâ ke lai-é Yok-ngí; Mí-lâ-li chûng-chhu̍k: Â-pak-tí ke lai-é Kî-sṳ lâu Yâ-ha̍p-li-le̍t ke lai-é Â-sat-li-ngâ; Kiet-sun chûng-chhu̍k: Sîn-mâ ke lai-é Yok-â lâu Yok-â ke lai-é Yî-thien; Yî-li-sat-fán chûng-chhu̍k: Sṳ̂n-li lâu Yâ-li; Â-sat chûng-chhu̍k: Sat-kâ-li-ngâ lâu Mâ-tham-ngâ; Hî-man chûng-chhu̍k: Yâ-hiet lâu Sṳ-mî; Yâ-thu-tun chûng-chhu̍k: Sṳ-mâ-ngâ lâu Vû-siet.

¹⁵ Liá-têu ngìn seu-si̍p kì-têu ke Li-vi-chhu̍k hiûng-thi, chhiòn-phu cheu lî-ngì kiet-chhiang chhṳ-kâ, yèn-heu cheu vòng ke min-lin, kîn-kí Song-chú ke fap-li̍t khôi-sṳ́ kiet-chhiang Song-chú ke sṳn-thien.

¹⁶ Chi-sṳ̂ ngi̍p-hi kiet-chhiang Song-chú ke sṳn-thien. Kì-têu chiông só-yû mò chhiang-li ke tûng-sî pân-to sṳn-thien ke thìn-yen, Li-vi-ngìn chiông kì-têu pân-chhut sàng-ngoi, fit-lo̍k Khi̍p-lùn-hâi.

¹⁷ Liá-hong kûng-chok chhai châng-ngie̍t chhû-yit khôi-sṳ́, to thi-pat ngit chhiu chhiòn-phu vàn-kûng, lièn sṳn-thien ke chhièn-thòng ya piang-chhiang lé. Yèn-heu kì-têu yu kûng-chok pat-ngit, to châng-ngie̍t sṳ̍p-liuk, chiông sṳn-thien chún-phi hó-se.

Chhùng-sîn Fung-hien Sṳn-thien

¹⁸ Li-vi-ngìn hiong Hî-sî-kâ-vòng po-ko kóng: “Ngài-têu yí-kîn chiông Song-chú ke sṳn-thien cheu lî-ngì piang-chhiang lé, pâu-hàm hien sêu-fa-chi ke chi-thàn, piong kiûng-piáng ke chok-è, lâu só-yû fu-tai ke yung-phín chhiòn-phu chhiang-li lé.

¹⁹ Ngài-têu ya chiông Â-ha̍p-sṳ̂-vòng vì-poi Song-ti ke-sṳ̀ só sái-chéu ke tûng-sî chhiòn-phu chún-phi hó-se; ngài-têu yí-kîn chiông kì-têu chhùng-sîn fung-hien, liá-ha chhiòn-phu piong chhai Song-chú ke chi-thàn chhièn.”

²⁰ Thi-ngi ngit tá-chó, Hî-sî-kâ-vòng seu-si̍p sàng-tú ke-têu liâng-chhiu, khiung-ha to Song-chú ke sṳn-thien hi.

²¹ Vi-tó oi su̍k vòng-sṳt ke chhui, Yù-thai ngìn-mìn ke chhui, pin kiet-chhiang sṳn-thien, kì-têu tai-lòi chhit-chak ngiù-kú, chhit-chak mièn-yòng-kú, chhit-chak se yòng-kú, chhit-chak sân-yòng-kú. Vòng fûn-fu Â-lùn heu-thoi ke chi-sṳ̂ chiông liá-têu thung-vu̍t cho sên-ngì hien chhai Song-chú ke chi-thàn táng.

²² Chi-sṳ̂ siên chhṳ̀ ngiù, chang chhṳ̀ mièn-yòng, yèn-heu chhṳ̀ se yòng-è, chiông tak-chak sên-ngì ke hiet hia chhai chi-thàn táng;

²³ chui-mî chiông ke-têu cho su̍k-chhui-chi ke sân-yòng-kú khiên-to vòng lâu khì-thâ kin-pai ke ngìn mien-chhièn, kì-têu chhiu on-sú chhai sân-yòng thèu-nà táng.

²⁴ Yèn-heu chi-sṳ̂ chhṳ̀ sân-yòng cho sên-ngì, chiông hiet tó chhai chi-thàn táng, chhù-thet só-yû ngìn-mìn ke chhui, yîn-vi vòng min-lin oi vi chhiòn-phu Yî-set-lie̍t ngìn-mìn hien sêu-fa-chi lâu su̍k-chhui-chi.

²⁵ Hî-sî-kâ cheu Song-chú thûng-ko siên-kien Kâ-tet lâu siên-tî Nâ-tân pûn Thai-ví-vòng ke chṳ́-sṳ, phai Li-vi-ngìn chhai Song-chú ke sṳn-thien tú, nâ-tén su-khìm, chhit-hièn-khìm lâu chhê-é; liá chhiu-he Song-chú thûng-ko siên-tî só fûn-fu ke.

²⁶ Li-vi-ngìn nâ-tén Thai-ví sṳ̀-thoi só-yung ke ngo̍k-hi, chi-sṳ̂ ya nâ-tén la̍p-pá khî chhai ke-vi.

²⁷ Hî-sî-kâ min-lin chhai chi-thàn táng hien sêu-fa-chi. Hien-chi yit khôi-sṳ́, ngìn-mìn chhiu siung-chan Song-chú, chi-sṳ̂ phùn la̍p-pá, khìm-sṳ̂ ngo̍k-chhui thàn-cheu Yî-set-lie̍t-vòng Thai-ví khì-thâ ke ngo̍k-hi lòi-fò.

²⁸ Só-yû ke fi-chung chhâm-kâ kin-pai, chhong-kô ke chhong-kô, phùn la̍p-pá ke phùn la̍p-pá, yit-chhṳ̍t to sên-ngì sêu-thet.

²⁹ Yèn-heu Hî-sî-kâ-vòng lâu chhiòn-phu ngìn-mìn khúi lo̍k-hi pai Song-ti.

³⁰ Vòng lâu ke-têu liâng-chhiu fûn-fu Li-vi-ngìn siung-chan Song-chú, chhong Thai-ví-vòng lâu siên-kien Â-sat só-cho ke chan-mî sṳ̂. Mìn-chung chhiòn-phu fôn-fôn hí-hí chhong-sṳ̂, yu khúi lo̍k-hi pai Song-ti.

³¹ Hî-sî-kâ tui mìn-chung kóng: “Liá-ha ngì-têu chhiòn-phu chhiang-li lé, chiông thèu-sâng tai-lòi cho kám-chhia-chi hien-pûn Song-chú!” Kì-têu chhiu thâng vòng ke fa, yû-têu ngìn ya chhṳ-ngien tai thèu-sâng lòi-cho sêu-fa-chi.

³² Chúng-khiung yû chhit-sṳ̍p chak ngiù-kú, yit-pak chak mièn-yòng-kú, lióng-pak chak se yòng-kú cho sêu-fa-chi hien-pûn Song-chú;

³³ hàn-yû fûn-phe̍t vì-sṳn ke liuk-pak chak ngiù-kú lâu sâm-chhiên chak mièn-yòng, he pûn mìn-chung sṳ̍t ke sên-ngì.

³⁴ Yîn-vi thèu-sâng thet-tô, fu-chit chhṳ̀ ke chi-sṳ̂ m̀-la, kì-têu ke thùng-chhu̍k Li-vi-ngìn chhiu pông-chhu kì-têu, chhṳ̍t-to kûng-chok kiet-suk. Ke-sṳ̀, yû kha tô ke chi-sṳ̂ kiet-chhiang chhṳ-kâ. (Ngièn-lòi Li-vi-ngìn pí chi-sṳ̂ kha chûng-sîm chûn-sú kiet-chhiang ke kûi-thin.)

³⁵ Chhù-liáu chhin-tô sêu-fa-chi yî-ngoi, hàn-yû chhin-tô phìn-ôn-chi ke yù, pin sêu-fa-chi khiung-ha hien ke chi-chiú, yit-yit chhú-lî. Án-ngiòng, Song-chú sṳn-thien tú ke sṳ-fung chhiu chhùng-sîn fî-fu̍k lé.

³⁶ Hî-sî-kâ-vòng lâu ngìn-mìn chhiòn-phu tông khoai-lo̍k, yîn-vi Song-ti pông-chhu kì-têu chiông liá-têu sṳ tông-kiak chhiu cho-hó.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan