Bìoball air-loidhne

Li̍t-thoi-chṳ Ha 25 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yù-thai-vòng Â-mâ-chhia
( Lie̍t-vòng Ki-ha 14:2-6 )

¹ Â-mâ-chhia ngi-sṳ̍p ńg-se ke sṳ̀ cho vòng, chhai Yâ-lu-sat-lâng thúng-chhṳ ngi-sṳ̍p kiú-ngièn. Kì ke â-mê Yok-yâ-tan he Yâ-lu-sat-lâng-ngìn.

² Â-mâ-chhia hàng Song-chú khon-cho chho̍k ke sṳ, chúng-he mò chôn-sîm.

³ Kì yit kiên-ku vòng-khièn, chhiu chhú-sí ke-têu am-sat kiâ-pâ ke kôn-yèn.

⁴ Chúng-he kì pin-mò chhṳ̀-sí ke-têu ngìn ke chṳ́-ńg, he cheu Song-chú chhai Mô-sî fap-li̍t sû-chûng só min-lin ke: “Yà-ôi mò yin-kôi yîn-vi chṳ́-ńg só-fam ke chhui lòi chhú-sí; chṳ́-ńg ya mò yin-kôi yîn-vi yà-ôi só-fam ke chhui lòi chhú-sí. Tak-sà yin-tông tâm-tông chhṳ-kâ só-fam ke chhui.”

Yî-tûng ke Chan-chên
( Lie̍t-vòng Ki-ha 14:7 )

⁵ Â-mâ-chhia-vòng seu-si̍p Yù-thai ke ngìn-mìn, chiông Yù-thai lâu Phien-ngâ-mén kî-chhu̍k ke ngìn chû-chṳt hí-lòi, cheu kì-têu só-su̍k ke chûng-chhu̍k phiên-cho yit-chhiên ngìn yit-chhui lâu yit-pak ngìn yit-chhui ke phu-chhui, tak-chhui sat-li̍p kôn-chóng chṳ́-fî. Ngi-sṳ̍p se yî-song ke nàm-ngìn chhiòn-phu chhai-nui, chúng-khiung yû sâm-sṳ̍p van-ngìn. Kì-têu he thi̍t-sién ke phu-chhui, chhiòn-phu cho-tet sông chan-chhòng, chhin voi yung chhiông lâu tún-phài.

⁶ Nang-ngoi, Â-mâ-chhia yu yung thai-yok sâm-chhiên si-pak kûng-kîn ngiùn-è tui Yî-set-lie̍t chhiáng-lòi sṳ̍p-van thai-nèn ke yúng-sṳ.

⁷ Chúng-he yû yit-ke sṳ̀n-ngìn lòi kien vòng, tui kì kóng: “Vòng â, m̀-hó tai liá-têu Yî-set-lie̍t kiûn-chhui lâu ngì khiung-ha hi; Song-chú m̀ lâu liá-têu pet-koet ke ngìn khiung-ha.

⁸ Ngì na-he yit-thin oi hi yúng-kám chên-chan, Song-ti voi sṳ́ ngì chhai thi̍t-ngìn mien-chhièn sṳt-phai; sṳ-sṳ̍t song, Song-ti chang yû-khièn kiet-thin sû-yàng.”

⁹ Â-mâ-chhia mun sṳ̀n-ngìn: “Ngài fu-pûn Yî-set-lie̍t kiûn-chhui ke sâm-chhiên si-pak kûng-kîn ke ngiùn-è oi ngióng-pân nè?” Sṳ̀n-ngìn kóng: “Song-chú voi su-pûn ngì ke pí liá hàn-kha tô!”

¹⁰ Só-yî Â-mâ-chhia chiông chhiáng-lòi ke kiûn-chhui kié-san, ham kì-têu chón-hi; kì-têu chhiu tông-nâu Yù-thai-ngìn, hi phun-phun-é chéu chón-hi lé.

¹¹ Â-mâ-chhia nâ-chhut yúng-hi, tai-liâng kiûn-chhui to Yàm-kuk; chhai ke-vi kì chhṳ̀-thet yit-van Yî-tûng-ngìn.

¹² Yù-thai kiûn-chhui yu chok-tó yit van-ngìn. Kì-têu chiông chok-lòi ke ngìn tai-to Sî-lâ-sàng ke pên-kông táng, tui ke-vi súng hâ-hi, só-yî liá-têu ngìn chhiòn-phu tiet-sí chhai pên-kông hâ.

¹³ Thùng-sṳ̀, Â-mâ-chhia só ham chón-hi ke Yî-set-lie̍t kiûn-chhui sa kûng-tá Yù-thai tak-sàng, tui Sat-mâ-li-â chhṳ̍t-to Pak-Fò-lùn chhṳ̀-thet sâm-chhiên ngìn, chhióng-chéu chhin-tô chhòi-vu̍t.

¹⁴ Â-mâ-chhia tá-yàng Yî-tûng-ngìn chón-lòi, chiông Yî-tûng-ngìn ke ngiéu-siong ya tai chón-lòi, li̍p-cho chhṳ-kâ ke sṳ̀n-mìn, hiong kì-têu khúi-pai sêu-hiông.

¹⁵ Liá-sṳ ngiâ Song-chú fat-khién, só-yî Kì phai yit-ke siên-tî hi kien Â-mâ-chhia, chit-phi kì kóng: “Ngì cho-má-ke pai ke-têu ngoi-chhu̍k sṳ̀n-mìn? Kì-têu lièn kiu chhṳ-kâ ke ngìn-mìn lì-khôi ngì ke sú chhiu cho m̀-tó!”

¹⁶ Â-mâ-chhia chhap-choi kóng: “Ngài-têu kám-yû chhiáng ngì cho koet-vòng ke ku-mun? Tiâm-tiâm! Ngióng-pân oi ngiâ ngài chiông ngì chhṳ̀-thet!” Siên-tî chhiu tiâm-tiâm, kì yu kóng: “Liá-ha ngài tî Song-ti yí-kîn kiet-thin oi sêu-me̍t ngì; yîn-vi ngì cho liá-sṳ, yu m̀ chiap-su ngài ke khien-va.”

Yù-thai Kûng-tá Yî-set-lie̍t
( Lie̍t-vòng Ki-ha 14:8-20 )

¹⁷ Yù-thai-vòng Â-mâ-chhia lâu kì ke ku-mun sông-liòng heu, phai sṳ́-chá hi kien Yâ-fu ke sûn-é, Yok-ha̍p-sṳ̂ ke lai-é Yî-set-lie̍t-vòng Yok-fà-sṳ̂, kit kì kóng: “Ngài-têu lòi-hi chan-chhòng piang sû-yàng!”

¹⁸ Chúng-he Yî-set-lie̍t-vòng Yok-fà-sṳ̂ phai sṳ́-chá hi kien Yù-thai-vòng Â-mâ-chhia, en kì kóng: “Yû yit-pái, Lì-pâ-nun sân-táng ke yit-thèu net-è tui yit-thèu hiông-pak-su kóng: ‘Chiông ngì ke moi-é ka-pûn ngài ke lai-é â!’ Mò sióng-tó, yû yit-chak yâ-chhu tui ke-vi ko, ke-thèu net-è sa pûn kì chhio-thet.

¹⁹ Â-mâ-chhia â, tá-yàng Yî-tûng-ngìn ngì ke sîm chhiu án kiêu-ngau ô! Chhai vuk-hâ hióng-fuk chhiu hó lé! Hò má sí-khú ngiâ liá-ke châi-fo, hoi ngì lâu Yù-thai ngìn-mìn khiung-ha me̍t-mòng?”

²⁰ Â-mâ-chhia m̀-thâng. Liá he Song-ti só kiet-thin ke, oi Â-mâ-chhia lâu Yù-thai ngìn-mìn pûn-ngìn tá-sû, yîn-vi kì-têu pai Yî-tûng-ngìn ke ngiéu-siong.

²¹ Só-yî Yî-set-lie̍t-vòng Yok-fà-sṳ̂ tai-liâng kiûn-chhui, chhai Yù-thai ke Pak-Sṳ-ma̍k lâu Yù-thai-vòng Â-mâ-chhia siông-chhṳ̀.

²² Yù-thai kiûn-chhui tá-sû, só-yû sṳ-pîn chhiòn-phu chéu-chón vuk-hâ hi.

²³ Yî-set-lie̍t-vòng Yok-fà-sṳ̂ chhai Pak-Sṳ-ma̍k chok-tó Â-ha̍p-chhia ke sûn-é, Yok-â-sṳ̂ ke lai-é Yù-thai-vòng Â-mâ-chhia, chiông kì tai-to Yâ-lu-sat-lâng, yèn-heu chin-kûng Yâ-lu-sat-lâng, chiông Yî-fap-lièn-mùn to Kok-mùn thai-yok lióng-pak kûng-chhak chhòng ke yit-thon sàng-chhiòng chhiòn-phu chhak-thet.

²⁴ Yok-fà-sṳ̂ yu chiông Song-ti sṳn-thien tú ke kîm-é, ngiùn-è, Ngò-phe̍t-Yî-tûng ke heu-thoi khon-sú ke sṳn-thien yung-phín, lâu vòng-kiûng ke chhòi-pó chhiòn-phu tai-chón Sat-mâ-li-â, ya tai-têu ngìn-chṳt chón-hi.

²⁵ Yî-set-lie̍t-vòng Yok-ha̍p-sṳ̂ ke lai-é Yok-fà-sṳ̂ sí-heu, Yù-thai-vòng Yok-â-sṳ̂ ke lai-é Â-mâ-chhia hàn sṳ̍t-kâ sṳ̍p-ńg ngièn.

²⁶ Â-mâ-chhia khì-thâ ke sṳ, tui-thèu to-mî chhiòn-phu ki chhai Yù-thai lâu Yî-set-lie̍t Lie̍t-vòng Sṳ́ tî-poi.

²⁷ Tui Â-mâ-chhia phoi-ngia̍k Song-chú ke-sṳ̀ hí, chhai Yâ-lu-sat-lâng chhiu yû-ngìn oi mèu-sat kì. Chui-mî kì thò-chéu to Lâ-kit-sàng, chúng-he sù-thi̍t kiuk-to ke-vi, chiông kì chhṳ̀-thet.

²⁸ Yû-ngìn chiông kì ke sṳ̂-thí yung mâ-é chai-chón, chong chhai Yù-thai ke sàng, kiâ chú-siên ke fùn-mu tú.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan