Bìoball air-loidhne

Li̍t-thoi-chṳ Ha 24 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Yù-thai-vòng Yok-â-sṳ̂
( Lie̍t-vòng Ki-ha 12:1-16 )

¹ Yok-â-sṳ̂ chhit-se ke sṳ̀ cho Yù-thai-vòng, chhai Yâ-lu-sat-lâng thúng-chhṳ si-sṳ̍p ngièn. Kiâ-mê Sî-pí-â he Phe̍t-sṳ-pâ-sàng ke ngìn.

² Yok-â-sṳ̂ chhai chi-sṳ̂ Yâ-hò-yâ-thai hàn-sâng ke ngièn-ngit hàng Song-chú khon-cho chho̍k ke sṳ.

³ Yâ-hò-yâ-thai vi Yok-â-sṳ̂-vòng sién lióng-ke pû-ngiòng; kì lióng-sà vi vòng sên-yông chṳ́-ńg.

⁴ Yok-â-sṳ̂ chhai-vi mò kí-kiú chhiu kiet-thin oi cháng Song-chú ke sṳn-thien.

⁵ Kì min-lin chi-sṳ̂ lâu Li-vi-ngìn to Yù-thai tak-sàng hiong ngìn-mìn sû-soi, cho tak-ngièn cháng Song-ti sṳn-thien ke fi-yung. Kì oi kì-têu kón-kín phan-lî, chúng-he Li-vi-ngìn yèn-chhàn sṳ̀-kiên.

⁶ Yok-â-sṳ̂-vòng chiông kì-têu ke liâng-chhiu Yâ-hò-yâ-thai hêm-lòi, mun kì: “Ngì cho-má-ke mò kam-tuk Li-vi-ngìn hiong Yù-thai lâu Yâ-lu-sat-lâng ngìn-mìn sû-soi nè? Liá-soi he Song-chú ke phu̍k-ngìn Mô-sî kûi-thin Yî-set-lie̍t ngìn-mìn na̍p ke, vi-tó oi vì-chhṳ̀ Song-chú yok-khui ke sṳn-chong-phùng.”

⁷ (Ngièn-lòi ke fái fu-ngìn-kâ Â-thâ-li-ngâ ke sú-hâ sún-fái Song-ti ke sṳn-thien, yu nâ sṳn-thien chûng chhin-tô sṳn-vu̍t hi-pai Pâ-li̍t.)

⁸ Vòng min-lin Li-vi-ngìn cho yit-chak fung-hien-siông, piong chhai sṳn-thien mùn-héu,

⁹ fûn-fu kì-têu to Yâ-lu-sat-lâng lâu Yù-thai tak só-chhai lâu ngìn-mìn kóng, chiông Song-ti phu̍k-ngìn Mô-sî yî-chhièn chhai khóng-yâ kûi-thin chṳ̂n-sû ke soi tai-lòi hien-pûn Song-chú.

¹⁰ Ngìn-mìn lâu ke-têu liâng-chhiu chhiòn-phu tông fôn-hí, chhiu chiông kì-têu ke soi-kîm tai-lòi, piong chhai siông-é tú.

¹¹ Tak-ngit Li-vi-ngìn chiông siông-é kông-tó vòng só chṳ́-phai kam-tuk liá siông-é ke kôn-yèn ke-vi. Siông-é chông-mân ke sṳ̀, vòng-sṳt sû-ki lâu thai-chi-sṳ̂ ke thoi-péu chhiu chiông chhièn nâ chhut-lòi, chiông siông-é piong chón-hi. Án-ngiòng, kì-têu sû-tó chhin-tô ke chhièn.

¹² Vòng lâu Yâ-hò-yâ-thai chiông chhièn kâu-pûn fu-chit cháng sṳn-thien ke ngìn, ham kì-têu chhiáng tá-sa̍k, muk-siong, tá-thiet, tá-thùng ke sṳ̂-fu lòi chin-hàng cháng sṳn-thien ke kûng-chok.

¹³ Só-yû ke kûng-ngìn chhiòn-phu sat-mâng kûng-chok, chiông Song-ti ke sṳn-thien cháng to ngièn-lòi ke yong-é, lâu yî-chhièn khiung-yong án kiên-ku.

¹⁴ Siû-cháng kûng-chok kiet-suk, kì-têu chiông chhûn-tó ke kîm-ngiùn kâu-pûn vòng lâu Yâ-hò-yâ-thai; Yâ-hò-yâ-thai yung kì lòi chṳ-chho sṳn-thien ke phàn-vón lâu khì-thâ yung-phín, chhai lî-pai lâu hien-chi ke sṳ̀ sṳ́-yung. Yâ-hò-yâ-thai hàn-sâng ke ngièn-ngit, ngìn-mìn sòng-sòng chhai Song-chú ke sṳn-thien cheu-sṳ̀ hien sêu-fa-chi.

Vòng lâu Ngìn-mìn Vì-poi Yâ-hò-yâ-thai ke Chṳn-chhet

¹⁵ Yâ-hò-yâ-thai sṳ̍t-to tông-ló, yit-pak sâm-sṳ̍p se chang ko-sṳ̂n.

¹⁶ Vi-tó ki-ngiam kì vi Yî-set-lie̍t ngìn-mìn, yu vi Song-ti lâu sṳn-thien só-cho ke yit-chhiet, kì-têu chiông kì chong chhai Thai-ví-sàng ke vòng-sṳt fùn-mu tú.

¹⁷ Yâ-hò-yâ-thai sí-heu, Yù-thai ke-têu liâng-chhiu lòi chhèu-pai Yok-â-sṳ̂-vòng, vòng chhiu thâng-chhiùng kì-têu ke kien-ngi.

¹⁸ Só-yî ngìn-mìn mò chhai Song-chú ke sṳn-thien kin-pai kì-têu chú-siên ke Song-ti, fán-chón hi pai Â-sa-lâ ńg-sṳ̀n lâu khì-thâ ngiéu-siong; yîn-vi kì-têu só-fam ke chhui, Song-chú tui Yù-thai lâu Yâ-lu-sat-lâng fat-khién.

¹⁹ Song-chú phai siên-tî kín-ko kì-têu, oi kì-têu kûi-hiong Kì, chúng-he ngìn-mìn m̀-thâng.

²⁰ Heu-lòi, Song-ti ke Lìn kám-thung chi-sṳ̂ Yâ-hò-yâ-thai ke lai-é Sat-kâ-li-â; kì chhiu khî chhai ngìn-mìn khon tet-tó ke só-chhai, hêm-kóng: “Song-ti mun: Ngì-têu cho-má-ke vì-poi Song-chú ke min-lin lòi ngiâ châi-fo? Ngì-têu lì-khôi Song-chú, só-yî Kì ya oi lì-khôi ngì-têu!”

²¹ Thai-kâ chhiu sióng mèu-hoi Sat-kâ-li-â; vòng ham ngìn-mìn chhai Song-chú sṳn-thien ke thìn-yen tú yung sa̍k-thèu chiông kì te̍p-sí.

²² Yok-â-sṳ̂-vòng m̀ ki-tet Sat-kâ-li-â ke â-pâ Yâ-hò-yâ-thai tui kì ke ên-chhìn, fán-chón chiông Sat-kâ-li-â chhṳ̀-thet. Sat-kâ-li-â thôn-hi chhièn kóng: “Ngien Song-chú khon-tó ngì só-cho ke, chit-fa̍t ngì!”

Yok-â-sṳ̂ Thúng-chhṳ ke Kiet-suk

²³ Ke-ngièn chhiû-thiên, Si-li-â kiûn-chhui lòi kûng-tá Yok-â-sṳ̂-vòng, lòi-to Yù-thai lâu Yâ-lu-sat-lâng, chhṳ̀-thet só-yû ke liâng-chhiu, yu chhióng-chéu chhin-tô chan-li-phín yun to Thai-mâ-sṳ-kiet vòng ke-vi.

²⁴ Si-li-â kiûn-chhui chṳ́-yû yit se-chhui, chúng-he Song-chú sṳ́ kì-têu tá-yàng pí kì-têu khiòng-thai ke Yù-thai kiûn-chhui, yîn-vi ngìn-mìn lì-khôi Song-chú — kì-têu chú-siên ke Song-ti. Song-chú yung liá fông-fap chit-fa̍t Yok-â-sṳ̂-vòng.

²⁵ Kì su chhûng-sông. Kiûn-chhui chha̍t-thui ke sṳ̀, kiâ sú-hâ lióng-ke kiûn-kôn chho-fán, chiông kì chhṳ̀-sí chhai mìn-chhòng táng, vi-tó po chi-sṳ̂ Yâ-hò-yâ-thai ke lai-é pûn kì chhṳ̀-sí ke yên-sù. Yok-â-sṳ̂ chong chhai Thai-ví-sàng, chúng-he m̀-he chhai vòng-sṳt ke fùn-mu tú.

²⁶ (Chho-fán ke he Â-mùn fu-ngìn Sṳ-mí-ap ke lai-é Sat-pha̍t lâu Mô-ap fu-ngìn Sṳ-mí-li ke lai-é Yok-sat-pha̍t.)

²⁷ Yok-â-sṳ̂ ke-têu lai-é ke sṳ, chhin-tô tui kì m̀-hó ke yi-ngièn, lâu kì siû-cháng Song-ti sṳn-thien ke sṳ, chhiòn-phu ki chhai Lie̍t-vòng Sṳ́ tî-poi. Kì ke lai-é Â-mâ-chhia sṳ̀n-chiap kì cho vòng.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan