Bìoball air-loidhne

Li̍t-thoi-chṳ Ha 2 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Chún-phi Hí Sṳn-thien
( Lie̍t-vòng Ki-song 5:1-18 )

¹ Só-lò-mùn kiet-thin oi hí sṳn-thien, chhai ke-vi kin-pai Song-chú. Kì ya kiet-thin vi chhṳ-kâ hí yit-chho vòng-kiûng.

² Só-lò-mùn tho̍k chhit-van ngìn pân-yun chhòi-liau, pat-van ngìn chhai sân-táng tá-sa̍k, sâm-chhiên liuk-pak ngìn kam-tuk kûng-chhàng ke chin-hàng.

³ Só-lò-mùn phai-ngìn hi tui Thai-ngì-vòng Hî-làn kóng: “Ngì sṳt lâu ngâ-pâ Thai-ví cho sên-lî, mai-pûn kì hí vòng-kiûng ke hiông-pak-su, chhiáng ngì ya án-ngiòng tui-thai ngài.

⁴ Ngài liá-ha hí sṳn-thien, yùng-kông Song-chú — ngài ke Song-ti. Liá-thien voi sàng-cho sṳ̀n-sṳn ke só-chhai, pûn ngài lâu ngài ke ngìn-mìn chhai ke-vi sêu-hiông kin-pai Song-chú, chhai ke-vi yit-chhṳ̍t hien-piáng, pin chhai tak chêu-sṳ̀n am-pû, tak ôn-sit-ngit, tak-chak ngie̍t chhû-yit, lâu khì-thâ sṳn-ngit hien sêu-fa-chi, kin-pai Song-chú — ngài-têu ke Song-ti. Kì sṳt min-lin Yî-set-lie̍t yún-yén oi án-ngiòng cho.

⁵ Ngài oi hí ke sṳn-thien tông-thai, yîn-vi ngài-têu ke Song-ti pí só-yû ke sṳ̀n-mìn kha ví-thai.

⁶ Mò ngìn yû phan-fap vi Song-ti hí sṳn-thien, yîn-vi chhiu-son thiên lâu thiên-táng ke thiên ya m̀-la Kì he̍t. Ngài son má-ke? Yû fap-thu vi Kì hí sṳn-thien mâ? Chṳ́ cho-tet hí sêu-hiông ke thien thin-thin.

⁷ Liá-ha, chhiáng ngì phai yit-ke hó sú-ngi ke sṳ̂-fu lòi, voi tiâu-khiet, voi yung kîm-ngiùn thùng-thiet tá-chho tûng-sî, voi chhiak làm-set, chṳ́-set, fùng-set ke pu. Liá-ke ngìn oi lâu Yù-thai pin Yâ-lu-sat-lâng ke-têu sṳ̂-fu, chhiu-he ngâ-pâ Thai-ví sién chhut-lòi ke sṳ̂-fu, khiung-ha cho-kûng.

⁸ Ngài tî ngì chám su-é ke kûng-ngìn tông-yû kî-su̍t, só-yî chhiáng ngì tui Lì-pâ-nun yun hiông-pak-su, chhiùng-su, thàn-hiông-su pûn ngài. Ngài oi phai-ngìn hi hia̍p-chhu ngì ke kûng-ngìn,

⁹ chún-phi tông-tô ke su-é, yîn-vi ngài só-oi hí ke he yit-chho kô-thai thòng-fòng ke sṳn-thien.

¹⁰ Ngài voi pûn ngiâ tó su-é ke kûng-ngìn lióng-chhiên kûng-tún séu-ma̍k, lióng-chhiên kûng-tún thai-ma̍k, si-sṳ̍p van kûng-sṳ̂n ke chiú, lâu si-sṳ̍p van kûng-sṳ̂n ke kám-lám-yù.”

¹¹ Thai-ngì-vòng Hî-làn fì-sin pûn Só-lò-mùn, kóng: “Yîn-vi Song-chú siak Kì ke chṳ́-mìn, chhiu sat-li̍p ngì cho kì-têu ke vòng.”

¹² Hî-làn yu kóng: “Siung-chan Song-chú — Yî-set-lie̍t ke Song-ti, thiên-thi ke chhóng-chho chá! Kì su-pûn Thai-ví-vòng yit-ke án-yû chhûng-mìn chṳ-fi ke lai-é; liá lai-é tá-son vi Song-chú hí sṳn-thien, ya vi chhṳ-kâ hí vòng-kiûng.

¹³ Ngài liá-ha phai yit-ke fî-sòng chhûng-mìn, hó sú-ngi ke sṳ̂-fu pûn ngì; kì ke miàng ôn-to Fu-làn,

¹⁴ kiâ-mê he Tan kî-chhu̍k ngìn, kiâ-pâ he Thai-ngì pún-thi ngìn. Kì chhin voi yung kîm, ngiùn, thùng, thiet, sa̍k-thèu, muk-chhòi lòi tá-chho tûng-sî, ya voi chhiak làm-set, chṳ́-set, fùng-set ke pu, hàn voi chhiak mà-sâ. Kì voi yung tak-chúng chhòi-liau tiâu-khiet, ya voi cheu só-yû ke sat-kie lòi tiâu-khiet. Ngì cho-tet pûn kì lâu ngì ke sṳ̂-fu pin ngiâ-pâ Thai-ví-vòng ke sṳ̂-fu khiung-ha kûng-chok.

¹⁵ Liá-ha, chhiáng ngâ chú chiông tap-yin ke séu-ma̍k, thai-ma̍k, chiú, kám-lám-yù yun pûn phu̍k-ngìn.

¹⁶ Ngài-têu voi chhai Lì-pâ-nun-sân chám ngì só sî-yeu ke muk-chhòi, khún-cho muk-phài, tui hói-lu yun-to Yok-pha, ngì chhiu tui ke-vi yun-to Yâ-lu-sat-lâng hi.”

Sṳn-thien Kûng-chhàng Khôi-kûng
( Lie̍t-vòng Ki-song 6:1-38 )

¹⁷ Só-lò-mùn thiàu-chhà só-yû chhiam-he̍t chhai Yî-set-lie̍t ke ngoi-chhu̍k ngìn (chhiong kiâ-pâ Thai-ví yî-chhièn só-cho ke fu-khiéu thiàu-chhà), chúng-khiung yû sṳ̍p-ńg van sâm-chhiên liuk-pak sà.

¹⁸ Kì phai kì-têu tông-chûng ke chhit-van ngìn pân chhòi-liau, pat-van ngìn chhai sân-táng tá-sa̍k, yu chṳ́-thin sâm-chhiên liuk-pak ke kûng-thèu lòi kam-tuk kì-têu ke kûng-chok.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan