Bìoball air-loidhne

Li̍t-thoi-chṳ Ha 16 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Â-sat-vòng lâu Si-li-â-vòng Kiet Thùng-mèn
( Lie̍t-vòng Ki-song 15:17-22 )

¹ Yù-thai-vòng Â-sat chhai-vi ke thi sâm-sṳ̍p liuk-ngièn, Yî-set-lie̍t-vòng Pâ-sâ oi kûng-tá Yù-thai, chhiu siû-kien Lâ-mâ cho fòng-ví-sàng, muk-tit he oi chhiet-thôn chhut-ngi̍p Yù-thai só-yû ke kâu-thûng.

² Só-yî Â-sat chiông sṳn-thien lâu vòng-kiûng pó-khu tú ke kîm-ngiùn chhiòn-phu yun to Thai-mâ-sṳ-kiet, to Si-li-â-vòng Phien-Ha̍p-tha̍t ke-vi, tui kì kóng:

³ “Ngiâ-pâ lâu ngâ-pâ yî-chhièn he thùng-mèn, ngài-têu ya lòi li̍p-yok cho thùng-mèn. Liá-têu kîm-ngiùn he sung-pûn ngì ke lî-vu̍t. Chhiáng chiông ngì lâu Yî-set-lie̍t-vòng Pâ-sâ ke mèn-yok fi-thet, kì chang voi tui ngài ke thú-thi chiông kiûn-chhui chha̍t-chéu.”

⁴ Phien-Ha̍p-tha̍t thùng-yi Â-sat-vòng ke kien-ngi, chhiu phai kì ke ngièn-soi hi kûng-tá Yî-set-lie̍t ke sàng-sṳ. Kì-têu cham-liâng Yî-yùn, Tan, Â-pak-Pak-Mâ-kâ, lâu só-yû chhai Nâ-fut-thâ-li tún fo-vu̍t ke sàng-sṳ.

⁵ Pâ-sâ thâng-tó só fat-sên ke sṳ, chhiu ngiàm-sṳ̀ thìn-chṳ́ siû-kien Lâ-mâ, vok-thet ke-vi ke kûng-chhàng.

⁶ Só-yî Â-sat-vòng seu-si̍p Yù-thai tak só-chhai ke ngìn, chiông Pâ-sâ chhai Lâ-mâ só-yung ke sa̍k-thèu, su-liau chhiòn-phu yun hi siû-kien Kâ-pâ lâu Mí-sṳ̂-pâ-sàng.

Siên-kien Ha̍p-nâ-nì

⁷ Ke-sṳ̀, siên-kien Ha̍p-nâ-nì hi kien Yù-thai-vòng Â-sat, tui kì kóng: “Yîn-vi Ngì yí-kho Si-li-â-vòng, m̀ yí-kho Song-chú — ngì ke Song-ti, só-yî ngì sṳt-thet kî-fi tá-yàng Si-li-â-vòng ke kiûn-chhui.

⁸ Yî-chhièn Kú-sṳ̍t lâu Li-pí-â kám m̀-he yû khiòng-thai ke kiûn-chhui, yu yû chhin-tô chan-chhâ lâu khì-pîn mâ? Chúng-he yîn-vi ngì yí-kho Song-chú, Kì chhiu sṳ́ ngì yàng-ko kì-têu.

⁹ Song-chú khon-ku chhiòn sṳ-kie, su li̍t-liong pûn ke-têu tui Kì chûng-sṳ̍t ke ngìn. Ngì cho liá-khien sṳ sṳ̍t-chhai tông-ngong; só-yî tui liá-ha khôi-sṳ́, ngì voi yit-chhṳ̍t tù-tó chan-lon.”

¹⁰ Â-sat thâng-tó chhiu fî-sòng khién, chiông siên-kien koân hí-lòi. Thùng-sṳ̀, Â-sat khôi-sṳ́ tui yû-têu ngìn-mìn tông chhàn-ngiûn.

Â-sat Thúng-chhṳ ke Kiet-suk
( Lie̍t-vòng Ki-song 15:23-24 )

¹¹ Â-sat chhai-vi khì-kiên só fat-sên ke sṳ chhiòn-phu ki chhai Yù-thai lâu Yî-set-lie̍t Lie̍t-vòng Sṳ́ tî-poi.

¹² Â-sat cho vòng ke thi sâm-sṳ̍p kiú-ngièn, kì ke kiok yîn-vi pot ngiàm-chhung ke phiang pien pâi-kiok; chhiu-son chhai ke-sṳ̀, kì me-mò khiù Song-chú ke pông-chhu, tân-tân khiù-mun yî-sên.

¹³ Lióng-ngièn heu kì sí-thet,

¹⁴ chong chhai Thai-ví-sàng — kì sên-chhièn vi chhṳ-kâ chho̍k-hó ke sa̍k-mu tú. Ngìn yung hiông-liau lâu hiông-yù kò kì ke sṳ̂-thí, yu sêu yit-tôi thai-fó hiong kì péu-sṳ ôi-sông.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan