Bìoball air-loidhne

Li̍t-thoi-chṳ Ha 19 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Siên-tî Chit-phi Yok-sâ-fap

¹ Yù-thai-vòng Yok-sâ-fap phìn-ôn chón-to Yâ-lu-sat-lâng vòng-kiûng.

² Siên-kien Ha̍p-nâ-nì ke lai-é Yâ-fu hi kien vòng, tui kì kóng: “Ngì ngin-vì pông-chhu fái-ngìn, siak ke-têu nâu Song-chú ke ngìn kám chho̍k? Ngì só-cho ke ngiâ Song-chú fat-khién.

³ Sûi-yèn án-ngiòng, ngì hàn-yû têu-é hó-chhu. Ngì fi-thet koet-nui só-yû Â-sa-lâ ńg-sṳ̀n ke chhû-siong; ngì kiet-sîm oi chhìm-khiù Song-ti.”

Yok-sâ-fap ke Kói-kiet

⁴ Yok-sâ-fap-vòng he̍t chhai Yâ-lu-sat-lâng, chúng-he kì thin-khì chhut-sùn mìn-kiên, tui nàm-phu ke Phe̍t-sṳ-pâ to pet-phu Yî-fap-lièn sân-khî ke piên-kie, ham ngìn-mìn kûi-hiong Song-chú — kì-têu chú-siên ke Song-ti.

⁵ Kì chhai Yù-thai tak fòng-ví-sàng sat-li̍p sṳ́m-phan-kôn,

⁶ tui kì-têu kóng: “Ngì-têu phan-sṳ oi kiún-sṳ́m; ngì-têu m̀-he vi ngìn phan-sṳ, he vi Song-chú. Ngì-têu siên-phan ke sṳ̀, Song-chú lâu ngì-têu khiung-ha.

⁷ Oi kin-vi Song-chú, phan-sṳ kiún-sṳ́m; yîn-vi Song-chú — ngài-têu ke Song-ti he kûng-ngi ke, m̀-chún ngì-têu phiên-sîm, ya-he pûn-ngìn sû-mâi.”

⁸ Yok-sâ-fap ya chhai Yâ-lu-sat-lâng chṳ́-phai Li-vi-ngìn, chi-sṳ̂ lâu khì-thâ liâng-chhiu cho sṳ́m-phan-kôn, chhài-phan vì-fam Song-chú fap-li̍t ke on-khien lâu mìn-kiên ke kiu-fun.

⁹ Kì chṳ́-sṳ kì-têu kóng: “Ngì-têu oi yung kin-vi Song-chú ke sîm chṳp-hàng ngim-vu, oi chûng-sîm sṳ̀n-sṳ̍t phan-sṳ.

¹⁰ Na-he tui tak só-chhai yû thùng-pâu yîn-vi chhṳ̀-ngìn ya-he ngim-hò vì-fam fap-li̍t kie-min ke on-khien sung-to ngì-têu mien-chhièn, ngì-têu yit-thin oi ngin-chṳ̂n chṳ́-thô kì-têu chhai sṳ́m-mun khì-kiên yin-kôi ngióng-pân cho, án-ngiòng, kì-têu chang m̀-voi tet-chhui Song-chú. Na-he ngì-têu án-ngiòng cho, ngì-têu chhiu mò-chhui. Na-mò, ngì lâu ngì ke thùng-pâu voi ngiâ Song-chú fat-khién.

¹¹ Thai-chi-sṳ̂ Â-mâ-li-ngâ oi kón-lî ngì-têu só-yû su̍k Song-chú ke sṳ; Yù-thai kî-chhu̍k ke chhu̍k-chóng, Yî-sṳ̍t-mâ-li ke lai-é Sî-pâ-thi-ngâ oi kón-lî ngì-têu só-yû su̍k vòng ke sṳ. Li-vi-ngìn oi fu-chit kam-tuk fap-thìn phan-kiet ke sṳ. Ngì-têu oi yúng-kám hi sṳ̍t-hàng yî-song ke chṳ́-sṳ. Ngien Song-chú lâu san-liòng ke ngìn khiung-ha.”

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan