Bìoball air-loidhne

Li̍t-thoi-chṳ Ha 26 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yù-thai-vòng Vû-sî-ngâ
( Lie̍t-vòng Ki-ha 14:21-22 ; 15:1-7 )

¹ Só-yû Yù-thai ngìn-mìn chhiòn-phu sat-li̍p Â-mâ-chhia sṳ̍p-liuk se ke lai-é Vû-sî-ngâ sṳ̀n-chiap kì cho vòng.

² Â-mâ-chhia sí-heu, Vû-sî-ngâ chiông Yî-lâ-thâ sû chón-lòi kûi-su̍k Yù-thai, chhùng-sîn cháng-ko.

³ Vû-sî-ngâ sṳ̍p-liuk se sṳ̀ cho vòng, chhai Yâ-lu-sat-lâng thúng-chhṳ ńg-sṳ̍p ngi-ngièn. Kiâ-mê Yâ-khó-li-ngâ he Yâ-lu-sat-lâng-ngìn.

⁴ Vû-sî-ngâ ho̍k kiâ-pâ Â-mâ-chhia ke mù-yong, hàng Song-chú khon-cho chho̍k ke sṳ.

⁵ Chhai Sat-kâ-li-â kâu kì ngióng-pân kin-vi Song-ti ke ngièn-ngit, kì chôn-sîm chhìm-khiù Song-ti; kì chûng-sîm sṳ-fung Song-chú ke sṳ̀, Song-ti chhiu su-fuk pûn kì.

⁶ Vû-sî-ngâ lâu Fî-li-sṳ-ngìn siông-chhṳ̀. Kì chhak-thet Kâ-thi̍t-sàng, Ngâ-pí-nì-sàng lâu Â-sṳ̍t-thut-sàng ke sàng-chhiòng, yu chhai Â-sṳ̍t-thut fu-khiun lâu Fî-li-sṳ khì-thâ só-chhai hí fòng-ví-sàng.

⁷ Song-ti pông-chhu kì tá-yàng Fî-li-sṳ-ngìn, he̍t chhai Kû-ngí-Pâ-li̍t ke Â-lâ-pak-ngìn, lâu Mí-vû-nì-ngìn.

⁸ Â-mùn-ngìn hiong Vû-sî-ngâ chin-kung. Kì ke sṳ-li̍t khiòng-thai, miàng-sâng chhòn-to Âi-khi̍p.

⁹ Vû-sî-ngâ vi-tó kâ-khiòng Yâ-lu-sat-lâng ke fòng-phi kûng-sṳ, chhai Kok-mùn, Kuk-mùn lâu sàng-chhiòng chón-kok ke só-chhai chhiòn-phu hí chhin kiên-ku ke sàng-lèu.

¹⁰ Kì ya chhai sàng-ngoi chho sú-mong-thap, yet chhin-tô chiáng, yîn-vi kì chhai sî-phién sân kiok-hâ lâu phìn-ngièn yû tông-tô ngiù-khiùn. Yîn-vi kì chu-chhung kâng-chung, chhiu kú-li ngìn-mìn chhai sân-thi chung phù-thò, chhai phìn-ngièn phì ke thú-thi lòi kâng-chung.

¹¹ Vû-sî-ngâ yû khiòng-thai ke kiûn-chhui, sùi-sṳ̀ cho-tet piên-chhui sông chan-chhòng. Kiûn-fông ke ki-liu̍k yû pi-sû Yâ-li lâu kôn-chóng Mâ-sî-ngâ pó-kón, pin yû vòng-sṳt ke yit-ke chṳ́-fî-kôn Ha̍p-nâ-nì-ngâ kam-tuk.

¹² Kiûn-chhui yû lióng-chhiên liuk-pak ke kâ-chhu̍k liâng-chhiu chṳ́-fî;

¹³ kì-têu sú-hâ yû sâm-sṳ̍p van chhit-chhiên ńg-pak ke sṳ-pîn, chhiòn-phu he tông voi siông-chhṳ̀ ke, yû nèn-li̍t cho-tet vi vòng tá-yàng thi̍t-ngìn ke chan-sṳ.

¹⁴ Vû-sî-ngâ vi chhiòn kiûn-chhui chông-phi tún-phài, chhiông, thiet-mo, chan-kap, kiûng-chien, lâu oi fin ke sa̍k-é.

¹⁵ Chhai Yâ-lu-sat-lâng, kì ke kûng-chhàng-sṳ̂ chhai sàng-lèu lâu sàng-chhiòng chón-kok ôn kî-hi, cho-tet tui táng-kô sa-chien, te̍p thai sa̍k-thèu. Kì ke miàng-sâng chhòn-to tak-vi, sṳ-li̍t fî-sòng khiòng-thai, yîn-vi Song-ti pông-chhu kì.

Vû-sî-ngâ Su Chit-fa̍t

¹⁶ Vû-sî-ngâ-vòng ke khiòng-thai sṳ́ kì chhiam-chhiam kiêu-ngau hí-lòi, vi chhṳ-kâ ngiâ châi-fo. Kì tet-chhui Song-chú — kì ke Song-ti, yîn-vi kì ngi̍p Song-chú ke sṳn-thien hi, sióng-oi chhîn-sṳ̂n chhai hiông-thàn táng sêu-hiông.

¹⁷ Chi-sṳ̂ Â-sat-li-ngâ tai-tén pat-sṳ̍p ke Song-chú yúng-kám ke chi-sṳ̂ thèn-tén vòng ngi̍p-hi,

¹⁸ oi chú-tóng kì. Kì-têu kóng: “Vû-sî-ngâ â, ngì mò-khièn hiong Song-chú sêu-hiông; chṳ́-yû Â-lùn heu-thoi cho chi-sṳ̂ ke, chang-he fûn-phe̍t vì-sṳn lòi-cho liá-sṳ ke ngìn. Chhiáng lì-khôi liá sṳn-thi. Ngì yí-kîn tet-chhui Chú Song-ti; ngì chai tet m̀-tó Kì pûn ngì ke yùng-yeu lé.”

¹⁹ Vû-sî-ngâ khî chhai sṳn-thien ke hiông-thàn sùn-thèu, sú nâ-tén hiông-lù. Kì tui ke-têu chi-sṳ̂ fat-khién, chhiu chhai ke-sṳ̀, kì ke ngiak-thèu fut-yèn pot thái-kô-phiang.

²⁰ Thai chi-sṳ̂ Â-sat-li-ngâ lâu khì-thâ chi-sṳ̂ khon-tó vòng ke ngiak-thèu pot thái-kô-phiang, kì-têu chhiu kiuk kì lì-khôi sṳn-thien; kì chhṳ-kâ ya kón-kín lì-khôi, yîn-vi Song-chú yí-kîn chit-fa̍t kì.

²¹ Vû-sî-ngâ-vòng chhûn-tó ke ngièn-ngit yîn liá thái-kô-phiang chhai lî-ngì song mò chhiang-li, he̍t chhai kak-lì ke vòng-kiûng tú, cho-m̀-tet chai ngi̍p sṳn-thien; koet-kâ thai-sṳ kâu-pûn kiâ lai-é Yok-thán chóng-kón.

²² Â-mô-sṳ̂ ke lai-é Yî-soi-â siên-tî chiông Vû-sî-ngâ-vòng thúng-chhṳ khì-kiên só-yû ke sṳ chhiòn-phu ki-liu̍k hâ-lòi.

²³ Vû-sî-ngâ sí-heu, chong chhai vòng-sṳt ke chhúng-pû, m̀-he chhai vòng-sṳt ke fùn-mu tú, yîn-vi kì pot-ko thái-kô-phiang. Kì ke lai-é Yok-thán sṳ̀n-chiap kì cho vòng.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan