Bìoball air-loidhne

Li̍t-thoi-chṳ Ha 15 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Â-sat ke Kói-kiet

¹ Song-ti ke Lìn kong chhai Ngò-tet ke lai-é Â-sat-li-ngâ sṳ̂n-song.

² Kì chhiu hi kien Â-sat-vòng, tui kì kóng: “Â-sat-vòng lâu só-yû Yù-thai, Phien-ngâ-mén ke ngìn-mìn nâ, chhiáng thâng ngài kóng! Na-he ngì-têu sun-chhiùng Song-chú, Kì yit-thin voi lâu ngì-têu khiung-ha. Ngì-têu chhìm Kì, Kì chhiu pûn ngì-têu chhìm-tó. Ngì-têu lì-khôi Kì, Kì chhiu fit-thet ngì-têu.

³ Yî-set-lie̍t yí-kîn chhin-kiú mò chṳ̂n-sṳ̀n, mò kau-thô ke chi-sṳ̂, ya mò fap-li̍t.

⁴ Chúng-he châi-nan lìm-to ke sṳ̀, kì-têu chón-hiong Song-chú — Yî-set-lie̍t ke Song-ti; kì-têu chhìm-khiù Kì, Kì chhiu pûn kì-têu chhìm-tó.

⁵ Chhai ke khì-kiên, chhut-ngi̍p ke ngìn chhiòn-phu mò ôn-chhiòn, yîn-vi tak só-chhai yû thung-lon.

⁶ Liá-koet kûng-tá ke-koet, liá-sàng kûng-tá ke-sàng, yîn-vi Song-ti sṳ́ châi-nan thung-khú kong chhai kì-têu sṳ̂n-song.

⁷ Chúng-he, ngì-têu yit-thin oi kiên-khiòng, cho-m̀-tet fôi-sîm; ngì-têu ke kûng-chok yit-thin voi tet-tó po-sóng.”

⁸ Â-sat thâng-tó siên-tî Ngò-tet ke lai-é Â-sat-li-ngâ ke yi-ngièn, chhiu tet-tó kú-li. Kì chiông Yù-thai lâu Phien-ngâ-mén chhiòn-thi só-yû ke ngiéu-siong pin kì chhai Yî-fap-lièn sân-khî só cham-liâng ke-têu sàng ke ngiéu-siong chhiòn-phu chhù-thet; kì yu chiông sṳn-thien thìn-yen tú Song-chú ke chi-thàn cháng-hó.

⁹ Chhin-tô Yî-set-lie̍t-ngìn tui Yî-fap-lièn, Mâ-nâ-sî, Sî-mién lòi kûi-sun Â-sat, he̍t chhai kì ke koet-chûng, yîn-vi kì-têu khon-tó Song-chú — kì ke Song-ti lâu kì khiung-ha. Â-sat seu-si̍p liá-têu ngìn lâu Yù-thai, Phien-ngâ-mén ke ngìn-mìn;

¹⁰ Â-sat chhai-vi ke thi sṳ̍p-ńg ngièn sâm-ngie̍t, kì-têu chhiu chhi-si̍p chhai Yâ-lu-sat-lâng.

¹¹ Ke-ngit, kì-têu tui chok-lòi ke chan-li-phín chûng, yung chhit-pak chak ngiù, chhit-chhiên chak yòng hien-pûn Song-chú.

¹² Kì-têu chhiu li̍p-yok, oi chhiòn-sîm chhiòn-yi chhìm-khiù Song-chú — kì-têu chú-siên ke Song-ti.

¹³ Mò-lun nàm-ńg ló-yu, m̀ chhìm-khiù Song-chú — Yî-set-lie̍t Song-ti ke, chhiu oi chiông kì chhú sí-hìn.

¹⁴ Kì-têu fung Song-chú ke miàng thai-sâng fat-sṳ, oi chûn-sú liá-yok; yèn-heu kì-têu fôn-hí chhin-sê, phùn la̍p-pá, yòng-kok.

¹⁵ Yù-thai só-yû ke ngìn-mìn chhiòn-phu tông fôn-hí; yîn-vi kì-têu chhiòn-sîm li̍p-yok, chhiòn-yi chhìm-khiù Song-chú, Kì chhiu pûn kì-têu chhìm-tó, só-yî Song-chú su kì-têu koet-nui thai-phìn.

¹⁶ Â-sat-vòng fi-thet kiâ-phò Mâ-kâ thai-heu ke miàng-fun, yîn-vi kì vi Â-sa-lâ ńg-sṳ̀n chho sià-yìm ke chhû-siong. Â-sat chiông ńg-sṳ̀n siong chám-thôn, tá-sui, chhai Khi̍p-lùn hâi-sùn sêu-thet.

¹⁷ Sûi-yèn Â-sat mò chiông Yî-set-lie̍t só-yû sân-kông táng ke sṳ̀n-meu fi-thet, chúng-he kì yit-sên-ngìn yit-sîm yit-yi tui Song-chú chûng-sîm.

¹⁸ Kì chiông kiâ-pâ lâu chhṳ-kâ fung-hien pûn Song-ti ke tûng-sî, chhiu-he kîm-ngiùn lâu yung-phín, chhiòn-phu piong chhai sṳn-thien tú.

¹⁹ Yit-chhṳ̍t to Â-sat chhai-vi ke thi sâm-sṳ̍p ńg-ngièn, liá-chham khì-kiên chhiòn-phu mò chan-chên.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan