Bìoball air-loidhne

Li̍t-thoi-chṳ Ha 20 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Song-chú Tá-yàng Yù-thai ke Sù-thi̍t

¹ Ko mò kí-kiú, Mô-ap, Â-mùn lâu thùng-mèn Mí-vû-nì-ngìn ke kiûn-chhui chhîm-fam Yù-thai, oi kûng-tá Yok-sâ-fap-vòng.

² Yû-ngìn po-ko Yok-sâ-fap kóng: “Yî-tûng ke-phién yû thai-kiûn tui Sí-hói tui-mien lòi kûng-kit ngì; kì-têu yí-kîn cham-liâng Ha̍p-sé-sun-Thâ-mâ.” (Ha̍p-sé-sun-Thâ-mâ yu ôn-to Yún-Kî-tí.)

³ Yok-sâ-fap chho̍k-kiâng, kiet-thin khì-khiù Song-chú tai-liâng, yèn-heu min-lin chhiòn-koet kim-sṳ̍t.

⁴ Ngìn-mìn tui Yù-thai tak-sàng lòi-to Yâ-lu-sat-lâng, khì-khiù Song-chú ke tai-liâng.

⁵ Kì-têu lâu Yâ-lu-sat-lâng ngìn-mìn chhi-si̍p chhai sṳn-thien ke sîn thìn-yen tú. Yok-sâ-fap-vòng khî chhai kì-têu ke mien-chhièn,

⁶ thai-sâng khì-tó kóng: “Song-chú — ngài-têu chú-siên ke Song-ti â, Ngì tui thiên-táng thúng-chhṳ thi-song van-koet; Ngì yû thai-nèn thai-li̍t, mò ngìn yû phan-fap tí-tóng Ngì.

⁷ Ngài-têu ke Song-ti â, Ngì ke chṳ́-mìn Yî-set-lie̍t sái-to liá-vi ke sṳ̀, Ngì kiuk-chéu liá só-chhai ke ngièn-chhu-mìn, chiông liá thú-thi su-pûn Ngì ke phèn-yû Â-pak-lâ-hón ke heu-thoi, yún-yén su̍k kì-têu.

⁸ Kì-têu yit-chhṳ̍t he̍t chhai liá-vi, ya hí sṳn-thien yùng-kông Ngì ke miàng. Kì-têu tî,

⁹ na-he yû châi-nan lìm-to kì-têu, chit-fa̍t kì-têu, chhiong chan-chên, pot-vûn, kî-fông, kì-têu cho-tet lòi to liá-chho kin-pai Ngì ke sṳn-thien, khî chhai thien ke mien-chhièn; kì-têu chhai châi-nan chûng hiong Ngì fû-khiù, Ngì chhiu thâng kì-têu, chṳ́n-kiu kì-têu.

¹⁰ “Liá-ha, Â-mùn-ngìn, Mô-ap-ngìn lâu Yî-tûng-ngìn lòi kûng-tá ngài-têu. Yî-chhièn ngài-têu ke chú-siên tui Âi-khi̍p chhut-lòi ke sṳ̀, Ngì m̀-chún kì-têu ngi̍p-hi ke-têu ngìn ke koet-nui, só-yî ngài-têu ke chú-siên hàng phe̍t-thiàu lu, mò sêu-me̍t kì-têu.

¹¹ Liá-ha kì-têu fán-chón án-ngiòng po-fu̍k ngài-têu! Kì-têu sióng-oi tui Ngì chhîn-chhṳ su-pûn ngài-têu ke thú-thi chiông ngài-têu kiuk-chéu.

¹² Ngài-têu ke Song-ti â, khiù Ngì hìn-fa̍t kì-têu, yîn-vi ngài-têu mò li̍t-liong lòi tui-khong liá lòi kûng-tá ngài-têu ke thai-kiûn. Ngài-têu m̀-tî oi ngióng-pân cho, chṳ́-yû ngióng-mong Ngì.”

¹³ Yù-thai só-yû ke nàm-ngìn, lâu kì-têu ke pû-ngiòng chṳ́-ńg, khî chhai sṳn-thien mien-chhièn.

¹⁴ Song-chú ke Lìn kong chhai chung-ngìn tông-chûng yit-ke Li-vi-ngìn sṳ̂n-song. Kì ôn-to Ngâ-ha̍p-sit, he Sat-kâ-li-ngâ ke lai-é; kì su̍k Â-sat chûng-chhu̍k, he Mâ-tham-ngâ ke hièn-sûn, Yâ-li ke chên-sûn, Pí-nâ-ngâ ke sûn-é.

¹⁵ Ngâ-ha̍p-sit kóng: “Yok-sâ-fap-vòng, Yù-thai lâu Yâ-lu-sat-lâng só-yû ke ngìn-mìn nâ, Song-chú kóng, ngì-têu m̀-sṳ́ sèu, ya m̀-sṳ́ kiâng án khiòng-thai ke thi̍t-kiûn. Kiet-thin chan-chên ke sû-yàng he Song-ti, m̀-he ngì-têu.

¹⁶ Thiên-kông-ngit, kì-têu tui Sé-sṳ̂ lu-héu sông-lòi ke sṳ̀, ngì-têu hi tui-khong kì-têu. Ngì-têu voi chhai Yâ-lû-yî-le̍t khóng-yâ chhièn ke sân-lak héu tù-tó kì-têu.

¹⁷ Liá-chhòng chan-chên ngì-têu m̀-sṳ́ tá; tân-chhiang pài-chhṳn khî-vún lòi, ngì-têu voi khon-tó Song-chú sṳ́ ngì-têu tet-sṳn. Yù-thai lâu Yâ-lu-sat-lâng ke ngìn-mìn nâ, m̀-sṳ́ sèu, ya m̀-sṳ́ kiâng. Thiên-kông-ngit ngì-têu hi mien-tui kì-têu! Song-chú voi lâu ngì-têu khiung-ha!”

¹⁸ Só-yî, Yok-sâ-fap-vòng khúi hâ-lòi, phu̍k chhai thi-song; Yù-thai lâu Yâ-lu-sat-lâng só-yû ke mìn-chung ya lâu kì khiung-ha phu̍k-tén kin-pai Song-chú.

¹⁹ Li-vi kî-chhu̍k ke Kô-hot lâu Khó-lâ chhu̍k-ngìn khî hí-lòi, thai-sâng siung-chan Song-chú — Yî-set-lie̍t ke Song-ti.

²⁰ Thi-ngi ngit tá-chó, ngìn-mìn to Thì-kô-â fu-khiun ke khóng-yâ hi. Kì-têu chhut-fat ke sṳ̀, Yok-sâ-fap tui kì-têu kóng: “Yù-thai lâu Yâ-lu-sat-lâng ke ngìn-mìn nâ, oi sin-kho Song-chú — ngì-têu ke Song-ti, ngì-têu chhiu khî tet-vún; oi siông-sin Song-chú siên-tî ke fa, ngì-têu chhiu yit-thin sṳ̀n-kûng.”

²¹ Vòng tui ngìn-mìn kóng-so̍t, min-lin kô-sú chok thi̍t-phe̍t chiet-khì sṳ̀ chok ke sâm, hàng chhai kiûn-chhui thèu-chhièn, theu-lu thai-sâng chhong: “Chan-mî Song-chú! Kì ke chhṳ̀-oi yún-yén chhòng-chhùn!”

²² Kì-têu khôi-sṳ́ chhong-kô chan-mî ke sṳ̀, Song-chú sṳ́ lòi chhîm-fam ke thi̍t-kiûn lon chhiang-chhiang lé, tá-sû thet lé.

²³ Â-mùn-ngìn lâu Mô-ap-ngìn kûng-tá Yî-tûng-ngìn ke kiûn-chhui, chiông kì-têu chhiòn-phu sêu-me̍t, yèn-heu chón ko-lòi pí-chhṳ́ siông-chhṳ̀.

²⁴ Yù-thai kiûn-chhui lòi-to khóng-yâ ke yit-chho thap, hiong thi̍t-kiûn ke chhṳn-thi khon, khon-tó mân-phien sṳ̂-thí, mò yit-ke chéu-thet.

²⁵ Yok-sâ-fap lâu kì ke kiûn-chhui chhiu hi chhióng chan-li-phín; kì-têu chhìm-tó chhin-tô thèu-sâng, yung-phín, sâm-fu lâu khì-thâ ta̍t-chhièn ke tûng-sî. Kì-têu yung sâm-ngit ke sṳ̀-kiên sû-si̍p chan-li-phín, chúng-he hàn-he chhin-tô nâ m̀-chéu.

²⁶ Thi-si ngit, kì-têu chhi-si̍p chhai Pí-lâ-kâ sân-lak tú siung-chan Song-chú. Só-yî liá sân-lak ôn-to “Pí-lâ-kâ”, chhṳ̍t-to kîm-pû-ngit.

²⁷ Yok-sâ-fap tai-liâng tet-sṳn ke kiûn-chhui fôn-fôn hí-hí chón-hi Yâ-lu-sat-lâng, yîn-vi Song-chú tá-yàng kì-têu ke sù-thi̍t.

²⁸ Kì-têu yit-lu thàn-khìm, chhit-hièn-khìm, phùn la̍p-pá chón-to sàng-tú, ngi̍p-hi Song-chú ke sṳn-thien.

²⁹ Tak-koet thâng-tó Song-chú ngióng-pân tá-yàng Yî-set-lie̍t sù-thi̍t ke sêu-sit chhiòn-phu tông-kiâng Song-ti.

³⁰ Án-ngiòng, chhai Yok-sâ-fap thúng-chhṳ khì-kiên koet-kâ thai-phìn; Song-ti su-pûn kì si-kin phìn-ôn.

Yok-sâ-fap Thúng-chhṳ ke Kiet-suk
( Lie̍t-vòng Ki-song 22:41-50 )

³¹ Yok-sâ-fap sâm-sṳ̍p ńg-se ke sṳ̀ cho Yù-thai-vòng, chhai Yâ-lu-sat-lâng thúng-chhṳ ngi-sṳ̍p ńg-ngièn. Kiâ-mê he Sṳ-li-hî ke moi-é Â-sû-pâ.

³² Yok-sâ-fap hàng kiâ-pâ Â-sat mò phiên-lì ke lu, chhiòn-phu cho Song-chú khon-cho chho̍k ke sṳ.

³³ Chúng-he, kì mò fi-thet sân-kông táng ke sṳ̀n-meu; ngìn-mìn hàn-he mò chhiòn-sîm chhiòn-yi kin-pai kì-têu chú-siên ke Song-ti.

³⁴ Yok-sâ-fap khì-thâ ke sṳ, tui-thèu to-mî, ki chhai Ha̍p-nâ-nì ke Lai-é Yâ-fu Sṳ́ tî-poi; liá sû he Yî-set-lie̍t Lie̍t-vòng Sṳ́ chûng ke yit-kién.

³⁵ Yû yit-pái, Yù-thai-vòng Yok-sâ-fap lâu cho chhin fái-sṳ ke Yî-set-lie̍t-vòng Â-ha̍p-chhia kiet-mèn;

³⁶ kì-têu chhai Yî-sùn-Kâ-phe̍t-kóng chho yit-chhui yén-hòng ke sòn-è.

³⁷ Mâ-li-sâ-sàng ngìn Tô-thai-ngá ke lai-é Yî-li-yî-chhia yi-ngièn kín-ko Yok-sâ-fap kóng: “Yîn-vi ngì lâu Â-ha̍p-chhia kiet-mèn, Song-chú oi fí-fái ngì só-chho ke sòn-è.” Heu-lòi ke-têu sòn-è ton-chṳ̂n fái-thet, chhiùng-lòi m̀-sṳt chhut-hói.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan