Bìoball air-loidhne

Li̍t-thoi-chṳ Ha 18 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Siên-tî Mí-kâi-ngâ Kín-ko Â-ha̍p-vòng
( Lie̍t-vòng Ki-song 22:1-28 )

¹ Yù-thai-vòng Yok-sâ-fap chhin yû chhòi-fu lâu miàng-sâng, kì lâu Yî-set-lie̍t-vòng Â-ha̍p kiet-chhîn.

² Kí ngièn-heu, Yok-sâ-fap hi Sat-mâ-li-â pai-fóng Â-ha̍p; Â-ha̍p vi-tó chêu-thai Yok-sâ-fap lâu kì ke sùi-chhiùng chhṳ̀ chhin-tô ngiù-yòng, pài-sat yèn-si̍t, sióng-oi sot-fu̍k Yok-sâ-fap lâu kì khiung-ha hi kûng-tá Kî-lie̍t ke Lâ-ma̍t-sàng.

³ Yî-set-lie̍t-vòng Â-ha̍p mun Yù-thai-vòng Yok-sâ-fap: “Ngì hén lâu ngài khiung-ha hi kûng-tá Kî-lie̍t ke Lâ-ma̍t mò?” Yok-sâ-fap en-kóng: “Ngì ke sṳ chhiu-he ngài ke sṳ. Ngài ke kiûn-chhui chhiu-he ngì ke kiûn-chhui; ngài-têu yit-thin lâu ngì khiung-ha hi siông-chhṳ̀.”

⁴ Yok-sâ-fap yu kóng: “Chúng-he, ngì oi siên khiù-mun Song-chú.”

⁵ Só-yî, Yî-set-lie̍t-vòng seu-si̍p thai-yok si-pak miàng siên-tî lòi, mun kì-têu: “Ngài cho-tet hi kûng-tá Kî-lie̍t ke Lâ-ma̍t mò?” Kì-têu kóng: “Cho-ngì hi! Song-ti voi sṳ́ vòng tet-sṳn.”

⁶ Chúng-he Yok-sâ-fap mun: “Liá-vi kám m̀-he hàn-yû Song-chú ke siên-tî? Ngài-têu cho-tet chhiáng kì khiù-mun Song-chú.”

⁷ Yî-set-lie̍t-vòng tui Yok-sâ-fap kóng: “Hàn-yû yit-ke, he Yîm-lâ ke lai-é Mí-kâi-ngâ, ngài-têu cho-tet thûng-ko kì khiù-mun Song-chú. M̀-ko ngài tông nâu kì, yîn-vi kì chhiùng-lòi m̀-sṳt tui ngài yi-ngièn kóng yit-ki hó-fa, chúng-he yi-ngièn kóng châi-fo ke fa.” Yok-sâ-fap kóng: “Vòng m̀-hó án-ngiòng kóng!”

⁸ Só-yî, Yî-set-lie̍t-vòng ham yit-ke kiûng-thìn kôn-yèn lòi, min-lin kì ngiàm-sṳ̀ hi chiông Yîm-lâ ke lai-é Mí-kâi-ngâ chhìm-lòi.

⁹ Yî-set-lie̍t-vòng Â-ha̍p lâu Yù-thai-vòng Yok-sâ-fap chok-tén vòng-phàu, chhai Sat-mâ-li-â sàng-mùn ngoi tá-ma̍k-chhòng ke-vi, chhô chhai chhṳ-kâ ke pó-chho táng; só-yû ke siên-tî chhai kì-têu mien-chhièn su-kám ngi̍p-sṳ̀n kóng yi-ngièn.

¹⁰ Khì-chûng yû yit-ke siên-tî he Kî-nâ-nâ ke lai-é Sî-tí-kâ; kì tá-têu thiet-kok, tui Â-ha̍p kóng: “Song-chú án-ngiòng kóng: ‘Ngì oi yung liá-têu thiet-kok tá Si-li-â-ngìn, chha̍t-tái sêu-me̍t kì-têu.’ ”

¹¹ Khì-thâ ke siên-tî ya chhiòn-phu án-ngiòng yi-ngièn kóng: “Cho ngì hi kûng-tá Kî-lie̍t ke Lâ-ma̍t, ngì yit-thin voi yàng; Song-chú voi chiông ke-sàng kâu chhai vòng ke sú-chûng.”

¹² Liá-sṳ̀, ke hi ham Mí-kâi-ngâ lòi ke kôn-yèn tui Mí-kâi-ngâ kóng: “Só-yû ke siên-tî chhiòn-phu kóng vòng voi sṳ̀n-kûng, ngì chui-hó ya án-ngiòng kóng.”

¹³ Chúng-he Mí-kâi-ngâ kóng: “Ngài chṳ́-tén yún-sên ke Song-chú fat-sṳ, Song-ti oi ngài kóng má-ke, ngài chhiu kóng má-ke.”

¹⁴ Mí-kâi-ngâ to Â-ha̍p-vòng mien-chhièn ke sṳ̀, vòng mun kì: “Mí-kâi-ngâ, ngài-têu cho-tet hi kûng-tá Kî-lie̍t ke Lâ-ma̍t mò?” Mí-kâi-ngâ en-kóng: “Cho ngì-têu hi tá â! Ngì-têu yit-thin voi tá-yàng; thi̍t-ngìn voi kâu chhai ngì-têu ke sú-chûng!”

¹⁵ Chúng-he vòng tui kì kóng: “Ngì oi fung Song-chú ke miàng cheu-sṳ̍t tui ngài kóng! Liá-ki fa ngài oi lâu ngì kóng kí-tô pái nè?”

¹⁶ Mí-kâi-ngâ kóng: “Ngài khon-tó Yî-set-lie̍t ke kiûn-chhui san chhai sân-kông táng, chhiu-chhiong mò mu̍k-ngìn ke yòng-khiùn. Song-chú kóng: ‘Liá-têu ngìn mò liâng-chhiu, ham kì-têu phìn-phìn ôn-ôn chón vuk-hâ hi!’ ”

¹⁷ Yî-set-lie̍t-vòng tui Yok-sâ-fap kóng: “Ngài kám m̀-he kóng-ko, kì chhiùng-lòi m̀-sṳt tui ngài yi-ngièn kóng yit-ki hó-fa? Chúng-he yi-ngièn kóng châi-fo ke fa!”

¹⁸ Mí-kâi-ngâ ki-siu̍k kóng: “Hó! Ngì-têu oi thâng Song-chú ke fa! Ngài khon-tó Song-chú chhô chhai thiên-thìn ke pó-chho, só-yû ke thiên-sṳ́ khî chhai Kì ke sùn-thèu.

¹⁹ Song-chú mun: ‘Má-ngìn hi phien Yî-set-lie̍t-vòng Â-ha̍p, pûn kì to Kî-lie̍t ke Lâ-ma̍t hi sung-sí nè?’ Ke-têu thiên-sṳ́ yit-sà kóng yit-yong.

²⁰ Heu-lòi, yû yit-ke lìn to Song-chú thèu-chhièn lòi kóng: ‘Ngài hi phien kì.’ Song-chú mun: ‘Ngì oi ngióng-pân phien nè?’

²¹ Ke-lìn kóng: ‘Ngài voi sṳ́ Â-ha̍p só-yû ke siên-tî kóng fâ-liâu.’ Song-chú kóng: ‘Hó! Ngì hi phien kì! Ngì yit-thin voi sṳ̀n-kûng.’ ”

²² Chui-heu Mí-kâi-ngâ kóng: “Liá chhiu-he sṳ-chhìn ke kîn-ko. Song-chú sṳ́ ngì ke siên-tî tui ngì kóng fâ-liâu, Song-chú yí-kîn min-thin ngì tù-tó châi-fo!”

²³ Kî-nâ-nâ ke lai-é Sî-tí-kâ siên-tî hàng-to Mí-kâi-ngâ mien-chhièn, tá kì ke choi-kok, chit-mun kì: “Song-chú ke Lìn má-ke sṳ̀-chiet lì-khôi ngài, lâu ngì kóng-fa nè?”

²⁴ Mí-kâi-ngâ en-kóng: “Tén-to ngì chéu-hi chui tî-poi ke se fòng-kiên khong hí-lòi, ke-ngit ngì chhiu voi tî lé.”

²⁵ Yèn-heu, Yî-set-lie̍t-vòng min-lin kóng: “Chiông Mí-kâi-ngâ chok hí-lòi, sung-to sṳ-chóng Â-mùn lâu vòng-chṳ́ Yok-â-sṳ̂ ke-vi,

²⁶ fûn-fu kì-têu chiông Mí-kâi-ngâ koân chhai kâm-ngiu̍k tú, tak-ngit tân-chhiang pûn kì vì-chhṳ̀ sâng-miang ke piáng lâu súi, tén-to ngài phìn-ôn chón-lòi.”

²⁷ Mí-kâi-ngâ kóng: “Na-he ngì hàn phìn-ôn chón-lòi, liá chhiu chṳn-mìn Song-chú mò thûng-ko ngài kóng-fa!” Kì yu kóng: “Kok-vi, oi ki-tet ngài thèu-ha só-kóng ke fa!”

Â-ha̍p Sí-thet
( Lie̍t-vòng Ki-song 22:29-35 )

²⁸ Yî-set-lie̍t-vòng Â-ha̍p lâu Yù-thai-vòng Yok-sâ-fap hi Kî-lie̍t kûng-tá Lâ-ma̍t-sàng.

²⁹ Yî-set-lie̍t-vòng tui Yok-sâ-fap kóng: “Ngài-têu sông chan-chhòng ke sṳ̀, ngài lòi kói-chông, ngì hàn-he chok-tén vòng-phàu.” Só-yî Yî-set-lie̍t-vòng kói-chông hi siông-chhṳ̀.

³⁰ Si-li-â-vòng min-lin kiâ ke-têu chan-chhâ ke chṳ́-fî-kôn, oi chôn-mùn tá Yî-set-lie̍t-vòng yit-sà.

³¹ Só-yî tông kì-têu khon-tó Yok-sâ-fap ke sṳ̀, láu-tó kì chhiu-he Yî-set-lie̍t-vòng, chhiu chhiòn-phu hi kûng-tá kì. Yok-sâ-fap thai-sâng hêm, Song-chú chhiu lòi kiu kì; Song-ti sṳ́ kûng-tá kì ke ngìn chón-sṳ̂n lì-khôi.

³² Chan-chhâ ke chṳ́-fî-kôn ngin-chhut kì m̀-he Yî-set-lie̍t-vòng chhiu mò ki-siu̍k hi kiuk kì.

³³ Chúng-he, yû yit-ke Si-li-â sṳ-pîn sùi-phien sa yit-chien, tú-hó sa-tó Yî-set-lie̍t-vòng Â-ha̍p chan-kap ke chiap-phung. Â-ha̍p tui sṳ́-chhâ ke hêm-kóng: “Ngài chho̍k chhûng-sông lé, to-chón hi, thui-chhut chan-chhòng!”

³⁴ Ke-sṳ̀, chan-chên ye̍t-lòi ye̍t li-hoi, Yî-set-lie̍t-vòng ngiûn-nai khî chhai chan-chhâ tú, mien-tui Si-li-â-ngìn, chhṳ̍t-to lìm-am. Ngit-thèu lo̍k-sân ke sṳ̀, kì chhiu sí-thet.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan