Bìoball air-loidhne

Li̍t-thoi-chṳ Ha 13 - HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-su

Â-pí-ngâ lâu Yâ-lò-pô-ôn Chan-chên
( Lie̍t-vòng Ki-song 15:1-8 )

¹ Yî-set-lie̍t-vòng Yâ-lò-pô-ôn chhai-vi ke thi sṳ̍p-pat ngièn, Â-pí-ngâ cho Yù-thai-vòng.

² Kì chhai Yâ-lu-sat-lâng thúng-chhṳ sâm-ngièn. Kiâ-mê ôn-to Mâ-kâ, he Kî-pí-â-ngìn Vû-lie̍t ke moi-é. Â-pí-ngâ lâu Yâ-lò-pô-ôn chan-chên;

³ Â-pí-ngâ tai-liâng si-sṳ̍p van kiûn-chhui lâu Yâ-lò-pô-ôn ke pat-sṳ̍p van thai-kiûn siông-chhṳ̀.

⁴ Lióng-kiûn chhai Yî-fap-lièn sân-khî pài-chhṳn. Â-pí-ngâ-vòng sông Sé-mâ-mien-sân hiong Yâ-lò-pô-ôn lâu Yî-set-lie̍t-ngìn hêm-kóng: “Ngì-têu thâng ngài kóng!

⁵ Kám-kóng ngì-têu m̀-tî Song-chú — Yî-set-lie̍t ke Song-ti sṳt lâu Thai-ví li̍p m̀-voi fi-thet ke yok he-mò? Song-chú chiông Yî-set-lie̍t ke vòng-vi yún-yén su-pûn Thai-ví lâu kì ke heu-thoi.

⁶ Nì-pat ke lai-é Yâ-lò-pô-ôn phoi-ngia̍k kì ke vòng — Thai-ví ke lai-é Só-lò-mùn,

⁷ heu-lòi, kì seu-si̍p yit-khiùn mò ha-lo̍k ke lù-màn, ngang-ngang lòi khî-fu Só-lò-mùn ke lai-é Lò-pô-ôn; ke-sṳ̀ Lò-pô-ôn hàn heu-sâng, mò kîn-ngiam hó tí-tóng kì-têu.

⁸ Liá-ha ngì-têu sióng-oi fán-khong Song-chú su-pûn Thai-ví heu-thoi ke vòng-khièn; ngì-têu yû khiòng-thai ke kiûn-chhui, yu yung Yâ-lò-pô-ôn chu-chho ke kîm-ngiù cho ngì-têu ke sṳ̀n.

⁹ Ngì-têu chiông Song-chú ke chi-sṳ̂ Â-lùn ke heu-thoi kiuk-chéu, ya chiông Li-vi-ngìn kiuk-chéu; ngì-têu cheu khì-thâ koet-kâ ke fông-fap chṳ́-phai chi-sṳ̂ thoi kì-têu. Na yû-ngìn khiên-lòi yit-chak ngiù-kú ya-he chhit-chak mièn-yòng, ngì-têu chhiu fûng-li̍p kì cho chi-sṳ̂, fu̍k-sṳ hî-ká ke sṳ̀n-mìn.

¹⁰ “Chúng-he, ngài-têu hàn-he sṳ-fung Song-chú — ngài-têu ke Song-ti, mò lì-khôi Kì. Â-lùn ke heu-thoi yìn-yèn chṳp-hàng chi-sṳ̂ ke chṳt-vu; Li-vi-ngìn hia̍p-chhu kì-têu.

¹¹ Kì-têu tak-ngit chó-am hiong Song-chú sêu-hiông, hien sêu-fa-chi, yu chhai sùn-kîm ke chok-táng hien kiûng-piáng; tak am-pû ya tiám-chho̍k kîm tên-thòi táng ke tên. Ngài-têu cheu Song-chú — ngài-têu Song-ti ke min-lin cho, chúng-he ngì-têu lì-khôi Kì.

¹² Song-ti lâu ngài-têu khiung-ha, he liâng-thô ngài-têu ke; Kì ke chi-sṳ̂ chhai liá-vi, oi phùn la̍p-pá seu-si̍p ngài-têu lâu ngì-têu siông-chhṳ̀. Yî-set-lie̍t-ngìn nâ, m̀-hó lâu Song-chú — ngì-têu chú-siên ke Song-ti siông-chhṳ̀! Ngì-têu he mò fap-thu tá-yàng ke!”

¹³ Liá-sṳ̀, Yâ-lò-pô-ôn phai yit phu-fun kiûn-chhui chhai Yù-thai kiûn-chhui ke heu-poi mài-fu̍k, khì-thâ ke chhiu tui thèu-chhièn kûng-tá.

¹⁴ Yù-thai-ngìn vat-thèu khon, khon-tó chhṳ-kâ su pâu-vì, chhiu khiù-ham Song-chú; ke-têu chi-sṳ̂ phùn la̍p-pá.

¹⁵ Yù-thai-ngìn thai-sâng sê; Â-pí-ngâ chhiu tai-liâng kì-têu kûng-kit. Song-ti tá-yàng Yâ-lò-pô-ôn lâu Yî-set-lie̍t kiûn-chhui.

¹⁶ Yî-set-lie̍t-ngìn chhai Yù-thai-ngìn mien-chhièn thò-chéu; Song-ti sṳ́ Yù-thai-ngìn yàng-ko kì-têu.

¹⁷ Â-pí-ngâ lâu kì ke kiûn-chhui thai-thai tá-yàng Yî-set-lie̍t-ngìn, sêu-me̍t Yî-set-lie̍t ke chîn-pîn ńg-sṳ̍p van.

¹⁸ Ke-sṳ̀, Yù-thai-ngìn tá-yàng lé, yîn-vi kì-têu vá-kho Song-chú — kì-têu chú-siên ke Song-ti.

¹⁹ Â-pí-ngâ kiuk Yâ-lò-pô-ôn ke kiûn-chhui, cham-liâng kì ke kí-chho sàng, chhiu-he Pak-thi̍t-li, Yâ-sâ-nâ, Yî-fut-lùn, lâu liá-têu sàng fu-khiun ke chhûn-chông.

²⁰ Â-pí-ngâ chhai-vi khì-kiên, Yâ-lò-pô-ôn yit-chhṳ̍t mò-chai chóng-khièn. Heu-lòi Song-chú kit-tá kì, kì chhiu sí-thet.

²¹ Â-pí-ngâ chhiam-chhiam khiòng-sṳn; kì yû sṳ̍p-si ke pû-ngiòng, ngi-sṳ̍p ngi-ke lai-é, sṳ̍p-liuk ke moi-é.

²² Yû-koân Â-pí-ngâ khì-thâ ke sṳ lâu ngièn-hàng chhiòn-phu ki chhai Siên-tî Yi̍t-tô Sṳ́ tî-poi.

« Roimhe

Air adhart »

Bible Society in Taiwan

Lean sinn:

Ceanglaichean taic

Sanasan